« បានឈ្មោះអ្នករៀនថ្មីនៅក្នុងពន្ធនាគារ » លីអាហូណា ខែ កញ្ញា ឆ្នាំ ២០២៣ ។
ការបង្ហាញអំពីសេចក្តីជំនឿ
បានឈ្មោះអ្នករៀនថ្មីនៅក្នុងពន្ធនាគារ
ស៊ីស្ទើរ ឡាណូស មិនដែលភ្លេចពីគោលបំណងរបស់នាងក្នុងនាមជាអ្នកតំណាងនៃព្រះយេស៊ូវគ្រីស្ទឡើយ ដោយបង្រៀនមិត្តរួមបន្ទប់របស់គាត់អំពីអត្តសញ្ញាណដ៏ទេវភាពរបស់ពួកគេ និងរបៀបអធិស្ឋាននៅក្នុងពន្ធនាគារ ។
ថតរូបដោយ អាមីលៀ លីយ៉ុង
ស៊ីស្ទើរ អាគីតហ្សាលី ឡាណូស គឺជាអ្នកផ្សព្វផ្សាយសាសនាគំរូម្នាក់ដែលមានទីបន្ទាល់ដ៏រឹងមាំ ។ ដើមឡើយនាងត្រូវបានចាត់តាំងឲ្យបម្រើនៅបេសកកម្មកូស្ដា រីកាសាន ហូសេ ខាងកើត ប៉ុន្តែនាងបានបម្រើជាមួយ ជេនីន ជាភរិយាខ្ញុំ និងខ្ញុំនៅក្នុងបេសកកម្ម អាហ្គូកាកាលីញេស ម៉ិកស៊ិក អស់រយៈពេលមួយឆ្នាំ មុនពេលនាងទទួលបានទិដ្ឋាការទៅកូស្តា រីកា ។
នៅខែមេសា ឆ្នាំ ២០២២ យើងបានលើកដៃលា នៅពេលស៊ីស្ទើរ ឡាណូស បានឡើងយន្តហោះទៅទីក្រុងម៉ិកស៊ីកូ ជាកន្លែងដែលនាងនឹងបន្តជើងហោះហើរទៅកាន់កូស្តា រីកា ។ មិនដល់ ២៤ ម៉ោងផង បន្ទាប់ពីយើងបាននិយាយលានាង ប៉ូលីសនៅទីក្រុងម៉ិកស៊ីកូបានទូរសព្ទមកយើង ។
ពួកគេបាននិយាយថា « យើងបានចាប់ខ្លួន អាគីតហ្សាលី ឡាណូស នៅអាកាសយានដ្ឋានដោយសារមានកាន់កាប់គ្រាប់កាំភ្លើងសម្រាប់ប្រើនៅយោធា » ។ « នេះជាបទឧក្រិដ្ឋរបស់សហព័ន្ធ ហើយនាងនឹងត្រូវកាត់ទោស » ។
ភ្លាមៗនោះ ខ្ញុំបានទាក់ទងទៅការិយាល័យច្បាប់ប្រចាំតំបន់របស់សាសនាចក្រ ហើយពួកគេបានជួលមេធាវីដើម្បីស្នើសុំឲ្យដោះលែងស៊ីស្ទើរ ឡាណូស ។ មេធាវីរូបនេះពុំមែនជាសមាជិកនៃសាសនាចក្រនោះទេ ។ គាត់បានប្ដេជ្ញាចិត្តជួយយើង ប៉ុន្តែបានបង្ហាញពីទុទ្ទិដ្ឋិនិយម ។ គាត់បានពន្យល់ថា ជនស៊ីវិលមានផ្ទុកគ្រាប់កាំភ្លើងគឺជាបទឧក្រិដ្ឋធ្ងន់ធ្ងរ ដោយមិនគិតពីចេតនារបស់បុគ្គលនោះទេ ។
ក្រោយមក ស៊ីស្ទើរ ឡាណូស បានប្រាប់យើងថា នាងបានរើសគ្រាប់កាំភ្លើងនៅតាមផ្លូវនៅតំបន់ចុងក្រោយរបស់នាង ។ នាងគិតថា គ្រាប់កាំភ្លើងនោះគឺជាអនុស្សាវរីយ៍របស់នាង ។ យ៉ាងណាមិញ គ្រាប់កាំភ្លើងនោះ មានរូបរាងស្រដៀងនឹងបណ្ដោងសោអនុស្សាវរីយ៍ ដែលដាក់លក់នៅខាងក្រៅអណ្តូងរ៉ែប្រាក់ចាស់មួយ ក្នុងតំបន់ចាស់របស់នាង ។ ទោះយ៉ាងណាក៏ដោយ អ្នកស៊ើបអង្កេតរបស់រដ្ឋាភិបាលបានចាត់ទុកនាងដូចជាភេរវករ ។ ក្នុងរយៈពេលពីរបីថ្ងៃ ស៊ីស្ទើរ ឡាណូស បានប្តូរពីពន្ធនាគារនៅអាកាសយានដ្ឋានទៅកាន់ពន្ធនាគារកម្រិតធ្ងន់ ដែលជាកន្លែងដាក់ឧក្រិដ្ឋជនស្ត្រីប្រព្រឹត្តបទឧក្រិដ្ឋធ្ងន់ធ្ងរ ។
ការអធិស្ឋានដោយសេចក្តីជំនឿ
ការអធិស្ឋានដើម្បីឲ្យស៊ីស្ទើរ ឡាណូស បានរួចខ្លួនក្នុងពេលឆាប់ៗក៏បានចាប់ផ្តើមធ្វើភ្លាមៗ ។ ជេនីន និងខ្ញុំបានអញ្ជើញពួកអ្នកផ្សព្វផ្សាយសាសនាចំនួន ១១៥ នាក់ដែលកំពុងបម្រើក្នុងបេសកកម្មរបស់យើងដើម្បីអនុវត្តសេចក្តីជំនឿថាយើងអាចឃើញអព្ភូតហេតុមួយ ប្រសិនបើវាជាបំណងប្រាថ្នារបស់ព្រះអម្ចាស់។ ខ្ញុំបានទាក់ទងប្រធានបេសកកម្មនៅទីក្រុងម៉ិកស៊ីកូ បេសកកម្មកូស្តា រីកាសាន ហូសេ ខាងកើត និងមជ្ឈមណ្ឌលបណ្ដុះបណ្ដាលអ្នកផ្សព្វផ្សាយសាសនាម៉ិកស៊ីកូ ហើយពួកគេបានអញ្ជើញអ្នកផ្សព្វផ្សាយសាសនារបស់ពួកគេឲ្យចូលរួមអធិស្ឋានជាមួយយើង ។
នៅក្នុងកំផែងពន្ធនាគារ ស៊ីស្ទើរ អាគីតហ្សាលី ឡាណូស មិនដែលភ្លេចពីគោលបំណងរបស់នាងក្នុងនាមជាអ្នកតំណាងនៃព្រះយេស៊ូវគ្រីស្ទឡើយ ។
នៅក្នុងកំផែងពន្ធនាគារ ស៊ីស្ទើរ ឡាណូស មិនដែលភ្លេចពីគោលបំណងរបស់នាងក្នុងនាមជាអ្នកតំណាងនៃព្រះយេស៊ូវគ្រីស្ទឡើយ ។ នាងបានបង្រៀនមិត្តរួមបន្ទប់ទាំងប្រាំបួននាក់របស់នាងឲ្យអធិស្ឋានដោយការអធិស្ឋានពេលព្រឹក និងពេលល្ងាចជាក្រុមជារៀងរាល់ថ្ងៃ ។ នាងក៏បានបង្រៀនពួកគេអំពីអត្តសញ្ញាណដ៏ទេវភាពរបស់ពួកគេផងដែរ ។
មិត្តរួមបន្ទប់របស់នាងម្នាក់បានប្រកាសថា « ខ្ញុំជាមនុស្សអាក្រក់ណាស់ ចំពោះអ្វីដែលខ្ញុំបានធ្វើដែលមកដល់ទីនេះ ហើយព្រះស្អប់ខ្ញុំហើយ » ។ ស៊ីស្ទើរ ឡាណូស សម្លឹងមើលកែវភ្នែករបស់នាង ហើយនិយាយថា « អត់ទេ ។ បងមិនមែនជាមនុស្សអាក្រក់ទេ ។ បងគ្រាន់តែជាមនុស្សម្នាក់ដែលបានធ្វើអ្វីមួយខុស ។ ប៉ុន្តែបងជាបុត្រីរបស់ព្រះ ហើយទ្រង់ស្រឡាញ់បង ! »
មិត្តរួមបន្ទប់ម្នាក់ទៀតបានរៀបរាប់ពីសុបិនដែលនាងមានពីរបីសប្តាហ៍ពីមុនពេលស៊ីស្ទើរ ឡាណូស ត្រូវបានចាប់ខ្លួន ។ មិត្តរួមបន្ទប់នោះសុបិនថាសត្វស្លាបដែលមានពណ៌ចម្រុះបានហោះចូលក្នុងពន្ធនាគារដើម្បីជួយនាង ។ មុនពេលស៊ីស្ទើរ ឡាណូស ចូលរួមក្នុងសាសនាចក្រ នាងមានរូបភាពសត្វស្លាបដែលមានពណ៌ចម្រុះ ដែលបានសាក់នៅលើខ្នងរបស់នាង ។ នៅពេលមិត្តរួមបន្ទប់ឃើញស្នាមសាក់ នាងបានដឹងថា នាងគួរតែស្តាប់សារលិខិតផ្សព្វផ្សាយសាសនារបស់ស៊ីស្ទើរ ឡាណូស ។
ស៊ីស្ទើរ ឡាណូស បានបង្រៀននាងអំពីការស្ដារឡើងវិញនៃដំណឹងល្អនៃព្រះយេស៊ូវគ្រីស្ទ ហើយបានឲ្យព្រះគម្ពីរមរមនមួយច្បាប់ទៅនាង ដែលនាងបានយកតាមខ្លួនទៅក្នុងពន្ធនាគារ—ជាច្បាប់ចម្លងដូចគ្នាដែលស៊ីស្ទើរជាអ្នកផ្សព្វផ្សាយសាសនាបានឲ្យស៊ីស្ទើរ ឡាណូស ប្រាំឆ្នាំមុននៅពេលដែលនាងរៀនពីសាសនាចក្រ ។
ការកាត់ក្តីសាលាដំបូងបានកំណត់ពេលយ៉ាងលឿននៅទីក្រុងម៉ិកស៊ីកូ ។ ជេនីន និងខ្ញុំបានទៅធ្វើសក្ខីកម្មដោយផ្ទាល់ ។ ពេលយើងជួបជាមួយក្រុមមេធាវីនៅក្រៅតុលាការ មេធាវីមានការភ័យខ្លាច ដោយដើរចុះឡើងៗនៅលើចិញ្ចើមផ្លូវ ។
ខ្ញុំបាននាំគាត់ទៅមួយចំហៀង ហើយបាននិយាយថា ៖ « ថ្ងៃនេះលោកនឹងមានអារម្មណ៍ស្ងប់ស្ងាត់ និងសុខសាន្ត ដែលលោកមិនដែលធ្លាប់មាននៅក្នុងបន្ទប់សវនាការទេ ។ សូមឲ្យខ្ញុំប្រាប់ថាហេតុអ្វី ។ ពួកអ្នកផ្សព្វផ្សាយសាសនាជាង ៥០០ នាក់ និងក្រុមគ្រួសាររបស់ពួកគេកំពុងអធិស្ឋានឲ្យលោក និងភាពជោគជ័យរបស់លោកនៅថ្ងៃនេះ ។ ពួកគេក៏កំពុងអធិស្ឋានបន្ទន់ចិត្តរបស់ចៅក្រម ហើយថាគាត់នឹងដោះលែងស៊ីស្ទើរ ឡាណូស ពីពន្ធនាគារ » ។
មេធាវីមានអារម្មណ៍ក្តុកក្តួល ហើយគាត់បានសម្តែងការដឹងគុណចំពោះសេចក្តីជំនឿ និងការអធិស្ឋានរបស់មនុស្សជាច្រើនជំនួសឲ្យគាត់ ។
នៅម៉ោង ១០:០០ ព្រឹក ការជំនុំជម្រះបានចាប់ផ្តើម ប៉ុន្តែខ្ញុំតម្រូវឲ្យរង់ចាំនៅខាងក្រៅបន្ទប់រហូតដល់វេនរបស់ខ្ញុំត្រូវថ្លែងជាសាក្សី ។ ពីរម៉ោងយ៉ាងយូរបានកន្លងផុតទៅ ។ បន្ទាប់មក អ្នកយាមបន្ទប់សវនាការបានចេញមក ហើយនិយាយថា ចៅក្រមមិនត្រូវការស្តាប់សក្ខីកម្មរបស់ខ្ញុំទេ លោកបានធ្វើការសម្រេចចិត្តរបស់លោករួចហើយ ។
ដោយបារម្ភ ខ្ញុំចូលទៅក្នុងបន្ទប់សវនាការ ហើយចៅក្រមចាប់ផ្ដើមនិយាយ ។ លោកបានមានប្រសាសន៍អំពីច្បាប់ដែលស៊ីស្ទើរ ឡាណូស បានបំពាន និងអំពីការចោទប្រកាន់ធ្ងន់ធ្ងរដែលនាងបានប្រឈម ។
« ដោយមិនយកចិត្តទុកដាក់លើអ្វីទាំងអស់ » លោកបានបន្តថា ខ្ញុំជឿលើភស្តុតាងដែលត្រូវបានបង្ហាញអំពីអត្តចរិតល្អរបស់ស៊ីស្ទើរ ឡាណូស » ។ បន្ទាប់មកលោកបានដកស្រង់ផ្នែកច្បាប់ដែលមិនច្បាស់លាស់ ដែលអនុញ្ញាតឲ្យលោកផ្តល់ក្តីមេត្តា ហើយលោកបានដោះលែងនាងភ្លាមៗ ។
ស៊ីស្ទើរ ឡាណូស ជាមួយស៊ីស្ទើរ ជេនីន រីឌ នៅក្នុងដៃនរណាម្នាក់ ស៊ីស្ទើរ ឡាណូសបានដួលនៅពេលនាងត្រូវបានដោះលែងពីពន្ធនាគារ ។
« ព្រះគង់នៅខាងខ្ញុំ »
នេះគឺជាអព្ភូតហេតុដែលយើងបានស្វែងរក ! ជំនួសឲ្យការកាត់ទោសឲ្យជាប់ពន្ធនាគារ ៤ ឆ្នាំ ឬច្រើនជាងនេះ ស៊ីស្ទើរ ឡាណូស បានមានសេរីភាព ។ បន្ទាប់ពីសវនាការ មេធាវីរបស់នាងបាននិយាយថា ថ្ងៃនោះគឺជាថ្ងៃដ៏សំខាន់បំផុតមួយនៃអាជីពរបស់គាត់ ។
គាត់បាននិយាយថា « ខ្ញុំពិតជាមានអារម្មណ៍ថា ព្រះគង់នៅខាងខ្ញុំ » ។ « ខ្ញុំចង់រៀនបន្ថែមទៀតពីជំនឿរបស់ពួកលោក » ។
ខ្ញុំបានអញ្ជើញគាត់ទៅមជ្ឈមណ្ឌលអ្នកទៅទស្សនាព្រះវិហារបរិសុទ្ធទីក្រុង ម៉ិកស៊ីកូ ស៊ីធី ម៉ិកស៊ិក ។ ខ្ញុំបានប្រាប់គាត់ថា « លោកនឹងឃើញអ្នកផ្សព្វផ្សាយសាសនាផ្សេងទៀតនៅទីនោះល្អដូចស៊ីស្ទើរ ឡាណូសអ៊ីចឹង » ។ « លោកនឹងឃើញពន្លឺនៅក្នុងកែវភ្នែករបស់ពួកគេ ហើយលោកនឹងសួរខ្លួនឯងថា ហេតុអ្វី » ។
ដប់ពីរម៉ោងក្រោយមក ស៊ីស្ទើរ ឡាណូស ត្រូវបានដោះលែងឲ្យរួចខ្លួន តែនៅតែស្លៀកសម្លៀកបំពាក់អ្នកជាប់ពន្ធនាគារដដែល ។ នាងបានដួលនៅក្នុងដៃរបស់ជេនីន ។ នៅពេលយើងទាំងអស់គ្នាឈប់យំ ហើយអាចនិយាយបាន ស៊ីស្ទើរ ឡាណូស បានពោលថា « ប្រធាន ខ្ញុំទទួលបានឈ្មោះអ្នករៀនថ្មីនៅក្នុងពន្ធនាគារ ! »
បទពិសោធន៍ទាំងមូលនេះបានបញ្ជាក់ថា « ហើយព្រះទ្រង់ក៏ពុំទាន់ឈប់ទៅជាព្រះនៃអព្ភូតហេតុដែរ » ( មរមន ៩:១៥ ) ។ ខ្ញុំគ្មានការសង្ស័យឡើយថា សេចក្តីជំនឿ និងការអធិស្ឋានរបស់មនុស្សល្អជាច្រើនបានជួយមេធាវីតវ៉ាក្តីរបស់គាត់ និងបន្ទន់ចិត្តរបស់ចៅក្រម ។
ដោយសារស៊ីស្ទើរ ឡាណូស បានឃុំខ្លួន ស្រ្តីដែលបានជាប់ពន្ធនាគារជាច្រើនបានទទួលក្តីសង្ឃឹមតាមរយៈដំណឹងល្អរបស់ព្រះយេស៊ូវគ្រីស្ទ មេធាវីបានបណ្តុះគ្រាប់ពូជនៃសេចក្ដីជំនឿ ហើយយើងត្រូវបានពង្រឹងក្នុងការជឿជាក់របស់យើងថា ព្រះអាចប្រើយើងដើម្បីបន្តកិច្ចការរបស់ទ្រង់ មិនថាយើងនៅទីណាឡើយ ។
ស៊ីស្ទើរ ឡាណូស នៅឯព្រះវិហារបរិសុទ្ធ ធីជូអាណា ម៉ិកស៊ិក