Unimwaane Michael A. Dunn

A raure ana karo Unimwaane Michael A. Dunn ngke e uarereke, ao e kaikawaaki iroun tinana, e ribanaki i nanon te onimaki ma te aroaro. Imwin reireina n te reirei ae Episcopal i Salt Lake City, Utah, USA, e mwaing nakon ana kauarinan te tautaeka, are e kaitibo iai ma kaain Ana Ekaretia Iesu Kristo ibukiia Aika Itiaki ni Boong Aika Kaitira.

Ngke e butimwaeaki irouia raoraona aika boou ma aia karo, e tangiria Micheal n reirei taekan te Ekaretia. N tokin te tai e motikia bwa e na reitaki ma mitinare. Aia reirei iaon te Atu n Atua ao Ana Moan Kaotioti Iotebwa Timiti e “rinnako inanou ma te korakora,” e taku.

Rinanon te tataro e ataia bwa e koaua te euangkerio ao e bwabetitoaki n ana kabanea n ririki n te kauarinan. Imwin anne, e a tia Unimwaane Dunn n “ribanaki irouia taan kairiiri aika bati.”

E katerea naba ana ibuobuoki Tamara are i Karawa ao te Tia Kamaiu i nanon maiuna. “Ngai te tia kakoaua,” e taku Unimwaane Dunn. “I kakabwaiaki bwa I riki bwa ana tia kakoaua Iesu Kristo ao ni katotoonga maiuna, Ana euangkerio ae kaokai ni boong aikai.”

E bungiaki Michael Austin Dunn ni March 5, 1958, tinana Patricia ao tamana James R. Dunn i Tucson, Arizona, USA. E ikawai rake i Salt Lake City. Imwin ana mitinare i Hawaii Honolulu Mition, e mare ma Linda Virginia Poulson i nanon 1980 n te Salt Lake Tembora. Iai natiia aika teniman.

E reke ana tikuri Unimwaane Dunn n te mass communication i nanon 1981 ao te matita tikuri n te reitaki i nanon 2008, man te Kuura n Reirei ae Utah. Bon ngaia te manatia n te KUED (PBS Utah), te beretitenti n te Dunn Communications Inc., ao ngkai, tarekita ibukin BYUtv ao BYU Rerio.

Unimwaane Dunn, are bon te Itingaun n te Aono ngke e weteaki, e a tia ni beku bwa te bitiobi, kauntira n te bitiobiriki, beretitenti n te titeiki, beretitenti n te botaki n ataeinimwaane, kauntira ae rietata, ao te beretitenti n te titeiki n te mition ae te South Africa Johannesburg Mition man 2014 nakon 2017.