Autalavou
Saunia e Faalogo i le Siufofoga o le Atua
Ua tau mai e Peresitene Uchtdorf o le mea muamua lava na faia e le Atua ina ua uma ona foafoaina le tane ma le fafine o le talanoa atu lea ia i laua ma tuuina atu ia i laua ni faamatalaga taua ma ni faatonuga. Tatou te mauaina lena lava faamanuiaga ia Aperila ma Oketopa i le taimi o le konafesi aoao, pe a lauga mai taitai o le Ekalesia ia i tatou ma tuuina mai ia i tatou fautuaga na e finagalo le Alii ia tatou faalogo i ai.
Pe na e faalogoina muamua le siufofoga o le Atua e ala mai i Ana auauna i le taimi o le konafesi aoao? Pe na i ai ea se taimi na e lagonaina ai e pei o se tasi o savali faapitoa na tuuina mai ai ia te oe se tali na e sailia? I se api o talaaga, e mafai ona e tusia i lalo lena aafiaga ma le ala na fesoasoani ai ia te oe. Ona saunia lea e faalogo i le siufofoga o le Alii i lenei konafesi o loo lumanai e ala i le tusia i lalo o tali na e maua ma suesue i ai i le taimi o au suesuega o tusitusiga paia. Tatalo i le Tama Faalelagi, ma ole atu ia maua ni tali ma manatu i le taimi o le konafesi. Ao e faalogo i auauna a le Alii, taulai atu i uunaiga patino. O a ni mea na e aoaoina? Na faapefea ona e lagona le musuia ina ia suia? Tusi i lalo na uunaiga aua o le Agaga lena o le Alii ua fetalai mai ia te oe!
Ia manatua i taimi uma e alofa le Tama Faalelagi ia te oe ma o le a taitaia oe i le ala sao. Ao e tauivi e faalogo i Lona siufofoga e ala mai i Ana auauna, o le a faamanuiaina ma siitiaina oe.