Fakahā Fakatāutahá—Ko Ha Fakamoʻoni mei he ʻOtua, ko ʻEtau Tamaí

ʻOku ʻikai ko e kau palōfitá pē ʻa e kakai ʻoku nau lava ʻo maʻu fakahaá. Fakatatau mo hoʻo faivelengá, te ke lava ʻo maʻu ha fakahā ke tokoni atu ʻi haʻo ngaahi fiemaʻu makehe, ngaahi fatongiá, mo ha ngaahi fehuʻi, pea mo ne tokoni ke fakamālohia hoʻo fakamoʻoní¹.

ʻI heʻeku fakakaukau atu ki he taʻu ʻe 40 ʻo ʻeku kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku ou ofo mo houngaʻia ʻaupito koeʻuhi ko e ngaahi aʻusia lelei, mo e liliu moʻui kuo fakahokó, pea ʻoku lolotonga fakahoko ʻe he fakahā fakataautaha mei heʻeku Tamai Hēvani ʻofeiná ʻi heʻeku moʻuí.

ʻOku ou manatuʻi lelei ʻeku fuofua aʻusia makehe ʻi he fakahā fakatāutahá. Naʻá ku taʻu 17; pea naʻe hoko ia ʻi he ʻapi ʻeku ongomātuʻá ʻi Suva, Fisi. Ne u nofo toko taha pē ʻi hoku lokimohé, ʻo laukonga mei he Tohi ʻa Molomoná fakataha mo ha holi loto-fakapapau ke u ʻiloʻi ʻiate au pē pe ʻoku moʻoni nai ʻa e tohí. Ko e tukupā eni ne ʻomi kiate au ʻe he ongo faifekau taimi kakato ko ʻEletā Liani Nalesoni mo ʻEletā Lenitī Palaisi, hili haʻana tā e lēsoni kau ki he palōfita ko Siosefa Sāmitá mo e founga naʻá ne maʻu ai ʻa e ngaahi lauʻi peleti koulá mei ha ʻāngeló, pea hili iá naʻá ne liliu ʻa e tohí ki he lea faka-Pilitāniá.

Naʻe lau ʻe he ongo faifekau ko iá ha ngaahi veesi mei he Tohi ʻa Molomoná lolotonga ʻemau fealeaʻakí, pea naʻá na vahevahe ha ngaahi fakamoʻoni mālohi mo fakamaama. Ne ueʻi mālohi au, pea ne u fie maʻu ke u ʻilo ʻiate au pē pe naʻe haʻu moʻoni ʻa e meʻa ne na vahevahe ki aí, mei he ʻOtuá . . . pea ne u fie lea ʻaki ʻa e meʻa ne na lea ʻakí ʻi he loto-fakapapau mo e loto-toʻa tatau.

Naʻá ku lau ʻa e 3 Nīfai vahe 11; pea ʻi he meimei taimi pē ko iá naʻe kamata ke u maʻu ha mahino pea hoko ʻo u maʻu ha maama. Ne u sioloto ki he Fakamoʻui ko Sīsū Kalaisí, ʻoku hāʻele hifo mei he langí pea tuʻu ʻi he lotolotonga ʻo e fuʻu kakaí kuo mafao atu hono ongo toʻukupú, ʻo fakaafeʻi kinautolu ke nau haʻu kiate Ia, ke nau ala ki he ngaahi mataʻi kafo ʻi Hono ongo nimá mo Hono ongo vaʻé. Naʻa nau fakahoko tahataha ʻeni, pea hili iá, naʻa nau fakatōmapeʻe ki he kelekelé mo hū kiate Ia ko e Mīsaia ne talaʻofa maí².

Naʻá ku ongoʻi māfana, fiemālie mo nonga pea ne u tangi ʻi he ʻofa, houngaʻia, mo e fakafetaʻi koeʻuhí ko e ʻEikí mo ʻEne misiona ʻo e ʻofá mo e ʻaloʻofá. Naʻá ku fakatokangaʻi ʻi he taimi pē ko iá ko ha fakamoʻoni fakalaumālie eni mei he langí . . . ko e meʻa ko ia naʻá ku lau mo ongoʻí naʻe moʻoni mo haʻu ia mei he ʻOtuá.

Ne toe foki mai ʻa e ngaahi ongo fakaʻofoʻofa ne u aʻusia mo e ongo faifekaú ʻi he ʻaho kimuʻá, ʻi heʻeku nofo toko tahá. Naʻe fakafoʻituitui mo mālohi ʻa e ueʻi ʻa e Laumālie Māʻoniʻoní. Ne ʻikai ke u loto ke ngata ʻa e momeniti mahuʻinga ko ʻení. Naʻá ku ʻiloʻi leva heni ʻa e ʻuhinga ʻo e fakahā fakatāutahá. ʻI he taimi kotoa pē naʻá ku vahevahe ai ʻa e aʻusia ko ia ʻi he taʻu ʻe 40 kuo hilí, ʻoku fakafonu hoku lotó ʻe he fakamoʻoni fakapapau ʻo e Laumālie Māʻoniʻoní.

Naʻá ku maʻu foki mo ha aʻusia ʻe taha ʻi he taimi naʻá ku kei hoko ai ko ha pēteliake fakasiteikí. Naʻá ku ofo pea mātuʻaki loto-maʻulalo ke maʻu fakahā mei he Laumālie Māʻoniʻoní ʻi he taimi kotoa pē naʻá ku hilifaki ai hoku ongo nimá ki he ngaahi ʻulu ʻo e kāingalotu ne nau omi ke maʻu honau tāpuaki fakapēteliaké. Ne tō loloto ʻi hoku ʻatamaí ʻa e ueʻi fakalaumālie mahino ne u maʻu ʻi he taimi kotoa pē, pea malava ai ke u tāpuakiʻi ʻa e tokotaha takitaha ʻaki ʻa e ngaahi tāpuaki ne finangalo ki ai ʻa e ʻOtua ko ʻenau Tamaí, ke nau maʻú. Ko hoku fatongiá ke fakafanongo fakalelei . . . pea fakalea ʻa e meʻa ne u maʻú.

Neongo ʻoku kehekehe ʻa e ongo aʻusia ko ʻení, ka ko e tefitoʻi meʻa mahuʻingá, naʻá ku fie maʻu ha fakahā mei he ʻOtuá ke akoʻi, fakahinohinoʻi mo fakafiemālieʻi au; pea naʻá ku tui te Ne tāpuekina au.

Naʻe akoʻi kitautolu ʻe hotau palōfita moʻui, ko Palesiteni Lāsolo M. Nalesoní, ki he tefitoʻi moʻoni ʻo e fakahaá, ʻi he Konifelenisi Lahi ʻi ʻEpeleli ʻo e taʻu 2020. Naʻá ne pehē:

“Naʻe fokotuʻu ʻe he Palōfita ko Siosefa Sāmitá ha sīpinga maʻatautolu ke muimui ki ai ʻi hono tali ko ia ʻetau ngaahi fehuʻí. ʻI hono tataki ia ki he talaʻofa ʻa Sēmisi, kapau te tau masiva ʻi he potó te tau lava ʻo kole ki he ʻOtuá, naʻe ʻoatu fakahangatonu ʻe he kiʻi talavou ko Siosefá ʻa ʻene fehuʻí ki he Tamai Hēvaní. Naʻá ne fekumi ki ha fakahā fakataautaha, pea naʻe kamataʻi ʻe heʻene fekumí ʻa e kuonga fakakosipeli ko ʻení.

“ʻI he founga tatau, ko e hā ʻe ʻomi ʻe hoʻo fekumí maʻau ʻi ha founga tatau? Ko e hā e poto ʻokú ke masiva aí? Ko e hā ha meʻa ʻokú ke ongoʻi ʻoku fie maʻu fakavavevave ke ke ʻilo mo mahinoʻí. Muimui ki he tā sīpinga ʻa e Palōfita ko Siosefa Sāmitá. Kumi ha feituʻu longonoa te ke lava ʻo toutou ʻalu ki ai. Fakavaivaiʻi koe ʻi he ʻao ʻo e ʻOtuá. Tuku hake ho lotó ki hoʻo Tamai Hēvaní. Tafoki kiate Ia ki ha ngaahi tali mo ha fakafiemālie.

“Lotu ʻi he huafa ʻo Sīsū Kalaisí fekauʻaki mo hoʻo ngaahi hohaʻá, manavasiʻí, mo ho ngaahi vaivaí—ʻio, ʻa e ngaahi fakaʻānaua ʻo ho lotó. Peá ke fakafanongo leva! Tohi e ngaahi fakakaukau ʻoku haʻu ki ho ʻatamaí. Hiki hoʻo ngaahi ongó pea fakahoko ʻa e meʻa naʻe ueʻi koe ke ke fakahokó. ʻI hoʻo toutou fai ʻeni ʻi he ʻaho ki he ʻaho, māhina ki he māhina, taʻu ki he taʻú, te ke “tupulaki ʻi he tefitoʻi moʻoni ʻo e fakahaá”.³