Te tauturu no ni‘a mai

E faaruru tatou paatoa i te tahi taime i roto i to tatou oraraa ia titau i te tauturu o te ra‘i no te tahi ohipa taa ê e te rû. Pauroa tatou e farerei i te tahi taime teimaha no te ohipa e tupu ra e aore râ ua taa ore tatou i te parau a te tahi taata, e te vai nei tera hinaaro rahi ia farii i te arata‘iraa pae varua, hoê hinaaro rahi ia ite i te e‘a tano e ia rave i te mea tano. I roto i te omuaraa o te mau papa‘iraa mo‘a no teie tau tuuraa hopea nei, ua fafau mai te Fatu e, mai te mea e noaa ia tatou te aau haehaa i te taime ati ra, e mai te mea e fariu tatou ia’na ra no te tauturu, e faarirohia tatou « ei mea puai, e [e] haamaitaihia ho‘i no ni‘a maira, e ia farii hoi i te ite i tera taime e tera taime » (PH&PF 1:28). E tae mai te reira tauturu mai te mea e, e imi tatou i te reira, e e pee ho‘i i te mea ta te arii Beniamina i parau i roto i te Buka a Moromona, « te parau a te Varua Maitai » (Mosia 3:19).

Peneia‘e aita e parau fafau tamarû a‘e i roto i te oraraa i teie parau fafau no te tauturu hanahana e te arata‘iraa pae varua i roto i te taime ati. E tao‘a te reira tei horo‘a-hua-hia mai mai te ra‘i mai, e tao‘a e titauhia no tatou mai to tatou apîraa ra e tae atu i te mahana hopea o to tatou oraraa …

I roto i te evanelia a Iesu Mesia, e tauturu to tatou no ni‘a mai. « A oaoa maitai na », ua parau te Fatu, « no te mea e arata‘i atu na vau ia outou » (PH&PF 78:18). « E tuu atu vau i ta to’u nei Varua ia oe na, o te haamaramarama mai i to oe feruriraa, o te faaî hoi i to oe aau i te oaoa » (PH&PF 11:13).

Te faa‘ite papû nei au i te ti‘araa Atua o Iesu Mesia. Te ora mau nei te Atua e te faatae mai nei Oia ia tatou i to’na Varua. I mua i te mau fifi o te oraraa e i mua i te mau hopoi‘a o te oraraa, ia pii hua tatou i te reira horo‘a no ô mai i te Atua, to tatou Metua, e ite mai tatou i te oaoa³.

Ua imi te tamaroa ra Iosepha Semita… ia ite i te mana‘o e te hinaaro o te Fatu i te taime o te oraraa, ua tae mai te taa ore e te mana‘ona‘oraa… Ua riro te vahi tapiri ra no Palmyra, Niu Ioka, ei vahi « mârôraa rahi no ni‘a i te pae faaroo », i tera taime, tei roto Iosepha i to’na apîraa. E oia mau, i to’na mata, ua arepurepu te taatoaraa o te mataeinaa, e te papa‘i ra oia e, « e rave rahi te taata tei amui atu i taua mau pŭpŭ faaroo eê ra e ua tupu te tahi ohipa rii « amahamaha i rotopu i te taata » [Iosepha Semita—Aamu 1:5].

No te hoê tamaroa tei ra‘e-noa-hia te ahuru-ma-maha o te matahiti, ua rahi roa’tu te fifi e te taa ore i te mea e, i rotopu iho i te utuafare Semita, e mea ê ta te tahi e ta te tahi faaroo i taua taime ra.

I teie nei, na roto i te reira iteraa e te hi‘oraa, te ani nei au ia outou ia feruri i teie mau mana‘o faahiahia o teie tamaiti no tera faito matahiti apî roa. Ua papa‘i oia :

« I roto i taua taime aehuehu rahi ra, ua tupu te fifi i roto i to’u mana‘o. Noa’tu râ te huru o teie mau mana‘o hohonu e te papû i tera taime e tera taime, aita vau i amui atu i taua mau pŭpŭ taata ra… No te rahi râ o te mârôraa e te mau pe‘ape‘a i roto i taua mau haapa‘oraa eê, e mea fifi roa ïa na te hoê taata apî mai ia’u, o tei ore i mâtau i te taata e te huru o te mau mea, ia ite papû o vai tei ti‘a e o vai tei hape.

« Ua fifi roa to’u mana‘o i te tahi mau taime ; te tuôraa e te maniania, ua haere noa ïa i te rahiraa e te tuutuu ore …

« I rotopu i taua mau aroraa parau ra e te maniania no te faaiteraa i te mana‘o, ua parau pinepine au ia’u iho e, E aha ra ïa te rave ? O vai tei tano i roto i taua mau pŭpŭ atoa ra ; e aore râ, ua hape anei ratou pauroa ? Mai te mea ua tano te hoê o ratou, o te hea ïa, e nahea vau e ite ai i te reira ?

A faaea teimaha noa ai au i raro a‘e i te mau fifi rahi i faatupuhia e te mârôraa a taua mau pŭpŭ faaroo ra, te tai‘o ra vau, i te hoê mahana, i te Episetole a Iakobo, pene hoê e te irava pae, o tei na ô mai e : Te ere ra râ te hoê o outou i te ite, e ani oia i te Atua ra, o tei horo‘a hua mai i te maitai i te taata atoa ra, ma te patoi ore ; e e horo‘ahia mai ta’na.

Aita roa â te hoê papa‘iraa mo‘a i ô ma te puai rahi a‘e i roto i te aau o te taata nei, mai to teie nei irava i ô mai i roto to’u nei aau. Ua ô mai te reira ma te puai rahi i roto roa i to’u nei aau. Ua feruri pinepine noa vau i te reira, e ua ite au e mai te mea e faufaahia te hoê noa a‘e taata i te ite no ô mai i te Atua, o vau ïa. Aita ho‘i au i ite i te mea e ti‘a e rave, e ia ore to’u ite ia faarahihia, e ore roa ïa vau e ite » [Iosepha Semita—Aamu 1:8–12].

E ua ite ihoa tatou e, te mea i tupu i muri iho, ua taui roa ïa te tereraa o te tuaaai o te taata nei. No ta’na faaotiraa e haere e « ani i te Atua », ua haere te tamaiti apî ra o Iosepha i roto i te uru raau tapiri noa i to’na fare. I reira, ei pahonoraa i ta’na pure tuutuu ore, ua fâ mai te Atua, te Metua Mure Ore, e ta’na Tamaiti, o Iesu Mesia, ia Iosepha e ua horo‘a mai i te tahi parau a‘o ia’na. Teie ohipa rahi i tupu, o ta’u e faa‘ite papû nei ma te haehaa, ua pahono ïa i te tahi mau uiraa e rave rahi atu â no to tatou tau tuuraa, eiaha noa no ni‘a i te ekalesia e ti‘a i te tamaiti apî ra Iosepha e amui atu e e ore e amui atu.

Ta’u fa… e ere ïa te faaiteraa i te mau taime matamua no te Faaho‘i-faahou-raa mai, noa’tu pai e, ua riro te reira ei hoê o te mau aamu mo‘a roa o te mau paapa‘iraa mo‘a. Te hinaaro nei râ vau ia tura‘i i te parau no te faito rahi o te ara-ohie-raa i te mau mea pae varua ta teie tamaiti apî roa e tamaiti ho‘i aita i haere i te haapiiraa, i faaite mai.

E hea i rotopu ia tatou, i te matahiti ahuru ma maha, e i te tahi noa’tu matahiti, e nehenehe e feruri afaro noa e e vai hau noa i roto i te upoo a ume haere ai e a huti haere ai teie mau puai e rave rahi ia tatou, no ni‘a ihoa râ i teie tumu parau faufaa rahi no to tatou faaoraraa mure ore ? E hea i rotopu ia tatou e nehenehe e faaoroma‘i i te arepurepuraa manava e tae mai no te taa-ê-raa te mau umeraa pae faaroo o na metua ? E hea i rotopu ia tatou, i te matahiti ahuru ma maha e aore râ pae ahuru, e ma‘imi i roto ia tatou e e ma‘imi i roto i te papa‘iraa mo‘a te mau pahonoraa i ta te aposetolo Paulo i parau « te mau mea hohonu atoa a te Atua ra » (1 Korinetia 2:10)?

Auê ïa te faahiahia… i te mea ua fariu hohonu teie taata hu‘a i ni‘a i te mau papa‘iraa mo‘a e i te pure omo‘e, o teie paha na puna rahi e piti no te hi‘oraa pae varua e te haapapûraa pae varua e vai nei no te mau taata atoa. Papû roa e, ua umeume oia i te mau mana‘o eê, ua hinaaro roa râ oia ia rave i te mea maitai e ua hinaaro roa oia ia ite mai i te e‘a tano. Ua ti‘aturi oia, mai ia tatou ho‘i e ti‘a ia ti‘aturi, e roaa ia’na ia haapiihia e ia haamaitaihia no ni‘a maira, o tei tupu ho‘i.

E parau paha tatou e, eiaha e maere, e varua taa ê ihoa o Iosepha Semita, e e vairaa taa ê to’na. E aha ïa te parau no tatou, tatou te mea paari a‘e i teie nei—tei ma‘iri i te ahuru ma maha matahiti—e aita tatou i opuahia no te iriti i te hoê tau tuuraa no te evanelia ? E ti‘a atoa ia tatou ia rave i te faaotiraa e ia haamatara i te taa ore e ia haere na roto i te aroraa parau no te mau tumu parau e rave rahi e arepurepu nei i to tatou oraraa. Ua î teie nei ao i teie mau huru faaotiraa fifi, e te vai ra te taime a faaruru ai tatou i te reira, e hiti mai te mana‘o no to tatou matahiti paari e to tatou mau paruparu.

I te tahi taime e tae mai te mana‘o e, e mea haumani to tatou pae varua. E ia tae mai te mau mahana tamataraa rahi, e tae roa mai paha te mana‘o e, ua mo‘ehia tatou e te Atua, e ua vaiiho-otahi-noa-hia mai i roto i to tatou taa ore e ta tatou fifi. E ere râ i te mea ti‘a ia parau e, e mea tano te reira mana‘o no te mau taata paari i rotopu ia tatou nei eiaha râ no te feia apî e te feia nava‘i ore te ite. Ua ite e ua here te Atua ia tatou paatoa. Tatou paatoa nei, e mau tamahine e e mau tamaiti tatou na’na, e noa’tu te mau haapiiraa tei roaa mai i roto i te oraraa, e parau mau noa teie parau fafau : « Te ere ra râ te hoê o outou i te ite, e ani oia i te Atua ra, o tei horo‘a hua mai i te maitai i te taata’toa ra, ma te pato‘i ore ; e e horo‘ahia mai ta’na » (Iakobo 1:5).⁴

E tae mai te haapiiraa e te paari o te ao nei e o te mau mea pae tino atoa na roto i te tino tahuti ma te rave‘a tahuti e te rave‘a pae tino. E tape‘a tatou, e hi‘o tatou, e faaroo tatou e e tamata, e hau‘a e e haapii mai tatou. Teie râ, no te ite pae varua, mai ta Paulo i parau, e tae mai te reira ia tatou na roto i te rave‘a pae varua mai roto mai to’na puna pae varua. Te parau faahou nei Paulo :

« E ore râ te taata e haapa‘o i ta te tino ra, e farii mai i ta te Varua o te Atua ra ; e mea maamaa ïa ia’na, e ore ho‘i oia e ite i te reira, no te mea, i imihia te reira e te varua » (1 Korinetia 2:14).

Ua itehia mai ia tatou, e ua ite ho‘i tatou e, te rave‘a hoê noa no te farii i te ite pae varua, o te haafatataraa ïa i to tatou Metua i te Ao ra na roto i te Varua Maitai e te i‘oa o Iesu Mesia. Ia rave tatou i te reira, e ia vai ineine tatou i te pae varua, e ite tatou i te mau mea aita to tatou mata i ite na mua a‘e, e e faaroo tatou i te mau mea aita paha to tatou tari‘a i faaroo na mua a‘e—« o ta te Atua ïa i vaiiho », no te faahiti ia Paulo (1 Korinetia 2:9). Ua fariihia teie mau mea na roto i te Varua.

Te ti‘aturi nei tatou e te faaite papû nei ho‘i i to te ao e, te vai nei te paraparauraa i rotopu ia tatou e to tatou Metua i te ra‘i e te vai nei te arata‘iraa no ô mai i te Fatu ra. Te faaite papû nei tatou e, te paraparau nei te Atua i te taata mai ta’na i rave i te tau o te Faaora e i te tau o te Faufaa Tahito.⁵

E au e, te tuuhia nei te mana‘o i to tatou nei anotau e, e mea maamaa e aore râ e mea hinaaro-ore-hia e aore râ e mea maamaa e te hinaaro-ore-hia te pure paieti e te tura no te mea mo‘a. Teie noa râ, titauhia te pure no teie mau taata ti‘aturi ore « no te anotau apî ». Te mau taime ati mau, te hopoi‘a rahi, te ahoaho hohonu, te mauiui rahi—e riro teie mau tamataraa i te ueue ia tatou i ta tatou iho rava‘i tahito e te tereraa ohipa mâtau no te haamahuta mai i to tatou itoito tumu. Ia farii tatou i te reira, e riro ratou i te faahaehaa ia tatou, i te tamarû ia tatou e i te faafariu ia tatou i te pure faatura.

Ahani e, ua riro noa te pure ei auê iti rahi i te taime ati, ua riro noa’toa ïa te reira ei ohipa pipiri, e ua tae roa tatou i te mana‘oraa e, e tâmuta te Atua e aore râ e pu ohipa taviniraa no te tauturu mai i roto i te ohipa rû. E ti‘a roa paha ia tatou ia haamana‘o i tei Teitei Roa, i te ao e te pô—pauroa te taime—eiaha i te taime noa ua manuia ore te tahi mau tautururaa e tei roto tatou i te ati rahi mau. Ia hi‘o tatou i te mea i roto i te oraraa o te taata nei, tei papa‘ihia no to’na haamanuiaraa maere e te hoona rahi no te varua taata, o te paraparauraa ïa na roto i te pure, te faatura e te paieti i to tatou Metua i te Ao ra.

« E faaroo mai, e Iehova, i ta’u parau », te himene nei te Salamo.

« E faaroo mai i ta’u tiaororaa, e ta’u arii, e ta’u Atua ; te pure atu nei ho‘i au ia oe.

« Te ite maira oe, e Iehova, i ta’u reo i te po‘ipo‘i ; ei te po‘ipo‘i au e haere faaite atu ai, ma te [hi‘o i ni‘a] ia oe. » (Salamo 5:1–3).

Peneia‘e te mea i titauhia no teie nei ao, e no te mau mea atoa, o te « hi‘o ïa i ni‘a » mai ta te papa‘i Salamo i parau—te hi‘oraa i ni‘a i te taime oaoa e i te taime ati, i te tau auhune rahi e i te tau nava‘i ore. E ti‘a ia tatou ia hi‘o noa i ni‘a e ia fa‘i i te Atua ei taata horo‘a i te mau mea atoa e ei puna no to tatou faaoraraa …

Ua pu‘e noa te mau vahi i roto i to tatou sotaiete tei haamo‘e i te varua no te pure e te tura e te haamoriraa. I roto i te mau pŭpŭ taata e rave tahi, ua maramarama maitai te mau tane e te mau vahine, ua faahiahia e ua rahi te ite, te ere ra râ ratou i te hoê mea faufaa rahi no te hoê oraraa î maitai. Aita ratou e hi‘o nei i ni‘a. Aita ratou e pûpû nei i te mau tapuraa na roto i te parau ti‘a [hi‘o PH&PF 59:11]. E mea navenave maitai te parau, aita râ e parau mo‘a. E mea mona maitai te parau, aita râ e paari. I roto anei i te piha toro‘a, i roto i te piha tauiraa ahu e aore râ te piha ohipa tamatamataraa, ua tae roa te taata i te faito haehaa roa o te huru ti‘amâ e te itehia ra to ratou mana ta‘oti‘ahia, e ia tae ratou i reira, ua faainaina Atua atura ïa ratou i te mana ta‘oti‘a ore no ni‘a mai.

Te mea oto râ, te ite-atoa-hia nei teie tura-ore-raa i roto i te Ekalesia. Te vai nei te taime e paraparau puai roa tatou, e tomo tatou e e faaru‘e tatou i te mau pureraa ma te faatura ore, e hora pure ho‘i e te haamoriraa tâmâ taua hora ra. Te tura, o te mata‘i reva ïa i te ra‘i ra. Te pure, o te reo pii ïa o te varua i te Atua te Metua. E mea maitai ia riro rahi a‘e tatou mai to tatou Metua te huru na roto i te hi‘oraa i ni‘a, te hi‘oraa ia’na, na roto i te haamana‘o-noa-raa ia’na e na roto i te aupuru-rahi-raa i to’na ao e ta’na ohipa.⁶

Te faatupuraa i te puai pae varua e te faatu‘atiraa ia tatou i ni‘a i te faaûruraa teitei roa a‘e, e ere ïa i te hoê ohipa ohie. Titauhia te tahi taime, e pinepine atoa te reira i te faatae mai i te tahi tafifiraa. Eita te reira e tupu noa mai mai te reira te huru, e tupu mai râ na roto i te tautooraa o tei hinaaro mau e na roto i te piiraa i te Atua e te haapa‘oraa i ta’na mau faaueraa …

Ua horo‘a mai te peropheta Iosepha Semita… peneia‘e i te faahitiraa papû roa a‘e no ni‘a i te titauraa ia faarahi i te pae varua i roto i te tau e ma te faaoroma‘i, e tuhaa ho‘i ratou no teie faanahoraa, ia hi‘o tatou. Te na ô ra [oia] : « Te [mana‘o nei tatou e] ua hamani te Atua i te taata ma te mana‘o e nehenehe ia haapiihia, e te aravihi e nehenehe e faarahihia mai te au i te haapa‘oraa e te itoito o te horo‘ahia no te maramarama tei fariihia mai te ra‘i mai i te feruriraa o te taata ; e ia fatata’tu te taata i te maitai-roa-raa, e rahi atu â te maramarama o to’na mau hi‘oraa, e e rahi atu â to’na oaoa, e tae noa’tu ua upooti‘a oia i ni‘a i te mau ino no to’na oraraa e ua mo‘e ia’na te mau hinaaro atoa no te hara ; e mai te feia mo‘a i mutaa iho ra, e tae i taua vahi no te faaroo ra i reira oia e tapo‘ihia’i i roto i te mana e te hanahana o to’na Rahu Nui [Atua] ra, e e rave-ê-hia’tu no te parahi i piha‘i iho Ia’na. Te [mana‘o] nei râ tatou e teie te hoê faito eita roa e noaa i te taata i te hoê noa iho taime » [Te Mau Haapiiraa a te Mau Peresideni o te Ekalesia : Iosepha Semita (2007), 240]⁷

E ti‘a ia tatou ia rave i te tahi taime no te faaineine i to tatou mana‘o no te mau mea pae varua. Eita te tupuraa o to tatou aravihi pae varua e tae mai na roto i te horo‘araa i te tahi haamanaraa. Ia vai te hinaaro, te tautooraa e te faaineineraa o te taata iho e ti‘a ai. E titau ihoa ïa te reira… i te haapaeraa maa, te pure, te imiraa i roto i te mau papa‘iraa mo‘a, te ohipa e tupu, te feruri-noa-raa e te po‘iaraa e te poiharaa i te oraraa parau ti‘a.

No’u nei, e noaa mai te tauturu ia hi‘o-faahou-hia teie mau parau a‘o a te Atua Mana Hope :

« Mai te mea e ani mai outou, e farii mai ho‘i outou i te heheuraa na ni‘a i te heheuraa, te ite ho‘i na ni‘a i te ite, ia noaa ho‘i ia outou te ite i te mau parau aroa e te mau mea hau ho‘i—i te mea o te faatupu mai i te oaoa, i te mau mea o te faatupu mai i te ora mure ore » (PH&PF 42:61).

« A ani atu i te Metua i roto i to’u nei i‘oa, ma te faaroo e te ti‘aturi e e horo‘ahia mai, e e farii ïa orua i te Varua Maitai, o te faaite mai i te mau mea’toa o te au ia faaitehia i te tamarii a te taata nei » (PH&PF 18:18).

« Ia vai noa hoʻi te hanahanaraa e te hanohanoraa o te mure ore i ni‘a i to outou na mau feruriraa » (PH&PF 43:34).

« A haaputu noa… i roto i to outou mau feruriraa i te mau taime atoa ra te mau parau no te ora, e e horo‘ahia mai ïa ia outou na i te hora ti‘a mau ra te reira tufaa o te horo‘ahia’tu i te taata atoa » (PH&PF 84:85).

« A imi itoito noa, a pure noa i te mau taime atoa, e ia faaroo noa ho‘i, e e ohipa amui mai te mau mea atoa ei maitai no outou, mai te mea e haere ti‘a noa outou ma te haamana‘o ho‘i i te fafauraa ta outou i fafau atu te tahi i te tahi ra » (PH&PF 90:24).

« E horo‘a’tu te Atua ia outou te ite na roto i to’na Varua Mo‘a, oia ïa, na roto i te horo‘a-parau-ore-hia na te Varua Maitai » (PH&PF 121:26).

Teie te mau parau fafau ta te Fatu e rave papû mai mai te peu e faaineine tatou ia tatou iho.

A fataa i te tahi taime no te feruri noa e no te feruri maite e no te pure no ni‘a i te mau ohipa pae varua.⁸

Te tahi fifi no tatou a tutava ai tatou ia faarahi i te pae varua, o te mana‘o ïa ua rahi roa te ohipa e rave e eita e roaa ia rave. Tei mua roa te maitai-roa-raa ia tatou tata‘itahi ; teie nei râ, e nehenehe ta tatou ia faariro i to tatou puai ei faufaa, ma te haamata i te vahi tei reira tatou, e ma te imi atu ai i te oaoa e tae mai na roto i te tapaparaa i te mau mea a te Atua. E haamana‘o na tatou i te parau a te Fatu :

« No reira, eiaha e rohirohi i roto i te ohipa maitai, no te mea te haamau atu nei outou i te niu no te hoê ohipa rahi roa. E na roto i te mau mea iti nei e tupu mai ai tei rahi roa ra.

« Inaha, te titau nei te Fatu i te aau e te mana‘o anaanatae ; e e amu ho‘i te feia anaanatae e te feia haapa‘o maitai i te maa maitai no te fenua no Ziona i teie mau mahana hopea nei » (PH&PF 64:33–34).

E parau faaitoito mau no’u te parau a te Fatu e, « e amu ho‘i te feia anaanatae e te feia haapa‘o maitai i te maa maitai no te fenua no Ziona i teie mau mahana hopea nei ». E nehenehe ta tatou paatoa ia vai anaanatae e ia vai haapa‘o maitai. Ahani ua parau te Fatu e, na te taata maitai roa e amu i te maa maitai no te fenua no Ziona i te mau mahana hopea nei, ia mana‘o vau, ua haaparuparu a‘ena ïa tatou e ua faaru‘e roa …

Tei ô nei te vahi no te haamata. Tei teie nei te taime no te haamata. Ia riro te roaraa o to tatou taahiraa avae, maori râ, hoê taahiraa i te taime hoê. Na te Atua, tei « opua i to tatou oaoa », e arata‘i ia tatou mai te hoê tamariirii ra te huru, e na roto i te reira tatou e haafatata ai i te maitai-roa-raa.

Aita i ra‘ehia i te hoê a‘e o tatou te maitai-roa-raa e aore râ te vahi teitei roa‘e no te tupuraa pae varua e roaa i te tahuti nei. E nehenehe e e mea titauhia ho‘i i te mau taata atoa ia haere i mua i te pae varua. O te evanelia a Iesu Mesia te faanahoraa hanahana no te reira tupuraa pae varua mure ore. Ua hau atu te reira i te hoê noa buka ture no te ohipa ti‘a. Ua hau atu te reira i te hoê noa huru oraraa sotiare maitai. Ua hau atu te reira i te mana‘o au no ni‘a i te haamaitairaa ia’na iho e te faaotiraa. O te evanelia te mana faaora o te Fatu ra Iesu Mesia ma to’na autahu‘araa e ta’na faaamuraa e ma te Varua Maitai. Na roto i te faaroo i te Fatu ia Iesu Mesia e te haapa‘oraa i ta’na evanelia, te hoê taahiraa i te taime hoê no te haamaitai mai a haere ai tatou, ma te taparu i te puai, ma te haamaitai i to tatou huru e i to tatou hinaaro rahi, e manuïa tatou i roto i te nănă a te Tia‘i mamoe Maitai. E titau te reira i te haapa‘o e te haapiiraa e te ohipa e te puai. Tera râ, mai ta te aposetolo Paulo i parau ra, « E ti‘a ia’u te mau mea atoa nei i te Mesia, tei tauturu mai ia’u ra. » (Philipi 4:13).

Te parau fafau nei teie heheuraa no to tatou nei anotau : « A faatae atu i to oe ti‘aturiraa i te reira Varua o te faaarata‘i atu ia rave i te ohipa maitai—oia ïa, ia rave i te parau ti‘a, ia haere noa ma te haehaa, ia haavâ mai te parau ti‘a ra ; e o te reira ho‘i to’u Varua.

« Oia mau, oia mau, te parau atu nei au ia oe e, e tuu atu vau i ta to’u nei Varua ia oe na, o te haamaramarama mai i to oe feruriraa, o te faaî ho‘i i to oe aau ;

Ei reira oe e ite ai, e aore râ na roto i teie nei mea e ite ai oe, i te mau mea atoa ra ta oe e hinaaro ia’u nei, e tei riro ei mau tufaa no te mau mea parau ti‘a ra, na roto i te faaroo ia’u nei e roaa te reira ia oe na » (PH&PF 11:12–14).⁹

• A tai‘o i te tuhaa 1 ei reira e feruri ai i te tahi taime ua hinaaro outou i te tauturu o te ra‘i. Nahea te parau fafau no te tautururaa hanahana i te haamaitairaa i to outou oraraa i roto i te ati ?

• I roto i te tuhaa 2, e aha te mea ta tatou e nehenehe e apo mai i roto i te hi‘oraa a Iosepha Semita o te tauturu mai ia tatou a faaruru ai tatou i te taa ore ? Nahea tatou i te faatupu rahi a‘e i te ara-ohie-raa i te mau mea pae varua mai ia Iosepha ra te huru ?

• A feruri maite i te mau parau a te peresideni Hunter no ni‘a i te fariiraa i te ite pae varua (a hi‘o i te tuhaa 3). Nahea e ti‘a ai ia tatou ia faarahi i to tatou hinaaro e to tatou aravihi ia faarahi i te ite pae varua ? E aha te tahi mau rave‘a i tauturu ai te ite pae varua ia outou ?

• E aha te vahi atâta i roto i te hi‘oraa i te Atua ei « tâmuta… e aore râ [ei] pu ohipa taviniraa no te tauturu mai i roto i te ohipa rû » ? (A hi‘o i te tuhaa 4). Nahea te pure i te riroraa ei haamaitairaa no outou ?

• I roto i te tuhaa 5, ua haapii te peresideni Hunter ia tatou nahea i te faatupu i to tatou puai pae varua. No te aha ua titauhia te tahi tautooraa no te faatupu i te puai pae varua ? E aha te mea ta tatou e nehenehe e haapii mai i roto i te mau irava papa‘iraa mo‘a ta te peresideni Hunter e faahiti nei i roto i teie tuhaa ?

• A hi‘o faahou i te mau haapiiraa a te peresideni Hunter i roto i te tuhaa 6 no ni‘a i te tupuraa pae varua. Nahea te tupuraa pae varua i riro no outou ei hoê faanahoraa no te hoê taahiraa i muri mai i te tahi ? Nahea te mau haapiiraa a te peresideni Hunter i roto i teie tuhaa e nehenehe ai e tauturu ia outou i te taime a tae mai ai te mana‘o, eita e roaa ia rave ?

Salamo 25:5; Maseli 3:6; 2 Nephi 32:8–9; Alama 5:46; 34:17–27; 37:36–37; PH&PF 8:2–3; 88:63; 112:10; Iosepha Semita—Aamu 1:13–17

A ani i te mau melo o te piha haapiiraa ia imi na roto i te pene, ia itehia mai te tahi mau parau e aore râ te tahi mau ahee (paragraphe) faufaa rahi no ratou. A ani ia ratou ia faaite mai i te reira mau parau e mau ahee e ia faataa mai ratou i te faufaa o te reira.