Manga Rinanoakin Baika Kainnanoaki Ibukin te Angabeba n te Tieminari
Ibukin boutokan te kamatebwai n te mweenga ao kaungan te wareware ni booki aika tabu, e a tia ni manga rinanoaki baike a kainnanoaki ibukin te angabeba n te tieminari. Ngkai, inanon te aua n ririki ni kamatebwai, ataei a nang aki ribooti bwa a wareki booki aika tabu (O Tetemanti, Nu Tetemanti, Ana Boki Moomon, ao Reirei ao Berita aika Tabu ao Bwaeao ae Bati Boona); ma a na riboti bwa a wareware ni booki aika tabu n te bong koraki 75 te katebubua.
Aio e bita te taratara man katian te tabe nakon katean te katei ae raoiroi n te riki bwa ana reirei Iesu are e na kakabwaiaia ataei i nanon maiuia. Aio e uota naba te tieminari, are e a tia ni bitaki bwa e na botau ma taian wareware inanon te 12 n namwakaina n Nakomai, Iriirai, bwa e na reitaki ni mwakuri ma ana bootaki te Ekaretia ni boutoka te kamatebwai n te euangkerio are karaoaki n te mwenga ao e boutokaki n te Ekaretia.1
Baika kainnanoaki aika raka ibukin te angabeba n te tieminari bon kaean te kiraati 75 te katebubua ao te bwaati n tuoan matataia n te bwi ae 75 te katebubua ke iaona. Beba ni kakoauaan bwaninin te kiraati, are e a butimwaeaki riki n taabo tabeua, e a tia n onea mwin te beba ni kinaaki.