Tamarii Tamaroa e Tamarii Tamahine na te Atua, te Metua Mure Ore

Te hinaaro nei tatou e ite no hea mai tatou, e e haere tatou ihea. No hea mai tatou? No te Atua ra. I ora’na to tatou varua hou a haere mai ai i teie nei ao. I ora’na oia i roto i te mau rururaa o te ra’i hou te niu o te fenu a haamauhia ai. I reira atoa tatou i mua ra. A amui ai tatou i te mau nuu o te ra’i ra, ua arue paatoa tatou i to tatou oaoa i te taime a haamauhia ai te niu o te fenua, e a faaineinehia ai to tatou faaoraraa. I reira atoa tatou i reira ra; ua tupu te anaanate i roto ia tatou e no reira, ua amui atu tatou i roto i taua faaineineraa rahi ra. Ua tia atoa’tu tatou i roto i taua apooraa o te ra’i ra … a püpü ai Satane ia’na ei Faaora no to te ao nei mai te peu no’na te tura e te hanahana ia faaora oia i to te ao nei. Area ra, ua parau Iesu e: “E to’u Metua, ia haapaohia to oe hinaaro, e no oe te hanahana e a muri noa’tu.” E no te mea hoi ua orurehau o Satane i te Atua, e ua imi i te haamou i te tiamaraa o te taata, no reira, aita te Metua i farii ia’na, ua patoi e ua tiavaruhia oia i raro, area ra o Iesu ra ua fariihia ia.

Tei ô atoa tatou, mea papu mau te reira, e ua ite tatou i te mau ohipa atoa tei tupu, e ua anaanatae maite tatou i te mau opuaraa i faataahia, ua haroaroa tatou i te reira, e ua faatiahia te reira mau opuaraa no to tatou maitai. Ua haere taua mau varua ra i nia i te fenua nei no te farii i te hoê tino, ia riro atoa ratou mai ia Iesu Mesia ra te huru, oia ia “i hamanihia ia au i te hohoa e te huru o te Mesia,” mai te omuaraa o te hamaniraa o te ao nei e tae roa mai i teie nei, e na reira noa tae roa’tu i te hopea, tae roa’tu i te taime e tae hope roa ai te mau varua atoa o tei opuahia ia haere mai i te oa nei e tae roa’tu i te taime e faaoti ai ratou i ta ratou misioni i roto i te i’o.³

Teie te … taata, te hamaniraa faahiahia roa ae a te Atua i nia i te fenua nei, oia hoi te perapeio. Na roto i te faaururaa, ua ite tatou e, e tamaiti oia na taua taata mure ore ra, oia hoi te Taata Hamani o te mau mea atoa ra. O oia te hamaniraa titiaifaro roa ae i roto i te anairaa o to’na openu, e mau ra i te mau aterebuti teitei roa ae, i te mana puai roa ae no te feruri, e o oia atoa te mea maramarama roa: aita e faaauraa i to te tahi atu mau hamaniraa’toa, i riro ai oia ei: “fatu i rotopu i te mau hamaniraa,” e o tei hiro’a ae i te Taata Hamani ra. Te hi’o ra tatou i teie mau mea e aita’tu e parau maoti ra: eita teie perapeio i te mea pata haere noahia, ua riro râ ei hopearaa no te mau faanahoraa e te mau opuaraa tei ferurihia i roto i te paari e i roto i te ite rahi e, te taata nei, e tamaiti ïa na te Atua, tei mau i te mau aterebuti e tae noa’tu i te hohoa o to’na Metua; e i te omuaraa, te rahiraa o teie mau maramarama, a riro noa ai ei hoa e ei taata rotahi i te Atua ra, ua parahi noa ïa i pihai iho i te Atua ma te ite ore i te hara. Ua ho te Fatu i te fenua nei ei faufaa e ei ai’araa no’na, ua ho atoa mai i te mau ture no te faatere ia’na ia faaî oia i te faito mau no to’na hamaniraa e ia farii hoi i te oaoa.⁴

Te faaite ra te mau papairaa mo’a e, ua ora’na te mau taata atoa o tei tomo mai i roto i teie ao e o tei fanauhia i roto i te tahuti nei, i mau ea’na ratou i to ratou huru varua, e ua riro ratou ei mau tamaroa e ei mau tamahine na te Atua, te Metua Mure Ore … e o Iesu Mesia te Tamaiti Fanau Tahi. E riro ïa te varua i poietehia e te Atua ei mea tahuti ore. Ia pohe anae te tino, eita te varua e pohe. I roto i te tiafaahouraa, e riro te tino ei mea tahuti ore mai te varua ra te huru.⁵

Eaha te huru faatiaraa o te taata, o to’na varua e o to’na tino i te tumu roa o to’na hamaniraa? Ia au i te mau pahonoraa atoa, te haapapuhia ra e … “Ua hamani te Atua i te taata ia au i to’na hohoa.” Mea papu ae te tatararaa i roto i te Buka a Moromona: “Oia mau, i te matamua ra i hamanihia ai te mau taata atoa ra i to’u iho huru.” (Etera 3:15). O te Metua iho teie e parau ra. No reira, mai te mea e itehia ia tatou te hohoa o te “Metua o te mau varua,” “Te Atua no te mau varua o te taata atoa ra,” e ite atoahia ïa ia tatou te hohoa o te taata tumu.

Ua riro Iesu Mesia, te Tamaiti a te Atua, ei “hohoa mau” no To’na Metua (Hebera 1:3). Ua hahaere oia na te fenua nei mai te taata nei, mai te hoê taata titiaifaro i roto i to’na huru faatiaraa, e ua parau oia ei pahonoraa i te hoê uiraa: “O tei hi’o mai ia’u ra, ua hi’o ïa i te Metua” (Ioane 14:9). Na roto noa i teie pahonoraa e matara ai te uiuiraa a te feia tei roto ia ratou te paari e te faatura. Aita’tu e tatararaa, oia hoi: mai te mea e, te titiro (te hohoa) o te Tamaiti a te Atua o te hohoa no To’na ra Metua, mai te reira atoa ïa te hohoa o te taata nei; inaha, te reira hoi te hohoa o te Tamaiti a te Atua, eiaha i roto noa i To’na oraraa tahuti nei, hou atoa râ i To’na fanauraahia i roto i te tahuti nei, e i muri iho i To’na tiafaahouraa. Te reira te hohoa o te Metua e o te Tamaiti, e piti nau taata, a fä ai raua ia Iosepha Semita i roto i te orama matamua i te ahura ma maharaa o to’na matahiti.

Inaha, mai te peu ua hamani te Atua i te taata—te taata matamua— ia au i To’na ra hohoa e i To’na ra huru, ua na reira atoa ïa Oia ia au i te hohoa o te Mesia, oia hoi: ia au i te hohoa o te mau taata i te tau o te Mesia ra e i teie atoa tau. Ua faaite papuhia i roto i te Buka a Mose e, ua hamani-mau-hia te taata ia au i te hohoa o te Mesia: “E ua parau atura vau, o te Atua i ta’u Fanau Tahi, ia’u ra hoi oia mai te matamua mai ä: E hamani taua i te taata ma to taua iho hohoa, ia au i to taua iho huru, e oia mau atura. E ua hamani ihora vau o te Atua, i te taata i to’u hohoa o ta’u ra Fanau Tahi i hamani ai au ia’na, i hamani au ia raua, te tane e te vahine” (Mose 2:26–27).

Te Metua o Iesu o to tatou atoa ïa Metua. Na Iesu iho i ho mai i taua parau mau ra, a haapii ai Oia i Ta’na mau pipi ia pure: “E to matou Metua i te ao ra,” e hope noa’tu. O Iesu râ te Matahiapo i rotopu i te mau tamarii tamaroa atoa a te Atua—te matahiapo i roto i te varua, e te fanau tahi i te tino nei. O oia to tatou tuaana, e ua hamanihia tatou ia au i To’na ra huru e ia au i te hohoa o te Atua.…

“Ua hamani te Atua i te taata ia au i To’na hohoa.” Hoê a atoa no te varua e no te tino, oia hoi ua riro te tino ei ahu no te varua, to’na tino piti; e te varua e te tino ra o te varua taata ïa o te taata nei (a hi’o PH&PF 88:15). Ua tuea te hohoa o te varua o te taata i te hohoa o te tino o te taata, e hoê a hohoa to te mau varua atoa o te mau mea i hamanihia i te hohoa o to ratou tino. Ua haapii papu mai te Perofeta Iosepha Semita i te reira (PH&PF 77:2).…

I te taime a ite ai te taeae o Iareda i taua Taata atua ra ma te tino varua (a hi’o Etera 3:6–16) o tei vehi Ia’na i te hoê tino i’o e te toto, ua fä Oia mai te hoê taata ra te huru, ma “te tino, te mau tuhaa e te hiaai o te aau” mai te tahi atu mau taata, tera ra, ma te mana i hau atu i to vetahi ê, no te mea e Atua Oia, oia mau te Tamaiti a te Atua, i riro na te Logo ei taata: tei roto ia’na “te î atoa a te Atua i te parahi mauraa.” (Kolosa 2:9). E no te aha eita Oia e fä mai mai te taata ra te huru? O te reira hoi te huru o To’na varua, e no reira e farii Oia i te hoê vehi tahuti tano, ei puhaparaa tano no Ta’na varua. Ua haere mai Oia i roto i te ao nei mai Ta’na i fafau (3 Nephi 1:13), ua vehi i te tino o te hoê aiu fanau api e ua tupu e tae roa’tu i te îraa o te faito o To’na varua. Ua haere mai Oia i te ao nei mai te mau taata atoa ra te huru i te mau tau atoa. Area ra, o Iesu anae te tamaiti a te Atua i fanauhia i roto i te tino nei.

Adamu, to tatou tupuna tumu, “te taata matamua,” mai te Mesia ra oia, e varua no roto mai i te ao varua ra, e mai te Mesia atoa ra, ua vehi oia i te hoê tino au, te tino taata, e ua riro mai ei “varua taata ora”. Te haapiiraa tumu no ni’a i te orararaa hou te tahuti nei—o tei heheu maramaramahia mai, i teie ihoa ra tau hopea nei, te faaiteraa faahiahia no ni’a i teie parau tei riro noa’na ei parau huna i mua i te mau taata nei, oia hoi: te tumu o te taata. Te faaite nei teie haapiiraa e, ua fanauhia te taata ei varua e na metua i te ao ra, e ua atuatuhia tae roa’tu i to’na paariraa i roto i te mau fare mure ore o te Metua, hou a haere mai ai i roto i te ao nei no te vehi i te hoê tino e no te farii i te mau tamataraa o te oraraa tahuti nei. Te haapii ra teie haapiiraa e, i ora’na te mau taata atoa ei varua hou te taata a fanauhia ai i roto i te tino nei, e te feia atoa i ora’na i nia i te fenua nei mai te tau mai â o Adamu, ua vehi ratou i te hoê tino e ua riro mai ei varua taata mai taua atoa ra huru.

Te manao nei te tahi mau taata e, eita o Adamu te taata matamua i nia i te fenua nei, e te taata tumu ra, o te hoturaa ïa o te hoê ora faitoraro i roto i te hau o te mau animala. E mau tatararaa teie no roto mai i te feruriraa o te taata. Te faaite nei te parau a te Fatu e: o Adamu “te taata matamua i rotopu i te mau taata atoa” (Mose 1:34), e no reira, e hopoia na tatou i te faariroraa ia’na ei tupuna matamua no te taata. Ua faaitehia i te taeae o Iareda e, ua hamanihia te mau taataa atoa i te matamua ra ia au i te hohoa o te Atua; e no reira, ta matou tatararaa i te reira, teie ïa: te varua e aore ra te tino, e aore ra raua toopiti atoa ra, e na te reira e aratai ia tatou i te hoê puohuraa manao: ua haamata te taata i to’na oraraa ei taata, ia au i te hohoa o to tatou Metua i te ao ra.

Parau mau e haamata te tino o te taata i te oteo na roto i te hoê ohi iti haihai roa, e aore ra te ohitaata, o te riro i muri iho ei aiu fanau api; e farii taua ohi ra i te ora, ia tae i te faito mau ra, na roto i te varua o tei faariro i te reira ohi ei vehi no to’na tino, i muri ae i te fanauraa o taua aiu râ, e tupu ïa oia i te paariraa a riro mai ai ei taata paari. Tera ra, no taua taata tumu ra, oia hoi te taata matamua, aita roa’tu te reira e faaite nei e, i haamata’na to’na oraraa i te faito raro ae i to te taata nei e aore ra te ohi taata o tei riro mai i muri iho ei taata.⁶

Na te Atua i hamani e i poiete i te mau mea atoa ra, e ua riro te taatoaraa ei mau tamarii Na’na. E haere mai tatou i te ao nei ei huaai No’na ma te vehihia i te mau aterebuti i mauhia’na e tatou i tera ra ao. No roto mai te mau tamarii a te taata nei i te Atua Manahope ra, noa’tu eita to te ao nei e farii i te reira parau mau. O oia te Metua o to tatou varua. Na’na i hamani i to tatou tino tahuti. Te ora ra e te nuu ra tatou, e tei roto to tatou ora i te Atua ra, to tatou Metua i te Ao ra. E no te mea no roto mai tatou Ia’na ra, ma te vehihia i te mau taleni, te mau aravihi e te paari, e no reira, e mea ti’a ihoa ïa ia haehaa rii ae tatou no te ite i Ta’na rima i roto i te mau ruperuperaa’toa e roaa nei ia tatou i roto i teie oraraa nei, e ia ho tatou No’na ra te tura e te hanahana i roto i te mau mea atoa ta tatou e rave ra i roto i te tino nei.…

… [Te taata], ua hamanihia ïa i te hohoa o te Atua iho, ia ti’a ia’na ia haapaari i to’na manao, ia feruri, ia pure e ia faaite i to’na faaroo; e ti’a atoa ia’na ia faaohipa i to’na puai no te faatupu i te mau hiaai o to’na aau, e i te mau taime atoa e faaturu’i ai oia i to’na puai i ni’a i te e’a titiaifaro, e fanao ïa oia i te tahi tuhaa rahi ae o te Varua o te Atua Manahope no te faauru ia’na ia puai roa’tu to’na maramarama, ia rahi roa’tu to’na ruperupe e to’na oaoa i roto i te ao nei; tera ra, i te mau taime atoa e faaturi ai oia i to’na mau puai i roto i te ino, e faaerehia oia i te faaururaa o te Atua Manahope a hope roa’tu ai i te haapoirihia no ni’a i to’na mau ite atoa i te Atua ra o tei hiro’a noa i te maramarama o te hoê animala maamaa.

… Ia riro mai tatou i muri iho mai te [Atua] ra te huru, ia roaa ia tatou te fanao no te parahi i nia i te mau terono, no te faatere i te hoê hau, i te hoê mana, e ia hotu noa tatou e amuri noa’tu. Ua opua te Atua i te reira i te omuaraa.… O te reira te tumu o to tatou oraraa i raro nei; eita tatou e manuia maori ra na roto i te haapaoraa i te mau parau tumu i faataahia, na roto i te apeeraa i te hoê faito e’a, na roto i te fariiraa i te mau maramarama e au no o mai i te Atua ra; ahiri aita ra, eita ïa te taata e tapae no te rave i ta’na ohipa e aore ra no te faatupu i te misioni i faataahia no’na i nia i te fenua nei. Teie mau parau tumu, o te mau parau tumu ïa no te evanelia o te parau mau mure ore, oia hoi: te mau parau tumu no te faaroo, no te tatarahapa, e no te bapetizo ia matara te hara, te mau parau tumu no te haapao i te parau na te Atua, te Metua mure ore, inaha, te haapao râ, o te hoê ïa o te mau parau tumu matamua e aore ra ture no te ra’i ra.⁷

E tamarii te taata na te Atua, i hamanihia i te hohoa o te Atua e i vehihia i te mau aterebuti o te Atua, e oia atoa, ei aiu fanau api na te hoê metua tane e te hoê metua vahine tahuti nei, e aravihi to’na no te riro mai, ia tae i te taime mau ra, ei taata paari; e oia atoa, ei huaai ohi-atua no roto mai i na metua i te ra’i ra, e aravihi atoa to’na, na roto i te tamataraa i roto i te mau tau atoa o te mau tau, no te riro mai ei Atua.⁸