Pene 1: Ua Ite Au Te Ora Nei To’u Faaora

Pene 1

Na roto i te faaiteraa a te Varua Maitai, e ite tatou tataitahi e, o Iesu te Mesia, te Tamaiti a te Atua Ora ra.

Aamu o te Oraraa o Joseph F. Smith

Ua hau atu pae ahuru matahiti to Joseph F. Smith taviniraa ei ite taa ê no te Faaora, ei Aposetolo hoi, ei Tauturu i roto i te Peresideniraa Matamua, e ei Peresideni atoa hoi no te Ekalesia. To’na iteraa papu—ta’na i faaite, mai mua mai i te terono, i to’na iho fenua e i te fenua eê, i roto i te mau apooraa a te Ekalesia, e i roto atoa i to’na iho utuafare—ua riro ïa ei tapa’o no te hoê aau e te hoê varua i pûpûhia ia Iesu Mesia e i Ta’na evanelia hanahana. E mea au ta’na parau; e mea papu ta’na poro’i: “Ua hinaaro vau i te faaite i to’u nei ti’araa ei tavini no te Atua, taa ê atu i te mau iteraa papu o te mau taata atoa, taa ê atu hoi i te mau buka i papaihia na, e i farii na hoi au i te haapapuraa a te Varua i roto i to’u iho nei aau, e te faaite papu atu nei au i mua i te Atua, te mau melahi e te taata atoa, ma te mata’u ore i te utu’a, e ua ite au e te ora nei to’u Faaora, e ite hoi au ia’na i to’na mata i mua i to’u nei mata, ma te ti’a i piha’i iho ia’na i nia i te fenua nei ma te pu’ohuhia i to’u tino i ti’a faahou mai, mai te mea e e haapa’o â vau; inaha, ua heheu mai te Atua i te reira ia’u. I farii na vau i te haapapura, e te faaite atoa atu nei au i to’u nei iteraa papu, e parau mau to’u iteraa papu.”¹

E ia hope a’era to’na oraraa, ua faatupuhia te hoê oro’a hunaraa ma’i taa ê i te Vahi Tanuraa Ma’i i Salt Lake City, e ua himene atoa te mau melo o te Pùpù Himene a te Fare Menemene i te hoê himene ta’na i au roa, ei faahanahanaraa ia’na, oia hoi, “Ua ite Au te Ora Nei To’u Faaora.” Ua riro taua parau ra ei tumu no to’na faaroo, ei niu atoa no ta’na parau e no to’na ti’araa peropheta: “Ua ite au te ora nei to’u Faaora. Ua ite au i te reira i roto roa i te mau aveave o to’u nei tino. Ua oaoa vau no te reira mai te au atoa i to’u nei oraraa. Ua hau atu to’u iteraa e te ora nei to’u Faaora i to’u iteraa e, te ora nei au.”²

Ua iritihia mai teie iteraa papu no roto mai i te hoê a’oraa ta te Peresideni Smith i horo’a i roto i te hoê amuiraa a te Tìtì Weber i te 18 no Atopa 1896.³

Haapiiraa na Joseph F. Smith

Ua riro te oraraa e te mau haapiiraa a te Faaora ei tapa’o papu no To’na huru Atua.

Ua mâtau tatou tataitahi i te aamu o to tatou Faaora mai tei tuatapapahia i roto i te Faufaa Apî; i fanauhia hoi Oia i te paretenia; i paari Oia i rotopu i to’na mau taea’e e riro atura ei taata, e te mau mea faahiahia Ta’na i rave i To’na apîraa na roto i te mana o te faatahinuraa i faatahinuhia ai Oia e te misioni o tei faataahia Na’na; i haapii hoi Oia i te mau haapii ture e te mau orometua i roto i te sunago e i roto i te hiero, i To’na haamamûraa te feia i imi i te rave’a no te tuu i te marei i Tei a’o mai ia ratou. Ua mâtau ia tatou te mana Ta’na i faaite i te faaoraraa i te feia ma’i, i te fa’aararaa i te mata o tei pô te mata, i te haafatafataraa i te tari’a o tei turi te tari’a, i te tamâraa i te lepera, e i te faaoraraa i tei pirio’i o tei ou’aou’a ihora i te oaoa.

Ua mâtau tatou i te mau parau haapiiraa ta’na i haapii; e mai te mea ra ia’u e, eita e titauhia â te tapa’o o te huru Atua o Iesu Mesia taa ê atu i te parau haapiiraa Ta’na i haapii e, e mea ti’a i te taata ia aroha atu i te feia o tei parau ino mai e o tei hamani ino mai ia ratou, e ia taho’ohia te ino i te maitai. Ia tae i To’na ra tau, te na ô ra te parau haapiiraa e, “e mata ra, e mata ïa ho’o, e niho, ei niho ïa.” [Mataio 5:38.] O te haapiiraa ïa te reira o tera tau. E mea ê roa râ ta Iesu i haapii. Ua a’o oia i Ta’na mau pìpì e, eiaha te ino ia taho’ohia i te ino, ia taho’ohia râ te ino i te maitai. “O te moto mai i to papari’a atau na, e fariu atoa atu i te tahi.” [Mataio 5:39.] E parau haapiira apî râ teie i to te ao nei. E parau haapiiraa te ore e au i te huru mairi o te taata nei. … No reira, e ere i to te taata nei. Eita e t’ia i te taata ia haapii i taua huru parau haapiiraa ra, e ia rave mai i roto i to’na oraraa ahiri aita e faaurûraa e e mana no ni’a mai.

“E ao to tei haehaa te aau, no ratou hoi te basileia ra o te ao.

“E ao to tei oto, e faaoaoahia hoi ratou.

“E ao to tei marû; e riro hoi ia ratou te fenua.

“E ao to tei hiaai i te maitai; e faaîhia hoi ratou.” [Mataio 5:3–6.]

A tai’o na i te A’oraa i nia i te Mou’a ra [a hi’o Mataio 5–7], ma te ui i te uiraa e, e ere anei te reira i te parau teitei e te hohonu hoi i tei haapiihia na e te taata. Ua riro te A’oraa i nia i te Mou’a ra ei haapapuraa ia’u e, e ere roa Iesu i te taata noa, e Atua râ Oia i pu’ohuhia i te tino tahuti nei. O te parau haapiiraa ïa o te ora mure ore, e ia haapa’o te taata i taua parau ra e ore roa oia e pohe; ia haere oia na taua e’a ra, e haere ïa oia na te e’a haumarû; ia tû to’na oraraa i taua parau ra, e ite oia i te parau mau, e na te parau mau oia e faatiamâ.

E tae a’era tatou i te mahana o To’na haavaraa, e te taata Ta’na i ma’iti ei Aposetolo e ei ite No’na ra, ua haavare ïa oia Ia’na, ma te tu’u atu i te Fatu i roto i te rima o To’na mau enemi. E haere maira ratou ma te ‘o‘e e te omore ei haru i te taata hau, i te taata o tei pato’i i te hamani ino, o tei ore roa i faahiti i te parau, o tei ore hoi i faateitei i To’na rima ei faaino i te feia hara ore e te feia maitai e te taata noa’tu maori râ, ei faaino i ta ratou mau peu iino e ta ratou hamani ino—ua haere mai ratou ei faariro Ia’na ei mau ‘auri, ia haava Ia’na i te haavaraa haavare, ia nehenehe ratou ia imi i te tumu no te haapoheraa Ia’na.

E tae a’era i te hoê taime, te haapii ra Oia i te taata i teie mau haapiiraa parau-ti’a ma te faaite papu e o Oia te Tamaiti a te Atua, e rave atura ratou i te ofa’i no te pehi Ia’na. E pahono atura Iesu, na ô atura, “E rave rahi ta’u ohipa maitatai i faaite atu ia outou na tau Metua ra; no te hea ohipa i taua mau ohipa ra i taora mai ai outou ia’u i te ofa’i?” [Ioane 10:32.] Aita Oia i rave i te ohipa ino i roto ia ratou ra; e ohipa maitai ana’e Ta’na i rave; teie râ, ua titau ratou Ia’na no te taparahi. E riri a’era o Petero e unuhi ihora i ta’na ‘o‘e e ta’iri i te tavini o te tahu’a e motu ê atura te tari’a, ua parau atura Iesu ia’na na ô maira, “A oomo i to ‘o‘e i roto i te vehi; o te rave hoi i te ‘o‘e ra, e pohe ïa i te ‘o‘e.” [Mataio 26:52.] I To’na haavaraa, ua faaoôhia Oia, ua papaihia, ua faaheihia i te hei taratara, e ua faainohia maira, aita râ Oia i faaino atu, ua auraro râ Oia i Ta’na utu’a ma te haehaa, ma te faa’oroma’i atoa i te mea ta te Atua i vaiiho i te feia iino ia tu’u mai i ni’a Ia’na.

Ua tu’uhia mai Oia i te hoê vahi i ti’a ai ia tamatahia te parau haapiiraa Ta’na i haapii, e i roto i te mau mea atoa Ta’na i faa’oroma’i, ua faaite Oia i te parau mau o Ta’na haapiiraa. E tae noa’tu i To’na mauiui pohe i ni’a i te satauro, ua ti’aoro Oia e, “E tau Metua, e faaore mai i ta ratou hara, aore hoi ratou i ite i ta ratou e rave nei.” [Luka 23:34.] Te ani nei au, e parau mau anei te reira? E parau mau ra, e parau ïa vau e, aita e ti’a i te taata noa ia faahiti i taua huru parau ra i reira; ua titauhia te mana e te varua e te here e te aroha e te hinaaro e te faaoreraa hara a te Atua iho. Te faaite papu atu nei au ia outou e, te taata o te tia ia’na ia ani i te Atua ia faaore i te hara a te feia tei faaino Ia’na i te faainoraa au ore, e Atua mau Oia. Ahiri aita atu e tapa’o no te misioni mo’a a Iesu Mesia, ua rava’i noa ïa te reira no te haapapu ia’u e, o Iesu te Faaora o teie nei ao. I To’na oraraa, ua haapii Oia ma te haapa’o atoa i te mau parau tumu o te faaora i to te ao nei. …

Ua pûpû Iesu i To’na ora ei tusia no te faatupu i te rave’a no te ora.

Ua faasataurohia … Iesu. Ua ravehia maira To’na tino e To’na mau hoa mai ni’a mai i te satauro, e ua horoihia ihora, e ua virihia i te ahu, tuuhia atura i roto i te menema apî aore â e taata i vaiihohia i reira. Hou râ te reira, i haapii na Iesu i Ta’na mau pìpì e, ia taparahihia te Tamaiti a te Taata e tia ai. Ua parau Oia i te parau papu, “I here mai ai tau Metua ia’u, o vau e horo’a i to’u ora, e a rave faahou atu ai. Aore roa e taata e riro ai ia haru, na’u iho râ e horo’a noa’tu. E tia ia’u ia horo’a, e e tia hoi ia’u ia rave faahou.” [Ioane 10:17–18.] Ua tae mai Oia no te faatupu i te tohuraa a te mau peropheta; mai te taata i hope i te pohe ia Adamu, e hope atoa i te faaorahia i te Mesia [a hi’o 1 Korinetia 15:22]. … Mai te mea e no te ture i ofatihia e te taata hoê i tae mai ai te hara, e ua amo te taata atoa i te utu’a o taua hara ra noa’tu â e ere na ratou i ofati i te ture, e ere anei i te mea tia, e ere anei i te mea au, ia tatarahia taua utu’a ra e te taata hoê? O te rave’a tera i faanahonahohia i te matamua ra, e rave’a parau tia ana’e ïa. Ua pûpû Iesu i To’na ora ei tusia no te faatupu i te reira. Ua taparahia Oia e te taata ino, o tei pari haavare Ia’na, e o tei haapô i to ratou mata o tei opani hoi i to ratou aau i te parau tumu mau Ta’na i haapii.

E oti a’era Oia i te hunahia, e tai’o tatou i roto i te Papairaa Mo’a e, i te mahana matamua o te hebetoma haera maira o Maria Magadala ra i te menema, e inaha, ua huri-ê-hia te ofa’i i taua uputa ra, e aita faahou Oia to roto. E hi’o atura oia i roto i te menema e ite atura i na melahi toopiti ra ma te ahu teatea, “i te upoo te tahi i te avae hoi te tahi,” [Ioane 20:12.] e parau maira raua ia’na na ô maira:

“Eaha oe i oto ai, e tera ra vahine? Ua parau atura oia ia raua, No tau Fatu i hopoi-ê-hia e ratou nei, aore au i ite i te vaiihoraahia e ratou ra.

“E tei te na reiraraa’tu oia ra e oti a’era, ua fariu tia’tura oia i muri, ite atura oia ia Iesu i te tia-noa- raa, aita râ oia i ite e o Iesu.

Ua parau maira Iesu ia’na, E tera ra vahine, eaha oe i oto ai? o vai ta oe e imi na? Parau a’era oia e o te taata faaapu ra, e ua na ô atura ia’na, E hoa, na oe oia i hopoi ê ra, e faaite mai oe i te vaiihoraahia oia e oe na, e na’u oia e ti’i atu e hopoi ê.

Ua parau maira Iesu ia’na, E Maria. Ua fariu atura oia ua parau atura ia’na E Raboni (o tei parauhia ra e, E te Orometua.)

E ua parau maira Iesu ia’na, Eiaha e tapea mai ia’u; aore â vau i tae i nia i tau Metua ra: e haere râ oe i tau mau taeae ra e parau atu ia ratou e, Te haere nei au i tau Metua ra e to outou Metua ra, e i tau Atua e i to outou Atua ra.” [Ioane 20: 13–17.]

E haere atura Maria e faaite atu i te mau pìpì e ua ite mata oia i te Fatu, e ua faaite atoa Oia ia’na iho ia ratou ra.

E teie nei, e feruri tatou i te reira ma’a taime rii. E ohipa i tuatapapa-maite-hia teie oia hoi, ua haere atu Maria i te menema, e ite atura oia i na melahi toopiti ra i reira, e ite atura oia i te Faaora Oia iho o tei ti’a faahou mai. Ua roaa ia’na te faaiteraa a na ve’a toopiti no te ra’i mai, e ua haapapuhia ihora taua faaiteraa ra e te Tamaiti a te Atua Oia iho, oia hoi ua ti’a faahou mai te Faaora. Ua faataehia mai ta’na parau ia tatou ei iteraa papu no’na ra. E pato’i anei outou i taua parau ra? E feaa to outou aau i to’na iteraa papu? … E tapapa atura Oia i na pìpì toopiti i nia i te e’a i Emausa, e taati atoa maira Oia ia raua; “Ua faaorehia râ te ite i to raua mata, aita’tura raua i ite Ia’na.” [Luka 24.16.] E ui maira Iesu ia raua eaha raua i oto ai, e na ô atura raua: “O oe ana’e paha te taata ê i Ierusalema nei aore i ite i te mau mea i tupu i reira i teie nei pu’e mahana”? [Luka 24:18.] E araara a’era to raua mata, ite atura raua Ia’na.

E faaite a’era Oia Ia’na iho i Ta’na mau pìpì. Te hoê i taua mau pìpì nei, ua faaroo ïa i te parau no to Iesu ti’a-faahou-raa, ua na ô râ oia e, eita oia e ti’aturi atu maori râ, ia faatoro roa’tu oia i te rima i To’na ‘ao‘ao e ia fafa hoi te manimani i te puta auri o To’na nau rima. E au to Toma huru i te huru o te taata i teie nei anotau. E faaite faahou maira Oia Ia’na iho i te mau pìpì, e tei piha’i atoa iho Toma ia ratou.

“Ua fariu maira ia Toma, ua parau maira, A faatoro mai na to rima, e a hi’o mai na i tau rima nei; e a faatoro mai na hoi i to rima e fafa i tau ‘ao‘ao, eiaha e faaroo taiata, e faaroo râ.

“Ua parau atura Toma Ia’na, na ô atura, E tau Fatu, e tau Atua.

Ua parau maira Iesu ia’na, no te mea te hi’o mai nei oe ia’u, e Toma, i faaroo ai oe; e ao to te feia aore i ite ia’u a faaroo mai ai.” [Ioane 20:27–29.]

Na roto i te mana o te Varua Maitai e ti’a ai ia tatou ia ite e te ora nei to tatou Faaora.

I muri a’e i To’na ti’a-faahou-raa, tavini atura Iesu i Ta’na mau pìpì, ma te haapapu i to ratou feruriraa e, aita roa’tu ratou i vare, o Oia mau râ te Tamaiti a te Atua, i ti’a faahou mai mai te pohe mai i te tahuti ore e te ora mure ore. Aita ratou i hi’o ma te mata tahuti nei. E rave rahi te mea ta tatou e ite i te mata tahuti nei, e vare râ te mata tahuti. E faaroo to tatou tari’a, e hape râ te tari’a. E ti’a i te tino tahuti nei ia haavarehia. … E faaite râ vau ia outou e, ia faaite te Mana Hope Ia’na iho i te taata nei, e na reira Oia na roto i te mana o te Varua Maitai, eiaha râ na roto i te mata tahuti e te tari’a tahuti nei. No reira, ia parau mai te Mana Hope ia outou ma te haapapu i Ta’na parau mau na roto i te mana o te Varua Maitai, … e ite ïa outou mai ta te Atua i ite. E ere ïa te reira i te mea ti’aturi-noa-hia; e ere i te hoê mea i faaitehia mai na roto i te tino tahuti nei e hapehape ai outou; e riro râ ei mea ta te Atua i faaite i te aau nei, i te varua ora nei, i te vai-mure- ore-raa o te taata nei, e taua mea nei, mai te Atua atoa, eita roa ïa e mou, eita roa e mure.

E na reira atoa Iesu i te faaaraararaa i te mata varua e te ite o Ta’na mau pìpì i muri a’e i To’na ti’a-faahou-raa, ia ite ratou e, o Oia te Fatu o Oia hoi te Mesia. Ua ite ratou e ua ti’a faahou mai Oia mai te pohe mai. Ua ite ratou e o Oia te Tamaiti o te Atua ora ra no te mea e, na te Atua i heheu mai te reira ia ratou. E ti’a atura ia ratou ia parau, mai te parau a te rohipehe,

“Aue, te oaoa rahi:

Ia ite te ora nei Oia.” [“Ua Ite Au te Ora Nei to’u Fatu,” Te Mau Himene, numera 69.]

… O vai te faaite i te oaoa rahi e te mauruuru o te ô mai i roto i te varua o te taata nei, o oia tei farii i teie iteraa papu no o mai i te Atua Mana Hope? Aita e parau e roa’a i te taata no te faaite i te reira. Eita atoa e ti’a ia’u ia faaite atu ia outou i te reira. Eita e roaa te parau no te faaite atu i te reira. E ite-noa-hia i roto i te aau. E ta’a noahia i te taata i roto i to’na tahuti ore. Te oaoa eita roa e ti’a ia parauhia, o ta te taata e ite o tei farii i teie iteraa papu no o mai i te Varua Maitai. …

Ua parau mai te Varua Maitai ia’u nei—eiaha râ na roto i te tari’a, eiaha na roto i te mata, i to’u nei râ varua, i te tuhaa ora e te mure ore no’u nei,—ma te heheu mai ia’u e o Iesu te Mesia, te Tamaiti a te Atua ora ra. Te faaite papu atu nei au ia outou e, ua ite au te ora nei to’u Faaora. Ua ite hoi au e ite mata atu vau Ia’na i ni’a i te fenua nei, e ite atoa vau Ia’na i To’na iho huru mau. … Inaha e tae faahou mai oia i ni’a i te fenua nei; eiaha mai To’na taeraa mai i te matamua, na roto râ i te mana e te hanahana rahi, ma te taho’o i te feia iino e te paieti ore, ratou i ore i faaroo i te reo o te Varua, ratou tei faa’eta’eta i to ratou aau i te parau mau, ma te opanipani i to ratou iteraa i te mau haapapuraa a te mau tavini o te Atua. E haavahia ratou; eiaha na roto i te faarooraa o te tari’a, eiaha atoa na roto i te hi’oraa o te mata, na roto râ i te parau ti’a ratou e haavahia ai, e faahapahia hoi ratou i te mea e, i tae mai na te maramarama i to te ao nei, ua ati atu râ ratou i te pouri, eiaha i te maramarama. … Na te Fatu te reira i heheu mai ia’u. Na’na i faaîroa i to’u nei varua i teie iteraa papu, eita atura e ti’a i to’u aau ia feaa. …

Tei ia tatou te iteraa papu o te mau pìpì a te Mesia i ni’a i te fenua i Asia e te iteraa papu a te mau pìpì a Iesu i ni’a i te fenua Marite nei, i te haapapuraa i taua parau mau nei. Tei ia tatou te Buka o te Parau Haapiiraa e te Mau Parau Fafau atoa, tei reira hoi te mau heheuraa e te mau faaiteraa a te Atua i to’na mau Tavini e To’na atoa Feia Mo’a i to tatou nei anotau, te toru ïa o te iteraa papu i teie mau mea nei. Taa ê atu i te reira, … tei ia tatou te faaiteraa a te Varua Mo’a i roto i to tatou nei aau, eita e ti’a ia pato’ihia te reira; o oia hoi te farii i teie iteraa papu na roto i te faaurûraa a te Varua Maitai, e ore roa ïa oia e vare. Eita te Varua o te Atua e haapapu i te mea haavare. No reira, ua farii ra outou i te faaiteraa a te Varua Mo’a i roto i to outou aau na, ua ite ïa outou e te ora nei te Faaora. …

… Te faaite atu nei au ia outou i to’u nei iteraa papu e te ora nei te Faaora. Ia vai te hoê vahi iti no teie iteraa papu i roto i to outou aau na. … Mai te mea e aroha tatou ia tatou iho ma te hamani maitai te tahi i te tahi, e faatupu ïa tatou i te parau o te Evanelia a te Tamaiti a te Atua, te parau haapiiraa a te Mesia, o tei faanahonahohia no te faaora e no te faateitei i to te ao nei, ma te faaho’i atu i te taata nei i mua i te aro o te Atua, ta’u ïa pure, ia fana’o tatou na roto i te fariiraa i te reira.

Mana’o Tauturu i te Haapiiraa

Eaha te mau ohipa e te mau haapiiraa no roto mai i te oraraa o te Faaora o tei tauturu ia outou ia farii i te iteraa papu e o Oia te Tamaiti a te Atua?
Nahea to Iesu Mesia faahoiraa i te ino i te maitai a faainohia mai ai Oia? Eaha te mau haamaitairaa o te tupu na roto i te haapa’oraa i Ta’na haapiiraa e, ia taho’o te ino i te maitai? Nahea tatou ia faarahi i to tatou haapa’o i teie parau haapiiraa? (A hi’o atoa Mataio 5:38–47.)
Nahea tatou ia faaau i te a’o ia “tanu … i te parau i roto i to outou aau, ia tamata outou i to te reira maitai” (Alama 34:4) i te mau parau ta te Peresideni Smith i faaite no roto mai i te A’oraa i ni’a i te Mou’a ra? (A hi’o Mataio 5:3–6.)
Nahea te aau haehaa e riro ai ei puai no tatou? No te aha taua aau haehaa ra i riro ai ei mea rave ata na to te ao nei?
Nahea te mau parau hopea a te Faaora a vai Oia i ni’a i te satauro i te faaiteraa i “te here e te aroha e te hinaaro e te faaoreraa hara”? Nahea tatou ia pe’e i To’na hi’oraa i roto i to tatou iho nei mau taime fifi e te tamataraa?
E mea nahea to outou iteraa papu i te haapuai-raa-hia na roto i to Maria i Magadala faaiteraa no te Faaora i ti’a faahou mai? (A hi’o Ioane 20:11–18.)
No te aha “ to Toma huru e au ai i te huru o te taata nei i teie anotau”? Eaha te mau haamaitairaa ta tatou e farii a ore ai tatou i “ite … a faaroo ai”? (Ioane 20:29).
Eaha te mea ta outou i haapii na roto mai i te Peresideni Smith no ni’a iho i te faaiteraa i te iteraa papu no te Faaora?
Eaha to outou huru i te iteraa papu o te Peresideni Smith no te Faaora? Nahea to’na iteraa papu e tauturu ai ia outou ia haapuai i to outou iho iteraa papu no Iesu Mesia, te Tamaiti a te Atua?