Unimwaane Patricio M. Giuffra

Bon aua ana ririki Unimwaane Patricio M. Giuffra ngke e mate tamana man te kaentia. Ngke te ataei ngaia, e ikawai rake ma ana titiraki nakon te Atua ao e titiraki bwa bukin tera e bobuaka te babaire.

“Tamau bon te kainnaba, tama, ao te tia mwakuri ae tamaroa,” e taku Unimwaane Giuffra. “E aera ngkai e mate?”

E reke kaekan aikai ao te oota tebwina te ririki imwina ngke Patricio ma tinana a kaitibo ma mitinare ao a butimwaea te euangkerio.

E reke irouna te kantaninga man te babaire ni kamaiu ibukina bwa e a oota ni buaia ana utu. “Tamau e katauraoa te kawai nakoira bwa ti na kaaina te Ekaretia,” e taku.

Man te tai are e babetitoaki iai, ana euangkerio e riki bwa atinroon maiun Unimwaane Giuffra. “Te Ekaretia bon maiu,” e taku. “I namakinna bwa bon nneu te Ekaretia.”

E tai ae onoti n te taina i nanon 1989 ngke e kabaeaki Unimwaane Giuffra ma ana karo ao tarina ma mwanena n te Ogden Utah Tembora. Imwin karaoan te otenanti, e wirikiriki tinana, “I namakina tamam.”

E bungiaki Patricio Mauricio Giuffra Vargas i Valparaíso, Chile, n Eberi 6, 1962, ana karo Lazaro Dante Giuffra Riffo ma Olga Rosa Vargas Canales. E ikawai rake i Valparaíso, Chile, ao e mare ma Maria Eugenia Gonzalez Olmos n te Santiago Chile Tembora i nanon 1992. Iai aman natiia.

E reke ana tikuri Unimwaane Giuffra n marketing and translation/interpretation man Brigham Young University in 1990 ao ana matita tikuri n te business administration degree man BYU i nanon 1994.

E a tia ni mwakuri bwa te mataniwi n te bobwai n te Woodgrain Millwork (1994–96), manatia ibukin bobwai ao kabutan te waaki n te Alvenius Chilena (1996–98), ao te manatia ni kabuta n te Carbotech Chile (1998–99) ao Arcotex SA (2000 ni karokoa ngkai).

E tia ni beku Unimwaane Giuffra bwa te mitinare n te Chile Osorno Mition, tia koroboki n titeiki, beretitenti n te Bootaki n Ataeinimwaane n titeiki, bitiobi, ao te beretitenti n te titeiki. Imwain ae e weteaki bwa te Itingaun ni Kabuta, e beku bwa te Itingaun n te Aono i Amerika Maiaki.