Te Opuaraa Rahi o te Ora e o te Faaoraraa

Te ora nei te Fatu Mana Hope; ua hamani Oia i te ra’i, te fenua e te mau pape pihaa ra, e ua riro tatou ei mau tamarii Na’na, ei huaai No’na, e aita hoi tatou i tae mai i onei ma te tumu ore. Ua faanahonaho te Fatu i to tatou taeraa mai i onei e te tumu hoi no to tatou oraraa. Ua faataa Oia e, e rave faaoti tatou i ta tatou misioni, e riro tatou ia au i te huru e te hohoa o Iesu Mesia ra, e mai Ia’na ra, aita ta tatou e hara, e faaorahia râ tatou, mai Ia’na ra e faaîhia tatou i te ite pora’o ore, e mai Ia’na ra, e faateiteihia tatou i te rima atau o te Metua ra, no te parahi i ni’a i te mau terono, e no te faatere arii e na roto i te mana i roto i te openu e piihia ai tatou ia faatere. Te faaite papu nei au no nia i teie parau tumu, no te mea ua faaite mai te Fatu i te reira i roto i to’u tino taatoa, mai to’u tumu upoo e tae roa’tu i to’u tupuae avae.³

E faautuahia te taata i roto i te oraraa amuri ae ia au i te mau ohipa ta’na i rave i roto i teie nei oraraa, e e e haavahia oia no te mau tiaauraa o tei tuuhia i roto i ta’na rima i roto i teie oraraa nei, i mua i te aro o te Haava o te feia ora e o te feia pohe, te Metua o to tatou varua, e to tatou Fatu. O teie te faanahoraa a te Atua, e tuhaa no ta’na ra opuaraa rahi. Aita tatou i haere mai i onei no te ora no te tahi noa tau ava’e rii e aore ra no te tahi noa tau matahiti rii, no te tamaa, no te inu e no te taoto, e i muri iho no te pohe. Aita te Fatu Mana Hope i faanahonaho i te hoê oraraa poto no te taata, te faufaa ore e te titiaifaro ore.⁴

Hou tatou a haere mai ai [i raro nei], ua ite tatou i te faufaa rahi ia tae roa mai tatou i roto i teie oraraa tahuti nei. Ua ite atoa tatou te faufaa rahi ia farii i te hoê tino tahuti e ua ite atoa tatou i te hanahana ia huaaihia tatou. Te opuaraa rahi o ta tatou e titau ra i te taime e tamatahia ai tatou—ia faitohia tatou i roto i te faito, o te faaohiparaa ïa i to tatou mau aravihi no o mai i te Atua ra, i to tatou mau mana no o mai i te Atua ra e tae noa’tu i te tiamaraa tei fatuhia e tatou. Na roto i teie mau rave’a, i muri ae i to tatou pouraa i raro ae i te mau mea atoa ra, mai te Mesia ra, e faateitei atoa tatou ia tatou i nia ae i te mau mea atoa ra, [a tai’o PH&PF 88:6], e e farii hoi tatou i te puai manahope e te huru mure ore o to tatou Metua i te Ao ra, o to tatou Metua Vahine i te Ao ra e o To Tatou Taeae Matahiapo! Ahiri aita tatou i ite i teie mau mea atoa nei, eita roa tatou e hinaaro e haere mai i onei.⁵

Aita’tu e mea faufaa ae i raro ae i te ra’i no’u nei e no te mau tamarii a te taata nei mai te opuaraa faahiahia no te oraraa e te faaoraraa o tei faaineinehia i te ra’i ra i te matamua ra, o tei horo’ahia mai na roto i te mau tau atoa e na roto i te faaururaa a te tahi feia mo’a i piihia e te Atua e tae roa mai i te mahana o te taeraa mai o te Tamaiti a te Taata nei, ua heheuhia mai teie Evanelia e tae noa ‘tu i teie nei opuaraa no te faaoraraa i to tatou mau metua o Adamu e o Eva. Ua horo’a te melahi no te Atua ia raua te opuaraa no te faaoraraa, te faaoraraa mai te pohe e te hara, ua heheuhia ïa i tera taime e i tera taime na roto i te mana no te Atua i te mau tamarii a te taata nei, aita te reira i taui. Aita hoê mea i roto i te reira i te matamua o tei faufaa ore, aita hoê ae mea e ti’a i te faaruehia, ua faaoti maitaihia teie opuaraa i te matamua ra na roto i te paari o te Metua e o te feia mo’a ra no te faaoraraa o te taata nei mai te pohe, e no to ratou faaoraraa e to ratou faateiteiraa i mua i te aro o te Atua.… Na roto i te mau u’i o te mau tau, taua Evanelia ra, taua opuaraa ra no te oraraa e te faaoraraa, taua mau oro’a ra, te hunaraa i roto i te Mesia, te haamanaoraa o te tusia rahi o tei pupuhia no te hara a to te ao nei e no te faaoraraa o te taata nei, ua horo’ahia ïa na roto i te mau tau, mai te hamaniraa o teie ao.⁶

E opuaraa no te ora ta te Mana Hope i faahoi mai i te taata nei i te mau mahana hopea nei no te faaoraraa i te varua taata i roto i te ao amuri atu e i roto atoa i teie oraraa to tatou, inaha ua haamau te Fatu i Ta’na ohipa ia farii hoi To’na nunaa ia i te iraa o te mau haamaitairaa o teie nei oraraa; ia faaorahia ratou i roto i teie nei oraraa e i roto atoa i te oraraa amuri atu, ia haamau ratou i o nei te niu no te paruru ia ratou i te hara, i to’na mau ino e i to’na mau hopearaa, ia riro ratou ei feia ai’a i roto i te basileia o te Atua i tera atu pae i teie faa no te roimata. Te Evanelia a Iesu Mesia, o te mana ia o te Atua no te faaoraraa.⁷

Ua paraparau te Atua i To’na ra tavini ia Iosepha Semita e ua ti’a hua roa mai Oia i mua Ia’na; eiaha te Metua anae ra, te Tamaiti atoa ra. Ua heheu raua ia raua iho i mua ia’na, e horoa atura ia’na ra te mau faaueraa e tae noa’tu i ta raua ture, ta raua Evanelia e ta raua opuaraa no te ora mure ore.… Tei roto i teie opuaraa te faaoraraa mai roto atu i te hara e i te mau hopearaa o te hara i roto i teie oraraa nei e i te oraraa amuri ae. Tei roto atoa i teie opuaraa te faateiteiraa, te hanahana, te mana e te faatereraa arii, e e roaa te reira i te mau tamarii a te Atua na roto i to ratou haapaoraa i te mau ture e i te mau parau tumu o te Evanelia.⁸

Te tumu o to tatou oraraa tahuti nei, o te faariiraa ïa i te iraa o te oaoa e ia riro hoi tatou ei mau tamarii tamaroa e ei mau tamarii tamahine na te Atua ia au i te tatararaa maramarama mau o te ta’o, ia riro tatou ei feia ai’a no te Atua e ei feia ai’a amui atoa e o Iesu Mesia (a tai’o Roma 8:14-17), ia riro tatou e mau arii e ei mau tahu’a i te Atua ra, ia ai’a tatou i te hanahana, te faatereraa arii, te faateiteiraa, te mau terono e te mau mana atoa e tae noa’tu i te mau ateributi i haafaufaahia e i mauhia e to tatou Metua i te Ao ra. Te reira te tumu no to tatou oraraa i te ao nei. No te titau i teie faito hanahana, e mea faufaa ia haere tatou na roto i teie oraraa nei e aore ra na roto i te tamataraa tahuti nei, e e mea na reira hoi tatou e faaite ai e mea tiama tatou, na roto i te tauturu a to tatou tuaana ra o Iesu Mesia.⁹

Te tumu o to tatou oraraa i te ao nei, o te haapaoraa ïa i te hinaaro o to tatou Metua mai tei na reira atoahia i te ao ra, no te faatupu i te parautia i te ao nei, no te haavi i te ino e te taataahiraa i te reira i raro ae i to tatou tapu avae, no te upootia i nia i te hara e i te enemi o to tatou nei varua, no te faateitei ia tatou i nia ae i te mau hapehape e te mau paruparu o te taata tahuti, na roto i te faaururaa a te Atua Mana Hope e i te mana o Ta’na i faaite mai, e e mea na reira hoi tatou e riro ai ei feia mo’a e ei mau tavini no te Fatu i te ao nei.¹⁰

E pohe tatou paatoa. Te reira anei râ te hopea o to tatou nei oraraa? Mai te mea i ora na tatou i mutaa ra, hou a haere mai ai i raro nei, e tamau a ïa tatou i te ora i taua oraraa râ ia faarue tatou i teie oraraa nei. E ora noa â te varua mai ia’na i ora’na i mutaa ra, e e fanao oia i te tahi atu â mau maitai i faariihia e ana na roto i te mau tamataraa o teie nei oraraa. E mea faufaa roa ino ia haere mai tatou i te ao nei e ia farii hoi i te tino tahuti; no te mea ahiri aita to tatou e tino tahuti, eita ïa tatou e riro mai te Atua ra te huru e mai ia Iesu Mesia atoa ra te huru.… E haere tatou i rapae i to tatou mau menema ra mai ia Iesu Mesia atoa ra, no te faarii i te tino tahuti ore mai ia’na atoa ra—oia hoi, e riro to tatou mau tino tahuti ei tino tahuti ore mai To’na atoa ra te huru, e e apitihia te varua e te tino, ia riro raua ei hoê taata ora, aita e apapiti, aita e taaê i te tahi e e mea mure ore râ.¹¹

Te tiai ru nei au i te taime e faarue ai au i teie nei oraraa, ei reira vau e faatiahia ai ia farii i te mau horoa’toa e te mau haamaitairaa’toa o tei faatupu i to’u nei oaoa i roto i teie nei ao; oia, te mau mea atoa. Aita vau e tiaturi nei e, te vai ra te hoê mea o tei opuahia no to’u nei oaoa o te patoihia ia’u i roto i te oraraa amuri atu, mai te mea e haapao vau e tae noa’tu i te hopea; ahiri aita ra, eita ia te îraa o te oaoa e roaa ia’u.… Te parau nei au i te oaoa e roaa mai na roto i te imiraa ia haapao i te hinaaro o te Atua i te ao nei e i te ao ra. Te tiai nei tatou i te taime e hoê ai tatou i ta tatou mau vahine e i ta tatou mau tane i roto i te oraraa amuri atu. Te tiai nei tatou i te taime e ite tiama ai ta tatou mau tamarii ia tatou ei mau metua tane e ei mau metua vahine no ratou i roto i te oraraa amuri atu. Te tiaturi nei au i te reira, Aita’tu ta’u e tiairaa. Ahiri aita te reira, aita ïa to’u e oaoaraa.¹²

Te mau parau tumu o te Evanelia i heheuhia mai e te Fatu i teie anotau, e aratai ia ia tatou i te ora mure ore ra. O te reira ta tatou e imi ra. O te reira te tumu i hamanihia ai tatou. O te reira te tumu i hamanihia ai te ao nei. Te tumu tatou i haere mai ai i raro nei, no te imiraa ïa ia upootia i ni’a i te mau ohipa maamaa e no te faaineineraa ia roaa ia tatou te ora mure ore amuri ae.…

Ia riro tatou ei feia haapao e te haehaa. Ia ora tatou i te haapaoraa a te Mesia. Ia faaea tatou i te rave i ta tatou mau ohipa maamaa, i te hara e i te mau haaparuparuraa o te tino, e ia taati’tu tatou i te Atua e i Ta’na ra parau mau ma te aau rotahi e ma te hiaai onoono ia aro i roto i te aroraa maitai o te faaroo e ia tapea etaeta noa e tae noa’tu i te hopea.¹³

Te tiaturi nei au e, ua riro to tatou Faaora ei hi’oraa mure ore no te mau taata atoa i te tino nei. Te mau ohipa o Ta’na i rave, ua faauehia tatou ia na reira atoa. Ua anihia tatou ia apee Ia’na; mai Ia’na i apee i To’na ra raatira; e te vahi i reira Oia, i reira atoa tatou, e no te mea hoi tei pihaiiho tatou Ia’na, mai Ia’na atoa râ ïa tatou.¹⁴

Te mea faufaa roa ia feruri, eere ïa i te aho maoro o to tatou oraraa, o to tatou râ aporaa i te haapiiraa o te oraraa nei, o to tatou amo maiteraa i ta tatou mau ohipa e i ta tatou hopoia i mua i te Atua e i mua i te tahi e te tahi. Te hoê o te mau tumu faufaa roa o to tatou oraraa, o to tatou ïa faaauraa ia tatou i te hohoa e i te huru o taua tino ra tei tae tino roa mai i roto i te tahuti nei ma te viivii ore—te hara ore, te parau ti’a e te pora’o ore! Ua haere mai Iesu Mesia i te ao nei eiaha ei taraehara noa no to te ao nei, ei hohoa atoa râ i mua i te mau taata atoa e no te haamau i te hohoa no te maitai roaraa o te Atua e no te ture a te Atua e no te haapao i te parau a te Metua.¹⁵

Aita e haapiiraa maitai ae i ta Iesu.… Ua heheu mai Oia ia tatou i te e’a no te faaoraraa mai te haamataraa, na roto i te mau tamataraa o teie nei oraraa e tae roa’tu i te faateiteiraa oti’a ore e te hanahana i roto i To’na ra basileia e i te hoe oraraa api i reira.…

E oaoa rahi to te taata e farii i teie iteraa papu maitai no to’na ra varua, ia parahi i roto i te hau e ia imi i te ravea hoê e tapae ai i reira, e te reira ravea hoê ra o te mau haapiiraa ïa a Iesu Mesia. Te haapii ra Ta’na Evanelia ia aroha tatou i to tatou taata tupu e ia rave tatou i te mau ohipa maitai atoa i faataahia no te faaaano i te varua o te taata.…

… “E haere mai outou ia’u nei, e te feia atoa i ha’a rahi, e tei teiaha i te hopoia, e na’u outou e faaora” (Mataio 11:28) o ta’na ia piiraa i te mau tamarii tamaroa e i te mau tamarii tamahine a te taata nei.¹⁶

O te Mesia te hioraa maitai rahi roa no te taata atoa e te tiaturi nei au e, ua faaineine ateahia te mau taata atoa ia riro mai Ia’na ra i te huru, mai Ia’na atoa i faaineine ateahia ia riro ei Faaora no te taata nei.… Ua hamanihia tatou ia au i te tarairaa tahuti o te Atua, e e riro atoa tatou ia au i To’na tarairaa varua, To’na maramarama, To’na paari e To’na mana.

Te tumu rahi tatou i haere mai ai i te ao nei, no te riroraa ïa mai te Mesia ra te huru, no te mea ia ore tatou ia riro mai Ia’na ra te huru, eita ïa tatou e riro ei mau tamarii tamaroa na te Atua, e eita tatou e riro ei feia ai’a e te Mesia ra.¹⁷

E pee tatou i te Tamaiti a te Atua. A faariro ia’na i to tatou nei hioraa maitai, to tatou taata aratai. E rave tatou mai ia’na e rave nei. A rave i ta’na ohipa. A riro mai ia’na i tei tia ia ratou i te rave no te riroraa mai ia’na te huru, oia hoi te maitairoa raa e te hara ore.¹⁸

E aore hoi ra i’oa i horoahia mai i raro a’e i te ra’i, e tia’i i te taaata ia faaorahia i te basileia o te Atua ra.¹⁹

Te taata e haere na roto i te tamataraa o te tahuti nei, o te faaite i to’na haapao maitai, e faaorahia ïa i te hara e i roto i te toto o te Mesia, na roto i te mau oro’a o te Evanelia, ia roaa ia’na te faateiteiraa i roto i te basileia o te Atua, aita ïa oia i iti ae i te teitei o te mau melahi ra.²⁰

Ua o tatou i roto i te taamu o taua fafauraa api ra e te mure ore ma te faaiteraa’tu e haapao tatou i te mau faaueraa a te Atua i te mau mea atoa o Ta’na e faaue mai ia tatou. O teie te fafauraamure ore e tae roa’tu i te hopearaa o to tatou oraraa.… Eita tatou e ite i roto i teie oraraa e i te oraraa amuri atu i te taime e ore ai ei faaheporaa e ei oaoaraa no tatou ia amo i ta tatou mau hopoia ei mau tamarii Na’na i te haapaoraa i te mau faaueraa a te Fatu e tae noa’tu i te hopearaa o te mau tau e amuri noa’tu. E mea na roto i teie nei parau tumu tatou e haafatata ai i te Atua e e vai maitai tatou i ta’na ra mau opuaraa. Na roto anae i teie tatou e rave faaoti ai i ta tatou misioni, e farii ai i te terono e te horo’a o te ora mure ore, o te riro ei horo’a rahi roa ae i te mau horoa atoa a te Atua. Te ite ra anei tatou i te tahi atu â ravea? ²¹

Aita’tu e faaoraraa i te faaoraraa ta te Atua i maiti. Aita e tiaturiraa no te ora mure ore maori ra na roto i te haapaoraa i te ture ta te Metua o te ora i tuu mai, “aita ana e tauiraa, aita te hoê noa ae initi tauiraa.” [Iakobo 1:17] aita’tu e ravea e farii ai tatou i te maramarama e te faateiteiraa. Aita roa to’u varua i feaa noa ae no ni’a i teie mau mea nei, ua ite au e parau mau te reira.²²

E roaa tataitahi te haamaitairaa, te fana’o, te hanahana e aore ra te faateiteiraa, na roto noa i te haapaoraa i taua ture ra i faatumuhia ai taua atoa ra mau fafauraa ra. Ia haapao tatou i te ture, e farii tatou i te haamaitairaa, aita’tu e ravea e farii ai tatou i te reira.²³

Aita te Mesia i farii i te maitai roaraa i te matamua ra; aita Oia i farii i te iraa mai te matamua, ua farii râ Oia te aroha no te aroha, e ua haere noa ra mai te aroha i te aroha, e tae noa’tu i te taime Oia i farii ai i te iraa (PH&PF93:11–13) Eere anei mai te reira atoa no te mau tamarii a te taata nei? Ua maitai roa anei te taata i te haamataraa? Ua farii anei te taata i te iraa i tera iho taime? Ua tae anei tatou i te hoe faito e tia ia tatou ia farii i te iraa o te Atua, o To’na hanahana, e To’na ra maramarama? Aita, aitia, mai te peu e aita o Iesu, te Tamaiti a te Atua e te Metua o te ra’i e o te fenua e orahia ra e tatou, aita hoi i farii i te iraa i te matamua, area ra ua tupu mai i roto i te faaroo, te ite, te maramarama, e te aroha e tae noa’tu i te taime oia i farii ai i te iraa, eita anei e tia i te taata atoa o tei fanauhia i te metua vahine i te farii i te faaue na nia i te faaue, i te a’o na nia i te a’o, e te tahi vahi iti i onei e ei o te tahi vahi iti e tae noa’tu i te taime e farii ai ratou i te iraa, mai ia’na i farii i te iraa, e ia faateiteihia ratou i pihaiiho ia’na i mua i te aro o te Atua?²⁴

Te ora nei au no to’u iho faaoraraa i teie nei e a muri atu; i muri mai i to’u faaoraraa, te vaira te faaoraraa o ta’u mau tamarii e to ratou mau metua vahine i herehia. Aita te hoê ae mea o ta’u e rave i teie nei ao e nehenehe e parau ei tusia mai te peu e ua roaa ia’u te re hanahana. Ua riro te reira ei ohipa no te here, te tutavaraa i te ora mure ore e te iraa o te oaoa. “O tei noaa te ora mure ore ra, ua faufaahia ia”. [PH&PF 6:7]²⁵