Haapaoraa i te Ture Tuhaa Ahuru

Te titau nei te Atua ia tuuhia te ahururaa o ta tatou apî i roto i Ta’na fare taoa; e e riro teie ei ture tamau no te taatoaraa o te mau Titi i Ziona.³

Na roto i teie parau tumu (tuhaa ahuru) e tamatahia te haapao o te nunaa o teie Ekalesia. Na roto i teie parau tumu e itehia te feia e paturu ra e aore ra e patoi ra i te basileia o te Atua. Na roto i teie parau tumu, e itehia te feia e rave hua ra i te hinaaro o te Atua, e haapao ra i ta’na mau faaueraa ma te haamo’a i te fenua o Ziona i te Atua ra, e pato’i ra i teie parau tumu e e tapu ê ra ia ratou i te mau haamaitairaa i Ziona. E mea faufaa teie parau tumu, inaha e mea na reira e itehia ai te feia haapao e te feia haapao ore. I roto i to’na anairaa, ua tû to’na faufaa e te faaroo i te Atua, e te tatarahapa, e te bapetizo ia matara te hara, e aore râ e te tuuraa rima no te horo’a o te Varua Maitai.⁴

Te ture tuhaa ahuru, o te hoê ia tamataraa e faaruruhia e te feia atoa o te riro mai ei mero no teie nunaa. O te ore noa’tu e haapao i teie parau tumu, ua riro ia ei taata tau’a ore i te maitai o Ziona, ei taata haapao ore i ta’na hopoia ei melo no te Ekalesia, e ei taata paturu ore i te tereraa tahuti nei o te basileia o te Atua. Aita atoa oia e paturu ra i te haaparareraa o te Evanelia i roto i te mau nunaa o te ao nei, e te haapao ore ra i te ohipa e faati’a ia’na ia farii i te mau haamaitairaa e te mau oro’a o te Evanelia.⁵

Te haapaoraa i te ture tuhaa ahuru, tei te taata iho te faaotiraa. Tei ia’u te aufauraa i ta’u tuhaa ahuru e aore ra aita. Tei ia’u te maitiraa ia na reira e aore ra aita; no to’u ra tau’a i te Ekalesia e to’u hiaai ia maitai oia, a manao ai au e mea maitai e e mea ti’a ia haapao i te ture tuhaa ahuru, e na reira ïa vau mai ia’u atoa e manao ra e mea maitai ia haapao i te ture no te tatarahapa e no te bapetizo ia matara te hara.⁶

O tatou o tei ore’na i aufau i ta tatou tuhaa ahuru i mua ra, ua riro ia tatou ei feia aitarahu i mua i te Fatu, e no te mea ra eita te reira e pee ia tatou ia aufau, eita ia te Fatu e titau faahou te reira ia tatou, e faaore ra i ta tatou tarahu tahito mai te peu e haapao tatou i teie ture i muri iho ma te haavare ore. E mea mauruuru te reira e te maitai atoa hoi, no reira te tupu nei to’u aau mehara.⁷

i ta’na tuhaa ahuru, eita roa ïa e taiva. Noa’tu te nainai e aore râ te rahi, e ture teie na te Fatu, e pihaa moni te reira na te Ekalesia; no ô roa mai i te Atua ra teie aniraa, e ua parau Oia, o ratou o te ore e haapao i te reira, aita ïa i tiamâ ia ai’a i te faufaa i Ziona. Eita roa’tu te taata e taiva mai te peu e aufau oia i ta’na tuhaa ahuru. E parau mau te reira. No te aha? No te mea, a u’ana noa ai to’na faaroo ia aufau i te tuhaa ahuru, te tiaturi atoa ra ïa oia i te Ekalesia e i te mau parau tumu o te Evanelia, tei roto ia’na te maitai e tei roto atoa ia’na te maramarama. A tamau noa ai oia i te haapao, eita roa ïa te tamaiti faahema e upooti’a i nia ia’na e eita atoa e ruri-ê i te to’na ra e’a.⁸

E ture aufauraa te tuhaa ahuru no te Ekalesia a Iesu Mesia i te Feia Mo’a i te Mau Mahana Hopea Nei. Ahiri aita ra, eita e tupu te mau opuaraa a te Fatu.⁹

Ua horoa … te Fatu i te ture no te tuhaa ahuru ia faufaahia te fare toa a te Fatu no te faatupu i te mau opuaraa e vai ra; no te haaputuputu i te feia veve, no te haaparare i te Evanelia i te mau nunaa o te ao nei, no te aupuru i te feia e horoa ra i te taatoaraa o to ratou taime i te mau mahana atoa no te tavini i te Fatu i ti’a ai ia mitohia to ratou oraraa. Ahiri aita teie ture, eita roa ïa teie mau opuaraa e tupu, eita atoa te mau hiero e patuhia e e atuatuhia, eita atoa te feia veve e faaamuhia e e faaahuhia. No reira, e mea faufaa te ture no te tuhaa ahuru i roto i te Ekalesia, e ua tae roa te Fatu i te haapapu onoono mai i te reira.¹⁰

[Te tuhaa ahuru] o tei faaohipahia no te tereraa o te mau oro’a o te fare o te Atua i roto … i te mau hiero. Ua tauasini e ua tauasini tara marite no te tuhaa ahuru i faaohipahia no te haapii i te feia apî i Ziona, no te atuatu i te mau fare haapiiraa o te Ekalesia. Ua tauasini e ua tauasini te tara marite i haamau’ahia no te faaamu e no te faaahu i te feia veve, no te atuatu i te feia tei roto i te mitoraa a te Ekalesia. Te imi ra ratou i te tauturu e te aupuru i pihai i to ratou “metua vahine” e e mea tano ihoa ïa ia faaherehere te Ekalesia, i roto i te oti’a o ta’na mau ravea, i te feia veve e to’na feia riirii, i te feia paruparu e te mau huma.¹¹

Te Fatu iho tei heheu mai nahea teie mau faufaa [tuhaa ahuru] ia haapao e ia faaterehia; oia hoi, na te Peresideniraa ia o te Ekalesia e te Apooraa Teitei o te Ekalesia (oia hoi te Tino Hoê Ahuru ma Piti Aposetolo), e te Episekoporaa Peresideni o te Ekalesia. Te mana’o nei au, te vai ra te paari i reira. Aita i vaiihohia i roto i te rima o te taata hoê ia faatere i te reira e aore râ ia tapea i te reira o oia anae ra. Tei ni’a ra te reira i te tapono o na taata hoê ahuru ma va’u, tei î i te paari, i te faaroo e i te aravihi i tuea i to teie nau taata hoê ahuru ma va’u. Te parau nei au, tei ia ratou te faatereraa i te mau tuhaa ahuru a te nunaa e te faaohiparaa i te reira i roto i te mau opuaraa’toa o ta ratou i manao ia au i to ratou paari, e haamaitai roa’tu te reira i te Ekalesia …. Teie mau faufaa o te tuhaa ahuru, te faaterehia ra ïa e teie mau taata i piihia e te Fatu ia mau i te tura no te na reira ia maitai e ia fanao te Ekalesia.¹²

Ua titau taa’e te Fatu … i te feia e ti’a ra i te upoo o teie Ekalesia e o tei faataahia ia aratai e ia faatere i te nunaa o te Atua, ia ara ia haapaohia te ture [tuhaa ahuru] a te Atua. E ohipa na matou i te raveraa i te reira … Ua riro ei faaheporaa no te feia faatere o te Ekalesia ia a’o i teie parau tumu, ia faahiti e, taaê noa’tu te mau ohipa o teie ture i titauhia i te mau melo, ia faaî atoa râ ratou i te fare toa a te Fatu ei pahonoraa i te mau hinaaro o te nunaa, inaha, te mau hinaaro o te Ekalesia o te mau hinaaro atoa ïa o te nunaa. No te mau melo i Ekalesiahia ai te Ekalesia, e no reira, te mau tarahu atoa a te Ekalesia, na te melo tataitahi ïa te reira e amo ia au i te faito e maraa ia’na. Te titau nei te Fatu ia matou ia ara ia haapaohia teie ture i rotopu i To’na nunaa.¹³

Te hinaaro nei au e faaite i to’u mau taeae e to’u mau tuahine i teie poipoi e, i to’u mana’o, aita’tu e tau maitai roa no te mau melo o te Ekalesia a Iesu Mesia i te Feia Mo’a i te mau Mahana Hope’a nei maori ra teie anotau to tatou, no te maitai o to ratou oraraa, no to ratou haapao maitai e te itoito atoa. Ua ite matou i te reira na roto i te mau tuatapaparaa rau e mauhia ra e matou. Te hoê o taua mau tuatapaparaa papu maitai, o te haapaoraahia ïa te ture tuhaa ahuru. E faaiteraa papu teie e, te rave mau ra te feia mo’a i ta ratou mau hopoi’a, e faaroo mau to ratou i roto i te Evanelia, tei roto ia ratou te hiaai ia haapao i te mau faaueraa a te Atua, e te ora papu ra ratou i te reira hau atu i te feia i mutaa ra.

Te hinaaro nei au e parau faahou atu ia outou e, e te na reira nei au no te haapoupou ia outou, oia hoi na roto i te haamaitairaa a te Fatu e te faaroo o te Feia Mo’a ia aufau i ta ratou tuhaa ahuru, i ti’a ai ia matou ia aufau pee roa i te taatoaraa o ta tatou mau tarahu. I teie mahana, eita roa te Ekalesia a Iesu Mesia i te Feia Mo’a i te Mau Mahana Hopea Nei e tarahu hoê noa ae tara marite ma te ore e aufau oioi atu i te reira. Ua tapae tatou i te faito e ti’a ai ia tatou ia aufau i te reira iho taime ta tatou mau hoo. Aita e faufaa faahou no tatou ia tarahu i te moni, e eita atoa tatou e na reira faahou mai te peu e tamau noa te Feia Mo’a i te Mau Mahana Hopea Nei i te ora i ta ratou haapaoraa e i te haapao i te ture no te tuhaa ahuru. Te reira te ture aufauraa a te Ekalesia.

Taaê noa’tu te reira, te hinaaro nei au e faaite atu ia outou e, noa’tu aita â tatou i tapae i te reira faito, te tiaturi nei ra matou e, te vaira te mahana eita te Ekalesia e ani faahou ia outou te hoê tara ei moni ö no te tahi noa’tu mau opuaraa, maori ra te mau ö ta outou e horoa hua mai, ia au i to outou iho hinaaro, no te mea te tuhaa ahuru i roto i te fare toa a te Fatu, ua rava’i ïa no te aufau i te mau mea’toa e au no te faahaereraa i te basileia o te Atua i mua.… Te reira te raveraa papu, te titauraa mau a te Fatu no te faatere i te mau ohipa i roto i Ta’na Ekalesia.¹⁴

Te vaira â te mau parau i roto i te mau papa’iraa mo’a no ni’a i teie parau tumu no te tuhaa ahuru o ta te Atua i heheu mai i roto i teie tau tuuraa Evanelia e o Ta’na hoi e faahepo nei ia tatou ia na reira, inaha no to tatou haapao i Ta’na ture, e haamo’ahia teie fenua ia riro mau ei fenua i Ziona no tatou. Taaê noa’tu te reira, ua fafauhia tatou e, mai te peu e haapao tatou i te mau ture a te Atua, mai te peu e tiaturi tatou Ia’na, e mai te peu e haafatata’tu tatou Ia’na e haafatata mai ïa Oia ia tatou nei, e e haamauruuru Oia ia tatou i To’na ra maitai e i Ta’na ra mau haamaitairaa. E avau Oia i te taata e âpu mai, e e faahotu Oia i te fenua, e na te fenua hoi e horoa i te puai i roto i te taata faahotu, oia hoi te taata e faapu ra i te fenua e te taata atoa e tiai ra i te nânâ. E faarahi Oia i ta’na mau puaatoro e e haafaufaahia oia i te pae atau e i te pae aui, e e roaa ia’na te îraa o te mau mea’toa no te mea ua tuu oia i to’na tiaturi i roto i te Atua; e haafatata oia ia’na i te Atua, e ua ineine roa no te tamata i te Atua ei hi’oraa mai te peu e iriti mau ihoa Oia i te mau haamaramarama o te ra’i ma te niinii mai i te mau haamaitairaa e rave rahi i ni’a ia’na nei. [A hi’o Malaki 3:10]. Te taata o tei farii i te Evanelia a Iesu Mesia, ia haapao oia i teie parau, inaha e ha’onaraa mau te roaa i reira. Te vaira te feia e tau’a iti nei i teie mau parau, e no reira, e mea papu roa ia e, eita atoa ratou e haafatata’tu i te Fatu, e te feia atoa o te na reira nei, eita atoa ia ratou e tamata i te Fatu, eita atoa hoi e haapao i te mau faaueraa Ta’na i horo’a mai, e eita atoa ratou e ite e, e parau mau ta te Atua e tei roto Ia’na te mana no te faatupu i Ta’na i fafau i to’na nunaa mai te mea ua tae to ratou manao no te haapao i Ta’na ture.

… Ua farerei au i te hoê taeae–eita vau e faaite i to’na i’oa, inaha e rave rahi tauasini taata mai te reira atoa to ratou iteraa papu, eiaha i ta te vaha noa, na roto ra i te faaiteraa o te manuia, o te ruperupe, o te nuuraa i mua e o te maitai rahi i itehia, ati ae ia’na, i roto i te medebara. I teie tau ootiraa, ua auhune ta’na mau hotu, ua ruperupe ta’na mau fare-aupuru- faaapu, area ra te fare-aupuru-faaapu o te rahiraa o to’na mau ihotupu ua î ïa i te aihere, e te maa i ootihia e ratou, o te afaraa noa ïa i tei ootihia e ana e aore ra tei raro rii noa mai i ta’na. Eaha ta outou tatararaa i te reira? Ta’u tatararaa, teie ia: ua tupu te reira no te mea ua haamaitai te Atua ia’na; ua haamaitai ihoa te Atua ia’na, inaha e taata maramarama oia, aita oia i haa na roto noa i to’na paari e te ite i te tinai, ua haa atoa ra na roto i te riaria i te Atua, e na roto i te hiaai ia haapao i Ta’na mau faaueraa.… Te aufau nei oia i ta’na tuhaa ahuru, te haamanao nei oia i ta’na mau ö, te haapao nei oia i te mau ture a te Atua, e aita oia e taia nei ia faaite i to’na iteraa papu i to’na mau hoa e i to’na mau ihotupu e, no to’na haapao i haamaitai ai te Atua ia’na, i tupu ai to’na ruperupe, e i riro ai oia i teie mahana mai te reira te huru. Taaê noa’tu ia’na, te vai atoa ra te feia o tei haaruperupehia mai te reira te huru. E te faaite papu nei au e, no te mea ua haamaitai te Atua ia’na, i to’na tapu fenua, e i ta’na mau ohipa, e no reira ua faaruperupe e ua haamaitaihia oia i roto i te mau haamaitairaa ta’na i imi e ta’na i haa. Ua haa oia ma te tiaturi i te Fatu; ua ite te Fatu i to’na aau, e no reira ua haamaitaihia oia.¹⁵

No reira, te faaite’tu nei au e, te ohipa faufaa i roto i te aufauraa i te tuhaa ahuru, o te haapaoraa ïa i te ture, e e hau atu i to vera ma te mau haamaitairaa e tuuhia i ni’a ia tatou, na roto i to tatou haapao. Ia roaa e rave rahi tauasini farane ia tatou, e aufau ti’a ïa tatou i te tuhaa ahuru i ni’a i te mau apî i fariihia e tatou, e no reira e riro te reira ei tuhaa moni rahi roa; area ra, te maitai e itehia e tatou na roto i te haapaoraa i teie ture i ta te Atua, ua hau atu ia i te maitai o ta teie moni e horoa no te atuatu i te feia veve. E hau ae te haamaitairaa o te taata horoa i to te taata i aupuruhia.

Te fifi, teie ïa: ia onahia te taata, i reira oia e haamata ai i te manao e, e mea veve oia no te haapao i te mau ture a te Atua. Na te tao’a rahi e haaveve i te mau taata i roto i to ratou mau auraa e te Atua Mana-Hope. E mea ohie i te taata riirii ia aufau i ta’na tuhaa ahuru e ia horoa i ta’na faufaa haihai ei aupururaa i te feia ravai ore; i te taime râ e riro ai oia ei ona milioni, i reira to’na aau e haamata ai i te aviavi. Te ohipa e tupu mai i muri iho, teie ïa: te faaere ra oia ia’na iho i te mau ravea e vai ra e farii ai oia i te mau faaiteraa rahi roa’tu no te maitai e te aroha o te Atua no’na iho, te mau faaiteraa o ta’na e nehenehe e farii na roto i te faaofaaraahia ta’na faufaa i roto i ta’na mau tao’a rahi.

Te haapao, o ta te Atua Mana-Hope ïa e titau ra ia tatou. O te reira atoa haapao Ta’na i titau ia Aberahama. E parau vau i teie nei ia haapao i ta te Atua, eiaha ra i ta te taata; e te faatio nei au i te taata atoa ia horoa mai i te hoê faaiteraa e, te haapao i ta te Atua, mai te aufauraa i te tuhaa ahuru, eita i te mea maitai ae i te oreraa e haapao—e mea maitai ae no te taata iho, e e mea maitai ae no te taatoaraa o te nunaa. Mai te peu e haapao te hoê taata i te ture no te tuhaa ahuru, e farii ïa oia iho i te mau haamaitairaa a te Atua, e na roto i teie taata, i maahia ai te fare toa a te Fatu no te faaamu i te feia veve, no te haaparare i te Evanelia, no te patu i te mau hiero e no te faatupu i te mau opuaraa a te Atua; mai te mea ra eita teie taata e haapao i teie ture, eita ïa e maahia te fare toa a te Fatu, e te faaere ra oia ia’na iho i te mau haamaitairaa ta te Fatu i haapao no’na ra.¹⁶