Mataupu Faavae a Faiaoga Asiasi
Tatalo mo Uso Taitoatasi i o Latou Igoa
O le a faatupulaia lo tatou alolofa ma uunaiga e faatatau mo i latou tatou te faiaoga asiasi i ai pe a tatou tatalo ma le loto maualalo mo uso taitoatasi i o latou igoa.
Sa faasoa mai e se tasi uso e faapea i se vaitaimi faigata o lona olaga, e masani ona oo mai ai se telefoni poo se feau tesi faigofie mai ana faiaoga asiasi “aemaise lava i ia aso pogisa.” E foliga la te iloa lelei lava pe a ia manaomia se faamalosiauga. Na ia iloa sa la’ua tatalo mo ia, i le taimi o a laua asiasiga ma o laua lava taimi.
Ua faasoa mai e tusitusiga paia le tele o faataitaiga o alii ma tamaitai o e sa tatalo mo isi i o latou igoa. O loo i ai faatasi ma e e le mafaagaloina le tama o Alema le Itiiti. Na fetalai atu se agelu ia Alema le Itiiti, ma tau atu ia te ia o lona tama “sa tatalo ma le faatuatua tele e uiga ia te oe … ; o le mea lea, mo lenei faamoemoe ua ou sau e faatalitonuina oe i le mana ma le pule a le Atua, ina ia talia talosaga a ana auauna, e tusa ma lo latou faatuatua” (Mosaea 27:14).
O le tatalo mo le tasi ma le isi e tatala ai o tatou loto ina ia maua faamanuiaga e finagalo le Alii e tuuina mai ia i tatou. O le faamoemoega o le tatalo, e le ina ia suia ai le finagalo o le Atua, ae ia faamautu ai mo i tatou lava ma isi ia faamanuiaga ua naunau i ai le Atua e to mai, ae e faalagolago i lo tatou ole atu iai.”1
“Mafaufau i lo tatou malosi tuufaatasi, pe afai e tofu uso uma ma se tatalo faamaoni i taeao ma po taitasi po o le, sili atu foi, e tatalo e le aunoa e pei ona poloaiina ai e le Alii,” na saunoa ai Julie B. Beck, o le sa avea ma Peresitene Aoao o le Aualofa.2 O le tatalo mo i latou tatou te faiaoga asiasi i ai e faamalosia ai i tatou taitoatasi ma le avea ai ma tamaitai o le Aupaia o Aso e Gata Ai.
Na saunoa Peresitene Henry B. Eyring, Fesoasoani Muamua i le Au Peresitene Sili: Tatalo mo se auala e iloa ai o latou loto. … O le a manaomia lou iloa o le mea e finagalo le Atua e te faia e fesoasoani ai ia te i latou ma faia mea uma, i le mea sili e te mafaia, e lagonaina ai le alofa o le Atua mo i latou.”3
Faatuatua, Aiga, Toomaga