Seia Tatou Toe Feiloai
O Le a Ia Faamamaina a Tatou Avega
Saunia e Elder Robert D. Hales(1932–2017)
O Le Korama a Aposetolo e Toasefululua
Mai le “Special Witnesses of Christ,” Ensign, Apr 2001, 20–21. Ina ia maimoa ia Elder Hales o tuuina mai lenei savali, “Jesus Christ Is the Perfect Example of Obedience,” asiasi i le prophets.lds.org ma filifili le “Special Witnesses of Christ.”
O le mana laveai o le Faaola o le a liua le olaga o le tagata pe afai o le a tatou faatagaina.
Ata mai le Getty Images
O loo ia te au se fiafia tele mo tusitusiga paia. Ou te fiafia e faitau i le soifuaga i le lalolagi o Iesu Keriso. E tele naua mea i Lona soifuaga lena e mafai ona siitia ma uunaia, ma faamalosia i tatou i o tatou taimi o le faigata. Ia te au, o se tasi o mataupu e sili ona paia i tusitusiga paia uma lava o le Ioane mataupu e 17. O le mataupu atoa lava o se tatalo faapuluvaga na tuuina atu e Iesu Keriso i Lona Tama. Na Ia faapea atu, o se taunuuga, “e lei iloa oe e le lalolagi ao au ua ou iloa oe.” Ua Ia tau atu i Lona Tama ua Ia faia mea uma na tuuina mai ia te Ia e fai.
O nisi taimi tatou te faagaloina ai le ofoofogia tele o le usiusitai o le Faaola na i ai. O mea uma na Ia faia, o mea uma na Ia fai atu ai na faia i le usiusitai i Lona Tama. O Lona sailia ma popole mo e matitiva, le valaaulia o Ona soo, Ana aoaoga i le laueleele o Palesitina faapea foi i le atu Amerika—o nei mea uma na faia ona sa poloaiina o Ia e Lona Tama e fai. Na leai Sana lisi patino o mea e fai. Na Ia fetalai mai, “Ou te le faia fua foi se mea; ae peitai, faapei ona a’oa’o mai e lou Tamā ia te au” (Ioane 8:28). Oka se faataitaiga sili o le usiusitai!
I filifiliga tatou te faia i le olaga, e tatau ona tatou faamasani lea i le Faaola. O Lana fautuaga faigofie lava “Sau … mulimuli mai ia te au” (Mataio 19:21) o le a mafai ona liua le olaga o le tagata pe afai o le a tatou faatagaina. O loo ia te Ia le mana e faamama ai a tatou avega pe afai o le a tatou liliu atu ia te Ia.
I le avea ai ma se Aposetolo a le Alii o Iesu Keriso, o loo ia te au le avanoa e tuuina atu ai la’u molimau i le Faaola. O lou manao silisili e faapea ia mafai e lau molimau ona ootia ai loto o i latou e faalogo i ai.
Ou te iloa o loo soifua Iesu Keriso. Ou te iloa Na te taitaia ma faatonuina Lana Ekalesia e ala i faaaliga e ala mai i Lana perofeta i lenei lava aso ma le taimi. Afai o le a i ai lo tatou faatuatua i lo tatou Faaola, o le a Ia fesoasoani ia i tatou i o tatou faigata ma puapuaga, ma o le a mafai ona tatou tumau e oo i le iuga ma toe foi atu i Lona afioaga pe a mavae lenei olaga faataitai. O loo soifua o Ia ma Na te silafia ma alofa ia i tatou taitoatasi. E matuai finagalo lava o Ia e faamanuia i tatou pe afai tatou te o mai ia te Ia.