Ataei aika Kananoanga

Ngke I ataeinimwaane, I uringa ngke I butiu n te kaa ma tamau ao n nooria aomata irarikin te kawai ake a mena ianon te kangaanga ke ni kainnanoa buokaia. Tamau n taainako e na bae n taekina “Pobrecito,,” are nanona “aomata aika kananoanga.”

N tabetai, I miakina tamau bwa e na bae ni buokiia aomata aikai, riki ngkana ti mwananga nako Mexico n nooria tibu. E na bae ni kunea temanna e rootaki n te kainnano ao n akea ae e ataia e nako ao e karekea te buoka are e kainnanoaki. I kunea imwiina bwa e buokiia ni karini araia n te reirei, e karekei tabeua amwarake, ke ni ibuobuoki n te aanga tauana ke teuana riki ibukin mweeraoia. E ibuobuoki nakoia “aomata aika kananoanga” ake e noriia. N te koaua, inanon au ririki ni kairake I aki uringa te tai ae ti na aki butimwaea temanna ni maeka irarikira ae kainnanoa nena n tiku imwaain ae bon tararuaia ibon irouna. Matakuakinan taneia aikai e karekea inanou te nano n nanoanga nakoia raou n aomata ao ibukiia ake a rootaki n te kainnano.

Inanon Tataekina Au Euangkerio e taekinaki: “Ko katobibiaki irouia aomata. Ko boo mangaiia inanon te kawai, kawariia ni mweengaia, ao ni mwananga ibuakoia. Bon natin te Atua ni kabane, mwaanem ao tarim. … Angiia aomata aikai a ukoukora te bwai ae iai bukina n te maiu aei. A tabeaianga ibukin taai aika a na roko ao aia utu” (Preach My Gospel: A Guide to Missionary Service [2018], 1).

Inanon ririki n au tai ni beku n te Ekaretia, I kataia n ukoria naake a kainnanoa buokaia, n te maiu n rabwata ao n te maiu n tamnei. N angiin te tai N na bae n ongo bwanaan tamau ni kangai, “Pobrecito,”aomata aika kananoanga.

N te Bwaibwara ti kunea te katooto ae tamaroa n tabeakinan temanna ae rootaki n te kainnano:

“Ao e ararake Betero ma Ioane nakoni maneban te Atua ngke auan te tataro are te aua tenua n te tanimaeaontai.

“Ao e uotaki te aomata temanna ae e a kamani mauku mai biroton tinana ae a kawewenea n te bong ae koraki ni mataroan te maneaba te mataroa are arana Tamaroa, ba e na bubuti bai n tituaraoi mairouia aomata aika rin n te maneaba;

“Ao ngaia ngke e nora Betero ma Ioane ba a nangi rin n te maneaba ao e bubuti te bai n tituaraoi.

“Ao Betero, e tarataraia ma Ioane, ao e kangai, Taraira.

“Ao ngaia e tarataraia, ba e taku i nanona ba tao e na anganaki te bai teuana mai irouia.

“E taku Betero, Akea au tirewa ma au koora; ma ae iai i rou ao I anganiko: Ko na nakonako n aran Iesu Kristo are te I-Natareta.

“Ao e taua ataina, ao e kateirakea: ao a riki naba ni korakora raurauni waena ma nimoimoia” (Makuri 3:1–7; e kairaki ma katuruturuana).

Ni warekan te karaki aei, e katikaki nanou man kabonganaan te taeka kamatoa. Te taeka kamatoa nanona kaineta am taratara, iango, ke taraia ma nanom raoi (taraa “fasten,” Dictionary.com). Ngke Betero e taraa te mwaane aei, e nooria bwa iai kaokorona ma ake tabeman. E aki taraa ana aki konabawai n nakonako ao mamaarana ao ni kona n ataia bwa ana onimaki e tau nakon te kamarurungaki ao n rinnako inanon te tmeobra ni karekei kakabwaia ake e ukoukori.

I nooria bwa e taua baina te atai ao e kateirakea. Ngke e buoka te mwaane aei, te Uea e kamaiua inanon te kakai, ao “a riki naba ni korakora raurauni waena” (Makuri 3:7). Ana tangira ibukin te mwaane aei ao nanona ni kan buokia e karika rikirakean te korakora ao te konabwai iroun te mwaane ae mamaara aei.

Inanon au tai ni beku bwa te Itingaun n te Aono, I kawakina tairikin te Kauabong koraki ni karaoa au ibuobuoki ni kakawari ma te beretitenti n te titeiki n au aono are I mwiokoaki iai. I kaoiia bwa a na kabaea ara tai ma naake a kainnanoa te otenanti n ana euangkerio Iesu Kristo ke naake aki kawakin aia berita ae tabu ake a tia ni karaoi. Rinanon ara ibuobuoki ae teimatoa ao ni karaoia ma nanora, te Uea e kakorakora ara konabwai ao ti a kona ni kuneia aomata ao utu ake a rootaki n te kainnano. Aikai ake bon “aomata aika kananoanga” ake a maeka n titeiki aika a kakaokoro are ti beku iai.

N te taina, I raona Beretitenti Bill Whitworth, te beretitenti n te Sandy Utah Canyon View Titeiki, ni karaoi mwakuri n ibuobuoki nakoia aomata. E tataromwaaka bwa antai ae ti riai ni kawaria, ni kataia ni karekea aekakin ana taneiai Nibwaai, are “e kairaki iroun te Tamnei, n aki atai moa baika [e] riai ni karaoi” (1 Nibwaai 4:6). E kaota anne ngkana ti mwakuri, ti riai ni kairaki man te kaotioti nakoia naake a rangi n rootaki n te kainnano, ni kaitaraa are ti tii rinanon aara ke kawarakiia aomata n aron are e kakaraoaki. Ti riai ni kairaki man mwaakan ana kairi te tamnei.

I uringa ngke ti nako ni mweengaia te taanga n ataei, Jeff ao Heather, ao natiia te mwaane ae uarereke, Kai. E ikawairake Jeff bwa kaain te Ekaretia ae kakaonimaki. Bon te tia takakaro ae rangi n taarena ao iai ana mwakuri ae reke kabwaiana iai. E a moanna n tionako man te Ekaretia ngke tebwitabun ana ririki. Imwiina, e a kabuanibwai bwa e kurati n te kaa, are e bita aron maiuna. Ngke ti roko ni mweengaia ao ni moanna n rena, e titirakiniira Jeff bwa bukin tera ngkai ti roko n nooria ana utu. Ti kaeka bwa iai tao 3,000 kaain te aro ake a maeka inanon tian te tieiki. Ngkanne I titirakinna, “Jeff, mai buakon mweenga ake ti na kona ni kawariia n te tairiki aei, tuangiira bukin tera e kanakomaira te Uea nako ikai.”

N anne, e a rootaki Jeff ao ni moanna n tibwaua nakoira tabeua raraomana ao tabeua kangaanga ake a kaitara ma ngaai n ana utu. Ti a moanna n tibwauai reirei aika a mwaiti n ana euangkerio Iesu Kristo. Ti kaoiia bwa a na karaoi tabeua bwaai aika a onoti are kanga a taraa n riki bwa te kangaanga n te moantai ma inanon te tai e na anganiia te kukurei ao te kimwareirei. Ngkanne Beretitenti Whitworth e angan Jeff ana kakabwaia te nakoanibonga ni buokia n tokanikai iaon ana kangaanga. A kukurei Jeff ao Heather ni karaoa are ti kaoiia iai bwa a na karaoia.

Tao teuana te ririki imwiina, e reke te tai ae tamaroa n nora Jeff bwa e bwabetitoa buuna, ae Heather, bwa kaain ana Ekaretia Iesu Kristo ibukiia Aika Itiaki ni Boong aika Kaitira. A kakatauraoi ngkai ibukin riniia n te tembora bwa a na kabaekai ibukin ngkai ao n aki toki. Rokora irouia e bita kawain maiuia n te maiu n rabwata ao n te maiu n tamnei.

E a tia ni katanoata te Uea:

“Mangaia are, bwaina te kakaonimaki; teei n te nakoa are I a tia n anganiko; buokiia ake a mamaara, tabekirake baai ake a tine, ao ni kakorakorai bubuaniwae aika aki konamaki’ (Reirei ao Berita aika Tabu 81:5).

“Ao ni karaoan bwaai aikai ko a karaoa ae raoiroi ae rangi ni korakora nakoia raom, ao ni karikirakea mimitongin teuare ngaia am Uea” (Reirei ao Berita aika Tabu 81:4).

Tairu ao mwaaneu, e reirei te Abotoro Bauro aron raoi kawai n ara mwakuri n ibuobuoki. E reireiniira bwa ngaira bon “rabwatan Kristo, ao bain rabatana ngkami n tatabemaningkami” (1 Koirinto 12:27) ao bwain te rabwata nako e kainnanoaki ni kakoauaa bwa te rabwata ae tabwanin e kamarurungaki. Ngkanne e reireia te koaua ae rmoan te korakora are e ninianako nanou ngke I warekia. E taku, “Ma moan te kai te nano iai ngkana akea bain te rabata aika atongaki ba moan te mamaara, aika bon riai: bain te rabata aika ti taku ba moan te mangori, iaon aikai ti anga ao a maiti riki katamaroa” (1 Korinto 12:22–23; e kairaki ma katuruturuana).

Ibukin aei, inanon uoote ao mwaanga nako ti kainnanoia aomata ni kabane—naake a korakora ao naake kanga a korakai. A bane ni kakawaki ao ni bongana nakon kateimatoaan “rabwatan Kristo.” I aki toki ni iangoia bwa ai antai ae akea ibuakora n ara bootaki n taromauri ae a na kakorakoraira ao ni kamarurungiira.

E reirei Unimwaane Christofferson: “Inanon te Ekaretia ao ti aki ti kamatebwai reirei aika a roko mai ieta, ti taneiai n aron karaoakina. Rabwatani Kristo ngkami, ao kain te Ekaretia a tararuaia i bon irouia ni koauan te maiu n te bong teuana ma teuana. Akea mai ibuakora ae kororaoi. … N rabwatan Kristo, ti na karaoa ae bati riki nakon ae tii reiakinan tuua ao taeka mai ieta ao ni karekea te atatai ngkana ‘ti bootaki ni maiu n te tangira’[Reirei Ao Berita Aika a Tabu 42:45]” (“Why the Church,” Liahona, Nov. 2015, 108–9).

N 1849, e mii Brigham Young ike e noora iai te Burabeti Iotebwa Timiti kanga e kairiia ana nanai n tiibu ao kooti ae moan te mwaiti. Tabeman ibuakoia maan aikai a bubura man tikiraoi, tabeman a uarereke ao a bareka. E uringa Brigham Young ngke e tarai matan te Burabeti Iotebwa ao e taku, “Iotebwa, iai am nanai aika rangi ni kamiimi … ae I a tiba nooria inanon maiu, tera ae ko na karaoia nakoia?” Te Burabeti, are kanga e taraa n aki raraoma ma te nanai ae aki nakoraoi, e tii kaeka, “[Brigham] a bane n tamaroa ni bon aroia nako.”

Ngke e uti Beretitenti Young, e ataia bwa ngkai te Ekaretia e ikotiia “tiibu ao kooti aika a kakaokoro,” bon tabena bwa e na bane ni kariniia ao ni kaira temanna ma temanna n ataa aia konabwai ngkai a rin n te Ekaretia. (E anaaki mai iroun Ronald W. Walker, “Brigham Young: Student of the Prophet,” Ensign, Feb. 1998, 56–57.)

Tariu ao mwaaneu, moanakin au taetae e kaoti ngke I karaua n iangoa temanna are e aki kakaonimaki n ana waaki ana Ekaretia Iesu Kristo. N te tai aei I kan taetae nakoia n tatabemaniia nako. Unimwaane Neal A. Maxwell e reirei bwa “aomata ae aekakin aikai a tei ni kaan—ma aki kakaonimaki n ana waaki—te Ekaretia. A aki kona n roko n te umwantabu, ma aki naba kitana ana bwaranta. Aikai ake a kainnanoa ao ni kainnanoaki n te Ekaretia, ma, niterana teuana, ‘a tia n aki maeka ma te Atua iaon te aonaba’ [Motiaea 27:31]” (“Why Not Now?,” Ensign, Nov. 1974, 12).

N na kaokioka ana kakao ara burabeti ae tangiraki Beretitenti Russell M. Nelson ngke e moan taetae nakoia kaain te Ekaretia. E taku: .”Ngkai, nakoia kaain te Ekaretia n tatabemaniia nako I taku: teimatoa ni kawain te berita ae tabu. Am motinnano n ira te Tia Kamaiu ni karaoan berita aika tabu ma Ngaia ao ni kawakin berita aikanne e na kauka te mataroa nakon kakabwaia n tamnei ma te tibwanga ae tauraoi nakoia mwaane, aine, ao ataei n taabo nako.”

Ngkanne e bubuti: Ngkai, ngkana ko a tia n tibanako man te kawai, I kaoi ngkami ma te kantaninga inanou n taiaoka oki. Tera nako tabeaiangam, tera nako am kangaanga, iai nnem ikai, n ana Ekaretia te Uea. Ngkoe ao rooro ake a tuai bungiaki a na kakabwaiaki man am mwakuri ngkai n oki nakon kawain te berita ae tabu” (“As We Go Forward Together,” or Liahona, Apr. 2018, 7; emphasis added).

I kaota au kakoaua ibukina, Iesu Kristo, te Mataniwi n te Ibuobuoki ao te Tia Kamaiu ibukira ni kabane. I kaoira n tatabemaniira nako ti na ukoiriia “pobrecitos,” “aomata aika kananoanga” aika ibuakora ake a kainnanoa buokaia, bon au tataro n aran Iesu Kristo, amen. Aio au kantaninga ao au tataro n aran Iesu Kristo, amen.