Tavini i roto i te Ekalesia

Aita te autahuaraa i horoahia no te hanahana e aore ra no te faateiteiraa o te taata, tera ra no te taviniraa i rotopu i te mau taata ta teie mau autahuaraa i farii i te piiraa no te tavini. A haamanao na i to tatou Fatu, to tatou Orometua, i muri mai i te hoê haapaeraa maa roa, a rohirohi roa ai to’na tino e a paruparu roa ai i te pae tino no te haapaeraa i te maa, aita roa oia i topa i mua i te mau faahemaraa a Satane a ani ai oia i te Mesia ia faaohipa i to’na tura e to’na mana no te haamaha i to’na porori e to’na poia.

Eiaha te mau ti’araa hanahana e te mau faataaraa teitei ae i to te taata, o ta te Atua i ho mai, e tae noa’tu i te mau piiraa e te mau faataaraa o te Autahuaraa Mo’a e mauhia ra e ratou, ia faaohipahia e ia faarirohia mai te mau ti’araa e horoahia ra e te te taata. Aita te reira i faataahia ei faaunauna e aita atoa i faataahia ei faaiteraa e mea te taata faatere. Ua faataahia rä te reira ei piiraa i roto i te hoê taviniraa haehaa, i roto i te ohipa a te Fatu hoê roa ra, o ta tatou e poro nei i te tavini.²

Ua matau vau i te tahi mau Peresibutero, i roto i to ratou oraraa taatoa, ua farii ratou i te mau piiraa i te mau taime i anihia ai ratou, aita roa’tu ratou i faaea noa i te hoê noa taime no te uiui i nia i te mau piiraa o tei tuuhia i nia ia ratou, aita atoa ratou i faaea no te hi’o i to ratou iho apï, ua haere atu ratou e ua haere mai ratou ia au i te aniraa a to ratou mau taeae i roto i te taviniraa i to ratou mau taata e i te Fatu.… Ua ineine noa ratou mai te taata tiai, ma te ore e manao ia ratou iho.… Ua rave ratou i te reira ma to ratou aau, e aita roa’tu ratou i faariro i to ratou mau piiraa mai te hoê ohipa toiaha, tera ra, ua rave ratou i ta ratou mau hopoia na roto i te oaoa, i te au maitai, e i te mauruuru tamau.… Ua ineine noa ratou e ua hinaaro atoa i te teretere, e aore ra i te rave i te mau mea e anihia ia ratou ia rave, ma te faariro, i te mau taime atoa, i ta ratou mau hopoia no te autahuaraa, mai te hoê hopoia faahiahia ae i to ratou iho mau hinaaro.³

Eita te mau apooraa hebetoma a te mau pupu autahuaraa … e faarahi noa i te maitai o te autahuaraa na roto i te mau haapiiraa, tera ra na roto atoa i te tahoêraa i te mau taeae hoê ae taime i roto i te hebetoma no te haamatau ia ratou ia haa tamau noa ei tavini no te Fatu.⁴

E te Atua e, haamaitai mai te Autahuaraa Mo’a, te mau tane natura ieie, te mau tane parau tia, te mau tane tura, te mau tane haavare ore, te mau tane o tei haaputuputu, e e rave rahi o ratou no roto mai i te mau nunaa o te ao nei, no te here o te Evanelia; e e rave rahi o ratou o tei fanauhia i roto i te fafauraa o te Autahuaraa Mo’a, e te pure nei au i te Atua ia haamaitai mai ia outou, to’u mau taeae, ma te îraa o To’na hinuhinu, o To’na aroha e o to’na here mau, ia ruperupe outou i roto i te fenua, e ia riro outou ei mau tavini mau No’na.⁵

O te Autahuaraa te upoo faatere. E peresideni te autahuaraa i nia i te mau mea atoa. E hopoia na te feia e mau nei i te Autahuaraa ia hiopoa i te mau faanahoraa atoa o te Ekalesia; eiaha i te mau faanahoraa anae o te Autahuaraa, tera ra i te mau faanahoraa atoa o tei haamauhia no te maitai o te mau taata atoa—ta tatou Sotaiete Tauturu, te pupu Feia Apï Tamahine e Feia Apï Tamaroa, te Paramaire, … e te mau faanahoraa atoa o tei faataahia no te haamaitai i te nunaa taatoa o te Atua e no te manuïraa te parau mau e te parau ti’a i roto i te ao. Mea tia ia farii teie mau pupu te aupururaa e te faatereraa e te anaanatae hohonu o te mau taata faatere o te Ekalesia, i roto anei i te paroita e aore ra i roto i te huimana faatere o te Ekalesia, no te mea te hinaaro nei te Autahuaraa ia maitai te nunaa o te Atua e te anaanatae nei ratou i roto i te paturaa e te faatiaraa ia Ziona i nia i te fenua nei. E mea tia i teie mau faanahoraa o tei faanahonahohia, o tei faatiahia, e o tei haamaitaihia e te Atua i te hi’o atu i teie mau hui mana faatere e i te rave apiti e o ratou i te ohipa, e i te faatura ia ratou i roto i to ratou mau tiaraa.⁶

Aita e vaira, i roto i te Ekalesia a Iesu Mesia, te faatereraa taaê e te mea faataaêhia, i nia ae e aore ra i rapae ae i te Autahuaraa mo’a e aore ra i to’na ra tura. Te vai nei te mau Sotaiete Tauturu, te Feia apï Tamahine e te Feia Apï Tamaroa, te Paramaire e te Haapiiraa Sabati, … eita râ teie mau faanahoraa i te pupu Autahu’araa e aore ra i te apooraa Autahuaraa, tera ra e mau faanahoraa ratou i haamauhia i raro ae i te faatereraa a te autahuaraa, e i haamauhia na roto i te mana o te Autahuaraa mo’a. Aita teie mau faanahoraa i haamauhia i rapae ae i te autahu’araa e aore ra i nia ae i te autahu’araa, aita atoa i te atea ê i to’na ra mana. Te faatura nei râ ratou i te parau tumu o te Autahuaraa. I te mau vahi atoa e haamauhia ai teie mau faanahoraa, e faatupu noa ratou i te maitai, i te faaoraraa tahuti e i te faaoraraa varua o te mau varua taata.⁷

Te hinaaro nei au e parau e, te titauhia nei te Sotaiete Tauturu, te mau [peresideniraa] rahi ihoa ra no teie faanahoraa rahi, ia ara maite i nia i te taatoaraa o ta’na iho mau pupu e vaira i rotopu i te mau vahine i Ziona. Tei te upoo ratou no teie mau faanahoraa’toa; ia faatere e ia auraro ratou i to ratou piiraa.⁸

Na roto i te [mau] pupu i tia ai ia matou ia faatoro i te rima no te tauturu, no te aratai e no te faauru, i nia i te hoê faito maitai, e rave rahi o to tatou feia apï tamaroa e feia apï tamahine, te ore e roaa i te tauturuhia na roto noa i te mau faanahoraa o te Autahuaraa. Tae roa mai i teie mahana, ua haamau teie mau faanahoraa i te niu no te hoê ohipa maitai roa e te faahiahia.⁹

Te pure nei au i te Atua ia haamaitai mai i te mau faanahoraa’toa o te mau pupu, mai te pupu matamua e tae roa’tu i te pupu hopea, ia tia ia ratou ia rave i ta ratou mau hopoi’a, ia ore ratou ia tutautohe noa e ia faahupehupe i te amoraa i ta ratou mau ohipa.… Eita te hau e tae mai i nia ia tatou, maori râ i te taime noa e haa ai tatou, e rave ai tatou i te ohipa, e riro ai tatou ei feia parau tia, ia horoa tatou i to tatou taime no te faaoti i ta tatou mau hopoi’a. E ia na reira tatou, i reira ïa te hau e tae mai ai i nia ia tatou, no te mea tei roto tatou i te rima o te Atua, eiaha râ i te rima o te enemi.¹⁰

Mai te peu te rave ra tatou i ta tatou mau hopoia, te rave râ ïa tatou i te hoê ohipa faahiahia e te hanahana. Mea faufaa mau no to tatou maitai tataitahi ia ite te mau tane e te mau vahine atoa o tei tomo i roto i te fafauraa o te Evanelia e, na roto i te tatarahapa e te bapetizo, e hopoia mau na ratou ia faaohipa i to ratou maramarama, to ratou tiamaraa o ta te Fatu i tuu i nia ia ratou ra, no te faahaere i mua te mau ohipa i Ziona e no te faatia ia Ziona i nia i te fenua nei.¹¹

Mea tia ia tatou paatoa ia haa no te maitai e no te faaoraraa o te mau taata—ia faatusia i to tatou iho mau hiaai e i to tatou mau manao no te maitai o te taatoaraa, ma te hinaaro mau ia rave i te hinaaro o te Atua Manahope, ma te haapao i te mau opuaraa a to tatou Fatu eiaha râ i to tatou iho hinaaro. Te haa nei tatou no te faaoraraa o te mau varua, e mea tia ia tatou ia manao o teie te hopoia rahi roa ae o tei tuuhia i nia ia tatou nei. No reira, mea tia ia tatou ia hinaaro i te faatusia i te mau mea atoa, no te here o te Atua, no te faaoraraa o te mau taata, e no te upootiaraa o te basileia o te Atua i nia i te fenua nei.¹²

Te tiai nei matou ia ite i te mahana … e haroaroa ai te mau pupu atoa o te Autahuaraa i roto i te Ekalesia a Iesu Mesia i te Feia Mo’a i te mau Mahana Hopea nei, i ta ratou mau hopoia; ia rave ratou i ta ratou iho mau hopoia, e ia haamana i ta ratou mau piiraa, e ia rave i ta ratou hopoia i roto i te Ekalesia, ia au i te maramarama e te mana ta ratou e mau nei.… Ua faanahonaho te Fatu e ua ite oia mai te matamua mai â, e ua faataa Oia i roto i te Ekalesia ia tia i te hinaaro o te taata tataitahi ia faatupuhia e te mau faanahoraa o te Autahuaraa. Ua parau maitaihia e mea maitai roa te faanahoraa o te Ekalesia. O teie noa te fifi, oia hoi, aita teie mau faanahoraa e rave papu nei i ta ratou mau hopoia o tei tuuhia i nia ia ratou. Ia ara anae ratou i te mau titauraa o tei anihia ia ratou, e faaoti ia ratou i ta ratou mau hopoia ma te faaroo, e e riro ïa te ohipa a te Fatu i te tupu i te rahi, e rahi te mana e te faatupuraa i roto i te ao nei.¹³

Mea tia i te taata tataitahi ia farii i te hinaaro i roto i to’na aau ia rave i ta’na tuhaa i roto i te ohipa rahi o teie anotau hopea. Mea tia i te taatoaraa ia riro ei mauhaa no te faatere i teie ohipa tae noa’u i te mau hopea o te ao nei. Oia mau, tei te taata taataitahi iho ra o te mau nei i te tahi tuhaa o te mana o te Autahuaraa mo’a e titauhia ai ia haamana e ia faatura i te reira piiraa, aita atu e vahi ê e nehenehe ai tatou e haamata i teie ohipa maoti ra i roto iho ia tatou nei e ia tama anae tatou i roto i te aua o te umete, ia tama anae tatou i to tatou iho aau, ia faaafaro anae tatou i to tatou oraraa, ia faatiama anae tatou i to tatou mau feruriraa no te raveraa i ta tatou hopoia no te Atua e no te taata, e e ineine ïa tatou no te faatupu i te hioraa maitai no to tatou utuafare, no te sotaiete, e i roto i te mau haerea atoa o te ora.¹⁴

Te mau tane e te mau vahine parau tia i mua i te Atua, o te tutava ma te haehaa, ma te rave i ta ratou hopoia, ma te aufau i ta ratou tuhaa ahuru, e ma te faaohipa i te hoê faaroo mo’a e te papu i mua i te Atua e te Metua, o te hahaere ra i te mau tamarii otare e te mau vahine ivi i roto i to ratou ra ati, e te tia maitai ia’na iho, eiaha ia viivii i teie nei ao [Iakobo 1:27], e o tei tauturu i te haapao i te feia riirii, e o tei faahanahana i te Autahuaraa Mo’a, o tei ore e haamaua i roto i te mau ohipa faufaa ore, o tei pure tamau nei i roto i to ratou utuafare, e o tei tuu nei i te Fatu i roto i to ratou aau, e patu ïa ratou i te hoê päpä e e ore roa ïa e noaa i te uputa o hade, e mai te peu e tahe mai te pape pue, e e puaihi te matai puai i to ratou fare, eita ïa e parari, no te mea ua patuhia i nia i te päpä o te parau tumu mure ore [a hi’o Mataio 7:24–27].¹⁵