Kau Atu ʻa e Kau Māʻoniʻoni ʻi he Ngaahi ʻAho Kimui Ní ki he ʻAho Lotu mo e ʻAukai Fakafonua ʻa Tongá

Naʻe fakaafeʻi ʻa e kau tangataʻifonua mo e kau fefineʻifonua kotoa ʻi he ʻotu motu ʻo e puleʻanga Tongá ʻi he Pasifikí ke kau ʻi ha ʻAho Lotu mo e ʻAukai Fakafonua ʻi he Sāpate ʻaho 28, Fēpuelí.

Naʻe fakamaʻu ʻa e ʻaukai fakafonuá ʻe he Siasi Uesiliana Tauʻatāina ʻo Tongá ʻi he Kolisi Tohitapu ko Siaʻatoutaí, ʻa ia naʻe tataki ʻe he Sekelitali Lahi ʻo e Siasí ʻi he efiafi Tokonakí.

Naʻe vete ʻa e ʻaukaí ʻaki ha fakataha lotu ʻi he hoʻatā Sāpaté ʻi he ʻApiako Māʻolunga ko Liahoná ofi ki Nukuʻalofa, Tonga.

Naʻe kole ʻe he Puleʻanga Tongá ki he kau taki mei he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ke nau tataki ʻa e ouaú.

Naʻe kau atu ki he fakatahaʻangá ha toko 200 ʻa ia ne kau ai ʻa e Palēmia ʻo Tongá, Honourable Faifekau Toketā Pōhiva Tuʻiʻonetoa, mo e kau mēmipa ʻo e kapinetí, kau taki māʻolunga ʻo e puleʻangá, kau nōpelé mo e kau taki mei he ngaahi tui fakalotu kehekehe.

Naʻe fakamatalaʻi ʻe ʻEletā ʻĪnoke Fotu Kupu, ko e Fitungofulu Fakaʻēlia ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻa e taumuʻa ʻo e feinga lotu mo e ʻaukai fakafonua fakamāhina ko ʻení.

Naʻá ne pehē, “ʻOku mau kole ki he Tamai Hēvaní ke haofakiʻi homau kakaí, ʻi Tongá ni pea mo tuʻapuleʻanga mei he COVID-19; ke tāpuekina homau toʻu tupú ʻi honau ngaahi faingataʻaʻia fakasōsialé mo e fakaakó; ke tāpuekina homau Tuʻí, Palēmiá pea mo e kau taki homau Puleʻangá pea ke tāpuekina foki mo homau ngaahi fāmili Tonga ʻi Tongá ni pea mo tuʻapuleʻangá ʻi honau ngaahi faingataʻaʻia fakasōsialé mo e fakaʻekonōmiká.”

Naʻe fakahoko ʻe Palēmia Tuʻiʻonetoa ʻa e lea talitali ʻi he fakataha lotú, pea muimui atu ai ha ngaahi pōpoaki mei he kau taki fakalotofonua ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

Naʻe fakahā ʻe he Palēmiá ʻene loto-houngaʻia moʻoni ki he kau taki ʻo e ngaahi tui fakalotu kotoa pē ʻi heʻenau poupou ki he ʻaukai fakamāhina ʻa e puleʻangá.

Naʻe fakamafola hangatonu ʻa e polokalamá ʻi he TV Tongá pea pehē ki he ʻinitanetí ʻi he uepisaiti ʻa e Komisoni Fakamafola Lea ʻa Tongá.

Ne hili ʻa e fakatahá pea hoko atu ha ʻaho ngāue tokoni fakafonua naʻe ui ko e “Haʻu ʻo Tokoni” ʻi he ʻaho Tokonaki 27 ʻo Fēpuelí ʻa ia ne kau fakataha atu ʻa e kāingalotu mo e ngaahi kaungāmeʻa ʻo e Siasí mei he ngaahi siteiki (ngaahi kulupu ʻo e ngaahi fakatahaʻanga) kotoa ʻe 21 ʻo e Siasí ʻi Tongá ʻi ha ngaahi ngāue hangē ko e fakamaʻa mo e hiko veve ʻi he ngaahi feituʻu fakapuleʻangá; vali ʻo e ʻū ʻapiakó, holo fakakoló mo e ngaahi falelotú; fakamaʻa ʻo e ngaahi faʻitoká; fakaleleiʻi ʻo e ngaahi ʻaá; kosi ʻo e musié; pea mo tānaki ʻa e ʻū meʻalele motuʻá mo e meʻangāué.

Naʻe kau atu ki he ngaahi ngāue tokoni fakakoló ha kāingalotu ʻe laungeau mei he ngaahi siasi kehekehe, pea pehē foki ki honau kau takí.

ʻIkai ngata aí, ne ngāue fakataha ʻa e kau taki tokolahi ʻo e puleʻangá mo e koló mo e kau taki ʻo e Kau Māʻoniʻoni ʻi he Ngaahi ʻAho Kimui Ní, ke fokotuʻutuʻu ʻa e ngaahi ngāue kehekehe ko ʻení.