Mulimuli i le Perofeta

Ona oo lea i se tasi aso na malie ai lou tama e o mai faifeautalai e aoao se tamaitai i lo matou fale. Na la o mai i le lata i le 5:00 i le afiafi ma amata ona aoao o ia—ma na la iloaina sa ou i ai i le isi potu o loo faia se saunisi ae lei alu e vaai au uo. Na la aoao atu e uiga i le perofeta tama—o Iosefa Samita—ma le Uluai Faaaliga. Ma sa ou faalogologo atu, mai i le isi potu.

Ina ua iu lava ona ou tuua le fale, na amata ona galue le Agaga i lou loto ma na oo mai ni fesili i lou mafaufau: “Aisea e te le faia ai le mea na aoao ai e tamaitai faifeautalai lenei tamaitai? Aisea e te le suesue ai le talafaasolopito o Iosefa Samita ma fesili atu i le Alii pe o ia o se perofeta?” Ma sa ou faapea ifo ia te a’u lava, “O loo ou fiafia. O loo ou faia mea lelei. Ou te le manaomia lena mea.” Ae na amata ona ma tauivi ma le Agaga, ma na ou filifii loa ou te le vaai i au uo i lena po. Sa ou toe foi i le fale.

Na ou fesili i lou tina, “O fea ou te mafai ona faitau ai i le talafaasolopito o Iosefa Samita?” Na ia tuuina mai ia te au ana tusitusiga paia ma faaali mai ia te au le Iosefa Samita—Talafaasolopito, ma na ou faitau ma tatalo. Na ou faitau i le parakalafa muamua, mafaufau loloto, ma fesili i le Tama Faalelagi pe moni mea o loo i ai iina. Na ou faia lenei mea i parakalafa uma lava seia oo ina ou faaumaina le mea atoa. Na naunau lou loto mo se tali. Na ou faitau ma tatalo i le po atoa lava, seia ta le 9:20 o le taeao na sosoo ai.

Na faaali mai e le Alii ia te au faapea o Iosefa Samita sa avea o se perofeta. Sa ou mauaina se aafiaga e matuai paia lava. Ao faaiuina lau tatalo, na ou folafola atu o le a ou sueina faifeautalai ma papatisoina aua ua ia te au lenei malamalama mautinoa lava.

Na ou tau atu i tamaitai faifeautalai, “Ou te manaomia ona papatiso nei lava.” Na la faamatala mai lesona na ou manaomia ona faia ma tautinoga na ou manaomia ona faia. Ae na ou fai atu, “Ou te le manao e faamaimau se aso se tasi i le malamalama ua tuuina mai e le Alii ia te au faapea o Iosefa Samita o se perofeta.”

Na valaau atu tamaitai faifeautalai i le la taitai sone. Na ia malie mai i se faasologa faanatinati o lesona. Na ia faatulagaina le faatalanoaga o le papatisoga ma tau mai ia te au na ia manaomia foi ona talanoa i le taitai misiona a le uarota, ma na ou fai atu, Aua le popole, o le a ou talanoa i le taitai misiona. O ia o lou tama. Sa ia tatalo mo ni tausaga mo au ina ia papatiso.

O lou papatisoga o se aafiaga o le a ou manatuaina i le faavavau. Oka se lagona matagofie ma le ofoofogia. Na ou lagonaina o au o se tagata fou. Sa ou mama. Na ou lagona le matuai latalata atu i le Atua, ma sa ou matuai fiafia lava.

Ona sa i ai sau molimau maumaututu e uiga i le mea na tupu i le Vao Paia i le 1820, na ou toaga lava i taimi uma i le talalelei ma le Ekalesia. Na amata ona ou auauna atu, faataunuu valaauga, ma tuuina atu mea uma na ia te au i le Ekalesia.

E lua vaiaso talu ona uma lou papatisoga, ae valaau au e lou peresitene o le siteki o se taitai i le autalavou nofofua matutua i lau siteki (e ui lava na ou fesili atu ia te ia po o le a le siteki). I le isi lua vaiaso, sa ou faatulagaina ai se konafesi faarisone a le au nofofua. O le konafesi sili lea a le au nofofua i le talafaasolopito o le Ekalesia, aua na ou feiloai ai i lou toalua iina.

Na ma faaipoipo i le tasi le tausaga mulimuli ane. Ua ma faaipoipo nei ma le fiafia mo le 38 o tausaga. Ua i ai se ma fanau e toafa ma le 10 fanau a fanau, ma o faamanuiaga uma lava ua ma maua ona o se filifiliga na ma faia. Ae ma te lei faaipoipo, na ou fesili atu ia te ia, “Pe o le a e lagolagoina au i le 100 pasene atoatoa lava o le usiusitai i perofeta soifua?” Sa fai mai o ia “Ioe.”

Ina ua uma ona ou papatiso, o le lauga muamua lava na ou faalogo i ai mai le perofeta, o Peresitene Spencer W. Kimball (1895–1985), sa faatatau i le ola tutoatasi ma ia poto i au tupe. Na ia faapea mai foi ia saunia se aoaoga lelei mo lau fanau.¹ O nei mea e lua na aoaoina i lo matou aiga ma ua avea ma ni faamanuiaga maoae. Ua lelei tulaga o lau fanau i le aso—e le faapea ona ua ou poto tele; na ou filfili e mulimuli i perofeta.

Ou te fiafia e auauna i le Alii ma ou uso a tagata aua o mea na sa ou aoaoina mai perofeta.

Ata

young woman reading scriptures

Mulimuli i Perofeta. Faalogo ia latou upu ma faataitai mea latou te aoao mai, ma o le a e fiafia. O lou faatuatua ma le malamalama e uiga i le Ekalesia ma le talalelei na oo mai i lau molimau faapea o Iosefa Samita o se perofeta.

Ou te alofa i le Tama Faalelagi ma Iesu Keriso. O lou manao ia faatasi ma i Laua e faavavau. O le mafuaaga lena e taua ai le faalogo i perofeta—latou te silafia le ala e toe foi ai i le afioaga o le Atua.

Ou te manatu e tatau i tagata talavou uma lava ona faitau i le talafaasolopito o Iosefa Samita ma le manatu atoa, ma le loto matala ma le mafaufau manino, ma ole atu i le Tama Faalelagi. Ma ou te mautinoa o le a tuuina mai e le Alii le tali, e pei ona Ia tuuina mai ia te au. Afai e te faitauina le vaega o loo ia tatou tusitusiga paia, e mafai ona e maua se molimau malosi. Ona mafai lea ona e faitauina foi isi vaega.²

Na vaai Iosefa Samita i le malamalama, na ia vaai i le Atua le Tama ma Iesu Keriso, ma na La talanoa mai ia te ia. O lenei malamalama paia lena e oo mai le Atua, e ala mai i le Agaga.

A uma ona e mauaina lenei faamaoniga i lou loto, faatu loa se sini ia iloa upu a perofeta soifua. Suesue a latou upu i tusitusiga paia, konafesi aoao, Mo le Malosi o le Au Talavou, Mekasini a le Ekalesia, ma le LDS.org. Aoao ia latou fautuaga i seminare, Aoga Sa, ma korama po o vasega. Fai ni sini e faalagolago i mea e faamuamua ua aoao mai e perofeta. Ona fai loa lea.

O le a e latalata atili atu i le Alii. O le a e lagonaina lou malamalama ua faateleina mo le aoga ma mea uma lava. Ma manatua e le tuulafoaiina lava oe. O loo ia te oe ni tagata e lagolagosua o loo siomia oe ua saunia e fesoasoani, e aofia ai lou epikopo po o le peresitene o le paranesi. Ma o le a faatasi ia te oe le Alii ma Lona Agaga.