« ការធ្វើការងារបម្រើដោយអត់ធ្មត់ » លីអាហូណា ខែ កញ្ញា ឆ្នាំ ២០២៣ ។
គោលការណ៍នៃការងារបម្រើ
ការធ្វើការងារបម្រើដោយអត់ធ្មត់
យើងអាចអភិវឌ្ឍសមត្ថភាពឲ្យមានភាពអត់ធ្មត់កាន់តែច្រើនក្នុងជីវិត និងក្នុងការបម្រើអ្នកដទៃ ។
នៅក្នុង កូរិនថូស ទី២ ១២:៧–៨ ប៉ុលប្រាប់ពីការអធិស្ឋានបីដងដើម្បីឲ្យ « បន្លាមួយចាត់មកក្នុងសាច់ឈាម » ត្រូវបានដកយកចេញ ។ ប៉ុន្តែការអធិស្ឋានរបស់លោកមិនបានឆ្លើយតបដោយការដកយកឧបសគ្គចេញនោះទេ ។ ផ្ទុយទៅវិញ ព្រះអម្ចាស់មានព្រះបន្ទូលទៅលោកថា « គុណរបស់អញល្មមដល់ឯងហើយ » ។ ប៉ុលបានបង្ហាញចិត្តអត់ធ្មត់ និងសេចក្តីជំនឿពីរបៀបដែលលោកបានឆ្លើយតបថា « ដូច្នេះ ខ្ញុំនឹងស៊ូអួតពីសេចក្តីកម្សោយរបស់ខ្ញុំ ដោយអំណរជាខ្លាំង ដើម្បីឲ្យព្រះចេស្តានៃព្រះគ្រីស្ទបានសណ្ឋិតនៅនឹងខ្ញុំ » ( ខទី ៩ ) ។
ព្រះអម្ចាស់ក៏បានបង្រៀនមរ៉ូណៃថា តាមរយៈព្រះគុណរបស់ព្រះយេស៊ូវគ្រីស្ទ យើងអាចរៀន និងចម្រើនកម្លាំងខ្លាំងឡើង ៖ « បើសិនជាមនុស្សលោកមករកយើង នោះយើងនឹងបង្ហាញដល់ពួកគេនូវភាពទន់ខ្សោយរបស់ពួកគេ ។ យើងឲ្យភាពទន់ខ្សោយទៅមនុស្ស ដើម្បីឲ្យពួកគេអាចបានរាបសា ហើយគុណរបស់យើងមានគ្រប់គ្រាន់សម្រាប់មនុស្សទាំងអស់ ដែលបន្ទាបខ្លួននៅចំពោះយើង ដ្បិតបើសិនជា ពួកគេបន្ទាបខ្លួននៅចំពោះយើង ហើយមានសេចក្ដីជំនឿដល់យើង លំដាប់នោះយើងនឹងធ្វើឲ្យអ្វីដែលទន់ខ្សោយក្លាយទៅជាខ្លាំងពូកែចំពោះពួកគេវិញ » ( អេធើរ ១២:២៧ ) ។
ការធ្វើការងារបម្រើដោយអត់ធ្មត់
ដូចជាប៉ុលដែរ ពួកយើងភាគច្រើនបានអធិស្ឋានទូលសុំការសង្គ្រោះជាច្រើនដងក្នុងជីវិតរបស់យើង—ជួនកាលច្រើនដង ច្រើនជាងបីដងឯណោះ ។ ពេលខ្លះ វាជាពេលវេលាដ៏ត្រឹមត្រូវដើម្បីទទួលពរជ័យ ហើយពេលខ្លះទៀត យើងដូចជាប៉ុល កំពុងត្រូវបានបង្រៀន និងពង្រឹង ។ នៅពេលនេះ យើងអាចរៀនអត់ធ្មត់ ហើយរៀនរង់ចាំតាមពេលវេលារបស់ព្រះអម្ចាស់ ។
យើងត្រូវការគុណលក្ខណៈដូចជាព្រះគ្រីស្ទនៃការអត់ធ្មត់ ពេលយើងធ្វើការងារបម្រើផងដែរ ។ យើងអាចធ្វើការងារបម្រើដល់មនុស្សដែលមានឧបសគ្គ និងកម្រិតនៃការយល់ដឹងអំពីដំណឹងល្អផ្សេងៗគ្នា ហើយវាត្រូវការការអត់ធ្មត់ និងសេចក្ដីស្រឡាញ់ដើម្បីធ្វើការងារបម្រើដល់មនុស្សដែលមិនអាចទទួលយក ។
រូបថតតាម Getty Images
ការអភិវឌ្ឍន៍ការអត់ធ្មត់
នៅពេលយើងមកស្គាល់ព្រះអង្គសង្គ្រោះ យើងនឹងដឹងកាន់តែច្បាស់អំពីអ្វីដែលទ្រង់នឹងធ្វើ ដើម្បីផ្ដល់ការងារបម្រើជំនួសយើង ។ តើយើងអាចអភិវឌ្ឍគុណលក្ខណៈដូចជាព្រះគ្រីស្ទនៃការអត់ធ្មត់ដោយរបៀបណា ?
-
សូមដឹងថាជីវិតរមែងស្លាប់គឺពោរពេញទៅដោយស្ថានភាពដែលសាកល្បងការអត់ធ្មត់របស់យើង ហើយវាជារឿងធម្មតាទេដែលនៅពេលខ្លះមានអារម្មណ៍ស្មុគស្មាញនោះ ។ សូមចងចាំថា ដោយមានការអនុវត្ត និងសេចក្តីជំនឿលើព្រះអម្ចាស់ យើងអាចកែលម្អការឆ្លើយតបរបស់យើងចំពោះស្ថានភាពតានតឹង ។ សូមមានចិត្តអត់ធ្មត់នឹងការខិតខំរបស់អ្នកដើម្បីកាន់តែមានចិត្តអត់ធ្មត់ !
-
សូមទូលសុំជំនួយពីព្រះ នៅពេលអ្នកមានអារម្មណ៍ថា ខ្លួនអ្នកកំពុងស្មុគស្មាញនឹងការមានចិត្តអត់ធ្មត់ ។ ការដកដង្ហើមវែងៗ និងការអធិស្ឋានអាចជួយនាំមកនូវភាពស្ងប់ស្ងាត់ និងសេចក្តីសុខសាន្ត ។
-
ការស្តាប់តន្ត្រីលើកស្ទួយខាងវិញ្ញាណដែលនាំមកនូវអារម្មណ៍ពោរពេញដោយសេចក្តី សុខសាន្តអាចជួយអ្នកឲ្យដោះស្រាយអារម្មណ៍ដែលមិនចេះអត់ធ្មត់ ។
-
ទទួលស្គាល់ពីពេលវេលារបស់ព្រះអម្ចាស់ក្នុងជីវិតរបស់អ្នក ។ ឆន្ទៈ និងបំណងប្រាថ្នារបស់យើងគួរតែកែតម្រូវទៅតាមកាលវិភាគរបស់ទ្រង់ ។
-
ការអត់ធ្មត់គឺជាផ្នត់គំនិត ។ សូមចងចាំថា អារម្មណ៍ភ័យខ្លាច ឬស្ថិតក្នុងស្ថានភាពប្រញាប់ប្រញាល់ កម្រនឹងធ្វើឲ្យជីវិតរបស់យើងប្រសើរឡើងណាស់ ។
គំនិតសម្រាប់ការធ្វើការងារបម្រើដោយអត់ធ្មត់
ពេលខ្លះកិច្ចការការងារបម្រើរបស់យើងគឺជួយអ្នកដទៃឲ្យមានការអត់ធ្មត់តាមរយៈការសាកល្បង ។ នេះគឺជារបៀបមួយចំនួនដែលយើងអាចជួយបាន ៖
-
បង្ហាញមនុស្ស ឬគ្រួសារថាយើងស្រឡាញ់ និងយកចិត្តទុកដាក់ចំពោះពួកគេ ទោះបីជាពួកគេកំពុងប្រឈមមុខនឹងបញ្ហាយ៉ាងណាក៏ដោយ ទោះបីជាពួកគេគិតថាពួកគេមិនគួរឲ្យស្រឡាញ់ ដោយហេតុផលអ្វីក៏ដោយ ។
-
សូមចែកចាយបទពិសោធន៍ជាមួយពួកគេ នៅពេលដែលអ្នកត្រូវរៀនអត់ធ្មត់ ហើយអ្នកក៏ធ្លាប់ជួបនឹងការលំបាកដែរ ។ សូមជួយពួកគេឲ្យមានអារម្មណ៍ថាពួកគេមិននៅឯកាទេ ប្រសិនបើពួកគេមានអារម្មណ៍គ្មានការអត់ធ្មត់ ឬស្មុគស្មាញនោះ ។
-
សូមអធិស្ឋានឲ្យពួកគេអាចមានភាពអត់ធ្មត់ឆ្លងកាត់ការសាកល្បងដ៏លំបាកៗ ហើយឲ្យពួកគេដឹងថា ព្រះវរបិតាសួគ៌នឹងស្តាប់ការអធិស្ឋានរបស់ពួកគេ ដើម្បីឲ្យពួកគេអាចមានអារម្មណ៍ថាមានកម្លាំង ។
-
សូមធ្វើជាអ្នកស្តាប់នៅពេលពួកគេត្រូវការនរណាម្នាក់និយាយជាមួយ ។ ការមានមិត្តភក្តិដែលយល់ចិត្ត គឺជារបៀបដ៏ល្អបំផុតមួយដើម្បីស៊ូទ្រាំនឹងការសាកល្បង ឬស្ថានភាពលំបាកៗ ។