« នៅទីបំផុតក៏យល់ពីអត្ថន័យនៃការទទួលបានក្តីស្រឡាញ់ពីព្រះ » លីអាហូណា ខែ កញ្ញា ឆ្នាំ ២០២៣ ។
យុវមជ្ឈិមវ័យ
នៅទីបំផុតក៏យល់ពីអត្ថន័យនៃការទទួលបានក្តីស្រឡាញ់ពីព្រះ
ខ្ញុំបានបាត់បង់ការមើលឃើញអំណាចនៃការស្គាល់អត្តសញ្ញាណដ៏ទេវភាពរបស់ខ្ញុំ ។
រូបភាពរចនាដោយ អាលីស្សា ស្កូប៊ឺត
កាលនៅពីក្មេង គ្រួសាររបស់ខ្ញុំបានប្តូរផ្ទះពីប្រទេស ហុងគ្រី ទៅប្រទេសអាល្លឺម៉ង់ ។ ខ្ញុំរំភើបចិត្តណាស់ពីការប្តូរទៅទីនោះ ប៉ុន្តែវាបានក្លាយជាការលំបាកបំផុតក្នុងរយៈពេលប្រាំបួនឆ្នាំក្នុងជីវិតរបស់ខ្ញុំ ។
ខ្ញុំស្មុគស្មាញនឹងការរៀនភាសាអាល្លឺម៉ង់ ហើយខ្ញុំតែងតែជាមនុស្សឆាប់តូចចិត្ត កត្តាទាំងពីរនេះហើយធ្វើឲ្យខ្ញុំក្លាយជាគោលដៅដែលគេចង់សម្លុតធ្វើបាប ។ តម្លៃក្នុងខ្លួនខ្ញុំពិតជាធ្លាក់ចុះ ។ យូរៗទៅខ្ញុំមានអារម្មណ៍ថាដូចជាគ្មាននរណាស្រឡាញ់ខ្ញុំ ហើយមានក្តីសង្ឃឹមតិចតួចសម្រាប់អនាគត ។ ខ្ញុំឆ្ងល់ថាតើពិភពលោកនឹងប្រសើរយ៉ាងណា បើគ្មានរូបខ្ញុំ ហើយពេលខ្លះថែមទាំងមានគំនិតចង់ធ្វើអត្តឃាតទៀតផង ។
ប៉ុន្តែទោះជាមានការលំបាកយ៉ាងណា ខ្ញុំបានដឹងថា ជីវិតខ្ញុំកើតមកដោយមានហេតុផល ទោះបីជាខ្ញុំមិនយល់ទាំងស្រុងក្តី ។ ខ្ញុំបានដឹងថា ខ្ញុំអាចរកឃើញពន្លឺរបស់ព្រះអង្គសង្គ្រោះ សូម្បីតែក្នុងគ្រាដ៏ងងឹតបំផុតក្តី ( សូមមើល អេធើរ ១២:៤ ) ។ នៅពេលដែលអ្វីៗហាក់ដូចជាមិនដំណើរការល្អ ខ្ញុំបានដឹងពីកន្លែងដែលត្រូវស្វែងរកទ្រង់ និងអ្វីដែលទ្រង់អាចធ្វើសម្រាប់ខ្ញុំ ប្រសិនបើខ្ញុំស្វែងរកទ្រង់តាមរយៈព្រះគម្ពីរ ការអធិស្ឋាន និងព្យាយាមធ្វើជាសិស្សរបស់ទ្រង់អស់ពីសមត្ថភាព ។ ជាការពិតណាស់ការរស់នៅតាមដំណឹងល្អរបស់ទ្រង់បានផ្ដល់ឲ្យខ្ញុំនូវគ្រប់សេចក្តីសុខសាន្ត ហើយបានជួយខ្ញុំឆ្លងកាត់គ្រាដ៏អាក្រក់នេះ ។
សេចក្តីពិតដែលខ្ញុំបានមើលរំលង
នៅទីបំផុត គ្រួសារខ្ញុំ និងខ្ញុំបានផ្លាស់ទៅប្រទេសហុងគ្រីវិញ ។ ខ្ញុំបានរៀនចប់នៅថ្នាក់វិទ្យាល័យ ហើយទោះបីជាពេលវេលាដែលគេសម្លុតធ្វើបាបខ្ញុំបានកន្លងផុតទៅក្តី ក៏ខ្ញុំនៅតែខ្វះការគោរពខ្លួនឯងដដែល ។ ផលប៉ះពាល់ពីការត្រូវគេសម្លុតធ្វើបាបយ៉ាងខ្លាំងនោះពិតជាជះឥទ្ធិពលលើរូបខ្ញុំណាស់ ហើយពេលខ្លះខ្ញុំនៅតែសង្ស័យលើតម្លៃខ្លួនឯង ។
ហើយក្នុងនាមជាយុវមជ្ឈិមវ័យខ្ញុំពិតជាចង់មានទំនុកចិត្តក្នុងការសម្រេចចិត្តធំៗក្នុងជីវិត និងសម្រេចចិត្តពីអ្វីដែលខ្ញុំចង់សម្រេចបានក្នុងជីវិត ។
ខណៈដែលខ្ញុំកំពុងជួបបញ្ហានេះ ខ្ញុំមានអារម្មណ៍បានទទួលការជំរុញចិត្តឲ្យចូលរួមនៅក្នុងសន្និសីទសម្រាប់យុវមជ្ឈិមវ័យនៅលីវនៅទ្វីបអឺរ៉ុបខាងកើត ។ ខ្ញុំត្រូវការការណែនាំខាងវិញ្ញាណមួយចំនួនក្នុងជីវិតរបស់ខ្ញុំ ដើម្បីជួយខ្ញុំឲ្យដុះខាត់តម្លៃខ្លួនឯង ហើយបានអធិស្ឋានស្វែងរកចម្លើយនៅទីនោះ ។
នៅយប់មួយនៅឯសន្និសីទនោះ ដៃរបស់ខ្ញុំឡើងព្រឺសម្បុរ នៅពេលដែលអ្នកឡើងនិយាយនៅក្នុងការប្រជុំពិសេសនោះបានចាប់ផ្តើមនិយាយអំពីរបៀបដែលគេសម្លុតធ្វើបាបគាត់កាលគាត់នៅក្មេង ។ គាត់បានមានប្រសាសន៍អំពីរបៀបដែលគាត់ធ្លាប់មានអារម្មណ៍ថា គ្មានតម្លៃ និងគេមើលមិនឃើញ ។ ខ្ញុំចាប់ផ្តើមយំភ្លាម ។
គាត់បានរៀបរាប់ពីអ្វីដែលខ្ញុំបានឆ្លងកាត់ ។
អ្នកឡើងនិយាយបានបន្ត ហើយបានចែកចាយសេចក្តីពិតដែលគាត់បានលាក់ទុកក្នុងអំឡុងពេលការប្រឈមរបស់គាត់នេះ—ជាសេចក្តីពិតដែលខ្ញុំបានមើលរំលង ៖
« ខ្ញុំជាបុត្ររបស់ព្រះ » ។
ការទទួលយកអត្តសញ្ញាណដ៏ទេវភាពរបស់ខ្ញុំ
នៅពេលការប្រជុំពិសេសនេះបានបញ្ចប់ ទឹកភ្នែករបស់ខ្ញុំនៅតែហូរ ។ អ្នកឡើងនិយាយបានសង្កេតឃើញ ហើយបានឱបខ្ញុំ ។ គាត់បានប្រាប់ថា ជាធម្មតាគាត់មិនមកនិយាយដោយផ្ទាល់នៅការប្រជុំពិសេសនោះទេ ប៉ុន្តែមានអារម្មណ៍ថា មានមនុស្សម្នាក់ដែលត្រូវការស្តាប់សារលិខិតរបស់គាត់ដោយផ្ទាល់ ។
ខ្ញុំគឺជាបុគ្គលរូបនោះ ។
បទពិសោធន៍នេះបានបង្ហាញខ្ញុំពីរបៀបដែលព្រះវរបិតាសួគ៌ជ្រាបដឹងទាំងស្រុងអំពីបុត្រាបុត្រីរបស់ទ្រង់ ហើយថាទ្រង់ ជ្រាបពីរបៀបជួយដល់យើងយ៉ាងច្បាស់ ដើម្បីយើងអាចទទួលអារម្មណ៍សូម្បីគ្រាន់តែជាពន្លឺនៃសេចក្តីស្រឡាញ់ក្នុងនាមជាមាតាបិតាដ៏ឥតខ្ចោះរបស់ទ្រង់ក្តី ។ ទ្រង់ជ្រាបដឹងថាខ្ញុំត្រូវការស្ដាប់សារលិខិតរបស់អ្នកឡើងនិយាយរូបនេះ ហើយបានណែនាំខ្ញុំឲ្យនៅកន្លែងត្រឹមត្រូវនៅក្នុងពេលវេលាដ៏ត្រឹមត្រូវ ។
ខ្ញុំបានដឹងហើយពីឃ្លាថា « ខ្ញុំជាបុត្ររបស់ព្រះ » ពេញមួយជីវិតខ្ញុំ ប៉ុន្តែសេចក្តីពិតនេះបានឆ្លុះបញ្ចាំងយ៉ាងត្រឹមត្រូវក្នុងព្រលឹងខ្ញុំតែនៅពេលនោះប៉ុណ្ណោះ ។ ខ្ញុំពិតជាបានដឹងពីអត្ថន័យនៃការធ្វើជាបុត្ររបស់ព្រះដ៏ល្អឥតខ្ចោះ ដែលស្រឡាញ់យើងយ៉ាងខ្លាំង រហូតដល់ទ្រង់មានព្រះទ័យលះបង់ព្រះរាជបុត្រារបស់ទ្រង់ ដើម្បីយើងអាចរស់ឡើងវិញ និងត្រូវបានប្រោសលោះពីអំពើបាបរបស់យើង ។ តើនរណាទៅដែលស្រឡាញ់ខ្ញុំយ៉ាងខ្លាំង ខណៈពេលដែលទ្រង់មិនអាចការពារខ្ញុំពីការឈឺចាប់បាន ទ្រង់គង់នៅជាមួយខ្ញុំឲ្យឆ្លងកាត់ការឈឺចាប់នោះ ហើយអាចជួយខ្ញុំឲ្យក្រោកឡើងពីការឈឺចាប់នោះ រីកចម្រើនពីការឈឺចាប់នោះ ហើយត្រឡប់ទៅរកទ្រង់វិញ ។
ទ្រង់ស្រឡាញ់ខ្ញុំឥឡូវនេះ ហើយទ្រង់ស្រឡាញ់ខ្ញុំគ្មានដែនកំណត់អំឡុងពេលជាច្រើនឆ្នាំដែលខ្ញុំទទួលរងការសម្លុតធ្វើបាប នៅពេលដែលខ្ញុំមានអារម្មណ៍ថា គ្មាននរណាម្នាក់អាចជួយបាន ។ ឥឡូវនេះ ខ្ញុំដឹងថា វាគឺដោយសារតែខ្ញុំបានដឹងពីសេចក្តីពិតនេះយ៉ាងជ្រាលជ្រៅ ដែលខ្ញុំបានជ្រើសរើសបន្តទៅមុខ ។
ថ្មីៗនេះ ប្រធាន រ័សុល អិម ណិលសុន បានបង្រៀនអំពីអំណាចនៃការស្គាល់អត្តសញ្ញាណដ៏ទេវភាពរបស់យើង ។ លោកបានមានប្រសាសន៍ថា ៖ « ក្មួយៗជាទីស្រឡាញ់ ក្មួយៗគឺជាបុត្រាបុត្រីខាងវិញ្ញាណរបស់ព្រះពិតប្រាកដមែន ។ … ប៉ុន្តែតើសេចក្តីពិតដ៏នៅអស់កល្បនោះបានដក់ជាប់ក្នុងដួងចិត្តក្មួយៗហើយឬនៅ ? …
« ពិតណាស់ ៖ សក្ដានុពលរបស់ក្មួយៗគឺទេវភាព ។ តាមការខិតខំស្វែងរកដ៏ឧស្សាហ៍របស់ក្មួយ នោះព្រះនឹងបំភ្លឺអំពីបុគ្គលដែលក្មួយនឹងប្រែក្លាយ » ។១
ឥឡូវនេះកាលណាខ្ញុំឃើញខ្លួនឯងចង់សួរពីតម្លៃរបស់ខ្លួន ខ្ញុំតែងតែរំឭកខ្លួនឯងអំពីសេចក្តីពិតនេះថា ខ្ញុំជាបុត្ររបស់ព្រះ ហើយថាជីវិតរបស់ខ្ញុំគឺជាអំណោយទានមកពីទ្រង់ ។
សូមចងចាំថា អ្នកគឺជាបុត្ររបស់ព្រះ ។ ហើយកុំភ្លេចនូវការគាំទ្រ ការផ្លាស់ប្តូរជីវិត និងអំណាចខាងវិញ្ញាណលើសពីធម្មតា ដែលបានមកពីការទទួលយកសេចក្តីពិតនោះ ។
អ្នកនិពន្ធរស់នៅ រដ្ឋ សេហ្គីន ប្រទេសហុងគ្រី ។