« បងប្អូនប្រុស និងបងប្អូនស្រីក្នុងព្រះអម្ចាស់ » លីអាហូណា ខែ កញ្ញា ឆ្នាំ ២០២៣ ។
បងប្អូនប្រុស និងបងប្អូនស្រី ក្នុងព្រះអម្ចាស់
« ដ្បិតព្រះទ្រង់ស្រឡាញ់មនុស្សលោកដល់ម្ល៉េះបានជាទ្រង់ប្រទានព្រះរាជបុត្រាទ្រង់តែមួយ »—ហើយទ្រង់បានប្រទានយើងឲ្យគ្នាទៅវិញទៅមក ។
ព្រះអង្គសង្រ្គោះបានធ្វើដំណើរពីក្រុងកាពើណិមទៅទីក្រុងមួយដែលមានឈ្មោះថា ណាអ៊ីន ។ នៅជិតរបងទីក្រុង ទ្រង់បានឃើញពីបុណ្យសពមួយ ។ ជាការស្លាប់របស់កូនតែម្នាក់ដែលមិនអាចទទួលយកបានបន្សល់ទុកឲ្យស្ត្រីមេម៉ាយទុរគតរូបនេះរស់នៅតែម្នាក់ឯង ។
« កាលព្រះអម្ចាស់បានឃើញ នោះទ្រង់មានព្រះហឫទ័យក្តួល អាណិតអាសូរ ដល់គាត់ណាស់ ក៏មានបន្ទូលថា កុំយំអី ។
« រួចទ្រង់យាងចូលទៅពាល់ក្តារមឈូស ឯពួកអ្នកសែងក៏ឈប់ ។ ហើយទ្រង់មានបន្ទូលថា អ្នកកំឡោះអើយ ខ្ញុំបង្គាប់អ្នកថា ចូរក្រោកឡើង » ។
នៅពេលកំឡោះរូបនោះបានក្រោកឡើង ហើយចាប់តាំងនិយាយ ព្រះយេស៊ូវ « ប្រគល់ដល់ម្តាយវិញ » ( សូមមើល លូកា ៧:១១–១៥ បានបន្ថែមការបញ្ជាក់ ) ។
ពេញមួយការបម្រើរបស់ ទ្រង់ មិនថាទៅបម្រើមនុស្សម្នាក់ ឬមនុស្ស ៩៩ នាក់ទេ១ ព្រះអង្គសង្រ្គោះបានធ្វើជាគំរូយ៉ាងឥតខ្ចោះពីការចេះមានចិត្តអាណិតអាសូរ សេចក្តីជំនឿ សេចក្តីសង្ឃឹម ចិត្តសប្បុរស សេចក្តីស្រឡាញ់ ការអភ័យទោស សេចក្តីមេត្តាករុណា និងការបម្រើ ។២ ទ្រង់អញ្ជើញយើងម្នាក់ៗឲ្យ « ចូរមកតាមខ្ញុំចុះ » ( លូកា ១៨:២២ ) និងដើម្បីធ្វើជា « ត្រូវឲ្យបានដូចជាយើង » ( នីហ្វៃទី៣ ២៧:២៧ ) ។៣
« ដូចជាយើង »
ដើម្បីធ្វើតាមគំរូដ៏ឥតខ្ចោះរបស់ព្រះអង្គសង្រ្គោះ និងប្រែក្លាយដូចជាទ្រង់ យើងទទួលយកការអញ្ជើញរបស់ទ្រង់ឲ្យដើរជាមួយទ្រង់នៅលើផ្លូវនៃសេចក្តីសញ្ញារបស់ទ្រង់ ( សូមមើល ម៉ូសេ ៦:៣៤ ) ។ ជួនកាល យើងឲ្យនិយមន័យផ្លូវនៃសេចក្តីសញ្ញា តាមរយៈពិធីបរិសុទ្ធនៃសេចក្តីសង្គ្រោះ និងភាពតម្កើងឡើង ដែលវាគូសបញ្ជាក់—ពិធីបុណ្យជ្រមុជទឹក និងពិធីបញ្ជាក់ ដើម្បីទទួលអំណោយទាននៃព្រះវិញ្ញាណបរិសុទ្ធ ហើយក្លាយជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ការតែងតាំងបព្វជិតភាពម៉ិលគីស្សាដែក ( សម្រាប់បងប្អូនប្រុស ) អំណោយទាននៅក្នុងព្រះដំណាក់របស់ព្រះអម្ចាស់ ( សម្រាប់យើងម្នាក់ៗជាបុគ្គល ) និងការផ្សារភ្ជាប់នៅព្រះវិហារបរិសុទ្ធ ។
ពិធីបរិសុទ្ធមួយដែលចាំបាច់សម្រាប់សេចក្ដីសង្គ្រោះ និងភាពតម្កើងឡើងគឺជាទង្វើដ៏ពិសិដ្ឋមួយដែលធ្វើឡើងដោយសិទ្ធិអំណាចបព្វជិតភាពដែលបានផ្តល់ការអនុញ្ញាត ដែលបង្រៀនយើងអំពីសេចក្ដីសញ្ញាដែលពិធីបរិសុទ្ធត្រូវបានភ្ជាប់ ។ តាមរបៀបខ្លះ យើងអាចគិតពីពិធីបរិសុទ្ធនៃសេចក្តីសង្គ្រោះ និង ភាពតម្កើងឡើងជាទង្វើខាងក្រៅ ដែលនាំមកនូវទំនាក់ទំនងដ៏ស្អិតរមួតជាមួយព្រះ និងព្រះរាជបុត្រាដ៏បរិសុទ្ធរបស់ទ្រង់មកក្នុងជីវិតរបស់យើង តាមរយៈសេចក្តីសញ្ញា ។
យើងម្នាក់ៗក្នុងនាមជាបុត្រា ឬបុត្រីជាទីស្រឡាញ់របស់ព្រះ ធ្វើសេចក្តីសញ្ញាដ៏ពិសិដ្ឋផ្ទាល់ខ្លួនរបស់យើងជាមួយព្រះ ។ យើងធ្វើដូច្នេះរៀងៗខ្លួន នៅក្នុងនាមយើងផ្ទាល់ ម្នាក់ម្តងៗ ។ ទំនាក់ទំនងនៃសេចក្ដីសញ្ញានេះជាមួយនឹងព្រះផ្ដល់ឲ្យយើងម្នាក់ៗនូវអំណាច សេចក្ដីសង្ឃឹម និងការសន្យា ។ សេចក្តីសញ្ញាទាំងនេះអាចផ្លាស់ប្តូរធម្មជាតិរបស់យើង បន្សុទ្ធបំណងប្រាថ្នា និងសកម្មភាពរបស់យើង ហើយជួយយើងសម្រាតភាពខាងសាច់ឈាមជាបុរស និងស្រ្តី ចេញ នៅពេលយើងធ្វើតាមសេចក្ដីទូន្មាននៃព្រះវិញ្ញាណបរិសុទ្ធ ។ តាមរយៈសេចក្ដីសញ្ញា តាមរយៈដង្វាយធួននៃព្រះគ្រីស្ទជាព្រះអម្ចាស់ យើងម្នាក់ៗអាចក្លាយជាបុត្ររបស់ព្រះ—« ងាយប្រដៅ ស្លូតបូត ទាបរាបសា អត់ឱន ពោរពេញទៅដោយសេចក្ដីស្រឡាញ់ » ( ម៉ូសាយ ៣:១៩ ) ។
ការបម្រើជាមួយគ្នាដោយសេចក្តីសញ្ញា
« ដ្បិតព្រះទ្រង់ស្រឡាញ់មនុស្សលោកដល់ម្ល៉េះបានជាទ្រង់ប្រទានព្រះរាជបុត្រាទ្រង់តែមួយ » ( យ៉ូហាន ៣:១៦ )—ហើយទ្រង់ប្រទានយើងឲ្យគ្នា ។ សេចក្ដីសញ្ញានៃការមានចំណែក—ដើម្បីផ្សារភ្ជាប់ជាមួយព្រះ និងគ្នាទៅវិញទៅមកដោយសេចក្ដីសញ្ញា—អញ្ជើញយើងឲ្យបំពេញអត្តសញ្ញាណ និងគោលបំណងដ៏ទេវភាពរបស់យើង ដោយការទំនាក់ទំនងជាមួយស្ថានសួគ៌ និងដោយការផ្សារភ្ជាប់ និងបង្កើតសហគមន៍នៃពួកបរិសុទ្ធ នៅពេលយើងស្រឡាញ់ និងបម្រើគ្នាទៅវិញទៅមក និងអ្នកដែលនៅជុំវិញយើង ។ ក្នុងការផ្តល់ឱកាសសម្រាប់ការប្តេជ្ញាចិត្តធ្វើតាមសេចក្តីសញ្ញា និងសេចក្តីសញ្ញានៃការមានចំណែក ព្រះជាម្ចាស់មិនរើសមុខមនុស្សណាទេ ។ ទ្រង់អញ្ជើញយើងម្នាក់ៗ ទាំងស្ត្រី និងបុរស ដែលបានរៀបការ ឬមិនទាន់រៀបការ ទោះជាមានប្រវត្តិ និងកាលៈទេសៈបែបណាក៏ដោយ ឲ្យមករកទ្រង់ និងរកគ្នាទៅវិញទៅមកដោយសេចក្ដីសញ្ញា ។
នៅពេលយើងមានចំណែកនៅក្នុងសេចក្តីសញ្ញារបស់ព្រះអម្ចាស់ នោះយើងក៏មានចំណែកនៅក្នុងសេចក្តីសញ្ញាចំពោះគ្នាទៅវិញទៅមកដែរ ។ រឿងអស្ចារ្យទាំងឡាយកើតឡើងនៅពេលយើងស្រឡាញ់ព្រះអម្ចាស់ និងសហការ ប្រឹក្សាជាមួយគ្នា និងបម្រើគ្នាទៅវិញទៅមក ។ ការបម្រើសេចក្តីសញ្ញាពង្រឹងទំនាក់ទំនងរបស់យើងជាមួយព្រះអម្ចាស់ និងគ្នាទៅវិញទៅមក ។ ការណ៍នេះរួមបញ្ចូលទំនាក់ទំនងផ្ទាល់ខ្លួនរបស់យើងជាមួយព្រះវរបិតាសួគ៌ ក្រុមគ្រួសារ ក្រុមជំនុំសាសនាចក្រ សហគមន៍ និងជំនាន់គ្រួសារ ។ នៅពេលយើងរស់នៅតាមសេចក្តីសញ្ញារបស់យើង នោះយើងលែងគិតតែពីខ្លួនឯង ហើយស្វែងរកការផ្តោតដ៏ប្រសើរបំផុតរបស់យើងទៅលើព្រះគ្រីស្ទ ។
ផែនការនៃសុភមង្គលដ៏ទេវភាពរបស់ព្រះ
នៅក្នុងផែនការនៃសុភមង្គលដ៏ទេវភាពរបស់ព្រះ ប្រធាន រ័សុល អិម ណិលសុន បានមានប្រសាសន៍ថា « ស្ថានសួគ៌គឺបើកចំពោះ ស្ត្រី ដែលត្រូវបានប្រទានឲ្យនូវព្រះចេស្ដារបស់ព្រះតាមរយៈសេចក្ដីសញ្ញាបព្វជិតភាពរបស់ពួកគេ ដូចជាបុរសដែលកាន់បព្វជិតភាពផងដែរ » ។៤
ប្រធាន ខាំមៀល អិន ចនសុន ប្រធានសមាគមសង្គ្រោះទូទៅបានកត់សម្គាល់ថា « យើងមានសិទ្ធិទទួលយកអំណាចបព្វជិតភាពដោយការមានគុណធម៌ស័ក្តិសមផ្ទាល់ខ្លួន » ។៥ ដោយដកស្រង់ពីប្រធាន ណិលសុន គាត់បានថ្លែងថា ៖ « យើងត្រូវការស្រ្តីដែលដឹងពីរបៀបដើម្បីទទួលបានអំណាចបព្វជិតភាពដែលព្រះប្រទានឲ្យដល់អស់អ្នករក្សាសេចក្តីសញ្ញា » ។៦ អស់អ្នកដែលរក្សាសេចក្តីសញ្ញាដែលស្វែងរក និងរស់នៅដោយសេចក្តីជំនឿ បន្ទាបខ្លួន និងឧស្សាហ៍ព្យាយាម ប្រធាន ចនសុន បានបង្រៀនថា អាចទទួលបានការណែនាំ ការបំផុសគំនិត អំណោយទាននៃព្រះវិញ្ញាណ វិវរណៈ និង « ជួយ និងពង្រឹងដើម្បីក្លាយកាន់តែដូចជាព្រះយេស៊ូវគ្រីស្ទ និងព្រះវរបិតាសួគ៌ » ។៧ នៅពេលយើងម្នាក់ៗផ្តល់អំណោយទានពិសេសរបស់យើងក្នុងភាពជាដៃគូជាមួយព្រះអម្ចាស់ និងជាមួយគ្នាទៅវិញទៅមក នោះយើងបង្កើត « រូបកាយតែ ១ » ( កូរិនថូស ទី១ ១២:១៣ ) ។
នៅក្នុងផែនការរបស់ព្រះ ម្តាយ និងឪពុកទាំងឡាយគឺជាដៃគូ និងជាជំនួយ ។ យើងជួយគ្នាទៅវិញទៅមកជាដៃគូស្មើភាពគ្នាក្នុងសេចក្ដីស្រឡាញ់ និងសេចក្ដីសុចរិត ដើម្បីចិញ្ចឹមបីបាច់ថែរក្សាគ្នាទៅវិញទៅមក និងក្រុមគ្រួសាររបស់យើង ។ ភាពបរិសុទ្ធនៃគំនិត និងអាកប្បកិរិយា គឺចាំបាច់ដើម្បីទទួលវិវរណៈ និងការបំផុសគំនិតដែលស្ត្រី និងបុរសត្រូវការ ។ នៅក្នុងផ្ទះរបស់ពួកគេ ជាឪពុក និងជាស្វាមីគឺត្រូវធ្វើជាអធិបតីដោយសុភាពរាបសារ ស្លូតបូត និងក្ដីស្រឡាញ់ដោយមិនលាក់លៀម—គុណសម្បត្តិសុចរិតដែលបុរស និងស្ត្រីត្រូវការក្នុងគ្រប់ទំនាក់ទំនងរបស់យើង ។៨
ស្ថានសួគ៌ទួញយំនៅពេលដែលមានការបំពាន ការគ្រប់គ្រង ឬការបង្ខិតបង្ខំគ្រប់ប្រភេទដោយបុរស ឬស្ត្រីក្នុងទំនាក់ទំនងណាមួយ ។ ដោយការលួងលោម និងដោយការអត់ធ្មត់ ដោយចិត្តល្អ និងដោយការចេះដឹងពេញទី គឺជាគុណសម្បត្ដិដូចជាព្រះគ្រីស្ទ ដែលយើងម្នាក់ៗស្វែងរក—មិនថាយើងរៀបការហើយ នៅលីវ ស្ត្រីមេម៉ាយ ឬលែងលះគ្នានោះទេ ( សូមមើល គោលលទ្ធិ និងសេចក្តីសញ្ញា ១២១:៤១–៤២ ) ។ នេះគឺដោយសារតែគោលជំហររបស់យើងនៅចំពោះព្រះអម្ចាស់ និងនៅក្នុងសាសនាចក្ររបស់ទ្រង់ត្រូវបានកំណត់ដោយបុគ្គលិកលក្ខណៈផ្ទាល់ខ្លួន និងសេចក្តីសុចរិតរបស់យើងក្នុងការរក្សាសេចក្តីសញ្ញា ។
ការប្រឹក្សាក្នុងក្រុមប្រឹក្សា
ក្នុងស្មារតីដូចគ្នានេះ នៅក្នុងសាសនាចក្ររបស់ព្រះអម្ចាស់ យើងប្រឹក្សាក្នុងក្រុមប្រឹក្សា នៅពេលយើងបម្រើជាមួយគ្នា ។ នៅក្នុងក្រុមប្រឹក្សារបស់យើង ថ្នាក់ដឹកនាំស្វែងរកការយល់ដឹង និងគំនិតមកពីមនុស្សទាំងអស់ ។ ខ្ញុំមានអំណរគុណចំពោះបុរសស្ត្រីដ៏អស្ចារ្យម្នាក់ៗ ដែលខ្ញុំមានអភ័យឯកសិទ្ធិបម្រើកៀកស្មាគ្នានៅក្នុងក្រុមប្រឹក្សាប្រតិបត្តិរបស់សាសនាចក្រ ។ បងប្អូនប្រុសស្រី ដ៏អស្ចារ្យទាំងនេះជួយប្រមូលសាសន៍អ៊ីស្រាអែលតាមរយៈការបម្រើជាអ្នកផ្សព្វផ្សាយសាសនា រៀបចំយើងឲ្យជួបព្រះតាមរយៈបព្វជិតភាព និងសេវាកម្មគ្រួសារ បង្រួបបង្រួមក្រុមគ្រួសាររហូតដល់អស់កល្បតាមរយៈការប្រើផ្នែកព្រះវិហារបរិសុទ្ធ និងពង្សប្រវត្តិ ហើយការផ្តល់ការងារបម្រើដល់ជនខ្វះខាតតាមរយៈការបម្រើផ្នែកសុខុមាលភាព និងខ្លួនទីពឹងខ្លួន ។
នៅក្នុងករណីនីមួយៗ យើងទទួលបានការសម្រេចចិត្តប្រសើរជាង និងទទួលបានជោគជ័យដ៏ធំនៅក្នុងការបម្រើរបស់ព្រះអម្ចាស់ នៅពេលយើងឲ្យតម្លៃលើការរួមចំណែករបស់គ្នាទៅវិញទៅមក និងធ្វើការជាមួយគ្នា ជាបងប្អូនប្រុសស្រីនៅក្នុងកិច្ចការរបស់ទ្រង់ ។
ស្រដៀងគ្នានេះដែរ ខ្ញុំមានអំណរគុណដែលនៅក្នុងស្តេក និងវួដរបស់យើង ថ្នាក់ដឹកនាំបងប្អូនប្រុសស្រី និងសមាជិករួបរួមក្នុងកិច្ចការនៃសេចក្ដីសង្គ្រោះ និងភាពតម្កើងឡើង ។ នៅទូទាំងសាសនាចក្រ ក្រោមការដឹកនាំរបស់អ្នកដឹកនាំបេសកកម្មដែលខិតខំ ក្រុមប្រឹក្សាថ្នាក់ដឹកនាំបេសកកម្ម រួមទាំងការបំពាក់បំប៉នអែលឌើរ និងស៊ីស្ទើរដែលដឹកនាំពួកអ្នកផ្សព្វផ្សាយសាសនារបស់យើង ដែលការងារ និងការទទួលខុសត្រូវទាំងនោះគឺមានតម្លៃ និងចាំបាច់ ។ បព្វជិតពួកបរិសុទ្ធថ្ងៃចុងក្រោយនៅផ្នែកយោធាសហរដ្ឋអាមេរិក ទាំងមន្ត្រីបុរស និងស្ត្រីដែលទទួលស្គាល់ដោយសាសនាចក្រ ផ្ដល់ពរដល់អស់អ្នកដែលបម្រើនៅគ្រប់ការបម្រើនៅតាមអង្គភាពផ្សេងៗ ។៩ នៅក្នុងការងារបម្រើ យុវជន និងយុវនារីរបស់យើងមានឱកាស និងត្រូវការការបម្រើ ។ នៅក្នុងការបម្រើរបស់យើង យើងទាំងអស់គ្នាឈរជាមួយគ្នា ។
របៀបមួយដែលយើងឈរជាសាក្សីនៃព្រះ គឺដើម្បីបម្រើជាសាក្សីនៃពិធីបរិសុទ្ធនៃដំណឹងល្អដែលបានស្ដារឡើងវិញ ។ បងប្អូនស្រី និងបងប្អូនដែលឈរជាសាក្សីសម្រាប់ពិធីបុណ្យជ្រមុជទឹក ទាំងអ្នកនៅរស់ និងអ្នកដែលបានស្លាប់ទៅ ។ បងប្អូនប្រុស និងបងប្អូនស្រីដែលឈរជាសាក្សីសម្រាប់ពិធីបរិសុទ្ធបន្ថែមនៅក្នុងដំណាក់របស់ព្រះអម្ចាស់ ។ នៅទីនោះ នៅក្រោមកូនសោរបស់ប្រធានព្រះវិហារបរិសុទ្ធ បងប្អូនស្រីធ្វើពិធីបរិសុទ្ធដ៏ពិសិដ្ឋសម្រាប់បងប្អូនស្រី និងបងប្អូនប្រុសធ្វើពិធីបរិសុទ្ធដ៏ពិសិដ្ឋសម្រាប់បងប្អូនប្រុស ។
នៅក្នុងផែនការនៃសុភមង្គលដ៏ទេវភាពរបស់ព្រះ ប្រធាន ដាល្លិន អេក អូក ទីប្រឹក្សាទីមួយក្នុងគណៈប្រធានទីមួយបានមានប្រសាសន៍ថា « អំណាចបព្វជិតភាពផ្តល់ពរជ័យដល់យើងទាំងអស់គ្នា ។ កូនសោនៃបព្វជិតភាពដឹកនាំទាំងបុរស និងស្ដ្រី ហើយពិធីបរិសុទ្ធនៃបព្វជិតភាព និង អ្នកដឹកនាំបព្វជិតភាពជះឥទ្ធិពលលើទាំងបុរស និង ស្ដ្រីដែរ ។ … អ្នកណាក៏ដោយដែលមានតំណែង ឬការហៅមួយ បានទទួលពីអ្នកកាន់កូនសោបព្វជិតភាពដើម្បីអនុវត្តសិទ្ធិអំណាចបព្វជិតភាពក្នុងការធ្វើកាតព្វកិច្ចរបស់ខ្លួន » ។១០
នៅឲ្យខ្ពស់ជាងពិភពលោក
នៅពេលយើងខិតខំ « រួមមកតែមួយ » សូម្បីតែព្រះយេស៊ូវគ្រីស្ទក៏តែមួយនឹងព្រះវរបិតាដែរ ( យ៉ូហាន ១៧:២១ ) យើងត្រូវតែ « ប្រដាប់ខ្លួន ដោយព្រះអម្ចាស់យេស៊ូវគ្រីស្ទវិញ » ( រ៉ូម ១៣:១៤ ) ។
យើងអាចត្រូវបានញែកជាបរិសុទ្ធដោយព្រះគុណថែមលើព្រះគុណ យើងរៀន និងបង្កើតបុគ្គលិកលក្ខណៈរបស់ព្រះយេស៊ូវគ្រីស្ទ—ឲ្យកាន់តែមានសេចក្តីស្រឡាញ់ ឲ្យកាន់តែងាយចេះអត់ទោស វិនិច្ឆ័យតិចតួច កាន់តែបម្រើ និងពលិកម្មដោយស្ម័គ្រចិត្តធ្វើជាគំរូនៃសេចក្តីមេត្តាករុណាកាន់តែជ្រាលជ្រៅ និងញឹកញាប់ ។
សូមឲ្យយើងទុកចិត្តលើគោលលទ្ធិ និងគំរូរបស់ព្រះគ្រីស្ទ ដោយរីករាយនឹងសេចក្ដីពិត ហើយធ្វើជាអ្នកដើរតាមទ្រង់ដ៏រាបទាប ( សូមមើល នីហ្វៃទី២ ២៨:១៤ )—យើងម្នាក់ៗជាបុគ្គល និងជាបងប្អូនប្រុស និងបងប្អូនស្រីនៅក្នុងព្រះអម្ចាស់ ។១១