I Tangiria n Noora te Tembora

Tariu ao mwaaneu aika kam tangiraki, I kakaitau ngkai I mena ibuakomi n te moan tetere n te maungatabu ni kabuta aei. Taan taetae, te katangitang, ao te tataro a tia ni uota te Tamnei—ai aron naba te namakin n te ota ao te kantaninga.

Te namakin anne e a tia ni uota rikaaki te ururing nakon te moan bong are I nakonako iai inanon te Tembora i Salt Lake. Bon te kairake ngai. Au karo bon ti ngaiia raou n te bong anne. Inanona, a tei tabeua te tai bwa ana butimwaeaki irouia taan mwakuri n te tembora. I rimoaia, n tii ngai n te tai ae uarereke.

I butimwaeaki iroun te aine ae katuarereke ae mainaina irana ni kunnikaina ae tamaroa ae mainaina ae bwain te tembora. E tararake neiei n taraai, moangare, ao imwiina e taetae n abeebete, “Kaaraki nakon te tembora, Tari Eyring.” I iango tabeua te miniti n taku bwa ngaia te anera ibukina bwa e ata arau. I aki ataia bwa te kaati ae uarereke ae ngaia ae iai arau iaona e a kaman tia n katokaaki iaon au kunikai ae te kooti.

I mwananga irarikina ao I tei. I tararake ao I nora te tiiring ae mainaina are e kaota ottana are kaanga e uki nako karawa. Ao n te tai anne, e roko te iango Irou n taeka aika matata aikai: “I a tia ni mena inanon te tabo ae ota aei mai imwaina.” Ma imwiina n te tai naba ae waekoa e roko n au iango, tiaki n oin bwanaau, taeka aikai: “Tiaki, ko tuai n roko ikai mai imwaina. Ko tabe ni uringa te tai imwain bungiakim. Ko mena n te tabo ae tabu n aekan aio.”

I tinanikun te tembora, iai taeka iaona ae “E Tabu Ba Ana Bwai Iehova.” I ataia ibon irou bwa a koaua taeka akanne. Te tembora bon te tabo ae tabu are kaotioti a roko nakoira n akea totokoana ngkana nanora a uki nako iai ao ti tau ni karekea.

Imwiina n te moan bong anne I a manga namakina naba te Tamnei anne. Te bukamaru n te tembora n raonaki ma tabeua taeka ake a uota te namakin ae abue inanou, ni kamatoa bwa te bwai are e a tia ni kaotaki e bon koaua. Te bwai are I namakinna ibukiu n taai aika a na roko, e koro bukina 40 te ririki imwiina rinanona te wewete ni beku mairoun te Uea.

I rinanon te namakin naba anne ngke I mare n te Tembora i Logan Utah. Beretitenti Spencer W. Kimball e karaoa te kabaebae. Inanona tabeua taeka ake e taekini, e anga te reirei aei, “Hal ao Kathy, maiu bwa ngkana e roko te wewete, e kona ni beebete kitanakin temanna ke te bwai teuana.”

Ngke e taekini taeka akanne, I nooria n ae matata n au iango, n ae karanaki, te maunga ae karabee ao te kawai ae kaineti nako taubukina. Te oo ae mainaina e biri man te maing n iteran te kawai ao e bua imarenan aroka aika uarinan i taubukin te maunga. Te auti ae mainaina e kona n nooraki ribuakon aroka.

Teuana te ririki imwiina, I kina te maunga anne ngke taman buu e uotiira ni waerake n te kawai anne. E bon bwarabwara raoi te bwai are I nooria are e anganai Beretitenti Kimbal n ana reirei inanon te tembora.

Ngke ti roko i taubukin te maunga, ana karo buu e tei irarikin te auti ae mainaina. E tuangiira bwa ngaia ma kainnabana a na kabooa te tabo ao e tangira natina te aine ao ngai bwa tina maeka n te auti n iruwa. A na maeka n rabwatan te auti, tabeua te buuti raroana. Ngaia are, inanon 10 te ririki ti maeka n aia maeka te utu anne, ngai ma kainnabau ti bae n taekinna ni katoa bong, “Ti riai ni kukurei n aio ibukina bwa tina aki tiku ikai n te tai ae maan.”

Te tareboon e roko mairoun te Kamitina ibukin te Reirei n te Ekaretia, Neal A. Maxwell. Te kauring are e anga Beretitenti Kimball bwa tina kona ni “kitanakin temanna ke te bwai teuana” e a koro bukina. Bon te wewete ni kiitana te utu ae tamaroa ni beku n te tibwanga inanon te tabo are I aki ataia mai imwaina. Ara utu a tauraoi ni kiitana te tai are kakabwaiaki ao te tabo ibukina te burabeti, n te tembora ae tabu, te tabo ni kaotioti, e noora te bwai n taai aika a na roko are n te tai anne ti a tauraoi nako iai.

I ataia bwa ana tembora te Uea bon te tabo ae tabu. Au kantaninga n te bong aei n taekinan te tembora bwa tina karikirakea nanomi ao am iango bwa e na tau ao n tauraoi ibukin te tibwanga ae rikirake ibukin te taneiai n te tembora ake a na roko nakoira.

Irou, te kaunganano ae te kabanea ni korakora bwa kona tau ibukin taneiai n te tembora bon te bwai are e taekinna te Uea n Ana auti ae tabu:

“Ao ngkana a teimatoa au aomata ni katea te auti nakoiu n aran te Uea, ao n aki kariaia bwaai aika aki itiaki n rin nako iai, bwa e na aki bareka, mimitongiu e na tiku i aona;

“Eng, N na mena ikekei, bwa N na roko nako iai, ao ni kabane ake a itiaki nanoia ake a na roko nako iai a na noora te Atua.

“Ma ngkana e kabarekaaki N na aki roko nako iai, ao mimitongiu e na aki mena ikekei; bwa N na aki roko nakon taian tembora aika aki tabu.”¹

Beretitenti Russell M. Nelson e kamatata nakoira bwa ti kona n “noora” te Tia Kamaiu inanon te tembora n te aro are ti nang Kinaa raoi. Beretitenti Nelson e taekina aei: “Ti matata Irouna. Tia matata n Ana mwakuri ao Mimitongina. Ao ti moanna n namakina korakoran maiuna ae akea tokina ae akea kabotauana.”²

Ngkana ngkoe ke ngai ti nakon te tembora n aki itiaki, tina bon aki kona n nooria, man mwaakan te Tamnei ae Raoiroi, te reirei n tamnei iaon te Tia Kamaiu are ti kona ni karekea n te tembora.

Ngkana ti tau ni karekei aekakin reirei akanne, a kona n rikirake rinanona ara taneiai n ana kantaninga te tembora, kimwareirei, ao te aki nanokokoraki inanon maiura. Te kantaninga anne, kimwareirei ao te aki nanokokoraki a tatauraoi ti rinanon otenanti ake a karaoaki inanon te tembora ae tabu. Bon inanon te tembora are ti kona ni karekea iai te kakoaua n reitakin te utu are e na reitinako imwiin te mate ao n teimatoa n aki toki.

Ririki aika a nako, ngke I beku bwa te bitiobi, te ataeinimwane ae tamaroa e rawa ni butimwaea au kakao ibukin kororaina n tau ni maiu ma te Atua inanon te utu ae akea tokina. N te kawai n totoko e tuangai taai aika tamaroa are e a tia ni karekea ma raraona. I anganna bwa e na taetae. Imwiina e tuangai teuana te tai inanon ana tai ni bobotaki ni kukurei, i nuukan te karongoa, ngke n te tai ae tawe e a namakinna bwa e a tiku ni maroa. I titirakinna bwa tera ae riki. E taku bwa e uringa te tai are ngke e uarereke, e tekateka iaon waen tinana, n rabwataki ni baina. N te tai anne ngke e taekina te karaki, e rotia te tang. I taku nakoina te bwai are i ataia e koaua: “Ti te kawai are ko kona iai ni karekea te namakin ni botakin te utu n aki toki bwa kona tau ibon iroum ao ni buokiia tabeman ni karekea te otenanti ni kabaebae n te tembora.”

Ti aki ata raoi ni kabwarabwaran reitakin te utu n te aba n tamnei ke tera are e na roko imwiina ngkana ti a tia ni manga kautaki. Ma ti ataia bwa te burabeti are Eria e roko n aron are e taekinaki n te berita bwa e na raira nanoia taama nakoia natiia, ao naati nakoia taama.³ Ao ti ataia bwa kukureira n aki toki e irekereke ma karaoan ara kabanea n tamaroa n anga te kakukkurei ae akea tokina nakoia ara koraki aika a mwaiti n aron are ti konaa.

I namakina te nano naba anne n tokanikai ni kaoakiia kain te utu aika a maiu n riki n tau ni karekea ao ni karinea te otenanti ni kabaebae n te tembora. Anne mwakoron te berita n ikotakiia kain Iteraera n te kabanea ni bong ni kauoua iteran te rabuna.

Teuana tibwangara ae korakora bon ngkai a rikirake kain ara utu. A bungiaki ma Otan Kristo bwa te bwaintangira. Anne are a na kona iai n namakina ae raoiraoi ao ae buakaka. Ibukin anne, noorakin te tembora ke tamnein te tembora e na karikirakea inanon te teei te nano ni karekea te tibwanga n te bong teuana bwa a na rin inanona.

Te bong anne ngkanne e kona n roko, ngkai te roronrikirake, a karekea te rekomente n te tembora bwa a na riki bwa taan tei n te bwabetito n te tembora. N te taneiai anne, aia namakin e na rikirake bwa otenanti n te tembora n tainako e kaineti nakon te Tia Kamaiu ao Ana Mwakuri ni Kamaiu. Ngkai a namakinna bwa a angan te aomata n te aba n tamnei aia tai ni kaitiakaki man aia bure, aia namakin e na rikirake ni buokan te Tia Kamaiu n Ana mwakuri ae tabu ni kakabwaian natin Tamara are i Karawa.

I a tia n noora mwaakan te taneiai anne ni bita maiun te aomata ae kairake. Ririki aika a nako I nako ma natiu te aine nakon te tembora n te bwakantaai teuana. Ngaia te kabanea n riki bwa te tia tei n te mwakuri ni bwabetito. Natiu te aine e tuangaki ngkana e kona n tiku riki ni kabanei otenanti ibukiia ni kabane aomata ake a tauraoi araia. E taku eng.

I mataku ngke e ruo natiu te aine n te tabo ni bwabetito. E waaki te bwabetito. Natiu ae uarereke e bwaro ranin matana ni katoa te tai are e tabekakirake iai man te ran. E manga butiaki riki imwiina ao imwiina, “Ko kona ni karaoia riki?” Ni katoa tai e kangai eng.

Ngkai te karo ae raraoma, I a moanna ni kantaningaia bwa e na kona ni kainaomataaki man karaoan riki aika a mwaiti. Ma I uringnga n teimatoa ni matoatoa ngkana e butiaki ngkana e kona ni karaoia riki ao e taku ni bwanaana n teimatoa ae uarereke, “Eng.” E tiku ni karokoa te kabanea n aomata iaon te rinan n te bong anne n tia ni karekea te kakabwaia n te bwabetito n aran Iesu Kristo.

Ngke I rianna n otinako man te tembora ma neiei n te tairiki anne, I mimi n te bwai are I a tia n nooria. Te ataei e a tia n tabekakirake ao ni bitaki imatau man ana beku ibukin te Uea n Ana auti. I teimatoa n namakina te namakin n te ota ao te rau ngkai ti ikotaki n riannanako man te tembora.

A waaki nako ririki. E teimatoa n taekina eng nakon te titiraki mairoun te Uea ngkana e na kona ni karaoia riki ibukina ngkana e a bon rang ni kangaanga. Anne te bwai ae kona ni karaoia te ibuobuoki n te tembora ni bitiira ao n tabekiira. Anne bukina bwa au kantaninga ibukimi ao ibukiia ami utu aika tangiraki bwa kam na rikirake n te nano ao te nanomatoa n tau n rin n ana auti te Uea n tainako n reken ami tai.

E tangiria ni butimwaiko ikekei. I tataro bwa kona kataia ni katea te nano inanoia natin Tamara are i karawa n nako ikekei, are a kona iai n namakina te kaniaaki riki nakoina, ao bwa ko na kaoia naba ami bakatibu bwa a na tau ni mena irarikina ao irarikim n aki toki.

Taeka aikai a kona n riki bwa am taeka:

I kaotia au koaua bwa ngaira bon natin Tamara are i Karawa ae tatangira. E rinea Natina ae Tangiraki, Iesu Kristo, bwa e na riki bwa ara Tia Kamaiu ao te Tia Kabooira. Ti te kawai n oki ni maeka ma Ngaia ma ara utu bon rinnanon otenanti n te tembora ae tabu. I kakoaua bwa Beretitenti Russell M. Nelson e taui ao e kamwakuri king ni kabane n te nakoanibonga are e na kona n reke iai te maiu ae akea tokina ibukiia natin te Atua ni kabane. I kakoaua n aran Iesu Kristo ae tabu, amen.