A Tape’a Papu i te Parau Mau ia Ore Outou e Haavarehia

Ua nava’i paha to tatou iteraa rau i teie nei ia maramarama e, aore roa e taata, e pùpù taata e aore râ, e faanahonahoraa huna e nehenehe ia amui ia rava’i te puai e te mana no te haapeapea i te mau fâ a te Atua Mana Hope e aore râ, ia taui i te tereraa o Ta’na ra ohipa. I te mau tau i mairi, e rave rahi feia tei ti’a mai mai te mana’o hape no te faaoti e, e rave ratou i te hoê faaapîraa faahiahia i te Ekalesia; ua mana’o ratou e, i roto noa i te hoê taime poto, e faarue te nuna’a taato’a i te parau tumu o te parau mau o ta ratou i ati atu e o ta ratou i amui atu mai te omuaraa mai o te Ekalesia. Ua mana’o teie feia e, e pe’e te nunaa i te mau “tia’i mamoe apî” area râ, ua ta’a i te nunaa o te Atua te reo o te tia’i mamoe mau e ore hoi ratou e faaroo i te mau a’o a te taata tei rave i ni’a ia’na te mana e ere hoi no’na ra. E ore roa te nuna’a e pe’e atu i taua huru taata râ. Ua ite te Feia Mo’a i te Mau Mahana Hopea Nei i te varua o te Evanelia; ua maramarama ratou i te varua o te parau mau. Ua haapii ratou i ta ratou ohipa, e e tape’a papu ratou i te parau mau, noa’tu eaha te mea e tupu mai.

Mai te haamataraa mai e tae noa mai i teie nei, ua ti’a-hua’tu tatou i mua i te aro o te ao atoa nei; e ua amui te ao atoa nei no te aro i te ohipa a te Fatu, eiaha no te feii noa raa, eiaha hoi no te hinaaro e aore râ, no te opua i te faaino e aore râ, no te aro i te parau mau tera râ, no to ratou ite ore i te parau mau e no to ratou ta’a ore i te mea o ta ratou e rave ra. E rave rahi tei haavarehia e te reo o te mau tia’i mamoe haavare; e ua arata’i hapehia e te mau mana’o hape. Ua haavarehia ratou; aita ratou i ite i te parau mau; aita ratou e maramarama ra i te ohipa o ta ratou e rave ra, e no reira, e au ra e, ua faata’ahia ratou no te aro atu i te parau mau e i te ohipa a te Fatu mai te omuaraa mai â. I te mahana i parau ai Iosepha Semita te Peropheta e, ua ite oia i te hoê orama e tae roa mai i teie nei, mai reira mai te enemi o te parauti’a, te enemi o te parau mau, o te viretu, o te tura, o te ohipa afaro e o te viivii ore o te oraraa, te enemi o te Atua mau hoê roa ra, te enemi o te heheuraa e o te mau faaurûraa i te taata nei mai te Atua mai, i aro ai i teie nei ohipa.

Eita roa e itea ia outou te hoa no te parau-ti’a, te hoa no te heheuraa, te hoa no te Atua, te hoa no te parau mau, te hoa no te oraraa parau-ti’a e te viivii ore o te oraraa e i te hoê taata, o oia tei haapao i te parau-ti’a e o tei nava’i i te paari ia ta’a i te parau mau e te haavare, te maramarama e te poiri- te parau nei au eita roa e iteahia te huru taata mai teie o te aro atu no te paruru i te tumu o Ziona. Ia aro ana’e i te tumu o Ziona, ua aro ïa i te Atua, i Ta’na heheuraa e i te varua o te aratai i te mau taata i te parau mau no ô mai i te vaipuna o te maramarama e te ite, i te parau tumu te faatahoê i te mau taata e o te tura’i i te taata ia faarue i ta ratou mau hara, ia tutava i te imi ia ora parau-ti’a noa e ia here i te Atua ma to ratou aau atoa, ma to ratou varua e to ratou puai atoa, e ia aroha i to ratou mau taata tupu mai ia ratou iho.²

Te vai ra te tahi mau taata o te hinaaro nei i te taaoti’a i te mana o te Atua i to te taata nei, e tei vai nei te reira i rotopu ia tatou e i rotopu i to tatou mau orometua o te fare haapiiraa. Te hinaaro nei ratou ia ore outou e ti’aturi i te mau aamu faaurûhia o te mau Papa’iraa Mo’a tei faaite mai e, tei raro a’e te mau mata’i e te mau are i te mana o te Atua e i mana’o outou e, i to te Faaora ti’avaruraa i te mau demoni, te faati’araa i tei pohe ra e aore râ, i te raveraa i te mau semeio mai te tamâraa i te mau lepera e a’ai noa te reira. Te hinaaro nei ratou ia ore outou e ti’aturi e, aita te Atua e ta’na Tamaiti o Iesu Mesia i fâ mai ia Iosepha Semita, e a’ai noa te reira area râ, ua hau a’e to tatou ite no te reira; ua faaite papu mai te iteraa o te Varua e, e parau mau te reira. E te parau nei au: a ara i te feia afai parau hape e haere mai ia outou no te poro e, e tupu noa teie mau mea na roto noa i te mau ture o te natura, e aore hoi o te Atua e mana.³

I rotopu i te Feia Mo’a i te Mau Mahana Hopea Nei, e nehenehe te mau parau tumu hape i anoihia i te parau mau o te Evanelia e porohia i na huru taata e piti e, e nehenehe ia parau e, no tera noa iho â hoho’a taata. Oia ïa:

A tahi—O te feia poiri o te ore e faaorahia, tei ere i te maramarama na roto i to ratou faaeanoaraa e to ratou faatau, tei ore e rave i te hoê noa’e ohipa e aore râ, tei ore e tutava no te haamaitai ia ratou iho na roto i te tai’oraa e i te haapiiraa; o ratou tei ro’ohia i te hoê ma’i ri’ari’a o te ore roa e nehenehe ia rapaauhia—te faatau.

A piti—te feia te’ote’o e te feia faateitei ia ratou iho o te tai’o nei i raro a’e i te lamepa o to ratou iho ite, o te tatara mai te au i te mau ture o tei imihia e ratou iho, o tei faatupu i ta ratou iho mau ture e o tei faariro ia ratou iho ei mau haava no ta ratou iho mau ohipa. E mea poiri ta’ota’o a’e ia ratou i te feia matamua i parauhia’e nei.

A ara i te feia faatau e te feia te’ote’o.⁴

Ua papu te iteraa o te Feia Mo’a i te Mau Mahana Hopea Nei i teie nei e, ua faati’a te Atua i Ta’na Ekalesia no te taime hope’a i ni’a i te fenua nei ia vai ti’a noa e ia ore e faata’ahuri faahouhia e aore râ, ia haamou faahouhia, e te fare o te Atua e fare ïa no te haapa’o, no te ture, no te ti’a, e aita roa e mana to te feia faahuehue ia haafifi i te Feia Mo’a na roto i to ratou poiri e to ratou nounou, i parau haere noa’tu ai i te parau ma’ama’a e inaha, ua titau ma to ratou puai atoa i te mau mana peropheta e i te tahi atu mau maitai e te mau horo’a a te varua e ia faareru teie mau huru taata e ta ratou atoa ra hoi mau haapiiraa i te Feia Mo’a. Tei pihai iho te Ekalesia a te Mesia i te Feia Mo’a. Ua farii oia i te ture a te Atua no te faatere ia’na iho e ia vai tamau noa. Te vaira ta’na rave’a no te faatitiaifaro i te mau hapa, te mau rave-ino-raa e aore râ, te mau hape o te tupu mai i tera taime e tera taime na roto ïa i te arepurepu ore e te faahuehue-ore-raa; e nehenehe oia e rave i te reira na roto i te tupuraa, te faarahiraa, te faananearaa, te paari, te faaoromai e te aroha.

Teie te huru taata o te maitihia ei feia faatere no te mau pùpù peresideniraa o te Ekalesia ia ite e ia papu i te Feia Mo’a e, te vaira te paari, te parau-ti’a e te faatura i te ohipa, e faaiteraa te reira i te huru o te arata’iraa a te feia o tei horo’ahia te ti’aauraa no te faatere i te mau ohipa a te Ekalesia.⁵

Mai te mau mahana mai â o Hiram Page (PH&PF tufaa 28), ua itehia e rave rahi mau taime, te mau varua haavare o te faaite roa mai ia ratou iho i te mau melo o te Ekalesia. E faaurû mai ratou i roto i te mau tane e i te mau vahine o tei ofati i te hoê ture e ua riro ratou ei mau mauihaa ohie na te Diabolo. I te tahi atoa taime, e faahema te mau varua haavare i te mau taata e faateitei nei e, te haapa’o maite ra ratou i te mau ture, te mau oro’a e te mau faanahoraa o te Ekalesia na roto i te raveraa i te tahi mau tapa’o o te tumu mo’a no te haafifi i te mau taata tei mana’o e, “ua maitihia ratou” e o te ore e ite faahou ia faataa i te faufaa tumu mau. [Mataio 24:24]. Mai a Satane, ua rave roa mai i te hoho’a o te hoê “melahi o te maramarama” [2 Korinetia 11:14; 2 Nephi 9:9].

Ia faaite ana’e te mau orama, te mau moemoea, te mau reo, te parau tohu, te mau mana’o e aore râ, te mau horo’araa e aore râ, te faaurûraa i te hoê parau poro’i e aita e tano e te mau heheuraa mana a te Ekalesia e aore râ, e pato’i te reira i te mau faaotiraa a to’na mau ti’a mana faatere, e ta’a i te Feia Mo’a i te Mau Mahana Hopea Nei e, e ere te reira no ô mai i te Atua ra noa’tu e ua mana’ohia e, te reira mau. E mea ti’a atoa ia ratou ia maramarama e, e horo’ahia mai te mau arata’iraa no te Ekalesia na roto i te peropheta o te Ekalesia e na roto i te heheuraa. E farii te mau melo haapa’o atoa i te heheuraa a te Varua Maitai no ratou iho, no to ratou mau utuafare, e no te feia atoa i ma’itihia no te faatere ia’na. Teie râ, eiaha e farii i te mau mea aita i ti’a i ta te Atua i faahaere mai na roto i te peresideni o te Ekalesia mai te huru ra e, e parau mana e aore râ, e mea ti’aturihia.⁶

Te mau horo’a a te Varua e te mau mana o te Autahu’araa Mo’a, na te Atua ïa, e ua horo’ahia no te haamaitai e te faaitoito i te nunaa e no te haapuai i to ratou faaroo. Ua ite mau o Satane i te reira e no reira, e imi oia na roto i te mau semeio haavare ia haamatapô e ia faahema i te mau tamarii a te Atua. A haamana’o na outou i te mau mea i faatupuhia e te mau tahu’a o Aiphiti i roto i ta ratou mau tautooraa ia ore Pharao e ti’aturi i te misioni mo’a a Mose e a Aarona.…

I roto i Ta’na heheuraa no ni’a i te haavaraa hope’a, ua parau te Mesia e noa’tu e nehenehe te mau semeio i ravehia e tupu mai na roto i te hoê tumu ino: “E rave rahi o te parau mai ia’u ia tae i taua mahana ra, E te Fatu, e te Fatu, e ere anei ua haapii matou ma to oe i’oa, e ua tatai te mau demoni i to oe i’oa, e ua rave i te semeio e rave rahi i to oe i’oa? O ta’u ia e parau atu, Aita roâ vau i ite ia outou. E haere ê atu outou, e te feia rave parau ino.”(Mataio 7:22–23.)

Aita te fifi e te mana o te ino o te ohipa tahutahu e vai noa no te ohipa tahutahu ana’e, no te mau ti’aturiraa ma’ama’a ra o te taata vare noa i te mau mea i mana’ohia e nehenehe ia rave na roto i to’na i’oa. E mea ino mau ia ti’aturi e, e nehenehe ta te diabolo e haamauiui i te hoê taata e aore râ, i te hoê vahine mai te mea e melo oia no te Ekalesia a te Mesia—[maori râ] aita to taua tane e aore râ, to taua vahine ra e faaroo a faainohia mai ai e te hoê mana e taua rave’a ra. Mai te mea e farii oia i taua mana’o ra, eita e ore ratou i te hema i to ratou iho mau ti’aturiraa hape. Aore roa e mana e vai nei i roto i te ohipa tahutahu iho, tei roto noa ra i te mana’o e te ti’aturiraa o te taata.⁷

E te mau taeae e te mau tuahine, eiaha e here i te hoê noa parau tumu o te evanelia. E mea fifi te hereraa i te hoê noa parau tumu o te evanelia i roto i te Ekalesia a te Mesia. E mea fifi no te mea, e haafaufaa ore ratou i te tahi mau parau tumu e aore râ, te tahi atu mau mana’o faufaa e te mana “faaora hoi” mai te mau parau haapiiraa e aore râ, te mau faaueraa au maitaihia.

E horoa te hereraa i te hoê noa parau tumu o te evanelia i te mau taata o te faaitoito nei i te reira ohipa te hoê feruriraa hape no ni’a i te evanelia a te Faaora; te taui nei e te nane nei ratou i Ta’na mau ture e Ta’na mau haapiiraa. E ere te reira i to’na natura. E mea faufaa te mau parau tumu atoa e te mau peu tei heheuhia mai e te Atua no te ora o te taata e, e mea fifi ia tu’u hoê noa o taua mau peu ra i mua i te taata nei e te haamo’eraa i te tahi; e haafifi te reira i to tatou ora no te mea, e haapoiri te reira i to tatou mana’o e e haamohimohi i to tatou ite. E haapoto teie huru hi’oraa noa’tu eaha te e’a e ravehia, i te mana’o e e haapeapea i te iteraa varua, e te hopea o te taata o tei haafifihia e teie ohipa ino e tei haapotohia te feruriraa, e topa ïa i roto i te hoê ti’araa i reira oia e faahemahia ai e te diabolo na roto i to’na haapoiri-raa-hia e aore râ, na roto i te ite i faahuruehia, e i te haava hape i to’na mau taeae e i te pe’e roa atu hoi i te varua o te taivaraa. E ere ïa oia i te mea papu i mua i te Fatu.

Ua ite matou i teie nei fifi: e mea oioi roa te Feia Mo’a e here nei i te hoê noa parau tumu o te evanelia i te haava e te faautu’a i to ratou mau taea’e e tuahine e ere i te mea itoito roa i roto i te haapiiraa e au maitaihia e ratou. E riro te taata e Ture no te Parau Paari ana’e to roto i to’na feruriraa i te faahapa ma te tau’a ore i te mau melo o te Ekalesia o te haapa’o nei i te faufaa rahi o te tahi atu mau haapiira o te evanelia.

Te vai atoa ra te tahi fifi i roto i teie hi’oraa—e riro te taata e here i te hoê noa parau tumu o te evanelia i te mana’o e o oia te mea maitai a’e, e faateoteo e e faateitei oia ia’na, e ara e aore râ, e faaetaeta atu oia i to’na mau taea’e e tuahine aita paha i haapa’o maitai i taua ture taa ê ra. E haamauiui teie peu i to’na mau hoa tavini e e fa’ainoino te reira i te Fatu. “O te te’ote’o to te pohe ra na mua, e te aau faateitei to te hi’a.”—(Maseli 16:18.)

Te vai nei i roto i te faanahonahoraa no te ora, te tahi mau parau faufaa rahi. Eita te reira e ti’a ia hunahia; e ore atoa te tahi atu e nehenehe ia tu’uhia i mua mai. E mea ti’a ia fariihia te ti’araa metua o te Atua, te maitai o te Tara’ehara a to tatou Fatu e Faaora, te faaho’i-raa-hia mai te evanelia i teie nei mau mahana hopea nei ma to tatou aau atoa. Aita e ti’a ia tatou ia taui no te iti o te faaroo, teie mau haapiiraa faufaa roa na roto i te haapae etaeta raa i te mau mea e ino ai te tino, na roto i te aufau etaeta raa i te tufaa ahuru na ni’a i tatou nei “aneto e te Kumina” [a hi’o Mataio 23:23] e aore râ, na roto i te haapa’oraa i te tahi atu mau oro’a. Mai te mea aita e faaroo i te Atua, aita ïa to te bapetizoraa e faufaa.⁸

Ia ore tatou ia haavarehia, ia arata’ihia i roto i te hape, ia ueuenoa-hia e te mata’i e te parau haapiiraa e te mau mana’o hape e aore râ, e te mau peu haavare a te taata e aore râ, e pe’e atu i te pi’i haavare ra, Inaha, teie te Mesia, e, inaha tera [Mataio 24:23], ua haamau te Atua i te faanahoraa mau no te aparauraa i rotopu ia’na e te taata, e ua haamau oia i te reira i roto i ta’na Ekalesia, e e mea ti’a i te taata atoa ia haapa’o maitai i te reira ia ore e haavarehia. Te mau mea atoa e aifaito i te reira, na te Atua ïa, e te mea eita e aifaito ra, no raro nei ïa.⁹

Na roto i te imiraa … i te aroha e te faaoreraa hara i te mau mahana atoa a haere noa ai tatou i mua e horo’a ia tatou te puai no te ape i te mau ino o te nehenehe ia haavihia na roto i te otohe raa i mua ia ratou.¹⁰

Eita roa’tu e tia i te hoê taata e oaoa nei i te Varua Mo’a o te Atua ia tiaturi e, e nehenehe te mau mana o te [ohipa tahutahu e te tahi atu mau ino] e haape’ape’a ia’na. Ua riro te fana’oraa i te Varua Mo’a ei paruru papu i te mau mana atoa o te ino.¹¹

Te tiaturi nei au e, te faahaere nei te rahiraa o te Feia Mo’a i te Mau Mahana Hopea Nei i to ratou faaroo i mua, e ua nava’i to ratou paari e to ratou ite e ua î te Varua o te Atua ora i roto i to ratou aau, no te ma’iti i rotopu i te parau mau e te parau hape, i rotopu i te mea tia e te mea hape, e i rotopu i te maramarama e te poiri; e te parau nei au e, te tiaturi nei au e ua nava’i to ratou paari no te haapa’o i te mau ture haihai, te mâ, te parau mau o te evanelia a Iesu Mesia hau atu i te mau mana’o hape o te mau philosopho e aore râ, o te feia ai vana’a e aore râ, e rave rahi atu â. Aita roa e ite e aore râ, e haapiiraa philosophia e nehenehe e mono i te parau mau a te Atua Mana Hope ra.

Ua parau Ioane, “E parau mau ta Oe parau” [a hi’o Ioane 17:17], e oia mau â te reira; e te tiaturi nei au e ua nava’i te ite o te Feia Mo’a i te Mau Mahana Hopea Nei no te parau a te Atua ia ta’a e, Na’na teie parau e ia ape i te mau mea e ere i te parau na te Atua; e e haapa’o ratou i te parau a te Atua, no te mea e parau mau ïa. Ua parau te Faaora, “I mau maite outou i ta’u parau, e pìpì mau ia outou na’u i reira. E ite ïa outou i te parau mau e na te parau mau outou e faatiamâ” [a hi’o Ioane 8:31-32].

Te tiaturi nei au e, te vai nei te ite e te maramarama o te Feia Mo’a i te Mau Mahana Hopea Nei, e to te feia faatere ihoa ra no Iseraela i te mau parau tumu no te evanelia e ua ite ratou i te parau mau, e na te reira e faatiamâ ia ratou—tiamâ i te hara, tiamâ i te hape, tiamâ i te poiri.¹²