O La Tatou Avanoa

Ata

—Two teens (boy and girl) talking on phones.

Ata na tusia e Alyssa Petersen

I lau tafaoga faamasani muamua ma Nate, na ou tei i le iloaina e le o ia o se Au Paia o Aso e Gata Ai. Na faaaloalo lava o ia, ae ina ua ou oo atu i le fale, na ou le mautinoa pe o le a ou toe alu i se isi tafaoga faamasani ma ia.

O le vaiaso na sosoo ai, na valaau mai ai Nate e fia iloa pe ou te manao e tafao i le Po o le Tausaga Fou. “Ou te faamalie atu,” o lau tala lea. “O le po lena o se aso Sa, ma e matamata e lou aiga ma au se faasalalauga mai le Au Peresitene Sili.” Na ou lagonaina se sipaka o se uunaiga ma faaopoopo atu, “E talia fiafia oe e matamata faatasi ma i matou pe a e manao ai.” Sa ou tei ina ua ia fai mai ioe.

Na ou lagonaina le malosi tele o le Agaga ao uunaia e le perofeta i tatou ia faatutu ni sini na o le a mafai ai e i tatou ona latalata atili atu ia Keriso. Na faalogo Nate i upu uma lava. Na ou lagonaina le mafanafana ma le filemu, ina ua ia alu i le fale. O le taeao na sosoo ai, na ia valaau mai ai ia te au.

“Na ou manao e faafetai atu ia te oe mo le valaauliaina o au anapo,” na ia fai mai ai. “Na faia se pati a au uo uma lava, ma ou te lei manao e alu aua na ou iloaina o le a i ai ni mea le lelei iina. Ua ou fiafia na e valaaulia au. Sa ou lagonaina le fiafia.”

Ou te lagonaina le Agaga ua tau mai ia te au na ou faia le mea sao. O le faauo na fesoasoani ia Nate e lagona faamanuiaga o le ola amiotonu. Ou te iloa e popole le Atua ia i tatou uma lava ma o le a Ia fesoasoani ia i tatou i taimi uma e filifili le mea sao.

I se tasi tausaga, na matou tietie atu ai ma lou aiga i Tijuana, Mekisiko, e asiasi i nisi o tagata lotu iina ma tuu atu ni sapalai i le fale o le misiona. Ae ui i lea, o le taimi lava na matou kolosia ai le tuaoi i le va o Kalefonia, ISA, ma Mekisiko, na matou leiloloa ai. E leai se tasi o i matou na i ai se telefoni feaveai, o lea na leai se ala e faafesootai ai se tasi mo se fesoasoani.

Mulimuli ane, na fautua mai lou tuafafine e taofi le taavale ae fai se tatalo. Na moeiini uma o matou mata ma punonou o matou ulu ao ia tatalo. Ina ua ia faaiu, na pupula ou mata ma o le mea muamua lava na ou vaaia o se taavale lau pasese ma se faailoga faafaatusa—o le Malumau o San Diego Kalefonia! Na ou ee atu, “O le malumalu!”

Na vave lava ona oso i fafo o le taavale se tasi o ou tuafafine ma tamoe atu i le taavale laupasese, lea na tu i le poloka o taavale. Na ia talanoa puupuu atu ia te ia ona ia toe tamoe mai lea ma fai mai na ia fai mai ia i matou e mulimuli atu ia te ia. Na matou mulimuli ao ia faaofi atu i totonu ma fafo o le poloka o taavale ma agai atu i auala o Tijuana seia matou taunuu i le fale o le misiona.

O lenei aafiaga na faamalosia ai lau molimau faapea o loo soifua le Tama Faalelagi ma o loo ia vaavaaia i tatou. O le tatalo ma le faatuatua o se aiga o le lagona sili lea, ma e faafofoga moni lava le Atua ia tatou tatalo.

Ata

family history chart

Na ou manao moni lava e fesoasoani i la matou talafaasolopito o aiga, ae ua fitu augatupulaga a lou tama i lona laina o le aiga, ma o sauniga uma lava o le malumalu ua uma ona fai. Mo le 11 tausaga na te lei toe mauaina lava ni faamatalaga fou e uiga i lona aiga. Na mou atu lou manao ma le faamoemoe. Na ou fai ifo ia te au lava ma le lotovaivai, “Ua uma ona fai uma lava lou talafaasolopito o aiga. O fea ou te alu i ai e maua ai ni igoa e ave i le malumalu?”

Na ou filifili e vaai i faamatalaga uma lava na i ai i lou tama i lana laina i le FamilySearch ma na tau mai e se leo ia te au e faapea o loo i ai pea le tele o galuega e fai. Sa amata ona ou saili mo ni faamatalaga i le initoneti atoa lava. Na mafai ona ou mauaina le tele o tagata e i ai lou faaiu, ae e lei mafai ona ou mauaina lou sootaga i na tagata uma lava.

Ina ua vaivai lou faamoemoe, na ou filifili loa e anapogi faatasi ma lou tina ina ia faamanuiaina la matou talafaasolopito o aiga. O le aso Sa na sosoo ai ao matou sauni e o i le lotu, na ou faia ai lau sailiiliga masani i le initoneti, ma na faafuasei lava ona ou mauaina se itulau o faamatalaga ou te lei vaai muamua lava i ai. O se vavega lava!

Faatasi ai ma le fesoasoani a faamatalaga fou, na ou aveina atu ai, i le 14 o ou tausaga, se aofaiga o igoa o le aiga e 400 i le malumalu. Sa matuai o’u fiafia lava. O lau vaega e fiafia i ai o le faasoaina atu o na igoa i le autalavou ma vaaia lo latou fiafia i le uuina o ni kata e matuai tele lava i o latou lima.

Ou te molimau atu i lenei galuega taua ma le ofoofogia. Pe a tatou faia le talafaasolopito o aiga, e fesoasoani le Agaga ia i tatou ia faamanuiaina ma pai mai i o tatou loto.