O Le Ki i le Faamagaloina o Au Lava Ia
E alala le tusitala i Iuta, ISA.
Sa le manaomia ona ou faasalaina pea au lava ia aua ua uma ona togiola Iesu Keriso mo au agasala.
Ata mai le Getty Images
Ua lima masina, ma e le o mafai pea ona ou faamagaloina au lava ia. Soo se taimi lava e sasi ai pe faia se mea e maasiasi ai, ou te lagonaina e pei ua ou taavilivili i lalo. Na faateleina lou maasiasi i soo se taimi ou te faia ai se isi mea ou te manatu e sese. Na le mafai ona ou lagonaina le filemu.
Na ou tatalo mo le faamagaloga ma na oo lava ina lagonaina faapea ua faamagaloina au e le Atua. Ae ou te le mafai lava ona faamagaloina au lava ia. E faapefea ona ou faia pe afai na ou agasala? Na ou faaauau pea lava pea ona faasalaina au lava ia, ma taofia ai au lava mai le agai atu i luma.
Ao ou lagona faapea, na ou alu atu i se konafesi o le taumafanafana a le autalavou lea na taulai tele atu ai a matou suesuega i le Togiola a le Faaola. I se tasi aso na ou tau ai i se fuaitau i le Tusi a Enosa na faapea mai: “Enosa e, ua faamagaloina au agasala, ma o le a faamanuiaina oe.
“Ma o aʼu, o Enosa, sa ou iloa e le mafai ona pepelo le Atua; o le mea lea, sa tafi ese ai loʼu lagona o aʼu sese” (Enosa 1:5–6).
Na mamana tele lena mea mo au. Na ou iloaina e faapea, e pei o au, na faia e Enosa se mea sese ma na manaomia le faamagaloga. Na ia faamatalaina foi lana tauiviga e sailia le faamagaloga o se fagatuaga i luma o le Atua (tagai Enosa 1:2). Ae na iu lava, i le mavae ai o le tatalo i le ao ma le po, na lagonaina e Enosa le filemu. Ina ua ia fesili atu, “ua faapefea ea ona faia lenei mea?” na tali mai le Alii, “Ona o lou faatuatua ia Keriso” (Enosa 1:7, 8).
O lena la! Na i ai le faatuatua o Enosa ia Iesu Keriso. Afai na mafai e Enosa ona tuu atu i le Faaola e tafi ese lona lagona nofosala, aisea ou te le tuuina atu ai ia te Ia e aumaia lena lava filemu i totonu o lou olaga? Mai i lena lava taimi, soo se taimi lava ou te lagona ai ou te le mafai ona faamagaloina au lava ia, ou te mafaufau i le alofa ma le faamagaloga a Iesu Keriso. Na ou tatalo mo le malosi e tuuese atu ai ou lagona leaga ma taofia le lagonaina o le maasiasi tele. Na alu ai sina taimi, ae i le mavae ai o ni tatalo se tele, na taofia lou lagonaina o le leaga tele i taimi uma lava. Sa iu loa ina ou lagonaina le toafilemu.
O lenei aafiaga na aoaoina ai au i le tele o mea e uiga i le alofa tunoa o Keriso. Ina ua ou agasala, na ou lagonaina le faanoanoa faaleatua, tatalo, salamo, ma lagonaina le faamaoniga faapea ua faamagaloina au e le Atua. Ae peitai na ou faaauau pea ona faasalaina au lava ia. Na iu lava ina ou iloaina sa ou le manaomia ona faaauau pea ona mafatia au lava ia mo le solia o lena agasala aua ua uma ona totogiina e Iesu Keriso e ala i Lana Togiola. Atonu na faigata ma tiga mo Ia, ae na Ia naunau pea e puapuagatia ina ia ou le puapuagatia.
Ata o Keriso, saunia e Heinrich Hofmann
Na ou aoao talu mai lena taimi e faalagolago ia Iesu Keriso ma tuu atu i Lona filemu e faatumuina lou olaga e ala i le faamalosia o lau sootaga ma Ia ma lou Tama Faalelagi. Ou te taumafai e tatalo ma faitau tusitusiga paia, ae maise lava le Tusi a Mamona, i aso uma. Ou te taumafai e auai i gaoioiga e siitia ai ma agafesootai lelei.
O loo ou faia pea ni measese, ae ou te iloaina afai ou te salamo ma faaauau pea ona faia le mea sili, o le a faamanuia au e Iesu Keriso i Lona alofa tunoa. Pe a ou faalagolago atu ia te Ia ma i le Tama Faalelagi, e taofia le lagona nofosala ma le maasiasi. Ua ou iloa nei le filemu lena e oo mai le mauaina o le faatuatua ia Iesu Keriso, ma ua sili atu ai lou malosi.