Tāpuekina ʻo Ope Atu ʻi heʻeku Ngaahi Fakaʻānauá

ʻI he taimi ne u kei siʻi ai ʻi he ʻotu motu ʻo Haʻamoá, naʻe talamai ʻe hoku ngaahi kaungāmeʻá ko e kau mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní—ne ʻiloa kia mautolu ʻko e Kau Māmongáʼ—naʻa nau lotu kia Siosefa Sāmita. Ne u tui kia nautolu.

Ne mēmipa ha taha ʻo ʻeku kau faiako ʻi he ako lautohí, Viena Tanuvasa, ʻi he siasi ʻo Siosefa Sāmitá. Naʻá ku nofo ʻaho taha pe ua ʻi he ngaahi taimi ʻe niʻihi mo e fāmili ʻo Sisitā Tanuvasá. Ko e feituʻu ia ne u fanongo ai ki heʻeku fuofua himi mei honau siasí: “Ka faingataʻa ho hala, feinga.”

ʻOku kei hoko pē ia ko e himi ʻoku ou saiʻia taha aí.

Ne toutou fakaafeʻi au ʻe Sisitā Tanuvasa ke maʻulotu fakataha mo ia ʻi hono siasí, ka ne ʻikai ke u faʻa tali ia koeʻuhi ne u fakaʻapaʻapa ki hoku fāmilí, ʻa ia ʻoku nau mēmipa mālohi ʻi ha fakatahaʻanga Kalisitiane kehe ʻi homau koló.

Hili iá, naʻá ku nofo mo ha kāinga mamaʻo ʻi ʻAokalani, Nuʻu Sila. Ne lōloa e fakaʻuli mei homau ʻapi ʻi he tuʻa kolo ʻo ʻOtalá ki homau falelotu fakatahaʻangá, ko ia ai ne ʻikai ke u faʻa ʻalu ki he lotú.

ʻI ha ʻaho ʻe taha, ne ma ō fakataha mo hoku kaungāmeʻá ke ʻave ha fakamoimoi ki ha faifekau. Ne u ʻilo ai ko ha faifekau ia mei he siasi tatau ne kau ki ai ʻa Sisitā Tanuvasá. Ne hū mai ki tuʻa ʻa e hoa ʻo e faifekau ko ʻení ki he kaá. Naʻá ne fakafeʻiloaki mai ia mo ʻomai kiate au ha tatau ʻo e Tohi ʻa Molomoná. Naʻá ne talamai ʻoku totonu ke u lau ia koeʻuhí te ne tokoniʻi au ke ako lahi ange fekauʻaki mo Sīsū Kalaisi. Naʻá ne talamai foki ʻoku totonu ke u lotu pea fehuʻi ki he Tamai Hēvaní pe ʻoku moʻoni ʻa e tohí ni.

Ne ʻikai ke u lau ia.

Ka neongo iá, hili ha uike ʻe ua mei ai, ne tukituki mai ʻa e ongo faifekaú ʻi hoku matapaá pea faifai ne u tukulolo. Naʻá ku ʻilo ʻe ʻikai fakangofua ʻe hoku fāmilí ha ongo faifekau ki homau ʻapí, ko ia ai ne u kole ange pe te u fetaulaki mo kinaua ʻi he taha ʻo ʻena ngaahi falelotú. Naʻá na loto-fiemālie ki ai pea ʻi ha taimi nounou mei ai, fakataha mo e tokoni ha niʻihi ʻo e kau fineʻofa mei hona uōtí, naʻá na akoʻi au ki he ongoongolelei ʻo Sīsū Kalaisí.

Ne fuʻu mālie, ne u loto ke ʻilo lahi ange. Ne u ʻaʻahi ki hona uōtí pea ne fakaafeʻi au ki henau Ngaahi Efiafi Fakafāmili ʻi ʻApí, pea ne u ongoʻi fiefia ʻi he ngaahi meʻa kotoa ne u akó . . . tukukehe pē ha meʻa ʻe taha.

Ne foki ʻeku manatú ki heʻeku ngaahi ʻaho ʻi Haʻamoá, ki he ʻuhinga ne u faʻa fakamataliliʻi ai hoku ngaahi kaungāmeʻa Māmongá. Naʻá ku ʻilo kimuʻa peá u lava ʻo hoko atu mo e ongo faifekaú, kuo pau ke u ako ki he moʻoni fekauʻaki mo Siosefa Sāmitá.

Ne u maʻu ʻa e meʻa naʻá ku fuʻu fie maʻú ʻi he kamataʻanga ʻo e Tohi ʻa Molomoná. ʻI heʻeku lau ʻa e fakamatala ʻo e ʻUluaki Mata Meʻa-Hā-Mai ʻa Siosefa Sāmitá—ʻa ʻene lotu ʻi he vao ʻakaú mo e ʻaʻahi fakaofo mei he Tamai Hēvaní mo Sīsū Kalaisí—naʻá ku ʻilo ʻi hoku lotó ko e meʻa kotoa ne hiki ʻi hení naʻe moʻoni. Naʻe ʻikai lotu ʻa hono siasí kia Siosefa Sāmita, ka naʻe hoko ia ko ha palōfita moʻoni ʻa e ʻOtuá.

Ne u fakapapau ʻi he taimi ko iá naʻá ku fie papitaiso.

Kuo fakamālohia hokohoko ʻeku fakamoʻoni kia Siosefa Sāmitá ʻi he ngaahi taʻu kuo hoko maí.

Ne tuʻo taha hono ʻahiʻahiʻi au ke mavahe mei hoku uōtí koeʻuhi ne ʻikai ke u ongoʻi ʻoku tali au ʻe he kau fefine pau ʻi he Fineʻofá. Ka ʻi heʻeku manatuʻi hono faʻa ʻave maʻu pē ʻe Siosefa Sāmita ʻene ngaahi ʻahiʻahí ki he ʻEikí, naʻá ku muimui ki hene sīpingá mo lotu fakamātoato ki he Tamai Hēvaní fekauʻaki mo ʻeku ngaahi palopalema ʻi he lotú. Ne tāpuekina au ʻaki ha ongo foʻou ʻo e loto-falala mo ha fakapapau ko ʻeku vā fetuʻutaki mo e ʻOtuá te ne tokoniʻi au ke u mavahe hake mei ha ngaahi faʻahinga fakahohaʻa.

Naʻe tokoniʻi au ʻi he ʻilo naʻe tali ʻe Siosefa Sāmita ʻa e fatongia lahi ʻi ha taʻu ne fuʻu kei siʻí ke u tali ai ha ngaahi uiuiʻi ʻi hoku uōtí, neongo ne u ongoʻi taʻe mateuteu. Kapau ne lava ʻe he Tamai Hēvaní ʻo fakamālohia ʻa e talavou ko Siosefá, te ne lava ʻo fakamālohia mo au.

Ne u toki hoko kimuí ni ʻo puke lahi pea ne u kole ha tāpuaki ʻo e lakanga fakataulaʻeikí. Hili ha taimi nounou mei he tāpuakí, ne mau ʻilo hake ne ʻikai toe fie maʻu ia ke fai hoku tafá. Naʻe fakamanatuʻi mai ʻe he aʻusiá ni ne ʻiloʻi maʻu pē ʻe Siosefa Sāmita ʻe maluʻi ia heʻene Tamai Hēvaní.

ʻOku ou fakamālō lahi naʻá ku kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní pea pehē ki he palōfita ko Siosefa Sāmitá. ʻOku fakafou ʻi heʻene tuí mo ʻene ngaahi feilaulau lahí ʻa hono fakafoki mai ʻo e ongoongolelei ʻo Sīsū Kalaisí, ʻo faitāpuekina ai au mo hoku fāmilí ʻo ope atu ʻi he meʻa ne u fakaʻānaua ʻe malavá.