Iosepha Semita, te peropheta no te Faaho‘i-faahou-raa mai

E rave rahi taime to te evanelia i horo‘ahia mai i to te ao na roto i te mau peropheta, e i te mau taime atoa, ua [mo‘e] te reira no te haapa‘o ore o te taata. I te matahiti 1820, ua mutu te muhu ore, e ua fâ faahou mai te Fatu i te hoê peropheta. Ua ti‘a i teie peropheta, o Iosepha Semita, ia faaite papû atu i tera ite au no’na iho, oia ho‘i, te ora nei te Atua, o Iesu te Mesia, te Tamaiti a te Atua, e Tino ho‘i tei ti‘a faahou mai, e tino taa ê e te faataa maitai i to te Metua. Aita oia i faaite papû no te hoê mea ta’na i ti‘aturi e aore râ, o ta’na e te tahi atu taata i mana‘o e i feruri, o te mea râ ta’na i ite. Ua roaa mai teie ite ia’na no te mea ua fâ tino mai te Atua te Metua e te Tamaiti ia’na e ua paraparau mai ia’na.⁴

Ua… fâ te Atua iho ia’na [ia Iosepha Semita] i roto i te tino. I muri iho, ua faaite roa te Metua e te Tamaiti i te parau mau eita e nehenehe e pato‘i, oia ho‘i, e tino taa ê e te faataa to raua. E oia mau, ua haapapû-faahou-hia te auraa i rotopu i te Metua e te Tamaiti na roto i teie parau hanahana i te tamaiti peropheta ra, « O Ta’u Tamaiti Here Teie. A Faaroo Ia’na ! » [Iosepha Semita—Aamu 1:17].⁵

I te faarooraa te taata i te tamaiti apî ra ia Iosepha Semita i te faaite-hua-raa ua fâ mai te Atua Iho i te hoê tamaroa, ua faaoo ratou ia’na e ua fariu ê atu ia’na, mai te huru atoa i te tau tahito ra no te keresetiano, ua fariu ê te mau taata paari e te aravihi no Ateno i tera taata iti e tavini ra i rotopu ia ratou. Teie râ te parau papû, o Paulo ana‘e, i tera ra tau i te matamua ra, i roto i tera oire rahi maramarama, tei ite e, e ti‘a i te hoê taata ia ratere na te pohe e ia ora. O oia ana‘e te taata i Ateno o te nehenehe e huti papû i te reni no te faataaraa i te oro‘a haamoriraa idolo e te haamoriraa o te aau i te Atua mau e te ora. [Hi‘o Te Ohipa 17:19–20, 22–23].⁶

Ratou tei pato‘i i te Faaora a haere mai ai oia i ni‘a i te fenua nei ma teie faaiteraa e, e Tamaiti oia na te Atua, ua parau ratou : « E ere anei teie i te tamaiti a te tamuta ra ? » (Mataio 13:55). I te faaiteraa Iosepha e, ua farii oia i te hoê orama e ua ite oia i te Metua e te Tamaiti, ua tae mai te uiuiraa i roto i te feruriraa e i ni‘a atoa i te utu o te mau taata na piha‘i iho, te mau orometua e te mau taata o te oire : « E ere anei i te tamaiti a te taata faaapu ra ? » Ua hamani-ino-hia te Mesia e ua haapohehia, ua faati‘amâ râ te tau ia’na. Te ohipa i ravehia i ni‘a i te tamaiti a te tamuta ra, ua rave-atoa-hia ïa i ni‘a i te tamaiti a te taata faaapu ra.⁷

E ere Iosepha Semita i te hoê noa taata rahi, e tavini faaûru râ na te Fatu, e peropheta na te Atua. To’na rahi, tei roto ïa i te hoê mea—te parau mau o ta’na faahitiraa e, ua ite mata oia i te Metua e te Tamaiti ua haapa‘o oia i te papûraa o teie heheuraa hanahana …

Te faaite papû nei au e… ua fâ mau te Metua e te Tamaiti i te peropheta Iosepha Semita no te haamata i teie ohuraa hanahana i mua o teie ohipa no te mau mahana hopea nei i to tatou nei anotau.

Te faaite papû nei au e, ua riro teie tamaiti peropheta ra ei semeio tumu mau… i roto i te aamu o teie ekalesia, e ua rahi ho‘i te tumu no te reira, e ua riro ho‘i oia ei faaiteraa ora e, i roto i te rima o te Atua e i raro a‘e i te faatereraa a te Faaora o te ao, e ti‘a i te mau mea paruparu e te ite ore ia vavahi i te mau mea puai e te itoito.⁸

I te ono no eperera 1830… no te haapa‘o i te faaueraa a te Atua, ua haaputuputu te hoê pŭpŭ tane e vahine i roto i te fare o Peter Whitmer [te metua] no te faanaho i Te Ekalesia a Iesu Mesia i te Feia Mo‘a i te Mau Mahana Hopea Nei … Aita hoê o ratou i tuôro i to’na ite taa ê e aore râ i te tahi ti‘araa faatere faahiahia. E mau taata maitai e e mau tino huiraatira au, aita râ ratou i mâtauhia i te tahi atu mau taata maori râ te mau taata e ora ra na piha‘i iho noa mai ia ratou …

Ua haaputuputu teie mau tane iti haehaa no te hoê o ratou, o Iosepha Semita tamaiti, e taure‘are‘a apî roa, tei faaite i te hoê parau faahiahia. Ua parau oia ia ratou e i te tahi atoa mau pu‘eraa tei faaroo mai e, ua farii oia i te mau farereiraa e to te ra‘i, e mau farereiraa hohonu e te pinepine, e na reira atoa te hoê orama no te Atua te Metua e no ta’na Tamaiti Here, o Iesu Mesia. Ei faahopearaa no teie mau heheuraa, teie ua matara mai te Buka a Mormona, e papaa parau no te ohipa a te Mesia e te mau taata i Amerika i tahito ra. I muri iho, ua faaue te Fatu i teie taure‘are‘a apî nei, e piti ahuru ma maha matahiti i tera taime, ia faati‘a faahou i te Ekalesia tei vai na i te tau no te Faufaa Apî e ia faaho‘i-faahou-hia to te reira anaana e ia topahia to te reira i‘oa te i‘oa o te ofa‘i tihi rahi e te upoo mure ore ho‘i, te i‘oa iho o te Fatu, Iesu Mesia.

E no reira, ma te haehaa e te faufaa rahi hope, ua iritihia te tuhaa matamua no teie aamu rahi o te Ekalesia, o te riro i te faataui eiaha i tera u‘i taata noa, te taatoaraa râ o te utuafare taata … Parau mau, e haamataraa haehaa, teie râ, e riro te tuôroraa e, ua paraparau mai te Atua, ua faanaho-faahou-hia mai te Ekalesia a te Mesia e ua haapapû-faahou-hia mai ta’na mau haapiiraa tumu, ei faahitiraa faahiahia hope i mua i to te ao mai te mahana mai â a taahi ai te avae o te Faaora iho i te mau puromu no Iudea e te mau aivi no Galilea.⁹

Te hoê pae o te heheuraa hanahana [ta Iosepha Semita i farii], o te mau arata‘iraa ïa no te faati‘a-faahou-raa i te Ekalesia mau e te ora, tei faaho‘i-faahou-hia mai i roto i teie anotau mai te tau no te taviniraa a te Faaora i te tahuti nei. Ua parau te peropheta Iosepha Semita no ni‘a i te Ekalesia a Iesu Mesia, « ua faanahonahohia mai te au i te mau faaueraa e te mau heheuraa Ta’na i horo‘a mai ia matou i teie nei mau mahana hopea, mai te au atoa i te faanahoraa o te Ekalesia tei papa‘ihia i roto i te Faufaa Apî » [Te Mau Haapiiraa a te Mau Peresideni o te Ekalesia: Iosepha Semita (2007), 158] …

… Te feia tei bapetizohia i roto i te Ekalesia i te ono no eperera 1830, e feia ïa tei ti‘aturi i te vairaa o te hoê Atua e tino to’na ; ua ti‘aturi ratou e, ua riro te papûraa no to’na vairaa e te papûraa no te vairaa o ta’na Tamaiti Iesu Mesia, ei niu mure ore i ni‘a i te reira teie ekalesia i te paturaahia.¹⁰

Na roto ia [Iosepha Semita] e te mau ohipa i tupu i muri iho, ua faaho‘i-faahou-hia mai te autahu‘araa e te evanelia i to ratou îraa i ni‘a i te fenua nei, e eita roa’tu te reira e iriti-faahou-hia’tu [hi‘o PH&PF 65:2]. Ua faati‘a-faahou-hia e ua opuahia te Ekalesia a te Mesia, te basileia o te Atua i ni‘a i te fenua nei, ia tere atu no te faaî i te ao taatoa nei [hi‘o Daniela 2:35].¹¹

Ua riro te taeraa mai o te peropheta Iosepha i roto i teie nei ao ei tupuraa no te parau tohu a Iosepha tei hoohia i Aiphiti, e rave rahi tenetere na mua mai :

« E faatupu te Fatu, to’u Atua, i te hoê hi‘o, e e riro oia ei hi‘o maitai no te huaai o to’u ra taaupu … E ma‘irihia oia i to’u nei i‘oa, e i te i‘oa atoa ho‘i o to’na ra metua » (2 Nephi 3:6, 15).

Ua topahia te i‘oa o Iosepha Semita tamaiti i te i‘oa o Iosepha i tahito ra tei hoohia i Aiphiti, o te i‘oa atoa o to’na metua tane, Iosepha Semita metua, e no reira ua tupu te tohuraa. O te peropheta Iosepha Semita oia e te piihia ra oia o « Iosepha te hi‘o ». Pinepine oia i te piihia « te peropheta, te hi‘o e te heheu parau ».

Pinepine teie nau parau « peropheta », « hi‘o » e « heheu parau » i te faaohipa-haere-hia ma te taui haere atoa ho‘i ia ratou, e te vai ra e rave rahi te mana‘o nei e, hoê â mea e hoê â huru. Tera râ, e ere ratou i te hoê â mea, e e auraa taa ê e te papû to teie mau parau.

Te parau nei [Elder] John A. Widtsoe i te hoê peropheta ei orometua haapii—te taata e vauvau i te parau mau. E haapii oia i te parau mau mai tei heheuhia mai e te Fatu i te taata nei, e na roto i te faaûruraa e tatara mai oia i to te reira auraa i te maramarama o te taata. Pinepine te parau « peropheta » i te faaohipahia no te faaite i te hoê taata e farii nei i te heheuraa e te arata‘iraa a te Fatu. E rave rahi taata tei mana‘o noa na e, te peropheta, e taata tohu atea noa ïa i te mau ohipa e tupu ananahi, o te hoê noa râ te reira o te mau ohipa a te hoê peropheta. Ua riro oia ei auvaha parau na te Fatu.

Te hi‘o, o te hoê ïa taata e ite mata nei. Te auraa ra, e ere roa’tu ïa te ite ra oia i to’na mata tahuti, i to’na mata varua râ. Te horo‘a no te hi‘o, o te hoê horo‘a ïa i ni‘a’tu i te natura. Mai te huru o Iosepha mai ia Mose ra, te hi‘o i tahito ra, e ua ite Mose i te Atua mata e mata, teie râ ta’na faataaraa no to’na hi‘oraa ia’na iho, ia au i ta’na iho mau parau :

« I teie nei râ ua ite to’u iho nei mata i te Atua ; eiaha râ i to te pae tino, o to’u râ mata pae tino nei ia hi‘o ia’na, o te oriorio ho‘i au e a pohe atu ai i mua ia’na ; tei ni‘a iho râ ia’u to’na hanahana ; e ua ite au i to’na mata, no te mea ua faahuru-ê-hia vau i mua ia’na ra » (Mose 1:11).

Eiaha tatou e mana‘o e, te iteraa e te mata varua e ere ïa i te ite-mau-raa. E ere tera huru iteraa i te hoê mana‘o noa mai te reira e aore râ te tahi feruriraa no’na. Te ite-papû-hia nei te reira, e ere râ i te mata tahuti. E mata varua to tatou tata‘itahi ei tu‘ati i to tatou nei mata tahuti. Ua hamani-na-mua-hia tatou ei varua e i muri iho to tatou tino i te hamaniraahia no te tapo‘i i to tatou varua. Ua parauhia mai tatou e, i roto i to tatou ai‘a matamua ua haere tatou ma te hi‘o te mata. E mea na roto ïa i te hi‘oraa to tatou mata varua inaha aita â to tatou tino e to tatou mata tahuti i tera taime. E mata varua to te taata atoa aita râ to tatou haamaitairaa tamau no te faaohipa i te reira maori râ e faahuru ê mai te Varua o te Fatu ia tatou …

Na roto i te mana o te Varua Maitai, e ti‘a i te tahi mau taata, tei tonohia mai i ni‘a i te fenua nei, ia hi‘o e ia ite i te mau mea e au i te Atua. Te hi‘o, e taata ïa e hi‘o i to’na mata e e ite ho‘i i te mau mea i tahito ra, e te mau mea e tupu mai, e na roto i te reira te mau mea atoa e heheuhia mai (hi‘o Mosia 8:15–17). No te haapoto noa, e taata o te ite mata, o te haere na roto i te maramarama o te Fatu e to’na mata varua araara maitai e o tei faahuru-ê-hia e te Mana o te Varua Maitai. Ua riro Mose, Samuela, Isaia, Ezekiela, e te vai atura, ei mau hi‘o, inaha, ua haamaitaihia ratou ia hi‘o tapiri i te hanahana o te Atua e ia roaa mai te tahi mana, rahi atu i te hoê taata tahuti.

E faaite te hoê heheuraa i te hoê mea ite-ore-hia e aore râ te tahi mea ta te taata i ite na mua a‘e e o tei mo‘e i to’na meharo. E parau noa te heheuraa i te parau mau e e tae noa mai ho‘i e te tahi titiro haamanaraa na te Atua. Ua rau te rave‘a e fariihia nei te heheuraa, teie râ, e titau tamau noa te reira i te heheu parau ia ora e ia haapa‘o ia’na iho no te faatu‘ati noa i ni‘a i te varua hanahana no te heheuraa, te varua parau mau, e na reira e roaa ai ia’na ia farii i te mau poro‘i hanahana.

Ei pu‘ohuraa, e ti‘a ia parau e, te hoê peropheta, o te hoê ïa orometua no te parau mau hanahana, te hoê hi‘o ia au i te mau tatararaa atoa o teie parau. Ua faahuru-ê-hia te aravihi no te ara-ohie-raa pae varua o te mata o [Iosepha Semita] i te hoê faito faahiahia e ua haavaruahia e te Varua Maitai. E mea na roto i teie horo‘a oia i te iteraa i te Metua e te Tamaiti a haere ai oia e pure i roto i te uru raau. Ia tuatapapa tatou i to’na oraraa e ta’na mau ohipa mai tera ra taime, e ite tatou e, aita oia i tamatamata i te rave na ni‘a i to’na noa ihoa mana. Ua turu‘i oia i ni‘a i te Fatu e na reira, ua farii oia i ta’na tauturu e ua horo‘ahia mai te arata‘iraa. Na te heheuraa i arata‘i i to’na oraraa.¹²

Ia himene tatou no Iosepha Semita, te himene « Auê te Taata i Parau ia Iehova » (Te mau himene, 1985, n°16), e haamana‘o tatou e rave rahi roa mau mea parau ti‘a no ni‘a ia’na.

Te arue nei tatou ia’na no to’na aravihi eiaha no te parau noa ia Iehova, no te parau atoa râ i te tahi atu mau ve‘a no te ra‘i mai. E rave rahi roa ho‘i tei farerei mai ia’na, tei horo‘a i te mau taviri e tei haapiipii i teie « hi‘o maitai » tei faatupuhia mai i roto i teie mau mahana hopea nei (2 Nephi 3:6–7). I te haamaitairaa te papa Semita ia Iosepha tamaiti i te matahiti 1834, ua faahiti oia i teie parau e, ua ite Iosepha i Aiphiti i teie hi‘o no te mau mahana hopea nei. E ua ta‘i Iosepha i tahito ra a ite ai oia i te ohipa a te peropheta Iosepha, o te riro i te haamaitai i to’na huaai e rave rahi.

Te arue atoa nei tatou ia Iosepha Semita no to’na itoito e to’na aravihi i roto i te iritiraa e te fariiraa e hanere e hanere api heheuraa. Ua riro oia ei rave‘a faataheraa no te heheuraa. Na roto ia’na, ia tai‘ohia, ua hau atu te mau api papa‘iraa mo‘a faahiahia tei fariihia i te tahi noa’tu taata i roto i te tuaai o te ao.

Te arue nei tatou ia Iosepha eiaha no to’na noa aravihi ia faaoroma‘i, no to’na atoa râ aravihi ia « faaoroma‘i maite » (PH&PF 121:8). Ei tamarii noa, e tapu mauiui mau tei ravehia i ni‘a i to’na avae—e ahani aita, eita ïa e ti‘a ia’na ia haere i tera taahiraa rave ‘atâ a te puhaparaa no Ziona mai Ohio haere ti‘a’tu i Missouri. I te roaraa o tera taahiraa, « ua haere avae oia i te rahiraa o te taime e ua farii atoa oia i te hoê tuhaa rahi mau no te mauiui, te oru e te putoto o to’na na avae » [Te Mau Haapiiraa a te Mau Peresideni o te Ekalesia : Iosepha Semita, 328]. E oia atoa, te arue nei tatou ia’na e ia Emma i te faaoroma‘iraa i te mo‘eraa heva rahi no e ono o ta raua mau tamarii ta raua i fanau e aore râ i faaamu e o tei pohe i to ratou apîraa. E taa ihoa i te mau metua tei mo‘e hoê a‘e tamarii e, e mea aroha roa.

Te arue nei tatou ia Iosepha no to’na aravihi ia faaoroma‘i i te hamani-ino-raa, mai te mauraa maoro e te atâta i roto i te fare tape‘araa no Liberty. E rave rahi ho‘i i tera ra taime tei mana‘o e, aita faahou e rave‘a. Ua haapapû faahou mai râ te Fatu ia Iosepha tei mau i te auri e, « e uiui mai to te mau hopea no te ao nei i to oe i‘oa » (PH&PF 122:1). Te ora nei tatou i roto i te hoê pu‘e tau i reira te uiuiraa rahi no ni‘a ia Iosepha Semita e te evanelia tei faaho‘i-faahou-hia mai.

E ua oti roa ïa ta Iosepha faaotiraa i to’na hiaai e « haavâhia… ei feia parau ti‘a mai » i to tahito ra [Te Mau Haapiiraa a te Mau Peresideni o te Ekalesia : Iosepha Semita, 263]. E nehenehe ia tatou ia himene i teie nei nahea Iosepha i te « faakoronaraa i rotopu i te mau peropheta no tahito ra » (Hymns, 1985, n° 27).

Te arue nei tatou ia Iosepha no to’na faaoroma‘iraa i te haavare maramara e te tamau, na reira atoa te ‘aupariraa. E no reira, ua haere oia i Carthage « mai te pinia mamoe ra i te taparahiraa », ma te « vai hau noa… mai te po‘ipo‘i tau mahanahana » e « ma te ore i faaino atu… i te taata atoa nei » (PH&PF 135:4). Aita oia i haere i Carthage ma te maramara. Aita oia i haere i Carthage ma te amuamu. Auê ia aravihi faahiahia no te faaoroma‘i maite !

Ua ite Iosepha o vai te fariu ti‘a’tu. Tei ni‘a i te Faaora Iesu Mesia, o ta’na i faaroo mai tera taime mai â a a‘o ai to tatou Metua i te Ao ra i te tamaiti apî ra ia Iosepha, i te na ôraa e,« O Ta’u Tamaiti Here Teie. A Faaroo Ia’na ! » [Iosepha Semita—Aamu 1:17].¹³

Ua mauruuru roa vau i teie taata, no ta’na mau haapiiraa, no ta’na mau heheuraa, no te mea ta’na i vaiiho ia tatou nei, inaha e mea na roto ia’na te evanelia i faaho‘i-faahou-hia mai ai i ni‘a i te fenua nei. I to’u nei mana‘o, aita e aamu nehenehe a‘e i roto i te tuaai mai teie aamu ohie e te au no teie taata hu‘a tei haere i roto i te uru raau i piha‘i iho i to’na fare, e ua tuturi i roto i te pure e ua farii i na taata no te ra‘i mai.

I teie nei te hi‘o nei tatou i roto i to’na oraraa e i roto i ta’na mau ohipa. E rave rahi tei paheru no te ite mai i te mau parau ‘aro i muri mai i te mau parau i papa‘ihia, aita râ e parau ‘aro … E faaroo ohie noa, te faaroo o te hoê tamaroa apî tei riro i te haapiipiihia i te mau mea e au i te Atua. E a tere noa ai te mau mahana, ua riro mai teie taure‘are‘a, aita ho‘i e parau tu‘ite haapiiraa e aita ho‘i i haere i te haapiiraa, ei taata haapiihia e te Fatu i te mau mea e tae mai.

I teie nei ua horo‘ahia mai ia tatou te maramarama e te feruriraa. Titau-noa-hia ia tatou ia haapiipii i te reira e ia aupuru ho‘i mai ta te Fatu i arata‘i ia Iosepha, e ia roaa ia tatou te faaroo ohie mai to’na te huru e ia vai to tatou hinaaro ia pee i te mau arata‘iraa ohie. I te taime e na reira ai tatou ma te pee i te e‘a ua hinaaro [te Fatu] ia tatou ia pee e ia haapii mai tatou i te mau haapiiraa Ta’na i hinaaro ia tatou ia haapii mai, e ite mai tatou e, ua taheehia to tatou oraraa i te mau mea atoa e pato‘i nei i te mau opuaraa a te Atua, mai ia Iosepha atoa te huru. Ua haere fatata roa mai oia i te maitai-roa-raa inaha ua tamâ oia i to’na varua e to’na feruriraa e ua ora haafatata oia i te Fatu e ua ti‘a ia’na ia paraparau Ia’na e ia faaroo Ia’na ia parau mai i te mau mea o ta Iosepha i vaiiho mai ia tatou na roto i ta’na mau heheuraa. Na roto i to’na mata varua ua ti‘a ia’na ia ite i te mau mea tei ma‘iri e te mau mea i mua ia tatou, e ua roaa ia tatou te mau faaiteraa no te parau mau o te mau mea ta’na i ite …

Ua mauruuru vau no to’u ti‘araa ei melo no teie Ekalesia, e ua mau to’u iteraa papû no te hanahana o te reira i ni‘a i te hinere no te aamu ohie no teie taata hu‘a i raro a‘e i te marumaru o te mau tumu raau i te tuturiraa e i te fariiraa i na taata no te ra‘i mai—eiaha hoê noa iho Atua, e piti râ tino taa ê, te Metua e te Tamaiti, tei faaite faahou mai na taata no te Atuaraa. Ua mau to’u faaroo e to’u iteraa papû i ni‘a i te hinere no teie aamu ohie, inaha ho‘i, mai te peu e ere i te parau mau, ua hope atoa ïa te parau o te momoni. Mai te peu e parau mau—e te horo‘a atu nei au i to’u iteraa papû no te reira—ua riro ïa te reira ei hoê o te mau ohipa rahi roa a‘e i roto i te tuaai atoa.

O ta’u nei pure e, a faahanahana ai tatou i te parau o teie peropheta rahi e a feruri ai tatou i to’na oraraa, ia roaa to tatou mauruuru i to tatou nei aau no te mau mea tei tae mai i roto i to tatou nei oraraa na roto i to’na ti‘araa ei hi‘o e na roto i ta’na heheuraa ia tatou—o te hi‘o maitai, tei faatupuhia e te Fatu no te arata‘i ia tatou i roto i teie mau mahana hopea nei, ia ho‘i to tatou avae i ni‘a i tera mau e‘a e arata‘i ia tatou i te faateiteiraa e te ora mure ore.¹⁴

• A feruri maite i te mau parau a te peresideni Hunter no ni‘a i te Orama Matamua a Iosepha Semita (a hi‘o i te tuhaa 1). Nahea to outou iteraa papû no ni‘a i te Orama Matamua i te faaûruraa ia outou ? No te aha e mea faufaa hope roa no te Feia Mo‘a i te mau Mahana Hopea Nei ia roaa te iteraa papû e, ua riro Iosepha Semita ei peropheta na te Atua.

• E aha te mana‘o e tae mai i roto ia outou a tai‘o ai outou i te mau haapiiraa a te peresideni Hunter no ni‘a i te faanahoraahia te Ekalesia ? (A hi‘o i te tuhaa 2). E aha te mau haamaitairaa tei tae mai i ni‘a ia outou e to outou utuafare na roto i teie Ekalesia a Iesu Mesia tei faaho‘i-faahou-hia mai ?

• No te aha e mea au ia maramarama i te auraa o na ti‘araa peropheta, hi‘o, e heheu parau ? (A hi‘o i te tuhaa 3). Nahea outou i te haamaitairaahia e te mau peropheta e te mau hi‘o e te mau heheu parau ?

• I roto i te tuhaa 4, te faataa nei te peresideni Hunter i te tahi tumu tatou e arue nei ia Iosepha Semita. Nahea teie mau haapiiraa i te faarahi i to outou mauruuru i te peropheta ra Iosepha ? » E aha te haapiiraa ta outou e nehenehe e apo mai mai roto mai i te hi‘oraa o Iosepha Semita ?

• A hi‘o faahou i te mau haapiiraa a te peresideni Hunter no ni‘a i to Iosepha Semita faaroo, haapiiraa pae varua e haapa‘o (a hi‘o i te tuhaa 5). Nahea teie mau haapiiraa e tano i ni‘a ia tatou ? Nahea tatou i te faaite i to tatou mauruuru i te mau haamaitairaa tei tae mai ia tatou nei na roto i te peropheta Iosepha Semita ?

Iritiraa a Iosepha Semita, Genese 50:25–33; Daniela 2:44; Ephesia 2:19–22; 4:11–14; PH&PF 1:17–32; 5:9–10; 122:1–2; 135; Iosepha Semita—Aamu

« A ite ai oe i te oaoa o te tae mai na roto i to oe maramaramaraa i te evanelia, e mea papû e e hinaaro oe i te faaohipa i te mea o ta oe i haapii. A faaitoito i te oraraa mai te au i to oe ite. Ia na reira oe, e puai to oe faaroo, to oe ite, e to oe iteraa papû » (Ia Poro Haere i Ta‘u nei Evanelia [2004], 21).