Savali a le Au Peresitene Sili
O Le Afioga a le Atua i Lana Fanau
Saunia e Peresitene Dieter F. Uchtdorf
Fesoasoani Lua i le Au Peresitene Sili
Ua tau mai e tusitusiga paia ia i tatou o le mea muamua lava na faia e le Atua ina ua uma ona foafoaina le tane ma le fafine o le talanoa atu lea ia i laua.1 Na i ai ia te Ia ni faamatalaga taua ma ni faatonuga faapelepele e tuuina atu ia te i laua. O Lona faamoemoe e le o le faamamafa atu pe faapopoleina i laua ae ia taitaia i laua i le fiafia ma le mamalu e faavavau.
Ma ua na o le amataga lena. Mai i lena aso seia oo mai i lenei aso, o loo faaauau pea e le Atua ona fesootai ma Ana fanau. Na faasaoina Ana afioga, faapelepeleina, ma suesueina e soo i augatupulaga uma lava. E faatauaina i latou e i latou o e saili ia iloa le finagalo o le Atua, ma latou te tuuina atu le molimau o le meamoni faapea “e le faia lava se mea e le Alii o Ieova, ae faaalia lona finagalo i ana auauna o perofeta.”2
O le mamanu lava lenei talu mai le amataga o taimi, ma o loo faaauau pea le mamanu i le aso. E le na o se tala manaia i le Tusi Paia; o le auala faatulagaina a le Atua e tuuina atu ai savali taua i Lana fanau. Na te faatuina ni tagata mai i lo tatou lotolotoi, valaaulia i latou e avea ma perofeta, ma tuuina mai ia i latou upu e fai atu, lea e valaaulia i tatou e “talia, e pei lava ua mai i [Lona] lava gutu.”3 Na Ia folafola mai, “Pe i lo’u lava leo po o i le leo o a’u auauna, ua tutusa lava.”4
O se tasi lenei o savali e aupito sili ona mamalu, e faamalosiau, ma tumu i le faamoemoe o le Toefuataiga—e le o sao le Atua! E alofa o Ia i Lana fanau. Na te le o tuua i tatou e fesetai i le pogisa.
E faalua i tausaga taitasi, ia Aperila ma Oketopa, tatou te maua ai le avanoa e faalogo ai i le siufofoga o le Alii e ala i Ana auauna i a tatou konafesi aoao ofoofogia.
Ou te tuuina atu ia te outou lau molimau patino e faapea, ae lei taitai ona faia e se failauga i le konafesi aoao lena savali umi agai i le pulelaa, na te faaaluina le tele o le taumafaiga, tatalo ma le suesuega e tali atu ai i le tofiga e lauga. O savali taitasi o konafesi e suitulaga i ni itula e le mafaitaulia o le sauniuniga ma le augani faamaoni ia malamalama po o le a le mea e finagalo le Alii i Lana Au Paia e faalogo i ai.
O le a se mea e ono tupu pe afai e tutusa lelei le sauniuniga a le failauga ma lo tatou manaoga? Pe o le a se eseesega o la tatou vaai i konafesi aoao pe afai tatou te vaai atu i konafesi o se avanoa e taliaina ai savali mai le Alii lava Ia? E ala mai i upu ma musika o konafesi aoao, e mafai ai ona tatou faamoemoe e taliaina tali patino i soo se fesili po o faafitauli atonu o loo tatou faafeagai.
Afai na e mafaufau i se taimi pe o le a fetalai moni mai lava le Tama Faalelagi ia te oe, o le a ou faamanatu atu ia te oe upu faigofie lava ae loloto e usuina e a tatou fanau o le Peraimeri: “O le Atua [lou] Tama, Ia aumai o [oe].” O Lona faamoemoe ia fesoasoani ia te oe ia toe foi atu ma “toe mafuta ai.”
Afai e te vaai i le Tama Faalelagi o Sona atalii [afafine], e mafai ona e ole atu ia te Ia ma se loto faamaoni, “Taitai au, faasino mai, le ala e ui ai. Aoao mai mea e ao na ou fai.” O le a Ia fetalai atu ia te oe e ala mai i Lona Agaga Paia, ona tuu atu lea ia te oe “o ana upu ia ou fai.” Ou te folafola atu afai e te faia lenei mea, “o i ai o manuia.”5
Ua manaomia i le aso le taitaiga a le Alii e pei lava ona i ai talu mai le talafaasolopito o le lalolagi. Ao tatou saunia e faalogo i le afioga a le Alii, tau ina ia tatou sailia ma le filiga le Agaga o le upumoni ina ia mafai ona tatou malamalama, pe a fetalai mai le Alii e ala mai Ana auauna, ma olioli ai faatasi.6
Ou te molimau “o le faia o nei mea o le a lē manumalo ai faitotoa o seoli ia te i [tatou]; ioe, ma o le a faamataa ese ai e le Alii le Atua mana o le pouliuli mai i o [tatou] luma, ma faia ia luluina le lagi mo lo [tatou] lelei, ma le mamalu o lona suafa.”7