Te Haapiiraa na roto i te Faaroo

I roto i teie faanahoraa no te haapa‘oraa faaroo ta outou e ta’u i farii te vai ra te tahi mea faahiahia e te hanahana, e te tahi mea apî no te haapii mai i te mau mahana atoa, te tahi mea faufaa rahi roa. E ere te reira i te hoê noa haamaitairaa no tatou e mea titauhia râ e, ia farii tatou i teie mau mea e ia haaputuputu i teie mau mana‘o apî.⁷

Te fâ rahi o te Haapa‘oraa Momoni, o te haamaitairaa ïa i te pae feruriraa, i te pae tino, i te pae morare e i te pae varua. Eita te hoê noa afa haapiiraa e nava‘i no te Feia Mo‘a i te mau Mahana Hopea nei.⁸

E mea maitai ia ora maoro i ni‘a i te fenua nei e ia noaa te aravihi e te ite e titauhia : no te mea ua parau te Fatu ia tatou e, te mau parau tumu no te ite o te noaa mai ia tatou i roto i teie oraraa nei e ti‘a ïa te reira e o tatou atoa i roto i te ti‘a-faahou-raa, e mai te mea e hau a‘e to te hoê taata noaaraa i te ite e i te maramarama i roto i teie oraraa nei e maitai a‘e oia i roto i te ao e tae mai ra [a hi‘o PH&PF 130:18–19].⁹

Te vai nei te tahi mau taata o te ore e haapii nei, e o te ore e haere vitiviti nei i mua mai te au i to ratou puai, no te mea aita to ratou mau mata e to ratou mau aau i ni‘a i te Atua ; aore roa ratou e faaite nei, aore atoa ho‘i ratou i farii i taua ite ra o ta ratou ho‘i e nehenehe e farii ; te ere rahi nei ratou i te mau mea tei nehenehe ia ratou i te farii. E ti‘a ia tatou ia noaa te ite hou a noaa’i te oaoa mure ore ; e ti‘a ia tatou ia ite maitai i te mau mea a te Atua.

Noa’tu i teie nei te haapa‘o ore nei paha tatou i te haamaitai a‘e â i to tatou taime, i te faananea i to tatou mau aravihi i te pae feruriraa, e titauhia râ tatou ia tae i te tahi taime ia haamaitai i te reira. E rave rahi te ohipa ta tatou e ti‘a ia rave, e ia ore tatou e haapii i teie mahana, e rave rahi ïa te mau mea ta tatou e ti‘a ia haapii ananahi.¹⁰

E ti‘a ia faaohipahia te feruriraa, ia faa‘u‘anahia taua mau taleni ra ta te Atua i horo‘a mai ia tatou ; ia faaohipahia te reira e ti‘a’i. I reira, ma te turamahia e te horo‘araa e te mana o te Varua Maitai, e noaa mai ïa ia tatou taua mau mana‘o ra e taua maramarama ra e taua mau haamaitairaa ra tei titauhia no te faaineine ia tatou no te tau i mua, no te mau mea e tupu mai.

E faaohipa-atoa-hia teie tumu parau i roto i ta tatou mau ohipa atoa e tu‘ati atu i te mau mea a te Atua. E ti‘a ia tatou ia haapuai ia tatou iho … E mea faufaa ore ïa ia faaea-ohipa-ore noa tatou ; mai te mea e faaea noa tatou, aore ïa e ohipa e oti i te ravehia. Te mau parau tumu atoa o te heheuhia mai te ra‘i mai, no to tatou ïa maitai, no to tatou ïa oraraa, no to tatou ïa faaoraraa e no to tatou ïa oaoa.¹¹

Te mana‘o nei paha tatou e e ere i te mea titauhia ia faaitoito tatou ia tatou iho i te imi eaha râ ta te Atua e titau nei ia tatou ; oia ho‘i, ia ma‘imi i te mau parau tumu ta te Atua i heheu mai, i ni‘a ho‘i i te reira mau parau tumu e nehenehe ai ia tatou ia farii i te mau haamaitairaa faufaa rahi. Te vai nei te mau parau tumu tei heheuhia ma te papû e te maramarama maitai, tei faataahia no te faateitei i te Feia Mo‘a i te mau Mahana Hopea nei e no te paruru ia ratou i te pe‘ape‘a e te hamani-ino-raa rahi, e no to tatou oreraa e tape‘a maite i ta tatou tufaa no te haapiiraa e no te haapa‘oraa i te reira, i ere ai tatou i te farii i te mau haamaitairaa tei tu‘atihia’tu i ni‘a i te haapa‘oraa i te reira.¹²

Te mau taea‘e e te mau tuahine, e tamau noa â tatou i te rave i te ohipa i roto i te i‘oa o te Fatu to tatou Atua ; te haaputuputuraa i te paari e te maramarama i te mau mahana atoa, e te mau mea atoa e tupu mai e horo‘a mai ïa i te maitai ia tatou e e faarahi ïa i to tatou faaroo e to tatou maramarama.¹³ [A hi‘o i te mana‘o tauturu 2 i te api 49.]

Te vai nei te hoê huru haapiiraa e ti‘a ia tatou paatoa ia haapa‘o maitai roa, e e ti‘a ho‘i i te taatoaraa ia tomo atu—o te haapiiraa ïa o te Varua.¹⁴

Te hoê iteraa varua iti o te hoê ïa ohipa tei hau atu i te faahiahia i te mau mana‘o e te mau iteraa noa, aore râ te mau mărôraa fifi ; e mea faufaa rahi roa e e mea tau‘a-rahi-roa-hia te hoê iteraa varua iti.¹⁵

Eita e ti‘a ia tatou ia tau‘a ore i te haamaitai i to tatou oraraa varua a imi ai tatou i te tao‘a no te ao nei. E hopoi‘a na tatou ia rave i te mau tutavaraa atoa no te faahaere ia tatou iho i mua i roto i te mau parau tumu no te maramarama e te ite, e no te faarahi atoa na piha‘iho ia tatou i te mau haamaitairaa e te mau mea maitai pae tino no teie oraraa nei.¹⁶

Mai te mea e haapa‘o noa tatou i te hoê noa pae, ma te haapa‘o rahi i te titauraa i te mau mea no te fenua nei, e ia tau‘a ore i te maitai pae varua, e ere ïa tatou i te mau taata tiaau paari.¹⁷ [A hi‘o i te mana‘o tauturu 3 i te api 49.]

Ua faaroo outou i te [tahi mau parau tumu] e rave rahi paha hanere taime, e e au ra e ti‘a i teie nei mau mea ia haapii faahou e faahouhia ia tatou. Oia’toa, o te tahi mea o ta’u i ite i roto i te tai‘oraa i te Buka no Te Parau Haapiiraa e te mau Parau Fafau. I te mau taime atoa e tai‘o vau i te hoê heheuraa i roto i taua buka ra e noaa ïa ia’u te tahi mana‘o apî, noa’tu e ua tai‘o vau i taua iho heheuraa ra e rave rahi mau taime. Te mana‘o nei au e mai te reira atoa te ohipa ta outou i ite ; mai te mea e eita, e mea taa ê roa ïa te reira i to’u nei.¹⁸

E au ïa tatou mai te tamarii e haapii ra i te piapa. E parau te orometua haapii i te tamarii, « Teie te reta a ; e tamata anei oe i te haamana‘o i te reira ? » E pahono mai te tamarii, « E, e tamata ïa vau i te haamana‘o i te reira ». E haere atu te orometua haapii i te reta i muri mai, ma te parau e, « Teie reta o te b; ïa e hi‘o anei oe i te reira ma te tamata i te haamana‘o i te reira ? » « E », parau mai ra te tamarii. I reira e ho‘i atu te orometua haapii i te reta a. « Eaha teie reta ? » Ua mo‘ehia te reira i te tamarii. E parau faahou â te orometua haapii i te tamarii e a, te reira e e ho‘i atu oia i te reta b, e e ite oia e ua mo‘e-atoa-hia te reira i te tamarii, e e ti‘a ïa ia’na ia haapii faahou i te reta b. E taime po‘ipo‘i ïa teie. I te taime avatea e pii e e ui-faahou-hia te tamarii, e e ite faahou â te orometua haapii e ua mo‘ehia te mau reta i te tamarii e e ti‘a ia’na ia haapii faahou. E no reira e ti‘a ia na ni‘a-noa-hia te haapiiraa, e tae roa ïa e ahani e aita to te orometua haapii e iteraa eaha ra ïa te tupu mai, e mea papû roa ïa e e paruparu to’na mana‘o. Mai te reira atoa ïa te Feia Mo‘a i te mau Mahana Hopea nei. Noa’tu e rohirohi paha tatou i te faaroo-faahou-noa-raa i te mau mea, e mea ti‘a ïa ia na reirahia ia nehenehe ho‘i ia tatou ia haapii papû mai i te reira. E ti‘a ia tatou ia haapii mai i te reira. Ua ite au e e haapii mai te Feia Mo‘a i te mau Mahana Hopea nei i te pae hopea i te taatoaraa o te mau ture e te mau faaueraa a te Atua, e i te haapa‘o maitai i te reira. Aita râ tatou i tapae atura i taua vahi ra.¹⁹ [A hi‘o i te mana‘o tauturu 4 i te api 49.]

Ia ti‘a ana‘e mai te [hoê orometua haapii] i mua i te taata e ti‘a ïa ia’na ia na reira ma te ite e te ti‘a nei oia i mua ia ratou ma te opuaraa ia faaite i te ite, ia nehenehe ia ratou ia farii i te parau mau i roto i to ratou mau varua e ia faati‘ahia ratou i roto i te parau-ti‘a na roto i te fariiraa i te tahi atu â maramarama, ma te haereraa i mua i roto i ta ratou haapiiraa i te mau parau tumu no te mo‘araa.

Eita teie ohipa e nehenehe e tupu, maori râ na roto i te faaohiparaa i te feruriraa, na roto i te hoê faaroo puai e na roto i te imiraa ma to’na aau atoa i te Varua o te Fatu to tatou Atua. Mai te reira atoa i te feia e faaroo nei ; ia ore ana‘e e haapa‘o-taa-ê-hia te mau mea ta te feia a‘o e titau i tera taime e tera taime i te nunaa mai teie atu purupiti, e ia ore ana‘e te mau taata e haa i roto i to ratou feruriraa ma to ratou mana‘o atoa e ma to ratou puai atoa i roto i ta ratou mau pure i mua i te Fatu, eita ïa ratou e farii i taua maitai ra e e fana‘o no ratou iho i te mea tei ti‘a ho‘i ia ratou i te farii.²⁰

Te mea ta’u e hinaaro i te Feia Mo‘a i te mau Mahana Hopea nei i roto i teie amuiraa, a ti‘a mai ai te mau Peresibutero no te a‘o ia tatou, ia faaohipahia ïa to tatou faaroo e ta tatou mau pure no te taata a‘o tata‘itahi, ia nehenehe ho‘i ia’na ia parau i taua mau mea ra, e ia noaa ho‘i ia tatou te varua no te farii i taua mau mea ra o te riro ho‘i ei maitai no te taatoaraa. E haamaitairaa taa ê e e hopoi‘a ho‘i teie na tatou. Aita tatou i haere noa mai i ŏ nei e aita e tumu ; ua haere mai tatou i teie amuiraa ma te ti‘aturi i te farii i te tahi mea o te haamaitai ia tatou.²¹

E ti‘a ia outou ia ani i te Fatu ia vaiiho i te [feia a‘o] ia parau i te tahi mea ta outou e hinaaro i te faaroo, ia parau mai ratou i te tahi mea ia outou o te riro ei maitai no outou. Mai te mea te vai ra to outou hinaaro ia ite i te tahi mau mea aita outou e maramarama ra, a pure ia nehenehe ia [ratou] ia parau i te tahi mea o te haamaramarama i to outou feruriraa no ni‘a i te mea o te haape‘ape‘a ra ia outou, e e farii ïa tatou i te hoê Amuiraa faahiahia e te hanahana, te hoê amuiraa hau atu i te maitai i te mau amuiraa atoa tei tupu na mua’tu. E mea maere paha te reira, e au ra ua riro ta tatou Amuiraa i hope a‘enei ei amuiraa maitai roa a‘e, ia riro ïa teie mai te reira te huru e ; e o outou te mau taea‘e e te mau tuahine, a faatae ti‘a’tu to outou mau aau i te Fatu ra e a faaohipa i te faaroo a paraparau mai ai to tatou mau taea‘e ia outou. Eita ïa tatou e tatarahapa, e eita ïa outou e ho‘i i te fare, eita ïa outou e haere i rapae i teie Amuiraa, ma te ore e ite e ua haamaitai-rahi-hia mau outou.²²

Te mana‘o nei au e e rave rahi mau taata i mua ia’u i teie mahana tei haere atea mai no te farerei ia matou i roto i teie amuiraa rahi ; e ua faaûru-paatoa-hia ratou ia haaputuputu mai i ŏ nei na roto i te mau mana‘o mâ—e te hoê hinaaro ia haamaitai ia ratou iho i roto i te mau mea e hinaarohia no ratou i roto i te basileia o te Atua. Ia ore tatou e tatarahapa i te haereraa mai, e mea titauhia ïa e ia faaineine tatou i to tatou mau aau ia farii e ia fana‘o i te mau mana‘o tauturu o te horo‘ahia mai e te feia a‘o i roto i te tereraa o te Amuiraa, o te nehenehe e faaûruhia mai e te Varua o te Fatu. Ua mana‘o vau, e te mana‘o noa nei â vau e, eita to tatou haereraa i mua e noaa na roto noa mai ana‘e i te taata a‘o na roto atoa mai râ ia tatou iho.²³

Ia putuputu ana‘e mai tatou… ua riro ïa te reira ei haamaitairaa taa ê no tatou ia farii i te arata‘iraa na roto mai i taua mau taata ra o te a‘o mai ia tatou, e mai te mea aita tatou e farii, i te rahiraa o te taime no tatou iho ïa te hape.²⁴

Ua ite au i teie huru i roto i te taata ta’u i faariro ei paruparu. E amui mai, te tahi o ratou, no te mea ua au ratou i te huru a‘oraa a to ratou taata a‘o, no te faahiahia i te huru e a‘o mai ai te taata a‘o ia ratou, aore râ e amui mai ratou no te hi‘o mata’tu i te taata a‘o aore râ no te hi‘opo‘a i to’na huru taata… eiaha râ no te farii i te mau arata‘iraa o te haamaitai ia ratou e o te haapuai ia ratou i roto i te parau-ti‘a…

Mai te mea eita tatou e faaohipa i taua mau ite ra tei horo‘ahia mai ia tatou e aita tatou i farii i te Varua o te Fatu, e mea iti ïa te haamaramaramaraa o te fariihia no ô mai i te feia a‘o ra, noa’tu e e mea faufaa rahi roa te mau mana‘o o te faaitehia mai. Noa’tu paha aita te mau mana‘o i hohora-papû-maitai-hia mai, mai te mea râ e faaitoito rahi mai te mau taata ia ratou iho… eita ïa e maoro roa e haapii mai ratou e e ore roa ratou e haere i rapae mai roto mai i te hoê amuiraa e aita to ratou mau feruriraa i haamaitaihia e te feia a‘o.²⁵

E ere noa na te mau a‘oraa roa e horo‘a i te Feia Mo‘a i te mau Mahana Hopea nei i te maitai rahi ; tera râ i roto i te mau a‘oraa huru rau te horo‘ahia mai e nehenehe ta tatou e haru mai i te tahi mana‘o, aore râ e nehenehe i te tahi parau tumu e haamaramarama i to tatou ite o te riro ei mea faufaa rahi no tatou i muri mai.²⁶

Ua haaputuputu mai tatou no te haamori i te Atua e no te faatere i te ohipa e titauhia no te faahaereraa i te parau no te parau mau i ni‘a i te fenua nei. Te huru o te mau arata‘iraa tei te huru ïa o te huru o to tatou mau feruriraa. E ti‘a ia tatou ia haapae i ta tatou mau ohipa pae tino e ia horo‘a i te taatoaraa o to tatou tau‘araa i te tumu no teie Amuiraa.²⁷

Te ti‘aturi rahi nei tatou i ni‘a i te Fatu no te haamaramaramaraa ia tatou e no to tatou ite pae varua—te ti‘aturi rahi nei tatou—i ni‘a i te Fatu. E mai te au i te huru o to tatou faaohiparaa i to tatou faaroo e farii ai ïa tatou i te haamaramaramaraa o te faaitehia mai na roto i te mau tavini a te Fatu … Te paraparau mai nei oia ia tatou, na roto i ta’na mau tavini, a a‘o mai ai ratou ia tatou i roto i teie mau huru amuiraa ia haaputuputu ana‘e mai tatou no te haamori i to tatou Atua.²⁸ [A hi‘o i te mana‘o tauturu 5 i te api 49.]