« ពិធីបុណ្យជ្រមុជទឹកនៅល្ងាចថ្ងៃសុក្រ » លីអាហូណា ខែ កញ្ញា ឆ្នាំ ២០២៣ ។
សំឡេងពួកបរិសុទ្ធថ្ងៃចុងក្រោយ
ពិធីបុណ្យជ្រមុជទឹកនៅល្ងាចថ្ងៃសុក្រ
បំណងប្រាថ្នាដើម្បីធ្វើការប្រែចិត្តរបស់ខ្ញុំបានជួយខ្ញុំស្វែងរកព្រះអង្គសង្រ្គោះ និងសាសនាចក្ររបស់ទ្រង់ ។
បន្ទាប់ពីបទពិសោធន៍ដ៏រំភើបរីករាយនៃការមកដល់សហរដ្ឋពីប្រទេសចិនដើម្បីសិក្សាផ្នែកបណ្ឌិតរបស់ខ្ញុំ ខ្ញុំបានរន្ធត់នឹងឯកសារសិក្សាធិការរបស់ខ្ញុំ ដែលខ្ញុំត្រូវអាន និងសរសេរ ។ ខ្ញុំក៏មិនប្រាកដចិត្តអំពីរបៀបទំនាក់ទំនងនឹងទីប្រឹក្សាសិក្សាធិការរបស់ខ្ញុំ ដែលបានបន្ថែមភាពតានតឹងដល់ខ្ញុំ ។ ខ្ញុំមានអារម្មណ៍ថាវង្វេង និងឯកោ ហើយខ្ញុំមិនដឹងថា ត្រូវធ្វើអ្វីនោះទេ ។
ខ្ញុំបានសន្និដ្ឋានថា អំពើខុសឆ្គងពីអតីតកាលរបស់ខ្ញុំបានធ្វើឲ្យខ្ញុំរងទុក្ខ ហើយខ្ញុំត្រូវតែប្រែចិត្ត ។ វានៅពេលពេលល្ងាច ដូច្នេះខ្ញុំបានស្វែងរក « ព្រះវិហារ » នៅលើអនឡាញ ។ ខ្ញុំបានរកឃើញថា សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ គឺជាព្រះវិហារតែមួយប៉ុណ្ណោះដែលបើកដល់ម៉ោង ៩:០០ យប់ ។ ដោយគិតចង់ប្រែចិត្តនៅឯព្រះវិហារ ខ្ញុំក៏សម្រេចចិត្តដើររយៈចម្ងាយមួយម៉ោង ។
ពេលខ្ញុំមកដល់ព្រះវិហារនៅម៉ោងប្រហែល ៦:០០ ល្ងាច ខ្ញុំបានឃើញពន្លឺភ្លើង ហើយឮសំឡេងសើច និងភ្លេងចេញពីខាងក្នុង ។ ខ្ញុំបានដើររកជុំវិញអគារ ប៉ុន្តែរកមិនឃើញទ្វារទេ ។ ខ្ញុំឃើញឪពុកលេងជាមួយកូនប្រុសក្នុងបន្ទប់មួយពីតាមបង្អួច ។ ខ្ញុំបានគោះបង្អួចដើម្បីឲ្យគាត់ចាប់អារម្មណ៍ ។ គាត់បាននាំខ្ញុំទៅមាត់ទ្វារ ស្វាគមន៍ខ្ញុំ ហើយប្រាប់ខ្ញុំថា មានគេម្នាក់កំពុងទទួលបុណ្យជ្រមុជទឹក ។
ខ្ញុំបានទៅតាមគាត់ ហើយបានចូលទៅក្នុងបន្ទប់ដែលមានបុរសម្នាក់កំពុងប្រសិទ្ធពរដល់ក្មេងប្រុសម្នាក់ដែលទើបតែបានជ្រមុជទឹក ។ កាលឈរក្បែរមាត់ទ្វារស្តាប់ពីពរជ័យនោះ ខ្ញុំមានអារម្មណ៍ថា ព្រះក៏កំពុងខ្សឹបប្រាប់ព្រះពរដល់ខ្ញុំដែរ ។ ដួងចិត្តរបស់ខ្ញុំមានភាពកក់ក្តៅ ដែលក្រោយមកខ្ញុំដឹងថា ជាព្រះវិញ្ញាណបរិសុទ្ធ ។ ខ្ញុំក៏បានឮសំឡេងមួយនិយាយថា ខ្ញុំត្រូវបានលើកលែងទោសដែរ ។
បន្ទាប់ពីពិធីបុណ្យជ្រមុជទឹក ខ្ញុំបាននៅជួបជុំជាមួយអ្នកដទៃ ទៀតហើយបានជួបមនុស្សល្អៗជាច្រើន ។ ខ្ញុំលែងឯកាទៀតហើយ ។ បុរសម្នាក់ដែលបានណែនាំខ្លួនថាជា « ប្រធានសាខា » ចាស់នៅទីនោះបានស្ម័គ្រចិត្តជូនខ្ញុំទៅផ្ទះ ។ ប៉ុន្មានខែក្រោយមក បន្ទាប់ពីរៀនមេររៀនជាមួយផ្សព្វផ្សាយសាសនា ខ្ញុំបានជ្រមុជទឹក ។
នៅថ្ងៃបុណ្យជ្រមុជទឹករបស់ខ្ញុំក្នុងឆ្នាំ ២០១៨ នៅទីក្រុង ខេមប្រីហ្គ រដ្ឋ ម៉ាសាឈូសេត បងប្រុសម្នាក់បានមានប្រសាសន៍អំពីរបៀបដែលព្រះវរបិតាសួគ៌ជាទីស្រឡាញ់របស់យើងបានរៀបចំពិធីបុណ្យជ្រមុជទឹកនៅថ្ងៃសុក្រនោះ ។ គាត់បានពន្យល់ថា ពិធីបុណ្យជ្រមុជទឹកត្រូវធ្វើឡើងនៅថ្ងៃអាទិត្យក្រោយ ប៉ុន្តែដោយសារតែការជាន់កាលវិភាគ នោះពិធីបុណ្យជ្រមុជទឹកនេះ ត្រូវបានរៀបចំនៅយប់ថ្ងៃសុក្រវិញ ។ បើគ្មានការផ្លាស់ប្តូរនោះទេ ខ្ញុំប្រហែលជាមិនដែលស្គាល់សាសនាចក្រ ព្រះអង្គសង្គ្រោះ និងព្រះវរបិតាសួគ៌របស់យើង និងបងប្អូនប្រុសស្រីរបស់ខ្ញុំនៅក្នុងដំណឹងល្អឡើយ ។