ការចែកចាយព្រះគម្ពីរមរមនចំនួន ៧២ ក្បាល

ដោយ ឡូរ៉ា អេ មីគុលគី នៅរដ្ឋតិចសាស ស.រ.អា.

រាល់ពេលដែលខ្ញុំបើកមាត់និយាយអំពីព្រះគម្ពីរមរមន នោះព្រះវិញ្ញាណបរិសុទ្ធគង់នៅជាមួយខ្ញុំ ។

រូបភាព

ព្រះគម្ពីរមរមនជាច្រើនកេះ

រចនារូបភាពដោយ អេលែន ហ្គានស៍

នៅអំឡុងពេលការរាតត្បាតនៃជំងឺកូវីដ-១៩ យើងមានពរដែលមានពេទ្យថែទាំអ្នកជំងឺ ដំណាក់កាលចុងក្រោយ សម្រាប់ស្វាមីខ្ញុំ ក្លូដ នៅក្នុងផ្ទះរបស់យើង ។ នៅទីនោះ កូនៗរបស់យើង និងខ្ញុំបានជួយថែទាំគាត់ដោយក្ដីស្រឡាញ់ រហូតដល់គាត់បានលាចាកលោកទៅកាន់គេហដ្ឋានសួគ៌ារបស់យើងវិញ ។

មុននេះ ក្លូដ និងខ្ញុំបានអធិស្ឋានអំពីថាតើត្រូវធ្វើទីធ្លាស្រយ៉ាបផ្ទះរបស់យើងទៅជាបន្ទប់មន្ទីរពេទ្យ ដែលយើងអាចបំពាក់ឧបករណ៍គ្រប់យ៉ាងដែលគាត់ត្រូវការដើម្បីមានអារម្មណ៍ងាយស្រួលឬអត់ ។ យើងបានទទួលការបញ្ជាក់ថាយើងគួរតែធ្វើ ។

ដើម្បីកែលម្អទីធ្លា កម្មករជាច្រើននាក់ត្រូវចូលទៅក្នុងផ្ទះរបស់យើង ។ សំណាងល្អ ទីធ្លានោះមានទ្វារខាងក្រោយ ដូច្នេះកម្មករអាចចេញចូល ដោយមិនចាំបាច់ចូលទៅក្នុងបន្ទប់ទទួលភ្ញៀវធំនៅក្នុងផ្ទះរបស់យើងឡើយ ។ នោះគឺជាពរជ័យដ៏អស្ចារ្យនៅកំឡុងពេលរឹតត្បិតនៃកូវីដ-១៩ ។

បន្ទាប់ពីបានធ្វើបន្ទប់របស់ ក្លូដ រួចហើយ គិលានុបដ្ឋាយិកាបានមកជារៀងរាល់ថ្ងៃ ។ ពួកគេមានចិត្តល្អ ពេញដោយក្តីស្រឡាញ់ និងមានចំណេះដឹងអំពីអ្វីដែលយើងត្រូវធ្វើ ដើម្បីរក្សា ក្លូដ ឲ្យមានផាសុកភាព ។

ពេលខ្ញុំចូលរួមក្នុងសាសនាចក្រ ខ្ញុំបានរៀនថា សមាជិកសាសនាចក្រគ្រប់រូបគឺជាអ្នកផ្សព្វផ្សាយសាសនា ។^១ ដោយសារខ្ញុំចូលចិត្តចែកចាយដំណឹងល្អ ខ្ញុំបានបញ្ជាទិញព្រះគម្ពីរមរមនបីកេះ ដែលមួយកេះៗមានគម្ពីរ ២៤ ក្បាល ។ ខ្ញុំប្តេជ្ញាថានឹងឲ្យគម្ពីរមួយក្បាលទៅមនុស្សគ្រប់គ្នាដែលចូលមកក្នុងផ្ទះរបស់យើង ។

ខ្ញុំបានគូសចំណាំផ្នែកសំខាន់ៗនៃគម្ពីរនីមួយៗជាមួយនឹងនាមប័ណ្ណដែលខ្ញុំបានរចនាដែលមានរូបថតព្រះវិហារបរិសុទ្ធសលត៍ លេកដែលខ្ញុំបានថត ។ ខ្ញុំក៏បានបិទភ្ជាប់ទីបន្ទាល់របស់ខ្ញុំនៅលើទំព័រទទេនៅខាងមុខគម្ពីរនីមួយៗផងដែរ ។ បន្ទាប់មក មុននឹងជូនព្រះគម្ពីរនេះទៅឲ្យកម្មករ ឬគិលានុបដ្ឋាយិកា ខ្ញុំបានពន្យល់ពួកគេពីអ្វីទៅជាព្រះគម្ពីរមរមន ។

ខ្ញុំភ្ញាក់ផ្អើលដោយក្តីរីករាយចំពោះប្រតិកម្មរបស់ពួកគេ ។ មានតែមនុស្សម្នាក់ប៉ុណ្ណោះដែលបដិសេធមិនទទួលយកព្រះគម្ពីរនោះ ។ អ្នកផ្សេងទៀតចាប់អារម្មណ៍ស្តាប់រឿងនេះ ។ អ្នកខ្លះបានអរគុណខ្ញុំយ៉ាងខ្លាំង ដោយនិយាយថាពួកគេដឹងអំពីព្រះគម្ពីរមរមន ហើយចង់បានមួយក្បាល ។ មនុស្សជាច្រើនសប្បាយចិត្តរហូតដល់ពួកគេឱបខ្ញុំ ។

ខ្ញុំជឿថា រឿងនេះបានកើតឡើង ដោយសាររាល់ពេលដែលខ្ញុំបើកមាត់និយាយអំពីព្រះគម្ពីរមរមន នោះព្រះវិញ្ញាណបរិសុទ្ធគង់នៅជាមួយខ្ញុំ ។ ខ្ញុំមានទំនុកចិត្តថា កម្មករ និងគិលានុបដ្ឋាយិកាអាចទទួលអារម្មណ៍ពីព្រះវិញ្ញាណ ។ ខ្ញុំបានចែកព្រះគម្ពីរទាំង ៧២ ក្បាលអស់ ហើយថ្មីៗនេះខ្ញុំបានបញ្ជាទិញ ២៤ ក្បាលបន្ថែមទៀត ។