Unimwaane Sean Douglas

Ngke e mitinare n te Chile Concepción Mition, E waakina ana beku Sean Douglas i abana i buki. Ao “toana ae kaain Chile are bon ana tia kataneiaa naba e rangi n tata ana taetae n Spanish.” Imwin teniua te namwakain i Amerika Maiaki, E teimatoa ni matoa karekean te taetae n Spanish iroun Unimwaane Douglas.

E roko irouna te bwarannano ao uringaia ana koraki ao te nanokokoraki are e a uotia nakon bubuanwaena. “Akea te bwai ae tamaroa ae I karaoia,” e tataro. “Akea aomata aika buokaki irou.”

E roko irouna te titiraki mai karawa ae kangai: “Ko karaoa aei ibukiu, ke ko bon karaoia ibukim?”

N te tai anne are e motikia nakon te Atua bwa e na kakeaa ao e na teimatoa ni kataia. “N te tairiki anne I mii n te taetae n Spanish,” e taku.

N te bong are imwina ao e a bebete bwai nako. “E tamaroa riki aron au taetae. I a kona riki n oota,” e taku. “Au mwakuri ni mitinare e kakorakora au koaua iaon mwaakan te tataro ao bwa ngkana ko waaki ni karaoa are e tua te Uea, E na katauraoa te kawai ibukim.”

Te iango aei are e kaira maiuna ni kabanea.

E bungiaki Sean Douglas ni Meei 1, 1964, i Salt Lake City, Utah, tinana Barbara ao tamana Leo Douglas. E ikawai rake i mainiku i Salt Lake Valley, e mare ma Patricia Ann Dickson—raona ngke e reirei n te kauarinan—n te Salt Lake Temple i nanon Tuun 1985. Iai aman natiia.

E reke ana beba Unimwaane Douglas n te accounting man te University of Utah ao e mwakuri bwa te oteta imwain are E mwakuri i nanon tenibwi te ririki n te Huntsman Corporation, are e riki bwa te kauoman ni beretitenti ao te mataniwi ibukin te mwane.

Ana onimaki iroun te Uea, are e kamatoaki ngke e kairake ao nkge mitinare, e kairia i nanon mwaingina nako Engiran ibukin te mwakuri, are e beku iai bwa te bitiobi ae ataei, ao Houston, Texas, USA. E beku bwa te beretitenti n te Mition n te Peru Lima South Mition man 2012 nakon 2015. E beku Unimwaane Douglas bwa te Itingaun n te Aono imwain wetena nakon nakoana ae ngkai.