« បន្ទាប់ពីការប៉ះទង្គិចផ្លូវចិត្ត ៖ ស្ថាបនាភាពធន់ និងទទួលយកការព្យាបាល » លីអាហូណា ខែ កញ្ញា ឆ្នាំ ២០២៣ ។
បន្ទាប់ពីការប៉ះទង្គិចផ្លូវចិត្ត ៖ ស្ថាបនា ភាពធន់ និង ទទួលយក ការព្យាបាល
ការព្យាបាលកើតឡើងនៅពេលយើងស្វែងរកជំនួយពីព្រះអង្គសង្គ្រោះ ហើយបង្កើតភាពជឿជាក់លើខ្លួនឯងខាងផ្លូវចិត្ត ។
មនុស្សភាគច្រើននឹងឆ្លងកាត់ព្រឹត្តិការណ៍ដ៏ឈឺចាប់យ៉ាងហោចណាស់ម្តងនៅក្នុងជីវិតរបស់ពួកគេ ។ យើងបានឃើញការណ៍នេះនៅក្នុងជីវិតយើងផ្ទាល់ និងនៅក្នុងវិជ្ជាជីវៈរបស់យើង ។ តើអ្វីដែលបណ្តាលឲ្យប៉ះទង្គិចផ្លូវចិត្ត ? បទពិសោធន៍ដ៏លំបាកៗដូចជាគ្រោះថ្នាក់ឡានបុកគ្នា បាត់បង់ការងារ សង្គ្រាម ការរំលោភបំពានលើរាងកាយ ការរំលោភផ្លូវភេទ ការសម្លុតធ្ងន់ធ្ងរ ការបាត់បង់មនុស្សជាទីស្រឡាញ់ និងជាច្រើនទៀត ។
ការប៉ះទង្គិចផ្លូវចិត្តគឺជាការឈឺចាប់ ហើយពេលខ្លះវាអាចនឹងមានអារម្មណ៍ថាអ្នកមិនអាចមានការធូរស្បើយបានទេ ។ ប៉ុន្តែ វាជាការសំខាន់ដើម្បីដឹងថាការឈឺចាប់អាចធូរស្រាល ហើយអ្នកនឹងទទួលបានសេចក្តីសុខសាន្តម្តងទៀត ពេលអ្នកពឹងផ្អែកលើព្រះវរបិតាសួគ៌ និងព្រះអង្គសង្គ្រោះរបស់អ្នក គឺព្រះយេស៊ូវគ្រីស្ទ ។
ព្រះវរបិតាសួគ៌អនុញ្ញាតឲ្យយើងឆ្លងកាត់ការលំបាក ។ ទោះបីជាទ្រង់មិនបានតែងតាំងពីមុន បង្កើត ឬគាំទ្របទពិសោធន៍ទាំងនេះក៏ដោយ ទ្រង់អាចជួយបាន « គ្រប់ការណ៍ទាំងអស់…ផ្សំគ្នាសម្រាប់សេចក្ដីល្អដល់[ យើង ] » បើយើងទុកចិត្តលើទ្រង់ ( គោលលទ្ធិ និងសេចក្តីសញ្ញា ៩០:២៤ សូមមើលផងដែរ នីហ្វៃទី២ ៣២:៩ ) ។
យើងបានឃើញថា ការងាកទៅរកព្រះវរបិតាសួគ៌ និងព្រះអង្គសង្គ្រោះជាជំនួយ គឺមានសារៈសំខាន់នៅក្នុងដំណើរការនៃការព្យាបាល ។ សេចក្តីសុខសាន្តរបស់ពួកគេព្យាបាលខាងផ្លូវចិត្ត និងខាងវិញ្ញាណ ។ យើងដឹងថា នៅក្នុងសេចក្តីស្រឡាញ់ និងសេចក្តីអាណិតអាសូររបស់ពួកគេ អ្នកអាចរកបានកម្លាំងដើម្បីព្យាបាល ។ យើងក៏បានរកឃើញនូវបច្ចេកទេសមួយចំនួនដែលនឹងអនុញ្ញាតឲ្យអ្នកស្ថាបនាកម្លាំងផ្ទាល់ខ្លួនរបស់អ្នកហើយឈានទៅរកការព្យាបាលផងដែរ ។
មនុស្សគ្រប់រូបឆ្លងកាត់នូវព្រឹត្តិការណ៍ប៉ះទង្គិចផ្លូវចិត្តខុសៗគ្នា ។ ជាការពិតណាស់ អ្នកខ្លះអាចឆ្លងកាត់នូវព្រឹត្តិការណ៍មួយដែលជាការប៉ះទង្គិចផ្លូវចិត្ត ខណៈដែលអ្នកផ្សេងទៀតប្រហែលជាមានអារម្មណ៍មិនស្រណុកចិត្ត ។ ដោយហេតុផលនេះ សូមចងចាំថាកុំប្រៀបធៀបបទពិសោធន៍របស់អ្នកទៅនឹងអ្នកដទៃ ឬប្រើបទពិសោធន៍របស់អ្នកជាបទដ្ឋាននៃបទពិសោធន៍ឡើយ ។
ការឆ្លើយតបទៅនឹងព្រឹត្តិការណ៍ផ្សេងៗ
សាម និង លូស៊ី បានធ្វើដំណើរទៅដើរលេងជាមួយគ្នា ហើយអ្នកបើកបររថយន្តដែលពួកគេជិះនោះបានដេកលក់ ហើយបានបត់ចេញពីផ្លូវ ។ ហេតុការណ៍នេះបានធ្វើឲ្យរថយន្តរបស់ពួកគេក្រឡាប់ជាច្រើនជុំ ។ សាម មិនមានរបួសធ្ងន់ធ្ងរទេ ហើយដំបូងហាក់ដូចជាគិតថា ហេតុការណ៍នេះមិនមែនជារឿងធំដុំទេ ។ គាត់បាននៅទីនោះដើម្បីលួងលោម លូស៊ី នៅពេលនាងត្រូវរុំដៃដែលបាក់របស់នាង ។
ជាច្រើនសប្តាហ៍ក្រោយមក នៅពេលដែលមានឱកាសសម្រាប់ សាម ធ្វើដំណើរម្តងទៀត គាត់មានអារម្មណ៍ភ័យស្លន់ស្លោ ដោយគ្រាន់តែគិតអំពីរយៈពេលជាច្រើនម៉ោងនៅលើផ្លូវ ។
សាម បានឆ្លងកាត់បទពិសោធន៍បាត់បង់សតិអារម្មណ៍ដោយសារតែបទពិសោធន៍ប៉ះទង្គិចផ្លូវចិត្តនេះ ។ សាម មានការស្ទាក់ស្ទើរក្នុងការនិយាយអំពីរឿងនេះជាមួយនរណាម្នាក់ ។ ប៉ុន្តែនៅពេលគាត់និយាយជាមួយ លូស៊ី គាត់បានដឹងថា នាងធ្លាប់ជួបគ្រោះថ្នាក់ចរាចរណ៍ពីមុនមក ហើយយល់ថាគាត់មានអារម្មណ៍យ៉ាងណា ។ ពួកគេបានពិភាក្សាអំពីអ្វីដែលលូស៊ី បានរៀនពីបទពិសោធន៍ពីមុនរបស់នាង នៅពេលនាងអនុវត្តសេចក្តីជំនឿរបស់នាងលើព្រះយេស៊ូវគ្រីស្ទ អធិស្ឋានទូលសុំការណែនាំ និងទទួលបានអត្ថប្រយោជន៍ពីការប្រឹក្សានៅពេលនាងមានការលំបាក ។
ក្តីសង្ឃឹម និងការព្យាបាលតាមរយៈព្រះយេស៊ូវគ្រីស្ទ
មិនថាការប៉ះទង្គិចផ្លូវចិត្តរបស់យើងយ៉ាងណាទេ ការព្យាបាលអាចកើតឡើងតាមរយៈព្រះអង្គសង្គ្រោះ ព្រះយេស៊ូវគ្រីស្ទ ។ ដោយសារដង្វាយធួនជានិរន្តរ៍របស់ព្រះអង្គសង្គ្រោះ និងព្រះទ័យអាណិតអាសូរ និងសេចក្តីមេត្តាករុណារបស់ទ្រង់ ទ្រង់អាចព្យាបាលរបួសទាំងអស់ដែលបានជួបប្រទះនៅក្នុងជីវិតរមែងស្លាប់នេះ មិនថាការប្រោសនោះមកក្នុងជីវិតនេះ ឬជីវិតបន្ទាប់នោះទេ ។ ជួនកាល វាត្រូវការពេលយូរជាងអ្វីដែលយើងរំពឹងទុក ឬចង់បានសម្រាប់យើង—ទោះជាមានការគាំទ្រដ៏ទេវភាពរបស់ព្រះអង្គសង្គ្រោះក៏ដោយ ។ ប៉ុន្តែទ្រង់ក៏អាចព្យាបាលយើងផងដែរ ( សូមមើល នីហ្វៃទី៣ ១៧:៧ ) ។
អែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់បានបង្រៀន ៖ពន្លឺរបស់ព្រះគឺមានពិតមែន ។ ពន្លឺនេះមានសម្រាប់យើងទាំងអស់គ្នា ! វាផ្ដល់ជីវិតដល់វត្ថុសព្វសារពើ ។ វាមានអំណាចដើម្បីបង្អន់ទ្រនិចឈឺចុកចាប់នៃដំបៅដ៏ជ្រៅ ។១
គ្មាននរណាម្នាក់យល់ពីការរងទុក្ខរបស់យើងខ្លាំងដូចព្រះវរបិតាសួគ៌ និងព្រះអង្គសង្គ្រោះឡើយ ។ ព្រះអម្ចាស់ « បានយាងចុះក្រោមគ្រប់ទាំងអស់ ដោយហេតុនោះ ទើបទ្រង់យល់គ្រប់ទាំងអស់ ប្រយោជន៍ឲ្យទ្រង់អាចបានទៅជាពន្លឺនៃសេចក្ដីពិតនៅក្នុងទាំងអស់ និងតាមរយៈគ្រប់ទាំងអស់ » ( គោលលទ្ធិ និងសេចក្តីសញ្ញា ៨៨:៦ ) ។ ស៊ីស្ទើរ អេមី អេ រ៉ាយ ទីប្រឹក្សាទីមួយក្នុងគណៈប្រធានអង្គការបឋមសិក្សាទូទៅ បានបង្រៀនថា ៖
« យើងទាំងអស់គ្នាមានអ្វីមួយនៅក្នុងជីវិតយើងដែលប្រេះឆា ដែលចាំបាច់ត្រូវប៉ះប៉ូវ ជួសជុល ឬប្រោសឲ្យជា ។ នៅពេលយើងបែរទៅរកព្រះអង្គសង្គ្រោះ ពេលយើងសម្របដួងចិត្ត និងគំនិតយើងជាមួយទ្រង់ ពេលយើងប្រែចិត្ត នោះទ្រង់នឹងយាងមកកាន់យើង ‹ ដោយអំណាចប្រោសឲ្យជានៅក្នុងចំអេងស្លាបទ្រង់ » [ នីហ្វៃទី២ ២៥:១៣ ] ឱបក្រសោបយើងដោយក្ដីស្រឡាញ់ ហើយមានបន្ទូលថា ‹ មិនអីទេ ។ … យើងអាចជួសជុលវាជាមួយគ្នា ! ›
« ខ្ញុំសូមថ្លែងទីបន្ទាល់ថា ពុំមានអ្វីដែលប្រេះឆានៅក្នុងជីវិតរបស់បងប្អូនខ្លាំងហួសពីព្រះចេស្ដានៃការព្យាបាល ការប្រោសលោះ និងការជួយរបស់ព្រះយេស៊ូវគ្រីស្ទនោះទេ » ។២
គំរូពីការព្យាបាល និងរបៀបដើម្បីព្យាបាលមាននៅក្នុងព្រះគម្ពីរ—និងក្នុងជីវិតរបស់គ្រួសារ មិត្តភក្តិ និងបុព្វការីជនរបស់យើង ។ តើអ្នកតែងតាំងពីមុនរបស់អ្នកមានភាពធន់ដោយរបៀបណា ?៣
អត្តសញ្ញាណដ៏អស់កល្បរបស់យើង
នៅពេល ជូលីអូ មានអាយុ ១៣ ឆ្នាំ ពូរបស់គាត់បានរំលោភបំពានលើផ្លូវភេទគាត់ ។ យូរៗ ទៅគាត់ចាប់ផ្តើមដកខ្លួនចេញពីគ្រួសាររបស់គាត់ ហើយនៅដាច់ដោយឡែកពីគេ ។ ពេលខ្លះគាត់បានធ្វើដូចជាគ្មានរឿងអ្វីកើតឡើង ប៉ុន្តែម្តងម្កាលគាត់មានអារម្មណ៍ភ័យខ្លាចជាខ្លាំង ។ គាត់តែងតែអាចគ្រប់គ្រងជីវិតបានជានិច្ច —សូម្បីតែមានអារម្មណ៍ថា មានសុភមង្គលជាខ្លាំង ដូចជានៅពេលកូនប្រុសគាត់កើតមកក្តី ។ គាត់ក៏មានអារម្មណ៍ខូចចិត្ត ។ ឥឡូវនេះកូនប្រុសរបស់គាត់កំពុងឈានចូលវ័យដូចគ្នា នៅពេលដែល ជូលីអូ ទទួលរងការរំលោភបំពាន ហើយនៅពេល ជូលីអូ សញ្ជឹងគិតអំពីបទពិសោធន៍ដ៏មានសក្តានុពលរបស់កូនគាត់ គាត់កំពុងប្រយុទ្ធជាមួយនឹងគំនិត និងអារម្មណ៍អំពីតម្លៃខ្លួនឯង និងអត្តសញ្ញាណដ៏អស់កល្បជានិច្ចរបស់គាត់ ។
ខណៈដែលការប៉ះទង្គិចផ្លូវចិត្ត គឺជាផ្នែកមួយនៃបទពិសោធន៍រមែងស្លាប់របស់យើង វាមិនមែនជាអត្តសញ្ញាណដ៏អស់កល្បជានិច្ចរបស់យើងទេ ។ អត្តសញ្ញាណដ៏អស់កល្បជានិច្ចរបស់យើងគឺជាបុត្ររបស់ព្រះ ។ ប្រធាន រ័សុល អិម ណិលសុន បានបង្រៀន ៖
តើក្មួយៗជានរណា ?
ដំបូង ហើយសំខាន់បំផុត ក្មួយៗគឺជាបុត្ររបស់ព្រះ ។
« ទីពីរ ក្នុងនាមជាសមាជិកសាសនាចក្រ ក្មួយៗគឺជាបុត្រនៃសេចក្ដីសញ្ញា ។ និងទីបី ក្មួយៗគឺជាសិស្សរបស់ព្រះយេស៊ូវគ្រីស្ទ » ។៤
លើសពីនេះ ការប៉ះទង្គិចផ្លូវចិត្តមិនមែនជាការឆ្លុះបញ្ចាំងពីតម្លៃ ឬភាពស័ក្តិសមរបស់យើងឡើយ ។ ស៊ីស្ទើរ ចយ ឌី ចូនស៍ អតីតប្រធានអង្គការបឋមសិក្សាទូទៅបានបញ្ជាក់ពីគំនិតទាំងពីរនេះ នៅពេលគាត់បានបង្រៀនថា ៖
« តម្លៃ ខាងវិញ្ញាណមានន័យថា តម្លៃខ្លួនយើង តាមរបៀបដែលព្រះវរបិតាសួគ៌ឲ្យតម្លៃយើង ពុំមែនលោកិយឲ្យតម្លៃយើងទេ ។ …
« … ភាពស័ក្ដិសម គឺទទួលបានតាមរយៈការគោរពប្រតិបត្តិ ។ ប្រសិនបើយើងមានអំពើបាប យើងពុំសូវស័ក្ដិសម ប៉ុន្តែយើងពុំមែនគ្មានតម្លៃនោះទេ » ។៥
ការរំលោភបំពានដែល ជូលីអូ ស៊ូទ្រាំនៅក្នុងកណ្តាប់ដៃពូរបស់គាត់មិនបានផ្លាស់ប្តូរតម្លៃ និងភាពស័ក្តិសមរបស់ ជូលីអូ ទេ ។ គាត់គ្មានបាបទេ ប៉ុន្តែគាត់បានប្រឆាំងនឹងអំពើបាប ។ ពេលខ្លះ វាអាចពិបាកក្នុងការចងចាំពីតម្លៃ និងភាពស័ក្តិសមរបស់អ្នក នៅពេលគេរំលោភបំពានលើអ្នក ។ សូមចាំថា អ្នកគ្មានបាបទេ តម្លៃរបស់អ្នកមិនដែលធ្លាក់ចុះទេ ហើយអ្នកមានភាពស័ក្ដិសមដើម្បីបន្តនៅលើផ្លូវនៃសេចក្ដីសញ្ញានេះ ។
នៅពេល ជូលីអូ ចាប់ផ្តើមទុកចិត្តលើព្រះអម្ចាស់ ទ្រង់បានជួយ ជូលីអូ ឲ្យដឹងថា បទពិសោធន៍ជីវិតរមែងស្លាប់មិនផ្លាស់ប្តូរសេចក្តីស្រឡាញ់ដែលព្រះវរបិតាសួគ៌មានចំពោះយើងនោះទេ ។ ឥឡូវនេះគាត់កំពុងរៀនដើម្បីមើលពីរបៀបដែលថា ទោះបីជាមានរឿងដ៏គួរឲ្យភ័យខ្លាចបានកើតឡើងក៏ដោយ ពួកគេមិនបានផ្លាស់ប្តូរមូលដ្ឋានតម្លៃ អត្តសញ្ញាណដ៏នៅអស់កល្បជានិច្ច ឬភាពស័ក្តិសមរបស់គាត់ឡើយ ។
ការពឹងផ្អែលលើខ្លួនឯងខាងអារម្មណ៍
ការអភិវឌ្ឍភាពខ្លួនទីពឹងខ្លួនខាងផ្លូវអារម្មណ៍នឹងជួយអ្នកឲ្យប្រើធនធានផ្ទាល់ខ្លួនរឹងមាំដើម្បីទប់ទល់នឹងឧបសគ្គ និងផ្លូវអារម្មណ៍ពិបាកៗ ។ អ្នកអាចអភិវឌ្ឍភាពធន់ សមត្ថភាពក្នុងការសម្រប និងគ្រប់គ្រងការសាកល្បង រួមទាំង—ការប៉ះទង្គិចផ្លូវចិត្តផងដែរ ។
ភាពធន់ទាក់ទងនឹងការស្វែងរកការគាំទ្រ និងការណែនាំពីព្រះវរបិតាសួគ៌ និងព្រះយេស៊ូវគ្រីស្ទ ការបម្រើអ្នកដទៃ ទទួលការបម្រើពីអ្នកដទៃតាមតម្រូវការ និងសមរម្យ ។
សកម្មភាពខាងក្រោមដែលបានណែនាំដោយអ្នកប្រឹក្សាជំនាញនេះនឹងជួយអ្នកអភិវឌ្ឍភាពធន់ ៖
-
ការស្ថាបនាទំនាក់ទំនងជាមួយអ្នកដទៃ
-
ការអភិវឌ្ឈន៍សុខភាពរាងកាយ
-
ស្វែងរកគោលបំណងក្នុងជីវិត
-
បណ្ដុះគំនិតល្អៗ
-
ស្វែងរកជំនួយនៅពេលដែលអ្នកត្រូវការវា៦
១. ភ្ជាប់ទំនាក់ទំនងជាមួយអ្នកដទៃ
ទំនាក់ទំនងដែលរឹងមាំ ជារឿយៗជំរុញឲ្យមានការព្យាបាល ។ ការភ្ជាប់ទំនាក់ទំនងជាមួយអ្នកទាំងឡាយណាដែលពង្រឹងអ្នក និងលើកទឹកចិត្តអ្នកឲ្យងាកទៅរកព្រះអង្គសង្គ្រោះ និងព្រះវរបិតាសួគ៌របស់យើង អាចធ្វើឲ្យមានភាពខុសគ្នាដែលអ្នកត្រូវការដើម្បីព្យាបាលឲ្យបានទាំងស្រុង ។
សាម បានជួយដល់ លូស៊ី ដោយការចែកចាយការភ័យខ្លាច និងភាពមិនស្រណុកចិត្តរបស់គាត់ ។ ទំនាក់ទំនងនេះបានជួយគាត់ឲ្យកាន់តែយល់ដឹងនិងមានភាពធន់ ។ នាងបានជួយគាត់ឲ្យរកឃើញពីរបៀបដែលគាត់អាចព្យាបាលខាងផ្លូវអារម្មណ៍ និងខាងវិញ្ញាណ ។
សូមពិចារណាដាក់គោលដៅដើម្បីអភិវឌ្ឍទំនាក់ទំនងកាន់តែរឹងមាំជាមួយអ្នកដទៃដែលអ្នកទុកចិត្ត ។ ការងារបម្រើគឺជារបៀបមួយដែលយើងភ្ជាប់ទំនាក់ទំនងជាមួយអ្នកដទៃនៅក្នុងសាសនាចក្រ ។
២. ថែរក្សាសុខភាពរាងកាយ
ការប៉ះទង្គិចផ្លូវចិត្តមិនត្រឹមតែខាងផ្លូវចិត្តប៉ុណ្ណោះទេ ថែមទាំងផ្លូវកាយផងដែរ ។ យើងអាចដកពិសោធន៍នឹងការហត់នឿយកាន់តែខ្លាំង បេះដូងលោតញាប់ ឈឺក្បាល ឬបញ្ហាឈឺក្រពះ ឬមានអារម្មណ៍រមួល ។ រោគសញ្ញាផ្នែករាងកាយទាំងនេះមាននៅទីនោះ ដើម្បីប្រាប់យើងថាមានអ្វីខុសប្រក្រតី ហើយយើងត្រូវការពិនិត្យសុខភាពរបស់យើង ។ ដូចដែលយើងអាចធ្វើអ្វីៗដើម្បីថែទាំសុខភាពផ្លូវអារម្មណ៍របស់យើងបានប្រសើរជាងមុន យើងក៏អាចពិចារណាពីរបៀបថែរក្សាខ្លួនយើងផងដែរបន្ទាប់ពីមានការប៉ះទង្គិចផ្លូវចិត្ត ។
ជាដំបូង ស្គាល់ពីរោគសញ្ញាផ្នែករាងកាយដែលអ្នកកំពុងជួបប្រទះ ។ បន្ទាប់មកព្យាយាមរំងាប់រាងកាយរបស់អ្នក ដោយផ្តោតលើដង្ហើមរបស់អ្នក និងដកដង្ហើមមួយៗ ។ ព្យាយាមស្គាល់ពីអារម្មណ៍របស់អ្នកនៅពេលដង្ហើមអ្នកដកលឿននិងញ័រប្រៀបធៀបនឹងពេលដែលដង្ហើមអ្នកដកមួយៗនិងយឺត ។
ជួនកាលការប៉ះទង្គិចផ្លូវចិត្តអាចបណ្តាលឲ្យមានរបួសដែលដាក់ដែនកំណត់យើង អ៊ីចឹងហើយ សូមធ្វើអ្វីដែលត្រឹមត្រូវសម្រាប់រាងកាយរបស់អ្នក ។ ប៉ុន្តែការធ្វើចលនា ជាពិសេសលំហាត់ប្រាណគឺមានប្រយោជន៍ ។ អ្នកខ្លះចូលចិត្តចេញដើរទៅខាងក្រៅ ឬរត់ ខណៈអ្នកខ្លះទៀតអាចឃើញថា ការខិតខំធ្វើគម្រោងអ្វីមួយឲ្យកាន់តែខ្លាំងអាចជួយបាន ។
សូមចងចាំ ពាក្យសម្ដីនៃប្រាជ្ញាវាងវៃ ( សូមមើល គោលលទ្ធិ និង សេចក្ដីសញ្ញា ៨៩ ) ។ ការព្យាយាមបិទបាំងការឈឺចាប់ដោយប្រើអាកប្បកិរិយា ឬសារធាតុដែលមិនមានប្រយោជន៍គឺហាក់ដូចជា« ការយកបង់រំរបួសមកបិទរបួសដែលមុតជ្រៅ » ។៧ ជួយរាងកាយរបស់អ្នកគ្រប់គ្រងភាពតានតឹង និងការឈឺចាប់ ជាជាងបិទបាំងវា ។
៣. ការស្វែងរកគោលបំណង និងអត្ថន័យ
គោលបំណងចម្បងរបស់យើងក្នុងជីវិតគឺដើម្បីរៀបចំខ្លួនត្រឡប់ទៅរស់នៅជាមួយនឹងព្រះបិតាសួគ៌របស់យើង ( សូមមើល អាលម៉ា ១២:២៤ ) ។ ការប៉ះទង្គិចផ្លូវចិត្តអាចបិទបាំងគោលបំណងនេះ និងរារាំងយើងពីការមើលឃើញសក្តានុពលរបស់យើង ។ ការស្វែងរកគោលបំណងជាក់លាក់មួយក្នុងសកម្មភាពប្រចាំថ្ងៃរបស់យើងអាចជួយយើងឆ្ពោះទៅមុខ ហើយថែមទាំងចងចាំគោលបំណងសំខាន់របស់យើងក្នុងជីវិតទៀតផង ។ ជូលីអូ ចាប់ផ្តើមឆ្ពោះទៅមុខ ហើយស្វែងរកគោលបំណងពីសកម្មភាពប្រចាំថ្ងៃរបស់គាត់ នៅពេលដែលគាត់ដឹងថា គាត់ចង់ជួយកូនរបស់គាត់ ។
ការស្វែងរកអត្ថន័យពីការប៉ះទង្គិចផ្លូវចិត្តអាចជួយយើងឲ្យមើលឃើញផ្លូវឆ្ពោះទៅមុខ ដោយការដឹងថា បទពិសោធន៍របស់យើងផ្តល់ឱកាសឲ្យយើងរីកចម្រើន និងក្លាយដូចជាព្រះគ្រីស្ទ ។ ឧទាហរណ៍ វាងាយស្រួលជាងក្នុងការមានចិត្តអាណិតអាសូរចំពោះភាពសោកសៅរបស់អ្នកដទៃ នៅពេលដែលយើងឆ្លងកាត់បទពិសោធន៍ដ៏លំបាកដោយខ្លួនយើង ។
ការស្រាវជ្រាវបានរកឃើញថា បន្ទាប់ពីការប៉ះទង្គិចផ្លូវចិត្ត មនុស្សតែងតែជួបប្រទះនូវអ្វីដែលត្រូវបានគេហៅថា « ការរីកចម្រើនក្រោយពីការប៉ះទង្គិចផ្លូវចិត្ត » ។ ការរីកចម្រើនក្រោយពីការប៉ះទង្គិចផ្លូវចិត្តត្រូវបានបង្ហាញដោយបុគ្គលម្នាក់ដែលស្វែងរកកម្លាំងបន្ទាប់ពីឆ្លងកាត់ការប៉ះទង្គិចផ្លូវចិត្ត ដូចជាកែលម្អទំនាក់ទំនង កាន់តែមានអំណរគុណចំពោះជីវិត ឬមានគុណភាពជីវិតជាក់លាក់ ឬបង្កើនការយល់ដឹងពីលទ្ធភាពនៃជីវិត ។ បន្ទាប់ពីបានឆ្លងកាត់ព្រឹត្តិការណ៍នៃការប៉ះទង្គិចផ្លូវចិត្តរួចហើយ សូមស្គាល់ពីរបៀបដែលអ្នកបានរីកចម្រើន ឬអាចរីកចម្រើនដោយសារតែបទពិសោធន៍នេះ ជាជាងផ្តោតលើព្រឹត្តិការណ៍ប៉ះទង្គិចផ្លូវចិត្តដោយផ្ទាល់ ។
៤. បណ្តុះគំនិតល្អៗ
ការឆ្លងកាត់ការប៉ះទង្គិចផ្លូវចិត្តអាចប៉ះពាល់ដល់របៀបដែលយើងគិតអំពីខ្លួនយើង និងពិភពលោកជុំវិញយើង ។ បន្ទាប់ពីឆ្លងកាត់ការប៉ះទង្គិចផ្លូវចិត្តរួចហើយ យើងប្រហែលជាមានគំនិតអវិជ្ជមាន ។ គំនិតដូចជា « ខ្ញុំទន់ខ្សោយ » « ព្រះវរបិតាសួគ៌មិនស្រឡាញ់ខ្ញុំ » និង « ខ្ញុំមិនស័ក្តិសមទេ » កាត់បន្ថយសមត្ថភាពរបស់យើងក្នុងការអត់ធ្មត់ ។ គំនិតទាំងនេះជាញឹកញាប់នឹងជះឥទ្ធិពលលើអ្វីដែលយើងទទួលអារម្មណ៍ ( សូមមើល សុភាសិត ២៣:៧; គោលលទ្ធិ និងសេចក្តីសញ្ញា ៦:៣៦ ) ។
បន្ទាប់ពីអ្នករកឃើញគំនិតអវិជ្ជមានរបស់អ្នកហើយ សូមពិចារណាពីគំនិតដែលយកមកផ្លាស់ប្តូរ រឹងមាំ និងប្រាកដនិយមមួយចំនួន ហើយសរសេរវាទុក ។ សូមរំឭកខ្លួនអ្នកអំពីគំនិតល្អៗទាំងនេះ នៅពេលដឹងពីគំនិតអវិជ្ជមាននៅក្នុងចិត្តរបស់អ្នក ។
ដើម្បីរៀនបន្ថែមអំពីរបៀបធ្វើកិច្ចការនេះ សូមមើលជំពូក ទី ២ នៃ ការរកឃើញកម្លាំងនៅក្នុងព្រះអម្ចាស់ ៖ ភាពធន់ខាងសតិអារម្មណ៍ ៖ ភាពធន់ខាងសតិអារម្មណ៍ ( ឆ្នាំ ២០២១ ) ។
អ្នកក៏អាចងាកទៅរកការអធិស្ឋាន សរសេរកំណត់ហេតុ សញ្ជឹងគិតពីព្រះគម្ពីរ ឬសុន្ទរកថានៅក្នុងសន្និសីទទូទៅ ( សូមមើល យ៉ូស្វេ ១:៨ ) ឬការសញ្ជឹងគិតផ្សេងៗទៀត ។
៥. ស្វែងរកជំនួយ
ពេលខ្លះ វាជាការសមរម្យក្នុងការពិចារណារកជំនួយលើសពីធនធានផ្ទាល់ខ្លួនរបស់អ្នក ។ លូស៊ី បានស្វែងរកជំនួយ ដែលអនុញ្ញាតឲ្យនាងជួយដល់សាម ។ សូមពិចារណាអំពីមនុស្ស—ដូចជាសមាជិកគ្រួសារ មិត្តភកក្តិ និងថ្នាក់ដឹកនាំវួដ—ដែលអាចនឹងមានប្រយោជន៍ ។ ការជាសះស្បើយពីការប៉ះទង្គិចផ្លូវចិត្តគឺជាពេលវេលាមួយដែលអ្នកប្រហែលជាត្រូវប្រើធនធានដែលមានសក្តានុពលទាំងអស់ក្នុងជីវិតរបស់អ្នក ។
ក្បួនខ្នាតទូទៅ ផ្តល់ការណែនាំអំពីពេលដែលវាសមស្របក្នុងការស្វែងរកការគាំទ្រពីអ្នកប្រឹក្សាជំនាញ ។៨
វាពិបាកណាស់ដែលមិនផ្តោតលើព្រឹត្តិការណ៍ដែលប៉ះទង្គិចផ្លូវចិត្តនោះប៉ុន្តែនៅពេលយើងធ្វើតាមដំបូន្មានរបស់ព្យាការីដើម្បីផ្ដោតអារម្មណ៍របស់យើងទៅលើព្រះអង្គសង្គ្រោះ និងដំណឹងល្អរបស់ទ្រង់ នោះ « ភាពសង្ស័យ និងការភ័យខ្លាចរបស់យើងនឹងរលត់បាត់អស់ » ។៩ សូមចាំថា អ្នកគឺជាបុត្រា ឬបុត្រីរបស់ព្រះវរបិតាសួគ៌ដែលពេញដោយក្តីស្រឡាញ់ ។ នៅពេលអ្នកផ្ដោតលើការខិតចូលទៅជិតទ្រង់ ហើយប្រើធនធានដ៏មានប្រយោជន៍ដែលមានសម្រាប់អ្នក នោះព្រះអម្ចាស់អាចជួយរាល់ការឆ្លងកាត់ការប៉ះទង្គិចណាមួយឲ្យទៅជាប្រយោជន៍ដល់អ្នកវិញ ។