Ua Uunaia le Au Paia e “Aoao Atu e pei ona Aoao Mai le Faaola”

Sa malaga mai taitai o le Ekalesia mai le isi itu o le lalolagi e tuuina atu i le Au Paia ni fautuaga atamai.

O Douglas D. Holmes, o le fesoasoani muamua i le Au Peresitene Aoao o Alii Talavou ma Brother Tad R. Callister, o le Peresitene Aoao o le Aoga Sa, na asia Samoa ia Novema talu ai.

O Brother Callister sa malaga faatasi mai ma lona faletua, o Sister Kathryn Louise Callister. O Brother Holmes sa malaga mai ma lona faletua, o Sister Erin Sue Holmes.

I se fonotaga i Apia, sa saunoa ai Brother Callister, “O le tatou sini e tatau ai o ni faiaoga o le talalelei a Iesu Keriso o le aoao atu lea o Ana mataupu faavae ma aoaoga faavae e pei ona sa Ia aoaoina atu.”

O le fautuaga e faapea o sauniuniga faamaoni ma le agaga tatalo, e tatau ona faia a o lei taitai aoao atu, sa ofoina atu e Brother Callister ia i latou o loo aoao atu nisi ki faaopoopo mo sauniuniga. Sa Ia faamalosiau atu i faiaoga e tatau ona faitau muamua mau o loo faatatau i le autu ona fuafua lea ma le agaga tatalo le lesona. “Tusi i lalo ma faaaoga ia uunaiga faaleagaga e te mauaina a o e tapena,” sa ia saunoa ai.

Sa uunaia e Brother Callister ia faiaoga ia valaaulia le Agaga Paia e fesoasoani ia i latou i le aoaoina o aoaoga faavae o le talalelei a Iesu Keriso ma faaaofia tagata uma o le vasega i le talanoaga o le lesona.

I le ta’ua ai o le Perofeta o Iosefa Samita o se faataitaiga, sa valaaulia ai e Brother Callister ia faiaoga e fesili atu i le Alii i fesili ma saili tali mai ia te Ia a o latou saunia. “O le tele o faaaliga na maua e le Perofeta o Iosefa Samita o se taunuuga o lona fesili atu i le Alii.”

Sa saunoa Brother Holmes i ni auala e fesoasoani ai i le autalavou, aemaise lava alii talavou, e ati ae ai le faatuatua i le Atua ma Iesu Keriso.

O isi taitai o le Ekalesia sa auai i lea fonotaga sa aofia ai Elder Meliula M. Fata, o le Fitugafulu Eria, ma lona faletua, Tuafafine Ponaivao L. Fata.

Sa faamalamalama e Brother Holmes, o le Fesoasoani Muamua i le au peresitene aoao o Alii Talavou, e faapea o le faamoemoega o le polokalama a le Ekalesia mo Alii Talavou o le fesoasoani lea i matua i le sauniaina o o latou alii talavou mo o latou olaga i le lumanai, e aofia ai le auauna atu i le Ekalesia ma i le avea ai o ni tama i totonu o aiga.

Sa ia fautuaina ni mea se tolu e mafai e taitai o le Ekalesia ona faia e fesoasoani ai i le sauniaina o alii talavou o i ai i le latou vaaiga. Sa ia saunoa e manaomia ona faatasi taitai ma o latou alii talavou, ma ta’u atu ia i latou e faapea: “I le avea ai ma taitai o alii talavou, e le o i tatou o ni pule o polokalama ae ao ona alolofa ia i latou.”

Lua, sa fautuaina e Brother Holmes e manaomia ona fesoasoani taitai e faafesootai alii talavou ma le lagi, ma uunaia i latou e suesue i tusitusiga paia, tatalo soo, ma faalagolago i le Alii.

Ma le mea mulimuli, sa ia saunoa e tatau ona tuuina atu ni avanoa i alii talavou e taitai ai. I lana saunoaga, sa ia aumaia ai se upusii mai ia Peresitene Gordon B. Hinckley (1910–2008) e faapea: “O le aoao atu ma le mataalia o le ute lea o le taitaiga i le Ekalesia.” Sa apoapoai mai Brother Callister e faapea e le tatau i taitai o alii talavou ona faatalitali mo isi e aoao o latou alii talavou i le auala e aoao atu ai. E tatau ona latou aoao atu i ai na tomai i le taimi nei.