Te Tihetiti e te Ma

Te tiaturi nei tatou e, te ora nei te Atua e o Oia te haava o te feia ora e o te feia pohe. Te tiaturi nei tatou e, tei nia To’na mata i te ao nei e te hi’o râ Oia i Ta’na mau tamarii i te haereraa mai te matapo e te purutia i roto i to ratou paruparu i te ao nei. Te tiaturi nei tatou e, ua tae mai tatou i onei na roto i Ta’na opuaraa … ua tae mai tatou i onei no te rave faaoti i te hoê faataaraa, eiaha ra no te faatupu i te hoê haapahiraa, e aore ra no te haamaha i to tatou mau aau hiaai i roto i te tahuti nei.²

Te vai maraa e te feruriraa i te mau manao tano … o te haamataraa ïa o te mau raveraa tia atoa. To’u nei hinaaro, ia ite hoi te feia api atoa i te faufaa o teie mau raveraa e te faufaa o te taviniraa i te Fatu i to ratou apiraa. Te tupuraa, te haamaitairaa, te haereraa i mua, te faaturaraa ia’na iho, te poupou e te faahiahia o te mau taata, e mau tuhaa anae te reira i roto i te oraraa o te feia api. Ua faaite te Faaora i te hioraa maitai, e ua haamata oioi oia i te rave i te ohipa a to’na ra Metua. Ua faaineine te peropheta Samuela ia’na i to’na api roaraa ia riro ei mea ma e te faatura ia ti’a ia’na ia faaroo i te mau omuhumuhu a te Atua.³

E rave rahi atu a mau tumu o tei ore i itehia e te feruriraa o te taata te tumu te viiviiore e horoa ai te puai e te mana i te mau nunaa o te ao nei, e parau mau ra te reira.⁴

Te tiaturi nei tatou i te hoê noa faito morare no te mau tane e te mau vahine. Ia haafaufaa orehia te maraa o te oraraa, e tae mai te mau ati atoa i nia ia tatou mai te pape tahe e tahe ia iritihia te mau uputa tapea pape.⁵

E hiaai mo’a to tatou ia haapapu maite i te ino rahi o te mau hara apeni. Noa’tu e haafaufaa orehia te reira e te mau taata o tei ore i ite i te hinaaro o te Atua, ua riro teie mau hara ei mea faufau roa i mua i to’na aro, e mai te peu e ua hinaaro tatou ia vai noa tatou ei nunaa maitihia e mea tia ia horo tatou i te atea roa i taua mau mea nei mai ia tatou e ape ra i te uputa o hade. Te mau hopearaa ino o teie nei mau hara, e itehia i roto i te mau ohipa faufau, te hamani ino, te oto, e te ma’i, e e tia hoi i te feia api e i te feia paari ia ite i te reira. Te haamou nei teie mau mea i te ao nei. Mai te peu te hinaaro ra tatou ia paruruhia tatou, e mea tia roa ia vahavaha tatou i te reira, ia faaatea’tu i te reira, ia ore e rave i te tahi vahi iti o te reira, no te mea e haaparuparu e e faaino te reira ia tatou, e haapohe te reira i te taata i te pae varua, e aita teie taata e nehenehe e parahi i pihaiiho i te feia parautia e i mua i te aro o te Atua.⁶

Te tiaturi nei matou e, te hara apeni o te piti ïa o te hara rahi roa ae i muri noa mai i te haamaniiraa toto.… Te poro nei matou ei parau na te Fatu: “Eiaha roa oe e faaturi” (Exodo 20:14) “O tei hio i te hoe vahine ma te hinaaro ia’na, e mai te peu e e faaturi te tahi i roto i to ratou nei aau, eita roa e farii i te Varua, e e faarue ratou i te faaroo” [PH&PF 63:16]⁷

Mai te mau ma’i pae tino e rave rahi, e tupu atoa mai te tahi noa’tu â mau ma’i rau na roto i te hara apeni. Ia faaauhia te mau hopearaa e tupu mai i ni’a i te tino na roto i te ta’eroraa ava, mai te inoraa te i’o taata, te huehueraa te mau tuhaa ora o te tino e a paruparu ai te mau faehau paruru o te tino, i reira te tino e vi ai i te mau faainoraa rau atoa o te ma’i. Mai te reira atoa te viivii i te hohoraraa ia vaitahaa te varua taata i mua i te mau ma’i rau atoa i te pae varua, e mai te reira atoa hoi to te viivii aratoraa ia ere te varua taata i to’na faehau paruru e i to’na aravihi no te faaora ia’na. Ua faaturituri te u’i tai’ata i te tau o te Mesia i te faarooraa i te reo o te parau mau, e no te mea ua tahiti roa te ino o to ratou varua e o to ratou aau, no reira ua imi ratou i te mau tapa’o e ua hau atu to ratou nounou i te mau fabula poopoo i te parau no te faaoraraa [a tai’o Mataio 16:4]⁸

Na te viivii e faahepo ia faautuahia eiaha te taata hara anae ra, e tae roa’tu i te toru e te maharaa o te u’i ma te faariro i te taata rave hara ra ei painu tipaeraa ore. E ia hapehape noa’tu, e o atoa paha tatini noa’tu rahiraa melo no to’na iho utuafare e i reira, mutu atu ai te mau taamuraa o te utuafare e oto atu ai te aau o te mau metua i te otamuraa i to ratou oraraa i roto i te opape pouri o te mamae rahi.⁹

E mea faufaa roa te ture viiviiore no te mau tamarii, te mau tane e te mau vahine atoa. E parau tumu faufaa rahi roa te reira no te mau tamarii a te Atua i te roaraa o to ratou pu’e mahana, mai to ratou ihoa fanauraahia e tae roa’tu i to ratou poheraa. Ua faataa te Atua i te mau faautuaraa mamae rahi ia ofatihia Ta’na ture viivii ore e tae noa’tu i te viretu e i te ma. Ia mana te ture a te Atua i rotopu i te taata nei, e haamouhia te tane e tae noa’tu i te vahine o tei ore i faaea viivii ore noa, o tei ore i faaea pora’o ore noa e o tei ore atoa hoi i faaea hapa ore noa. Te titau nei matou i te mau vahine ia vai viivii ore noa ratou, te hapa ore e te pora’o ore. E mea titauhia e e mea faufaa hoi ia riro te tane ei mea viivii ore e te ma, hoê a huru atoa no te vahine.¹⁰

E mea avauhia ia faataime i te tavini i te Fatu no to tatou haapao oreraa i to tatou apiraa.… E mea maitai ae te taata i huri tua i te ino maoro i muri iho, i te taata i onoono i roto i te hara i te roaraa o to’na pu’e mahana i te ao nei. Tera ra, … e u’ana te tatarahapa e te mamae o te aau ia tatarahapa tatou maoro i muri iho i to tatou oraraa no te mau hemaraa e te mau hara o ta tatou i rave i to tatou apiraa.¹¹

E mea haama no te totaiete e titau onoono nei ia haavi te mau vahine ia ratou i te raveraa i te mau hara apeni area te mau tane ra, aita ïa e haaviraa no ratou. Eaha ïa huru aperaa pouri e te faatiatiaraa e itehia ra i roto i te paeraahia te mau tane ma te haama ore e te hitahita ore?…

Ia hara te vahine, e farii ihoa oia i te mamae, inaha e mea papu e tae mai te utua, e mea oioi anei e aore ra e mea taere. Area ra te tane o te tuu i nia iho i taua vahine ra te utua o ta’na mau hape, ua tataipiti ïa te faahaparaa e topa i ni’a ia’na. O te tane mau te tumu rahi no te mau hara e tupu mai na roto i te faatura ore i te mau peu mâ e te viivii ore, o te pari pinepinehia ra i te vahine.

Te farii papu nei matou i te faaiteraa papu a te Atua, na roto i te hoê peropheta tahito o te Ati Nephi: “Ua oaoa hoi au, o te Fatu te Atua, i te vahine taiata ore ra. E e mea faufau te faaturi i mua ia’u nei, te na reira maira te Fatu sabaota.” (Iakoba 2:28.)¹²

Te patoi nei matou i te taiataraa e i te mau huru viivii atoa. Aita tatou i tae mai i onei no te rave i te ohipa viivii a rau noa’tu â to’na huru. Hau atu i te mau mea atoa, e mea vahavaha roa’tu te viivii apeni i te hi’oraa o te Atua.… No reira, te patoi nei matou i te viivii apeni e i te mau huru raveraa faufau atoa.¹³

Te tahoêraa tiama o na apeni, na te Atua te reira i faaue, eiaha ei ravea hoê roa no te faarahi i te huaai, no te haamaitai atoa râ i te feruriraa e te huru maitai o te taata, o te roaa na roto anae i te tahoêraa te tane e te vahine o tei here i tetahi e tetahi. Te faaite papu ra te mau Papairaa mo’a i te mana’o e te faaueraa a te Atua no nia i te tane e te vahine. Eere i te mea tia i te tane ia vai otahi noa, e no reira e mea faauehia te reira: “E faarue te taata i tana metua tane e ta’na metua vahine, e ati atu ai i ta’na vahine, e e riro raua ei hoe” [a hi’o Genese 2:18, 24].

Te tumu parau ra, e mea faaturahia te faaipoiporaa, e parau mau te reira i teie nei mahana e i te taime a parau mai ai te Aposetolo ra [a hi’o Hebera 13:4].…

Ua faati’ahia te tahoêraa apeni i roto i te faaipoiporaa, e mai te peu e ua ravehia te reira na roto i te mana’o tano e mea poupou ïa e e mea mo’a atoa. Area ra, ia ravehia i rapae i te mau auraa o te faaipoiporaa, ua riro ïa te apeniraa ei hara ino roa e te faufau i mua i te aro o te Atua.¹⁴

I teie mahana, mai te pape pu’e te taheraa te ino i roto i te ao nei. Te hoê o te mau tumu, o te haapao oreraahia ïa te faaipoiporaa; e ua ore te huru mo’a o te faaipoiporaa i roto i te feruriraa o te rahiraa o te mau taata. Ua faariro noahia râ te reira ei parau mana tivira e i te tahi mau taime ua ravehia te faaipoiporaa no te mea e mea haapahihia te reira e te taata e aore ra e mea hapehia i tupu ai te reira e aore râ ei ravea no te haamaha i te aau hiaai. E no reira, ia haafaufaa ore noahia’tu te mo’araa o te fafauraa, e aore ra ia haamo’ehia te reira, e riro ïa te haapao oreraa i te mau euhe o te faaipoiporaa, i roto i te hi’oraa o te mau taata e rave rahi, ei hape iti na’ina’i roa.¹⁵

Te haapao oreraa i te mau fafauraa o te faaipoiporaa, e tumu rahi te reira no te mau faataaraa, e e rave rahi te mau ino o te apee atoa, te iti roa ae o teie mau ino o te haama e te roo ino e tae mai i nia i te mau tamarii hara ore. Te mau hopearaa e tupu mai na roto i te hara faaturi, eita te reira e ta’otia noahia i ni’a i na taata hara. Mai te mea ua itehia te reira hara e te huiraatira e aore ra ua hunahia i raro ae i te paruru omo’e o te hara, te mau hopearaa e tupu mai, aita ïa e faaauraa to’na ino rahi. Te mau varua tahuti ore o te tae mai i te fenua nei no te farii i te tino i’o e mea tia ia ratou ia fanau maitaihia, na roto i te mau metua o tei ore i roohia i te ino o te hara apeni.¹⁶

Te tiaturi nei matou e, te ture i horoahia mai te reira te huru, no te taatoaraa ïa o te mau taata e ua horoahia mai te reira ia faaohipahia e te feia mo’a atoa. Area râ, ia ofati noahia’tu te mau fafauraa, taaê noa’tu te ofatiraahia te ture no te viivii ore, e mea papu ïa e, e hara te reira, e e riro ïa te faautuaraa o taua na hara râ, i te mea u’ana roa’tu e te mamae rahi i roto i teie nei oraraa e aore ra i roto i te ao amuri atu.¹⁷

Te na’ohia râ e, ua rahi ae te ‘u matie i te tahi noa’tu mau ‘u, no reira te mana’o nei matou e, ua rahi atoa te mau faito o te hara e ô atu i roto i te mau auraa ti’a ore o te apeniraa hau atu i te mau hara o ta tatou e ite ra. O ratou atoa o te o atu i roto i teie hara rahi – te hara no te viivii ore – i roto i te rahiraa o teie mau raveraa, ua u’ana roa’tu teie hara na roto i te ofatiraahia te mau fafauraa mo’a, e i te tahi mau taime te o atoa ra te haavare i roto, te faatinaraa e tae roa’tu hoi i te hamani inoraa.

Eiaha roa teie mau hara ia hunahia e ia faatiahia. E iteahia ia tatou te vahi taaê i rotopu i te hinaaro e te hopearaa o te tahi na apiti i momo’ahia e o te topa hoi i roto i te hara i te hoê taime mana’o orehia, i te hinaaro e te hopearaa o te hoê taata o tei haere i te mau vahi mo’a râ e o tei rave i te mau fafauraa mo’a e a opua ino ai e eia i te viretu o te vahine a to’na taata tupu na roto i te rama e te faahepo no te faatupu i to’na ra mau hinaaro faufau.

Te vaira te taaêraa, eiaha râ i roto noa i teie mau raveraa ino mai te mea noa’tu e faitohia te manao i faatupu i te reira, ia faito atoahia ra te mau hopearaa e tupu mai … I roto ra [i te huru o te taata tei rave i te mau fafauraa], e rave rahi atu a te mau taata o te mauiui, e mou te mau utuafare, na teie hara e faatae mai te ino i ni’a i te mau taata hara ore atoa, e tae roa te reira ino i ni’a i te sotaiete … Ia amuihia te feia ora e te feia i pohe e tae noa’tu i te feia o tei ore â i fanauhia i te ao nei, e faaruru atoa ratou i te mau ino e aita e mana i roto i te feia hara no te tata’i i te reira.¹⁸

O te feia faufau e te ino anae te ore e hinaaro ia riro ei mea ma; aita to ratou aau e au i te mea ma e te parau mau. Aita vau i ite e tae roa anei te hoê varua i te haafaufaa ore i te mea ma e te viivii ore, te maitai e te parau mau e te hanahana. Te tiaturi nei au e, te vai noa nei i roto i te aau o te taata faufau roa e te ino roa, i te tahi mau taime, te hiro’a o te huru Atua i tuuhia i roto i te varua o te mau tamarii tamaroa atoa a te Atua. E riro paha te mau taata ei mea ino roa ae, e no reira aita’tu to ratou e hiroa no o mai i te Atua ra, maori ra te hoê hihi iti e aratai ia ratou i te maitai e ia tapea i te maitai i roto i to ratou aau, area ra aita vau e tiaturi nei te vai nei i te hoê varua i te ao nei o te faarue roa i te ite e te faahiahia no te mau mea maitai e te ma, ia itehia e ana. E mea fifi roa ia tiaturi e, e tae te hoê taata i te faito teitei roa o te ino, e aita’tura to’na e hinaaro ia riro ei mea maitai e te ma, ahiri e tia ia’na, area ra e rave rahi te mau taata o tei parahi noa i roto i te hara e o te feruri aita e ravea no ratou. Mai te peu te vai nei te ora, te vai atoa ra ïa te tiaturiraa, e mai te peu e te vai nei te tatarahapa, te vai atoa ra ïa te faaoreraa hara.¹⁹

Te Evanelia a Iesu Mesia, o te raau ïa i opuahia e te Atua no te rapaau i te mau ino e haaparuparu nei i te mau taata atoa, i te mau paruparu u’ana ihoa ra o te hara apeni.²⁰

No reira, te parau atu nei matou ia outou o tei tatarahapa i ta outou mau hara, o tei utuhihia e te Mesia ra na roto i te bapetizoraa, o tei faatiahia mai te menema tahe ra i te hoê oraraa api, o tei fanauhia i te pape e te varua, o tei riro mai ei mau tamarii na te Metua, ei feia ai’a no te Atua e ei feia ai’a hoe e o Iesu Mesia– te parau atu nei matou ia outou, ia haapao outou i te mau ture a te Atua, e mai te peu e faaea outou i te rave i te ino, e faaea outou i te parau ino, e faaea outou i te rave i te mau viivii apeni e te tahi noa’tu, e faaea outou i to outou parautia ore, e e tiaturi outou i te Atua, e tiaturi outou i te parau mau e e farii outou i te reira e e vai parautia outou i mua i te aro o te Atua e o te taata nei, e faateiteihia ïa outou, e e tuu mai te Atua ia outou i mua, ia haapao outou i teie mau faaueraa. O tei haapao i te mau faaueraa a te Atua, o outou anei e aore ra o vetahi ê, e ti’a ratou e aita ratou e topa, e aratai ratou e aita ratou e pee, e haere ratou i nia e aita ratou e haere i raro. E faateitei te Atua ia ratou e e faarahi Oia ia ratou i mua i te mau nunaa o te ao nei, e e tuu mai Oia i Ta’na titiro no te mauuruuru i nia ia ratou, e No’na hoi ratou. O teie te iteraa papu ta’u e tuu atu i mua ia outou.²¹