Ua Faaora Iesu Mesia i te Mau Taata Atoa i te Pohe Tino

Te ti’aturi nei matou i te Fatu ia Iesu e i ta’na misioni faaoraa hanahana i roto i te ao nei, e i te tara’ehara, te faaoraraa umerehia e te hanahana o ta’na i rave no te ora o te mau taata.²

Aita ta Iesu ohipa i oti i haapohehia ai to’na tino, aita atoa oia i faaoti i te reira i muri mai i to’na ti’a faahouraa mai te pohe mai; area râ, ua faaoti oia i te opuaraa, te tumu te reira oia i haere mai ai i te fenua nei, aita oia i rave i te taata’oraa o ta’na ohipa. Ahea ia oia e rave ai? I muri a’e i to’na faaoraraa i te mau tamaroa e te mau tamahine tataitahi a to tatou metua Adamu o tei fanauhia e aore râ, o te ore roa e fanauhia i ni’a i te fenua nei i te hope’a o te mau tau, eiaha ra te mau tamaiti o te pohe mure ore. O teie ta’na misioni.³

Ua riro Iesu Mesia, te Tamaiti a te Atua ora, ei hi’oraa maitai no te mau taata ato’a ia pee, ei hoho’a maitai no te mau taata ata’o. Aita ta’na e hara; e ere Oia i mea ino. Aita roa e ino i roto Ia’na, aita te tiaturi ore, aita atoa te huru ma’ama’a. Ua vehihia Oia i te paari o te Atua mai te fanauraa mai e tae noa’tu i te pohe, e i muri mai i To’na ti’a faahouraa, ua roaa Ia’na te hanahana o te Metua, e ua riro mai te Atua iho te huru, ua farii i te mana mai te au i to te Atua, mai te au i Ta’na i parau, ua horo’ahia te mana taata’o Ia’na, e te parahi nei Oia i te rima atau o te Manahope, e o oia to tatou Arai, to tatou Tua’ana Paari, e mea ti’a ia tatou ia pee Ia’na eiaha ra i te tahi atu.⁴

Aita’tu e i’oa i faaitehia mai i raro i te ra’i maoti râ, to Iesu Mesia, na roto i te reira e nehenehe ai tatou ia faaorahia e aore râ, ia faateiteihia i roto i te basileia o te Atua.⁵

Te vai nei te tahi parau mau rahi faahiahia i roto i te faanahoraa o te ora o tei riro ei mea faufaa. E ore e nehenehe ia vaiihohia i roto i te poiri; e ore atoa e nehenehe ia tu’u i te tahi atu mea i mua ia ratou. Te huru metuaraa o te Atua, te maitai o te tara’ehara a to tatou Fatu e Faaora, te faahoi- raa-hia mai te evanelia i roto i teie mau mahana hopea nei, e mea ti’a ia fariihia ma to tatou aau atoa.⁶

E ere te pohe i te hoê mea riaria. Na roto i te reira, ua taatiatoa- hia mai te tahi o te parau mau hohonu e te faufaa o te oraraa o te taata. Noa’tu e e mea teiaha mau no te mau taata o te farii i te oto no te faarueraa mai o ta ratou i here, ua riro te pohe ei haamaitairaa rahi i roto i te faanahoraa mo’a.

Ua fanauhia tatou ia nehenehe tatou ia vehihia i te tahuti, oia hoi, ia nehenehe ia tatou ia faaahu i to tatou varua i te hoê tino. Taua haamaitairaa ra, o te taahiraa matamua ïa o te hoê tino tahuti ore, e te taahiraa piti ra, o te pohe ia. Ua riro te pohe ei e’a no te haereraa i mua mure ore; noa’tu e mea fifi ia faaoromai, aita roa te hoê o te ti’aturi nei i te evanelia a Iesu Mesia, oia hoi, i te ti’a faahouraa, e hinaaro ia tauihia te reira.… E mea titauhia te pohe e ua riro atoa ei haamaitairaa, e … aita roa e, eita roa tatou e mauruuru e oaoa rahi mai te mea e aita te reira.⁷

I to te taata [Adamu] hi’araa i taua ture ra o te ra’i, o tei opani ia’na ia ore ia rave i te mau mea rii tumu o te fenua nei, i ti’a ai ia’na ia riro no te fenua nei e no te repo, i afai mai ai oia i te pohe tahuti i ni’a iho ia’na, mai te au i ta te Atua i parau e e tupu mau te reira mai te mea e amu oia i te “ma’a i rahuihia.” ⁸

Ua riro te pohe ei faautu’araa no te ture i ofatihia, e aita to te taata nei e mana no te haapio è i te reira no te mea, tei te faaueraa a te Atua, “I te mahana e amu ai oe i te reira, e pohe ia oe,”[Mose 3:7] e ua tae teie faautu’araa i ni’a i te mau i’ô atoa, e mea mana ore hoi te taata e te faufaa ore mai ia’na atoa ra.⁹

E parauhia tatou ei mau taata tahuti no te mea tei roto ia tatou te mau huero o te pohe tera râ, i te ti’a mau, e mau taata tahuti ore tatou, no te mea tei roto atoa ia tatou te huero o te ora mure ore. E piti ïa huru taata te taata nei, e varua o te horo’a i te ora, te puai, te maramarama e te paari o te taata, e te tino hoi ei vairaa no te varua e hoê â to raua hoho’a, hoê â ta raua mau titauraa, e faaau e e faatura oia i roto i to’na ti’a mau, i te hinaaro o te varua. Ia apitihia raua, e riro ia ei varua. E auraro te tino i te varua, area te varua, a faaapi ai e a faaohipa ai oia i te tino, e faaterehia oia e te mau ture i haamanahia e o te arata’i ia’na i roto i te tahuti nei. I roto i teie tino tahuti, te vai ra te mau huero o te viivii e te pe, oia hoi, ia tahito e aore râ, ia pohe, ia au i te mau Papa’iraa Mo’a, e parauhia e “te pohe tahuti.”¹⁰

E pohe te mau taata atoa e fanauhia i roto i teie ao. Aita e parauraa e o vai oia, e nohea oia, ua fanauhia anei i rotopu i te taata moni e te opu hui mana e aore râ, i rotopu i tei haehaa e tei veve, e ua numerahia to’na mau mahana e te Fatu, e i te taime ti’a mau, e hope’a to’na. E mea ti’a ia tatou ia feruri i te reira. Eiaha tatou e haere ma te aau oto e aore râ, ma te mata oto; eiaha roa. Te oaoa nei au i te mea e, ua fanauhia vau ia ora, ia pohe, e ia ora faahou. Te haamauruuru nei au i te Atua no te reira iteraa. E horo’a te reira ia’u i te oaoa e te hau o te ore roa e nehenehe i to te ao nei ia horo’a e ia iriti faahou. Ua heheu mai te Atua ia’u i te reira na roto i te evanelia a Iesu Mesia. Ua ite au e, e parau mau te reira. No reira, aita e ti’a ia’u ia oto e aita atoa e mea e haamauiui ia’u.

Ua faanahohia te mau mea o ta’u e farerei i roto i te ao nei no te faaitoito, no te faaoaoa, no te horo’a i te hau, te ti’aturi e te anaanatae ia’u i roto i teie oraraa nei, e i te hoê ti’aturiraa maitai no te ora e te faateiteiraa i mua i to’u Atua i roto i te ao e tae mai nei. Aita e tumu no’u ia oto i mua i te pohe. E parau mau, e ta’i au ia pohe ana’e to’u mau hoa e to’u mau fetii. E nehenehe atoa vau e ta’i ia ite ana’e au ia vetahi ê ia oto.

Te vai nei te here i roto i to’u varua no te mau tamarii a te taata nei. E nehenehe au e ta’i ia ta’i ana’e ratou; e nehenehe au e oaoa ia oaoa ana’e ratou tera râ, aita e tumu no’u ia aue e aore râ, ia oto no te mea ua tae mai te pohe i roto i te ao nei. Te parau nei au no te pohe mure noa, te pohe tino.… Ua ite [Te Feia Mo’a i te Mau Mahana Hopea Nei]e, e tae mai te pohe i ni’a ia ratou na roto i te hi’araa o Adamu, e na roto i te parau-ti’a o Iesu Mesia i horo’ahia ai te ora ia ratou, e noa’tu e e pohe ratou, e ora faahou ratou.¹¹

Ua topa te pohe i ni’a ia tatou ma te faaohipa ore i to tatou tiamâraa; aita tatou i rave i te hoê mea noa a’e no te ume mai i te reira i ni’a iho ia tatou; ua tae mai te reira na roto i te hiaraa o to tatou na metua matamua. No reira, aita te taata nei i hopoi mai i te pohe i ni’a ia’na iho, e aita atoa ia e faufau ia’na ia imi i te ora; no te mea ia pohe oia na roto i te hara a Adamu, e ora faahou oia noa’tu e, ua hinaaro oia e aore râ, aita, na roto i te parau-ti’a o Iesu Mesia, e te mana o to’na ti’a faahouraa. Te taata atoa o te pohe e ora faahou mai.¹²

Ua riro Iesu Mesia … ei hotu matamua no te ti’a faahouraa mai te pohe mai, e no te mea ua ti’a faahou oia, e faati’a ïa oia i te mau tamarii ato’a a te Metua tei mairihia i te faautu’araa a Adamu. Mai te pohe mure noa i noaa i te mau taata atoa na roto mai i te hoê taata no reira, na roto i te parau-ti’a o te Mesia, e roaa ai te ora ia tatou na roto i te ti’a faahouraa e tae mai i ni’a iho ia ratou, te mea maitai e aore râ, te mea ino, te me ereere e aore râ, te mea uouo, te tïtï e aore râ, tei tiamâ, te mea ite e aore râ, te mea ite ore, te mea apï e aore râ, te mea paari, aita e uiraa [a hi’o 1Korinetia 15:21-22;; Alama 11:44].Te pohe i tae mai na roto i te hi’araa o to tatou na metua matamua, ua faaorehia ïa na roto i te ti’a faahouraa o te Tamaiti a te Atua, e aita ta tatou e rave’a, aita ta’u e aita ta outou.¹³

Ua ite tatou e, ua faateiteihia [te Tamaiti a te Atua] i ni’a i te satauro; e ua patiahia to’na aoao, e ua tahe te toto ora mai roto mai i to’na tino; e ua uuru oia i ni’a i te satauro e pohe ihora; ua ravehia mai to’na tino mai ni’a mai i te satauro… virihia ihora i roto i te ahu mâ, e tuuhia’tura i roto i te menema apî aore â e taata i vaiihohia i reira.¹⁴

Ua tatara te Mesia i te mau uputa o te mau menema, ua rê i ni’a i te pohe e te menema e ua haere mai “ei matamua no te mau hotu o ratou o tei taoto.”[1 Korinetia 15:20.]¹⁵

Ua haere mai i roto i te ao nei… ua farii e piti tufaa o te mana—te mana no te pohe, o Ta’na i farii na roto i to’na metua vahine; e ahiri oia i hinaaro, i te mana no te pato’i i te pohe o Ta’na i farii na roto i To’na Metua Tane. No reira e mana To’na ia ora e a muri noa’tu e no te haere na roto i te pohe ia ti’a Ia’na ia mauiui no te mau taata ato’a, e ia haere mai i rapae i te menema i roto i te hoê oraraa apî—ei taata ti’a faahou, ia ahuhia i te tahuti ore e te ora mure ore, ia nehenehe i te mau taata ato’a ia ti’a mai mai roto mai i te menema e a haere atu ai i te ora mure ore, mai te mea e haapa’o ratou. E ti’a mai iho â ratou, ei mau taata hanahana e aore râ, ei mau taata hanahana ore. E ti’a mai ihoa ratou noa’tu e, aita ratou e hinaaro. Aita e nehenehe ia ape. Aita tatou e nehenehe ia tape’a i te faautu’araa o te pohe tahuti ia topa i ni’a ia tatou, oia atoa eita tatou e nehenehe ia faaore e aore râ, ia opani i te ti’a faahouraa o te tino mai roto mai i te menema; mai te Atua ia ti’a faahou mai te pohe mai, e na reira hoi te mau taata atoa.¹⁶

Te tiaturi papu nei tatou e, o Iesu Mesia iho te hoho’a ti’a o te ti’a faahouraa mau o te mau taata mai te pohe mai e haere atu i te ora. Te ti’aturi nei matou e, aita atu e ti’a faahouraa; e no te mea e, ua vai maite noa to’na huru mau, te mau puta o to’na na rima e to’na na avae e to’na aoao, ia nehenehe oia ia faaite papu ia’na iho i te mau taata o tei fea’a i te tupuraa o te ti’a faahouraa, e ua haapapu e, o oia mau iho â, te Fatu i faasataurohia, i hunahia i roto i te menema, e ua ti’a faahou mai te pohe mai no te haere i roto i te ora, mai te reira atoa outou e te mau tamaroa e te mau tamahine tataitahi a Adamu, i fanauhia i roto i te ao nei.¹⁷

E ti’a [faahou] mai tatou mai roto mai i te menema, ia oto te pu ra, e i reira to tatou mau tino e ti’a mai ai e i reira to tatou mau varua e tomo faahou ai i roto ia ratou, e riro mai ai ratou ei mau varua ora ia ore tahe e aore râ, e faataa faahouhia area râ, e riro ei hoê, ei mea tahuti ore, e te mure ore.¹⁸

Eita te mau mea rii tumu no reira mai teie tino tahuti e pohe, eita e mure tera râ, i te mahana o te ti’a faahouraa, e tuati faahouhia teie mau mea rii tumu, te ivi e te ivi, te i’ô e te i’ô. E ti’a mai te tino mai to’na ihoa huru a tu’uhia’tu ai i raro i te repo no te mea, aita te tino e tupu faahou e aore râ, aita e tupu i te rahi i roto i te menema. E ti’a mai te reira mai to’na huriraahia i raro, e tupu te mau tauiraa i roto i te maitai roa na roto i te ture o te faahoiraa. Area te varua, e tamau noa ïa i te tupu e i te rahi, i muri mai ra i te ti’a faahouraa, e tupu te tino e tae noa’tu e ua riro mai ei taata paari.¹⁹

E amui-faahou-hia te varua e te tino. E ite faahou tatou ia tatou i roto i te i’ô, i roto i taua mau hiero o ta tatou i farii i ô nei i roto i te tahuti nei. E faati’ahia mai to tatou mau hiero mai te au i to ratou tu’uraahia i raro area râ, te vaira te hoê faahoiraa; te mau mero tataitahi tei mutumutu, tei tapupuhia, te mau huru hapepa atoa i tupu na roto i te hoê ati pepe e aore râ, i te tahi atu huru, e faahoihoihia i to’na huru mau. E faahoihia te mau melo e te mau tiaatiraa atoa hoi i to’na vahi mau. E ite tatou te tahi e te tahi e oaoa tatou i te faarereiraa ia vetahi ê na roto i te mau ui atoa o te mau tau e amuri noa’tu, mai te mea e haapa’o tatou i te ture a te Atua.²⁰

Aue ia ite i te hanahana, ia’u nei iho â, oia atoa paha ïa ia outou paato’a na tei ite i te parau mau e aore râ, tei farii i te reira i roto i to outou aau i te mea e, o ratou atoa o ta tatou i matau e o tei faarue mai i ô nei, e farerei faahou tatou e e ite faahou atu hoi ia ratou i roto i to ratou iho huru mau. E farerei faahou tatou i taua taata o ta tatou i matau i o nei i roto i te i’ô—eiaha ra te tahi atu varua, te tahi atu taata e aore râ, i taua taata ihoa i roto ra i te tahi atu huru area râ, o taua taata mau ra e taua huru mau ra e te taua hoho’a mau ra, te taata mau o ta tatou i matau e o ta tatou i ora na i pihai iho i roto i teie oraraa tahuti nei, e tae noa’tu i te mau pepe o te i’ô. Eita ra te hoê taata e ora noa i roto i te mau paira, te mau pepe, te mau huru huma atoa, te mau hape rii e aore râ, te mau hapepa, no te mea e iritihia te reira, i te taime tano mau, ia au i te aroha faito ore o te Atua. E faaorehia te mau huru huma atoa; e iritihia te mau hape rii, e roaa i te mau tane e te mau vahine te maitai roa o to ratou mau varua, i te maitai roa o ta te Atua i opua i te matamua. Ua hinaaro Oia ia fanauhia te mau tane e te mau vahine, e ta’na mau tamarii ia riro ei feia tufaa i te Atua, e feia tufa tatou e Iesu Mesia, e ia maitai roa i te pae tino e i te pae varua na roto i te haapa’oraa i te mau ture e na roto hoi i te reira oia i horo’a mai ai i te rave’a ia roaa te maitai roa i ta’na mau tamarii ato’a.²¹

E mea ti’a ia tatou ia maramarama e, na roto i te faataaraa o te mau taahiraa o te haereraa i mua e no te mau faanahonahoraa mure ore tei faaitehia mai ia tatou na roto i te heheuraa hanahana, i ti’a ai ia tatou ia parau e, o te mau taata ana’e tei ti’a faahou e o tei faahanahanahia te nehenehe e riro ei mau metua no te mau tamarii varua. O te reira huru varua ana’e i faateiteihia te tae i te paariraa i roto i te tereraa i haamauhia o te oraraa mure ore; e te mau varua o ta ratou e fanau mai i roto i te mau ao mure ore, e haere atu ratou ma te tura na te mau taahiraa e rave rahi e aore râ, na te mau ai’a, e mea na reira hoi te mau metua i faahanahanahia i te fariiraa i to ratou faateiteiraa.²²

Aita roa vau e ite nei i te tahi atu â mea e hinaarohia maoti râ, o tei horo’ahia mai ia tatou na roto i te evanelia a Iesu Mesia—e, noa’tu e pohe tatou area râ, e ora faahou tatou, e noa’tu e pohe tatou e pau i te tahe i roto i te mau mea rii tumu o te fenua no reira mai hoi to tatou mau hiero i te rave- raa-hia mai area râ, e faahoi faahouhia mai teie mau mea rii tumu i te taata tataitahi e e faanahonaho faahouhia, e e riro faahou mai ei mau varua ora mai te Mesia atoa ra i na mua mai ia tatou; o tei horo’a ia tatou taua rave’a ra.²³