Pe ua Galo Au i le Atua?
Edwin F. Smith
Iuta, ISA
Ata na tusia e Allen Garns
Na ou sailia i mea uma lava. Na faalua ona ou tietie mai le ofisa i le fale inisinia e saili ni vaega taua na manaomia e faauma ai se siligi na matou auina atu i le nofoaga o le militeri. Na fuafuaina e auina atu i le vaa i le lua aso—i le taimi tonu lava e ausia ai le tapulaa o le feagaiga. O le a feagai lau kamupani ma ni faasalaga ogaoga pe afai matou te le ausia la matou tautinoga.
Na ou ulufale atu i le potu teuoloa ma toe vaai tasi lava mo na vaega o loo misi. Na ou siakiina pusa taitasi ma toe faamaonia ai o na vaega na okaina moni lava. Ua tuai tele le toe oka o na vaega ae ausia pea le taimi faatapulaa. Sa ou lagonaina le lotovaivai. Na ou agai atu i le fale, ao taumafai pea e mafaufau pe faapefea ona foia le faafitauli.
Na ou faia se tatalo faavave ma e leai se loto i ai ae lei moe ma taumafai ia maua sina moe. Na ou toe laasia i lou mafaufau laa uma lava na ou faia i lena aso, ma le faamoemoe o le a ou manatua se mea na misi ia te au. Sa ou feminoia’i ma feliuliua’i seia ta le 3:00 i le taeao.
Na iu lava ina ou nofo i luga. Na ou vaai atu i lalo i le aluga na ou tuuina i le fola e faamanatu mai ai ia te au lava ia e tatalo. Ou te le’i lagonaina se fia tatalo. Na ou tatalo i le aso atoa ae leai se mea na ou fai atu ai na faia se eseesega. Pe ua Galo Au i le Atua?
I le leai o se isi mea e alu i ai, na ou sesee ifo i ou tulivae ma amata ona tatalo. Sa ou fesili atu i le Tama Faalelagi pe o Ia silafia lou tulaga. “Tama Faalelagi,” na ou ole atu ai, “ua E silafia le mea o loo i ai na vaega o loo misi. Pe mafai ea ona E faasino mai foi ia te au—i le aso?”
Mulimuli ane i lena taeao, na ou savali atu i lo‘u ofisa. Sa ou tuu lau atopau i luga o lau kesi ma lagonaina e tatau ona ou siakiina le potuoloa mo le taimi mulimuli. Na ou ulufale atu i le potuoloa ma vaai atu i pusa na ou siakiina ma toe siakiina i le aso ua tuanai. Sa tosina la’u vaai i se pusa lapoa. Sa i ai se mea na foliga le sao.
O se vaaiga faalatalata na iloa ai e le tasi le pusa ae o pusa e lua ua tuufaatasi. Sa ou sii ese le pusa i luga mai le pusa i lalo. I le pusa pito i lalo, na ou maua ai na vaega! Na ou faia se tatalo o le faafetai ma toe foi atu i lou ofisa e faailoa atu i inisinia ua maua na vaega na misi.
Na faafuasei lava, ona ou iloaina e le gata na ou mauaina na vaega, ae na ou iloaina foi e silafia e le Tama Faalelagi le mea o loo ou i ai ma e taua au ia te Ia. E lei galo au i le Atua, ma o le a le galo lava ia te Ia.