Unimwaane Paul V. Johnson

Teuana te reirei ae kakaawaki are e karekea Unimwaane Paul V. Johnson man mwakurina n te Rabwata are tararuai reirein te Aro bwa naake a kawakin aia berita aika tabu, e kaawakin naba ana berita te Atua—inanon kangaangan te maiu aei.

“E boni ngae ngke e bati ara titiraki ni mwakoron nako maiura, iai berita aika kakaawaki,” e taku. “Ti riai n aki kariaia bwaai tabeua bwa a na tukira man ana berita nako te Atua.”¹

N te bong aei, a kaitara natin te Atua ma te butinaroki n te aonaba, mangaon kaawa, ao mwaitin te rongorongon iaon bwaai n retiaki n te intanete. Ma ngkana ti kawakin ara berita ae tabu, e taku Unimwaane Johnson, te Uea e anga te kairi, korakora, ao te rau.

N Eberi 3, 2021, e kamatoaki Unimwaane Johnson bwa kaain te Beretitentii n te Itingaun, are e na bwainaki n Aokati 1, 2021. E riki Unimwaane Johnson bwa te ka-16 ni kamitina n te Botaki n Reirei n te Ekaretia man 2008 nakon 2015, are e manga mena n te nakoa anne i nanon 2019.

E bungiaki Paul Vere Johnson n Tuun 24, 1954, i Gainesville, Florida, USA, ana karo Vere ma Winefred Johnson. E ikawai rake i Logan, Utah, USA, e mitinare n te Norway Oslo Mition. Imwin ana mitinare, e mare ma Leslie Jill Washburn n te Logan Utah Tembora n 1976. Iai 9 natiia ao 40 tibuia.

E reke ana tikuri Unimwaane Johnson n te zoology/botany man Brigham Young University i nanon 1978, ana matita n te education mai BYU i nanon 1982, ao ana taokita n te instructional technology man te Utah State University inanon 1989.

E tia reirei n te tieminari i nanon 12 te ririki i Arizona ao i Utah imwain ae mwakuri n nakoa ni mataniwi n Ana Rabwata te Ekaretia ibukin te Reirei n te Salt Lake City.

E kamatoaki Unimwaane Johnson bwa kaain te Moan Kooram n te Itingaun n Eberi 2, 2005. E a tia ni beku bwa te Itingaun n te Aono, kauntira n te titeiki beretitentii, te kauntira ae rietata, bitiobi, ao te beretitenti n te Bootaki n Ataeinimwaane n te Uoote.