Ua faanaho te Atua i te Sotaiete Tauturu ei Maitai no te Feia Mo’a

E faanahonahoraa puai e te mana rahi te pupu Sotaiete Tauturu o te Ekalesia a Iesu Mesia i te feia Moa i te Mau Mahana Hope’a nei, e e hopoi’a mau te amohia ra e ana!³

Aita’tu e faanahonahoraa na te mau vahine i roto i te ao nei o te mau nei hoêa ti’araa teitei e te mana no te ra’i mai, mai teie pupu Te tahi mau faanahonahoraa, na te taata ïa i faati’a.… Teie faanahonahoraa ua hamanihia e te Atua, ua haamanahia e te Atua, ua faanahonahohia e te Atua, e ua faauehia e te Atua no te faatere i te faaoraraa i te varua o te mau vahine e o te mau tane. No reira, aita’tu e faanahonahoraa e nehenehe e aifaito i teie pupu e o te farii i te ti’araa teitei tuea mai teie pupu, maori ra mai te peu e faanahonaho te Atua i te hoê pupu ê atu â. E mai te peu e na reira Oia, mea na roto noa ïa i te mau reni o te autahuaraa, taua iho autahu’araa râ e taua iho mau reni o te autahu’araa râ i faati’a i te Sotaiete Tauturu, eiaha ra na roto i te tahi atu rave’a.⁴

E nehenehe te mau vahine e faati’a i te mau pupu e i te mau sotaiete, e haamana i te mau papature, e haamau i te mau ture no to ratou faatereraa, e rahi noa’tu â. Eiaha e mo’ehia, aita roa’tu hoê noa o teie mau sotaiete e nehenehe e faatueahia i te hoê pupu Sotaiete Tauturu o te hoê paroita o te Ekalesia a Iesu Mesia i te Feia Mo’a i te mau Mahana Hope’a nei.… Eere i te mea ti’a ia faaterehia outou e te mau vahine o te ao nei; na outou râ e faatere i te ao, i te mau vahine ihoa râ o te ao nei, i roto i te mea poupouhia, i te mau mea na te Atua, i te mau mea maitatai atoa e i te mau mea ti’ama atoa no te mau tamarii a te taata nei.… A faariro i te [Sotaiete Tauturu] ei numera matamua, ei mea aravihi ae, ei mea teitei ae, ei mea numera hoê ae e ei mea hohonu ae i te mau pupu atoa e vai nei i te ao nei. Na te reo o te peropheta o te Atua e pii nei ia outou ia na reira, ia riro ei mea teitei ae, ei mea rahi ae, ei mea numera hoê ae, ei mea mâ ae e ei mea puai ae i te haapaoraa i te mau mea maitai. Ta outou hopoi’a, o te fana’oraa ïa i to outou mau tura no te farii i te mau mea atoa i faataahia i roto i to outou piiraa e o ta outou hoi e ai’a mai roto atu i te Fatu e tae noa’tu i ta’na mau horoa.⁵

Te ti’aturi nei au e, te rave nei ta tatou Sotaiete Tauturu i te hoê ohipa faahiahia i rotopu i te mau taata…. Ua riro oia ei faanahonahoraa faufaa no te maitai o Iseraela, no te maitai o te mau tuahine, o te mau metua vahine, e o te mau tamahine i Ziona.⁶

E parau atu vau i te tahi parau no ni’a i te Sotaiete Tauturu. Teie te hoê faanahonahoraa o tei faati’ahia na roto i te Perofeta Iotefa Semita. No reira, teie ïa te pupu tahito roa ae i roto i te Ekalesia e teie hoi te pupu tei riro ei mea faufaa i roto i te numera matamua. Eita oia e haapao noa i te mau hinaaro o te feia veve, o te feia ma’i e o te feia ravai ore, tera râ te tahi tuhaa o ta’na hopoi’a – e te tuhaa rahi atoa ae ïa – o te araraa ïa i te maitai pae varua e te faaoraraa o te mau metua vahine e o te mau tamahine i Ziona; no te hi’o aita roa’tu hoê noa ae o ratou i haapao orehia, tera ra ua paruruhia ratou taatoa i te veve, i te mau ati, i te mau mana o te pouri e te mau ohipa ino o tei haafifi ia ratou i te ao nei. E hopoia na te Sotaiete Tauturu ia aupuru i to ratou iho maitai pae varua e i to te mau tuahine atoa o te Ekalesia.⁷

I raro nei, i hea roa tatou e imi ai i te maitai, i te varua parau mau, i te haavare ore, i te aroha o te Atua, i te hitahita ore e te faaoromai, i te faaoreraa i ta vetahi hapa e te faaoromai maoro, i te aroha e te tahi atu mau maitai pae varua, maori râ i roto i te mau faanahonahoraa o te haapautuutu nei i te mau metua vahine e i te mau tamahine i Ziona. Te mau nei outou, e to’u mau tuahine here e, i te mana rahi i roto i to outou mau ti’araa no te amo i to outou mau piiraa ei melahi aroha no te feia i roto i te mamae e te faatitiraa, no te feia i hi’a, no te feia overe, no te feia paruparu e no te feia taparu. Te mau nei outou i te reira mana e e tura to outou no te faaohipa i te reira i rotopu i te nunaa o te Atua e i rotopu atoa i te feia e faatiahia outou ia tapiri atu!

I te mau vahi atoa e hinaarohia ai te tamahanahana, tei reira teie faanahoraa e ua ineine oia i te horo’a i te tamahanahanaraa o tei titauhia. I te mau vahi te vai nei te ma’i, tei reira te Sotaiete Tauturu i roto i to’na mau amaa e te rauraa o to’na mau faanahoraa no te faatere i te mau mea e hinaarohia. I te mau vahi atoa te erehia râ te ite i te mau parau tumu o te oraraa, i te mau parau tumu o te oraraa titiaifaro, i te mau parau tumu o te oraraa tano, ua ineine ïa teie faanahoraa no te horoa i te ite, no te haamaramarama e no te haapii na roto i te hi’oraa maitai e ia au i te ture i te feia e titau nei i teie huru tauturu e i teie huru patururaa.

I roto i te mau faito atoa no te ma’ua, e aore ra no te ereraa i te ite i te ohipa no te pae utuafare, no te mau hopoi’a a te utuafare, oia ia no te mau hopoi’a o te ti’a ia tupu maite i rotopu i te hoê tane e ta’na vahine faaipoipo e te mau metua e te mau tamarii, oia ïa na roto i teie faanahoraa a te Sotaiete Tauturu, te mau aratairaa e te mau heheuraa ta’na i farii, e mea fatata oia e ua ineine atoa i te horoa’tu i te mau haapiiraa ia au i ta’na mau hopoi’a faufaa roa. I te vahi te vai nei te hoê metua vahine apî o tei ore i ite i te mau mea e titauhia ia’na ia ite no nia i te aupururaa e te haapa’oraa i ta’na aiu, e aore ra i te faaunauna e te faanehenehe i to’na fare no’na iho e no to’na hoa faaipoipo, te vaira ïa teie faanahoraa, te hoê tuhaa o teie faanahoraa, no te haapii i teie metua vahine apî e no te tauturu ia’na ia rave i ta’na hopoi’a e ia rave maitai. E i te mau vahi atoa aita e rava’i te ite i roto i te horoaraa e te faaamuraa i te maa tano e te maitatai i te mau tamarii, e aore râ i te vahi e hinaarohia ia horo’a i te aratairaa pae varua ti’a e te maa pae varua i te mau tamarii, te vaira ïa i roto i te faanahoraa rahi o te Sotaiete Tauturu a te mau tuahine o te Ekalesia a Iesu Mesia i te Feia Mo’a i te mau Mahana Hopea nei te mau faanahoraa na te mau metua vahine e na te mau tamahine i Ziona, te mau tuahine o te ti’a ia horo’a i tera haapiiraa.⁸

A tamau i te aupuru i te feia riirii… Te peapea nei matou i te manaoraa e, te vai râ paha o ratou o te mamae nei i roto i te mamu e o te hinaaro nei hoi i te rima tauturu. Ta outou hopoi’a matamua o te feia ïa e parahi râ i roto i to outou aroa. A haamana’o i te feia ruhiruhia, a haapa’o i te mau tamarii otare e i te mau vahine ivi.⁹

Aita i maoro ae nei ua farii au i te haamaitairaa ia haere atu e hi’o i te hoê o te mau puhaparaa i roto i te hoê titi atea o Ziona, i reira e rave rahi te mau taata i ma’ihia, e noa’tu ua ratere matou e rave rahi mau mahana e ua tapae atu matou i te puhaparaa i te maororaa pô, ua anihia matou ia haere atu na muri i te peresideni no te fareirei i te tahi tau taata rii o tei ma’ihia. Ua ite atu matou i te hoê tuahine iti e tarava noa ra i ni’a i te ro’i ma te ma’i rahi, e te papu ore e ora anei to’na ma’i. Te parahi râ to’na hoa faaipoipo iti na te pae o te ro’i ma te mamae rahi a hi’o ai oia i te ma’i rahi o ta’na vahine faaipoipo o tei riro ei metua vahine no te mau tamarii e rave rahi. Tei roto te utuafare i te veve rahi.

Aita i maoro, ua tomo mai te hoê vahine i roto i te fare, ma te ete maa i roto i ta’na rima e tae noa’tu i te tahi atu mau mea monamona no to te utuafare i roohia i te ati. Ma te aniani, ua ite matou ua faauehia oia na te Sotaiete Tauturu o te paroita ia haapa’o e ia atuatu i teie vahine ma’i i roto i te pô taatoa. Tei reira oia ma te ineine i te haapa’o i te mau tamarii iti nainai, i te haapa’o e ua faahapu maitaihia ratou e ua faatamaahia e ua faata’otohia ratou; ia tama i te fare e ia rave i te mau mea atoa no te haamaitai i te vahine ma’i e to’na utuafare. Ua ite atoa matou e, ua maitihia te tahi tuahine no te mono ia’na i te po’ipo’i ae; e na reira, i te mau mahana taatoa, ua farii teie utuafare iti i te aupuru aroha e te haapa’o o te mau tuahine o te Sotaiete Tauturu tae roa’tu i te taime e afaro mai teie tuahine i roohia i te ma’i e te mamae.

Ua ite atoa matou e, no te mea ua nahonaho maitai e ua afaro maitai teie Sotaiete Tauturu, ua farii atoa te tahi atu mau ma’i o teie puhaparaa hoê â huru utuuturaa, e hoê â tautururaa no te tamahanahanaraa ia ratou. A tahi râ vau a ite ai i te faahohoaraa o te faufaa e te nehenehe o teie faanahoraa faahiahia, e ua mana’o vau eere anei teie i te hoê ohipa faahiahia mau ta te Fatu i heheu i te Perofeta Iotefa Semita ia faati’a i teie huru faanahoraa i roto i te Ekalesia.¹⁰

O vai te nehenehe e parau i te maitai rahi e faatupuhia i rotopu i te Feia Mo’a na roto i te hoê Sotaiete Tauturu nahonaho maitai e te afaro maitai, eiaha i te pae tino noa, i te pae varua atoa râ. E ohipa aroha te reira e aita roa’tu paha e vaira hoê noa ae ohipa faufaa roa ae maoti ra te aroha o tei aratai maitaihia, no te farii i te here e i te ti’aturiraa o to tatou mau taata tupu. E ia roaa anae to ratou ti’aturiraa na roto i te tahi mau ohipa haihai, e mahuti ïa te uputa no te arata’i i to ratou varua i te tahi vahi teitei ae o te faaroo e te maitai pae varua; e oia mau, mea faufaa ae te pae varua i te pae tino…

Mai te peu e feruri maite tatou, mea maitai ae ia pohe tatou i te po’ia tahuti eiaha râ i te pohe veve e i te pohe ma’ua i te pae tahuti e i te pae varua o tei riro ei mea faufaa ia roaa ia tatou te ô o te ora mure ore, te ô rahi roa ae a te Atua. Mea faufaa ae no’u ia ite i te mau parau tumu o te parau mau mure ore i te maa tahuti nei. Tera râ, e mea faufaa no tatou nei teie na tuhaa toopiti, te maa pae varua e te maa pae tino e ua faaohie hoi te Atua ia farii te taata nei i na tuhaa toopiti, maoti ra na roto i te haapaoraa i Ta’na mau ture e na roto i te oraraa ia au i To’na hinaaro.

E hopoia na te mau tuahine e haa nei i roto i te Sotaiete Tauturu te raveraa i te mau tamarii mai to ratou aruaruraa no te tauturu ia ratou ia riro ei mau tamarii afaro e te maitai, o tei ti’aturi atoa i te Atua te Metua Mure Ore e i te misioni hanahana a Ta’na Tamaiti; te aratairaa i te mau metua vahine ia haapii i ta ratou mau tamarii i ni’a i teie e’a. E hopoi’a faufaa teie, faufaa ae i te atuaturaa i te mau hinaaro pae tino nei o tei tuuhia i ni’a ia outou, e to’u mau tuahine. Oia mau, aita e oti’a i roto i te ohipa maitai ta outou e nehenehe e rave i roto i te mau tuhaa atoa e i te mau vahi atoa e roaa ia outou.¹¹

Tei roto te rahiraa o te mau haaraa a te Sotaiete Tauturu i te mau ohipa materia o te oraraa nei, i te mau mitoraa pae tino o te nunaa o te Ekalesia, tera râ, e nehenehe atoa te mau haaraa a te Sotaiete Tauturu e hemo ae i te mau oti’a o te oraraa tahuti nei, mai te mea e faaû atu oia i te nuuraa i mua pae varua o te taata e tae noa’tu hoi i te mau hinaaro pae tino nei…. E hopoia na outou te aupururaa i te mau tamarii otare, eiaha râ i to ratou mau hinaaro pae tino noa, i to ratou atoa râ haereraa i mua i te pae maramarama e i te pae varua. Oia mau, ia riro outou ei metua vahine no te mau tamarii otare e ei tauturu no te feia i roto i te fifi. I roto i teie mau haaraa atoa, e ti’a te Ekalesia i muri ia outou no te tauturu ia outou.¹²

Ua riro te mau mea pae varua ei mea faufaa roa ae. Na’na e haapuai i te faaroo o te mau tane e o te mau vahine, e horo’a i te maramarama, te ite e te mana no te faaruru i te diabolo e i te mau faahemeraa a te diabolo, te mana no te ite atea i te mau ohipa haavare a te taata e te mau ohipa iino. Taua maramarama râ, taua ite pae varua ra, taua maramarama pae varua râ o tei tauturu ia outou ia faataa te parau mau i te parau hape, te maramarama i te pouri, te maitai i te ino, o te reira ïa te mea faahiahia te ti’a ia tatou ia imi e ia roaa hoi te reira ia tatou.¹³

A feruri na ia Emeline B. Wells, te Peresideni o te Sotaiete Tauturu.… ua tomo oia i roto i te Ekalesia i to’na nainairaa, ua faaruru oia e rave rahi mau tamataraa, te oto, te riaria e te peapea e te mau ati atoa i faaruruhia’na i te omuaraa o te oraraa o te Feia mo’a matamua o te Ekalesia. To ratou tere mai Misouri, Nauvoo e tae atu i roto i te Faa o te mau pae mou’a, a tere ai ratou na roto i te mau fenua ano e i reira aore hoi e tipaeraa no te faaea e no te haamaha i te rohirohi. Ua taia anei o’na? Ua taia anei to’u metua vahine? Ua taia anei o Vilate Kimball? Aita, ua tiaturi râ ratou i te Atua e aita roa ratou i faaru’e i te maramarama e vaira i roto i to ratou aau no ni’a i te Atua e i Ta’na parau mau. E roaa anei ia outou ia ruri ê atu i te hoê noa ae o teie mau vahine i roto i to ratou mau ti’aturiraa i te Ekalesia a Iesu Mesia i te Feia Mo’a i te mau Mahana Hope’a nei? E roaa anei ia outou ia haapouri i to ratou mau feruriraa no nia i te misioni a te Perofeta Iotefa Semita? E roaa anei ia outou ia tapo’i i to ratou mata no ni’a i te misioni hanahana a Iesu Mesia, te Tamaiti a te Atua? Eita roa’tu e amuri noa’tu. No teaha? No te mea ua ite ratou. Ua heheu te Atua i teie mau mea ia ratou, ua haroaroa ratou, e aita e mana i ni’a i te fenua nei e nehenehe e ruriê i ta ratou i ite no nia i te parau mau. Aita te pohe i taiâhia e ratou. Aita te mau tamataraa i haaparuparu ia ratou. Te toetoe e aore râ te ua e aore râ te veavea eita te reira i te ma’i no ratou. Te mea otahi roa o ta ratou e hiaai râ, e ite râ e e nounou râ, o te upootiaraa ïa te Basileia o te Atua e te parau mau o ta te Fatu i horoa i roto ia ratou.

Teihea roa teie mau vahine i teie nei? Tei onei vetahi pae, mauruuru pai i te Atua no te mea e mea rahi ratou. Area râ, te vaira te tahi i onei eere to ratou huru i te mea tano i tei titauhia ia ratou…. A tuatapapa hohonu’na i to ratou oraraa, to ratou aau e te mau peu matauhia e ratou io ratou râ, i reira outou e ite ai e, aita ratou e tuea râ i te mau tuahine o ta tatou e titau nei, aita ratou e tuea râ i te hohoa o ta te Evanelia e faatupu i ni’a i te hoê vahine e aore râ i ni’a i te hoê tane o tei farii i te Evanelia e o te ora râ i te Evanelia, no te mea aita ratou iho i ite i te Evanelia, e aita atoa ratou e ora râ i te Evanelia. Ia hi’ohia ratou, e mana’o outou e, te mau râ ratou i te mau mea atoa e tei roto ia ratou te mau maramarama atoa, te faaroo taatoa, te paari taatoa e te ite taatoa; eita roa râ mai te reira te huru—aita ratou e mau ra i te reira. Ia faaea anae te mau vahine e te mau tane i te pii i te Atua na roto i te pure, te ere râ ïa ratou i te tahi mea.… Aita to ratou e vai papuraa, aita to ratou e faaroo e aita atoa to ratou e aroha mai te au i tei titauhia ia ratou.¹⁴

Mea faufaa te parau e te ture a te Atua no te mau vahine o te hinaaro e tapae i te mau hope’a maitata’i e no te mau tane atoa; ia haapii e ia feruri te mau vahine i te mau fifi o teie ohipa rahi o te mau mahana hope’a nei ma te faaau i te mau heheuraa a te Atua e ma te tauturu a To’na varua, o te ti’a ia ratou ia farii i te reira na roto i te pure tae e te u’ana.¹⁵

Ia haa tatou no te maitai pae tino e no te maitai pae varua o te Ekalesia, e ia haamata tatou i te haapuai i te ohipa no te haamaitairaa pae varua e te oraraa pae varua e te faaoraraa o te Ekalesia.¹⁶

Te faaite nei matou i to matou faatura e to matou ti’aturi i te mau tuahine o te haa nei i roto i te Sotaiete Tauturu; e haamaitai mai te Fatu ia ratou. Ua na reira oia i mutaa râ e tamau noa Oia i te haamaitai ia ratou mai te peu e tamau noa ratou i te paturu i te Autahuaraa o te Atua o tei tuuhia mai i nia i te ao nei no te aratai i te Ekalesia e no te haapao i te mau ohipa o te basileia o te Atua.¹⁷

Te hinaaro nei au e parau … i te Sotaiete Tauturu … e i te mau faanahoraa paatoa o te Ekalesia, aita roa’tu outou i taaê atu i te Autahuaraa o te Tamaiti a te Atua, eita roa te Fatu e farii i mua i To’na aro hoê noa ae o ratou mai te peu e faaatea ratou ia ratou i te reo e te aratai o te mau taata faatere no te Autahuaraa. Tei raro ae ratou i te mau mana e i te tura o te Ekalesia e aita ratou i taaê i te tahi. Aita atoa hoi ratou e faaohipa i te hoê noa ae ti’araa i roto i ta ratou mau faanahoraa maoti râ na roto i te Autahuaraa o te Ekalesia.¹⁸

Ma to’u varua hohonu, hoê anae hiaai to’u no teie mau vahine maitai atoa, o te haa nei i roto i teie ohipa faufaa, oia hoi ia Haamaitai te Atua ia ratou, ia paruru i to ratou ora, ia tauturu ia ratou ia vai itoito noa e te papu i roto i to ratou parau ti’a no te maitai o Ziona; e ia tauturu ia ratou ia farii i roto i to ratou varua e, o te Ekalesia a Iesu Mesia i te feia Mo’a i te mau Mahaha Hope’a nei te tuuhia i mua roa e aita’tu e Ekalesia maitai i te Ekalesia nei i raro ae i te Basileia tiretiera. Te mau ra te Ekalesia i te mana o te Atua, te parau ti’a, te parau mau e te mana no o mai i te Atua râ, no te rave i te ohipa a te Atua i ni’a i te te fenua.¹⁹