« មើលទៅព្រះដើម្បីទទួលបានគោលបំណង និងការណែនាំ » លីអាហូណា ខែ កញ្ញា ឆ្នាំ ២០២៣ ។
សម្រាប់មាតាបិតា
មើលទៅព្រះដើម្បីទទួលបានគោលបំណង និងការណែនាំ
គោរពជូនមាតាបិតា
ព្រះវរបិតាដែលគង់នៅស្ថានសួគ៌របស់យើងមិនបានបញ្ជូនយើងមកផែនដីដោយគ្មានការណែនាំនោះទេ ។ តាមរយៈអំណោយទានដ៏ទេវភាពនៃព្រះគម្ពីរ ការអធិស្ឋាន ព្យាការីដែលនៅរស់ សមាជិក និងមានអ្វីៗជាច្រើនទៀត យើងអាចមើលទៅព្រះដើម្បីទទួលបានគោលបំណង និងការណែនាំ ។ នៅពេលអ្នកអានច្បាប់ លីអាហូណា នេះ សូមពិចារណាអំពីធនធានដែលទ្រង់បានប្រទានដល់យើង ដើម្បីជួយយើងឲ្យមានជីវិតប្រកបដោយអត្ថន័យ ហើយត្រឡប់ទៅរកទ្រង់វិញនៅពេលក្រោយ ។
ការពិភាក្សាអំពីដំណឹងល្អ
តួនាទីបង្រួបបង្រួមរបស់យើងនៅក្នុងផែនការរបស់ព្រះ
អ្នកអាចអានជាក្រុមគ្រួសារនូវ កូរិនថូស ទី១ ១១:១១ ហើយពិភាក្សាអំពីអត្ថន័យរបស់ខគម្ពីរនេះ ។ សូមចែកចាយសេចក្តីថ្លែងការណ៍មកពីអត្ថបទរបស់ អែលឌើរ ហ្គើរីត ដបុលយូ ហ្គង ( ទំព័រ ៤ ) ដែលពន្យល់អំពីតួនាទីរួម ដែលបុរស និងស្ត្រីមាននៅក្នុងផែនការនៃសេចក្តីសង្គ្រោះ ។ តើភាពខុសគ្នារបស់យើងអាចបង្រួបបង្រួមយើង ជំនួសឲ្យការបែងចែកយើងដោយរបៀបណា ?
អំណាចព្យាបាលនៃសេចក្តីជំនឿ
សូមអាន ម៉ាថាយ ១៥:២១–២៨ រួមគ្នា ដែលនិយាយអំពីស្ត្រីសាសន៍កាណាន ។ ហេតុអ្វីបានជាអ្នកគិតថាសេចក្តីជំនឿរបស់នាងបាននាំទៅរកការព្យាបាលកូនស្រីរបស់នាង ? សូមអានសារលិខិតមកពីអត្ថបទរបស់ប្រធាន ខាំមៀល អិន ចនសុន ទំព័រ ៨ ដើម្បីយល់កាន់តែច្បាស់អំពីតួនាទីនៃភាពស្លូតបូត និងសេចក្តីជំនឿក្នុងការទទួលបានព្រះចេស្តារបស់ព្រះអម្ចាស់ ។
ការរំឭកប្រចាំថ្ងៃអំពីព្រះយេស៊ូវគ្រីស្ទ
សូមសួរគ្រួសារអ្នកថា តើពួកគេចងចាំព្រះអង្គសង្គ្រោះក្នុងជីវិតរបស់ពួកគេដោយរបៀបណា ? សូមអានចំណុចសំខាន់ៗមកពីអត្ថបទនៅលើ ទំព័រ ៣៨ អំពីសារៈសំខាន់នៃការចងចាំ ។ សូមពិចារណាបង្ហាញរូបភាព ឬសម្រង់សម្តីដែលរំឭកអ្នកអំពីព្រះគ្រីស្ទនៅក្នុងផ្ទះរបស់អ្នក ។
ចូរមកតាមខ្ញុំ ការកម្សាន្តសប្បាយប្រចាំគ្រួសារ
ចងចាំពរជ័យរបស់ព្រះគ្រីស្ទជារៀងរាល់ថ្ងៃ
ប៉ុលបានបង្រៀនពួកបរិសុទ្ធនៅកូរិនថូស ៖ « ព្រះគ្រីស្ទបានសុគត ដោយព្រោះបាបរបស់យើងរាល់គ្នា… ហើយថា ទ្រង់ត្រូវគេបញ្ចុះក្នុងផ្នូរ រួចដល់ថ្ងៃទី៣ នោះទ្រង់មានព្រះជន្មរស់ឡើងវិញ » ( កូរិនថូស ទី១ ១៥:៣–៤ ) ។ លោកបានលើកទឹកចិត្តពួកគេឲ្យ « កាន់ខ្ជាប់ » ( កូរិនថូស ទី១ ១៥:២ ) នូវដំណឹងល្អដែលលោកបានផ្សព្វផ្សាយដល់ពួកគេ ។ សូមអញ្ជើញគ្រួសាររបស់អ្នកឲ្យលេងល្បែងចងចាំនេះ ៖
-
សូមផ្តល់ពេលដល់មនុស្សគ្រប់គ្នាដើម្បីសរសេរចម្លើយខ្លីមួយចំពោះសំណួរខាងក្រោម ៖ តើអ្វីជាពរជ័យនៃដំណឹងល្អដែលអ្នករីករាយដោយសារដង្វាយធួនរបស់ព្រះអង្គសង្គ្រោះ ? ( ដើម្បីទទួលបានគំនិតមួយចំនួន សូមមើល កូរិនថូស ទី១ ១៥:១៩–២៩ ) ។
-
សូមប្តូរវេនចែកចាយអ្វីដែលអ្នកបានសរសេរ និងរំឭកដោយការចងចាំនូវអ្វីដែលអ្នកសរសេរពីមុនអ្នកបានសរសេរ ។
ការពិភាក្សា ៖ តើយើងអាចចងចាំបានកាន់តែច្បាស់អំពីពរជ័យដែលព្រះគ្រីស្ទបានប្រទានដល់យើងដោយរបៀបណា ? សូមពិចារណារៀបចំផែនការគ្រួសារមួយ ដើម្បីគិតអំពីរបៀបមួយជារៀងរាល់ថ្ងៃ ដែលព្រះគ្រីស្ទបានប្រទានពរដល់ជីវិតរបស់អ្នក ។