Kam Kona n Ikotiia Iteraera.

Ma I a itibwa ataia bwa Ngai ao ni kabane aomata ti maeka ngkoa ma Tamara are i Karawa aika natina n tamnei mwane ao aine imwain bungiakira. Tabeman a riai n ataia. n aron ae I ataia, bwa E tangiriia natina ni kabane bwa a na kukurei n aki toki ma ngaia. Ma ngaia are. i mwaina rokoia aomata n te aonaaba, E kaotii ni kabane Ana baire aika kororaoi ibukin te kamaiuaki ao te kukurei ma Iesu Kristo bwa ara tia Kamaiu. Te kananokawaki, Taatan e totokoa ana baire te Atua.³ Ni kaineti ma te boki ae te Kaotioti, “iai te buaka i karawa“⁴ Taatan e rarabakau ni mwamwanaa kateni mwakoron Natin te Atua aika tamnei ni karimoa moa imwaain te Atua.⁵ Ma tiaki ngkami! Te Abotoro Ioane e noria bwa kam tokanikai iaon Taatan “man ami taeka are [kam] kaotiotia”⁶

Atakin arou ni koaua, ni buokaki ma au kakabwaia n te tamanuea e anganai te korakora ao te onimaki ni butimwaea ana kakao Beretitenti Spencer W.Kimball ni ikota Iteraera.⁷ E na bon titebo ma ngkami, raou aika tangiraki. Atakin tokanikaim iaon Taatan man taekan am kakoaua ngkoa e na buoki ngkami n “tangira, n tibwauaia, ao ni kaoia”⁸ ngkai ao n taainako—ni kaoia aomata bwa a na roko ao n noria, nakomai ibuobuoki, ao roko ao kaaina, bwa te buaka anne ibukiia tamneia Natin te Atua e teimatoa ni waakinako.

Tamnei

Unimwaane Corbitt

Tera aron te mwaaka ae moan te korakora iroumi? Iangoa aio: kam takarua ni kukurei⁹ n roko nakon te aonnaba ae bwaka ike a na bane aomata ni kaitara te mate n rabwata ao n tamnei. Ti na aki kona n tokanikai iaon te mate n rabwata ao n tamnei. Ti na rinanon te korakai tiaki tii man oin ara bure ma man aia bure naba tabeman. Aomata a na kona n namakin aekan iango nako aika karika te uruaki ao te un¹⁰—ibukina bwa ti mwaninga ao a rabunaki ara iango ao ana kairiribai te aonaaba e reitinako ni taketeniira ao ni kataira. Kantaninga ni kabane n oki ni kautaki ao ni itiaki imatan te Atua ae tabu a bane iaon temanna te Aomata are kawakina Ana berita¹¹

Tera ae kakorakorako ni waaki nako? E reirei Beretitenti Henry B. Eyring, “E aanaki n te onimaki inanon Iesu Kristo ni kamatoaa te babaire ni kakukurei ma taben Iesu Kristo iai ngke e karako am atatai ni kaangaanga ake ko na kaitara ma ngaai n te maiu ae mamate.”¹² Ngke E berita Iesu Kristo bwa E na roko nakon te maiu ae mamate ao n anga Maiuna ni bootiira¹³ ao ni kamaiuira, kam bon aki tii Kakoaua. Ngkami “tamnei aika rine”¹⁴ iai iroumi te “onimaki ae rianako” are kam noora ana berita bwae kakoroaki bukina.¹⁵ E aki kona ni kewe,ao kam Nooria ngke e katutua Rarana ibukimi, ngkoa imwain Bungiakina¹⁶

Inanon ana taeka ni kabotau Ioane, “a kataea ana kai [Taatan] n raraan te Tibutetei.”¹⁷ Beretitenti Dallin H.Oaks e reirei bwa n te aonaaba arei “[kam] noora te toki ao te kaanea.”¹⁸

Katautaua bwa n te bong teuana imwaain mwanangam nakon te reirei, temanna mairouia am karo e karaoa ni koauate berita bwa ko na kana kanam ae ko tatangiria ngkana ko okira mweengam! Ko rang kukurei! Ngke ko mena n te reirei ko iangoa kanakin te amwarake ao kanga ko a tia ni katongnga. Ni bon arona, ko tibwaa am rongorongo ae raoiroi ma tabeman. Kantaningan okim nakon mweengam e karika iroum te kukurei are taaian ukeuke ao kangaangan te reirei a taraa ni bebete. Akea te bwai ae kona n anaa kukureim ke ni karika te nanououa iroum bwa e matoa ni koaua te berita! N ae ti tearona, imatami tamnei aika uea a bungiaki, ko reiakinna n noora ana berita Kristo n te kawai ae koaua aei, ao ko katoonga Ana kamaiu.¹⁹ Am onimaki ae korakora bon aekan te mwatireti are rikirake ni korakora ao ni bubura ngkana ko aki toki ni kataneiai, ma a kaman tauraoi inanom.

Ko na kanga ni kautaa am onimaki ae aintoaa inanon Kristo ao ni kabongaana ni ikotiia Iteraera ngkai ao n tokanikai riki iaon Taatan? Man manga reiakinan taraakin mooa ao n nooria ma te koaua raoi bwa e berita te Uea ni ikotiia ao ni kamaiuia n te bong aei. E ti kamanena Ana Boki Moomon ao Ana burabeti n reireinira arona. Ngkoa imwain Kristo, “burabeti aika nibwaite, ao … ibonga, ao … taan tia reirei … n [anai] nanoia aomata bwa a na karia rokonte Mesia, ao ni kakoaua n aiaron ae e a tia n roko.”²⁰ Te burabeti Abinataai e reirei, “Ao ngkai ngke arona bwa e tuai n roko Kristo iaon te aonaba, taekinan bwaai aika a na riki n aiaron are aongkoa a bon tia n riki, ao e na bon akea te kaboaki.”²¹ N aron Aramwa, Abinataai “e [taratara] ma te kantaninga ma te mata n onimaki”²² ao e noora Ana berita te Atua ni kamaiu are e a tia ni koro bukina. A “tokanikai iaon [Taatan] n raraan te Tibutetei, ao … n taekan aia kakoaua” ngkoa imwain bungiakin Kristo, n aekan ae kam karaoia. Ao te Uea e angania te mwaaka ni kaoia ao ni ikotiia Iteraera. E na karaoa ae titebo ibukimi ngkana kam waaki nako n ami onimaki, noora ikotakin Iteraera—ni katobibia aonaaba ao ni bon oin ami “bootaki”²³—ao ni kaoiia ni kabane!

Bubua mitinare a kateitei iaon aia onimaki n te maiu are mai mwaaina ae korakora inanon Kristo ni iangoia ake a reitaki mangaiia ke n reireiniia ake a kunnikainiiani bwabetito ao kunikain te tembora. Inanon te maroro ae atuuhaki “Begin with the End in Mind”²⁴ Beretitenti Nelson e tibwa ana katoto ni karaoan aei ao n tuangiia taan kairiri n te mition n reireiniia ara mitinare bwa a na karaoa aekan naba anne. Atakina bwa a kamwakura te onimaki ae korakora aei inanon Iesu Kristo n te aonaaba n tamnei e na rangi ni buokiia ara mitinare n “ongo Irouna”²⁵ ao ni kamwakura aia onimaki ae korakora ni ikotiia Iteraera n aron are E berita iai te Uea.

Bon te koaua, iangoan taian kewe a urua te onimaki²⁶ Raraou, ngkana bon nanom ni iangoa ke n taraai bwaai aika a kauntaba ae antai raoi ngkoet,, e moamoa riki n tamnei aika tangako, a na kamamaraa am onimaki inanon Kristo ao n akea te rairanano e kona ni uruanna. Taiaoka kamanena ami iango ni karikirakea ami onimaki inanon Kristo ma tai urua.

.Aia burokuraem Ataei ao Kairake bon te bwai ni mwakuri ae taetae ni burabetiaki ni buoki ngkami kairake ni kakorakora ami onimaki. E reirei Beretitenti Oaks, “Te burokuraem anne e karaoaki ni buoki ngkami n riki n aekan ara Tia Kamaiu n aua taabo: ibukin te maiu n tamnei, te reitaki, te maiu n rabwata, ao te aro ni wanawana.”²⁷ Ngkai ngkami kairake kam kairiiri—kairiiri—ni maiuakinan te maiu n te euangkerio, n tabeakiniia tabeman, kaoia bwa a na karekea te euangkerio, katiteuanaia taian utu n te maiu are akea tokina, ao karaoi bootaki ni kakukurei,²⁸ te onimaki ae korakora inanon Kristo n te maiu imwaain te maiu aei e na oti ao ni kamwakai ngkami ni karaoa Ana mwakuri n te maiu aei!

Aiarona naba, am kouru ibukim, e moamoa riki taian kouru aika uarereke taiia, ”²⁹ a buokiko ni kauraa am onimaki ae korakora. Ngkana ko katea te kouru ae tamaroa ko waaki nako, n aron are ko karaoia mai mwaina ao ko noora are Tamam are i Karawa e tangiriko ao temanna riki bwa kam na karaoia.³⁰ Ngkanne ko na baireia ao ni mwakuriia bwa ko na kanga ni kakoroa nanona. Unimwane Quentin L. Cook e reirei, “Tai kamangora bonganan te babaire, katean kouru…ao [kaoakiia tabeman]—ni kabane ma te mata n onimaki.”³¹

Te rinerine e nakoim! E taku te Uea ibukim,“Te mwaaka [n rinerine] e bon nakoia.”³² Unimwane Neil L. Andersen e kabwarabwara,“Ami onimaki e na rikirake tiaki n te maninanti, ma man te rinerine.”³³ E taku riki,“[Te] tititraki ni koaua [are iai iroumi]…e na taobaraeaki n te nanorinano ao te maata n tonimaki.”³⁴

I kakoaua bwa (1) kinakim ae koaua ao (2) buburan mwaakan te onimaki inanon Kristo inanomi e na kona ni buoki ngkami ni katauraoa te aonaaba ibukin okin te Tia Kamaiu man kaoakiia ni kabane aomata n roko nakon Kristo ao ni karekei kakabwaia man Ana Mwakuri ni Kamaiu.”³⁵ Ti na tibwaa te kukurei are inanon ana Ana Boki Moomon ae e na bon reke:

“Aika a raoiroi a ongo nakoia burabeti, ao … a kakantaninga nakon Kristo ma te teimatoa … e ngae ngke a bainikirinaki … a na aki mate.

“Ma [Kristo] … e na kamaiuia, ao e na reke te rau irouia irouna.”³⁶

N aran Iesu Kristo, amen.