Te Autahu‘araa—« no te Faaoraraa i te Utuafare Taata »

Te parau nei tatou, te Feia Mo‘a i te mau Mahana Hopea nei, e ua farii tatou no ô mai i te Atua ra te îraa o te evanelia mure ore ; te parau nei tatou e tei ia tatou ra te Autahu‘araa mo‘a—te mana o te Atua tei horo‘ahia i te taata nei, na roto ho‘i i te reira e ti‘a’i ia tatou ia faatere i te mau oro‘a o tei fariihia e ana.⁸

Te taata atoa o te faahaehaa ia’na iho i mua i te Atua e o te utuhihia i raro i te pape, i muri a‘e i te tatarahaparaa, no te mataraa o ta’na mau hara, e farii ïa oia, na roto i te tuuraa rima, i te horo‘a o te Varua Maitai. E nehenehe anei ta’u e horo‘a i te reira ia’na ? Aita, e ve‘a noa vau na te Mana Hope tei farii i te mana no te utuhiraa no te matararaa hara ; e utuhi noa vau ia’na i raro i te pape, e mana ho‘i to’u ia na reira. E tuu noa vau i to’u na rima i ni‘a iho ia’na no te fariiraa i te Varua Maitai, i reira te Atua, mai mua’tu i to’na aro, e farii ai i to’u mana, e ite mai ai e e ve‘a vau na’na, e e horo‘a’tu ai te Varua Maitai i ni‘a i taua taata ra.⁹

I te taime ua bapetizo vau i te mau taata e ua faatere i te mau oro‘a no teie autahu‘araa mo‘a, ua haapapû mai te Atua i taua mau oro‘a ra na roto i te horo‘araa mai i te Varua Maitai, e te horo‘araa i te hoê iteraa i te mau taata o ta’u i haamaitai, ma te haapapûraa ia ratou e ua horo‘ahia mai te mana no ô mai i te ra‘i ra. E nehenehe i te mau Peresibutero atoa tei haere e poro i teie Evanelia mure ore, e tei haa mai te au i to ratou piiraa, e faaite i te hoê â iteraa papû, e e na roto i ta ratou raveraa i roto i teie mau oro‘a mo‘a ua faaite-papû-hia mai ïa te hanahana e te mana o te Atua i ni‘a i te upoo o te mau taata tei haamaitaihia. Teie ïa to matou iteraa papû; teie ïa te iteraa papû [i te matahiti 1830] no te tahi taata tei ti‘a e tei parau e ua faati‘a te Atua ia’na ia bapetizo i te taata no te matararaa hara, e tei tuu i te rima i ni‘a ia ratou no te fariiraa i te Varua Maitai, o te horo‘a ho‘i ia ratou te hoê iteraa no roto mai i te mau ao mure ore e e tei ia’na ra teie mana. Teie taata o Iosepha Semita ïa ; e ua horo‘a oia i teie mana, tei horo‘ahia ia’na e te mau melahi mo‘a, i ni‘a i te tahi atu mau taata tei tonohia’tu no te faaite i to te ao e, e te feia o te farii i taua mau oro‘a mo‘a ra, e farii ïa ratou i te iteraa no ô mai i te Mana Hopea e, ua faati‘ahia ratou ia na reira. E teie ïa to matou iteraa papû; e teie ïa to’u iteraa papû i mua i te nunaa e i mua i te ao nei.¹⁰

I hea i roto i te ao nei e nehenehe ai ia outou ia ite i te hoê pŭpŭ orometua faaroo o te ore e taiâ i te parau, mai to tatou mau Peresibutero ? Tei hea te taata e aore râ te pŭpŭ taata e nehenehe e itehia o te ore e taiâ i te faaite ia ratou iho i mua i to te ao nei e i te parau e ua haamanahia ratou e te Atua no te faatere i te tahi mau oro‘a i te mau taata na roto i te reira e nehenehe ai ia ratou ia farii i te heheuraa no ô mai i te Atua ra ? O te taata atoa e faaite i te hoê haapiiraa mai teie te huru, eita e maoro roa e itehia ïa e taata haavare oia—e tuu ïa oia ia’na iho i roto i te hoê ti‘araa ataata roa, e eita e maoro roa e itehia e aita oia i mau i taua mana ra. To tatou râ mau Peresibutero e ti‘a mai ïa ratou ma te taiâ ore i ni‘a i teie ti‘araa … Ua tono mai te Atua i ta’na mau melahi mo‘a mai te ra‘i mai e ua faaho‘i mai i te mana i te taata no te faatere i te mau oro‘a no te evanelia.¹¹ [A hi‘o i te mana‘o tauturu 2 i te api 240.]

Ua faaho‘ihia mai te Autahu‘araa ; ua horo‘ahia te reira i te taata, e na roto i te fariiraa i te autahu‘araa, te taata atoa o te hinaaro ia riro ei taata maitai e te oaoa, e nehenehe ïa ia ratou ia farii i te reira haamaitairaa taa ê. Te faaite mai nei te evanelia ia tatou e nahea ia riro ei taata faahiahia, ei taata maitai, e ei taata oaoa. E haapii te evanelia a te Mesia ia tatou i te mau mea atoa e titauhia no to tatou oraraa maitai i teie nei e no ananahi.

Tei mua teie mau fâ ia tatou i teie mahana, e ti‘a ia tatou ia tape‘a tamau noa i te reira i mua ia tatou. A hi‘o e piti ahuru ma pae matahiti i muri, e aore râ e hoê ahuru noa matahiti i muri, e rave rahi tei ô mai i roto i te ekalesia i taua roaraa taime ra, e a hi‘o eaha ta tatou i rave mai. Te ite atea nei tatou e te taa maitai nei tatou i te mau mea i teie nei, no reira e mea ineine maitai a‘e tatou no te mau mea o te tae mai i te fenua nei i to tatou huru e ahuru, ahuru ma pae, piti ahuru e râ piti ahuru ma pae matahiti i ma‘iri a‘enei, i te ite nahea i te rave i te ohipa, i te ite nahea i te rave i te mau mea mai tei ti‘a ia ravehia…

Te fâ o te autahu‘araa no te faaoaoa ïa i te mau [taata] atoa, no te haaparare i te haamaramaramaraa, no te horo‘a i te hoê â mau haamaitairaa i te taatoaraa.¹²

No teie tumu iho i horo‘ahia mai ai te Autahu‘araa Mo‘a i roto i te tau ta tatou e ora nei, no te arata‘i e no te haamaitai i te Feia Mo‘a a te Atua i ŏ nei, e te faito o te ohipa ta tatou i rave i roto i teie ao, ia noaa mai ia tatou te maramarama, te parau-ti‘a e te haapa‘o-maitai-raa… te reira atoa ïa te huru o to tatou faateiteiraa ia ti‘a’tu tatou i tera’tu pae o te paruru.¹³

Ua parau te Fatu e e horo‘a Oia ia tatou i Ta’na mau mea atoa—e te reira mai te au ïa i te tăpŭraa e te fafauraa no te Autahu‘araa [a hi‘o PH&PF 84:33–44]. Eita e ti‘a i te taata ia feaa i te mea ta Iesu i parau, e ua parau Oia, mai tei papa‘ihia i roto i te mau Heheuraa a Ioane Peata, « O te riro ia’na te rê ra, e haaparahi au ia’na a‘u nei i nia i to’u nei terono, mai tei riro atoa mai te rê ia’u ra, e te parahi nei au e tau Metua atoa i nia iho i to’na ra terono ». [Apokalupo 3:21.] E nehenehe anei e parauhia te tahi mea rahi a‘e i te reira ? Aita anei tei roto i te reira te mau mea atoa ?¹⁴

Teie evanelia ta tatou i farii ua heheuhia mai ïa mai te ra‘i mai, e te autahu‘araa ta tatou e mau nei ua heheuhia mai ïa no te faaoraraa i te utuafare taata. E ti‘a ia tatou ia haamana‘o noa i te reira.¹⁵ [A hi‘o i te mana‘o tauturu 3 i te api 240.]

I to’u mau taea‘e i roto i te Autahu‘araa te hinaaro nei au e pûpû atu i te tahi mau parau a‘o, te haapiiraa e te ti‘aororaa. Te vai nei i ni‘a ia outou te mau hopoi‘a teitei e te mo‘a, eiaha noa no te faaoraraa o teie u‘i, no te mau u‘i tahito atoa râ e rave rahi, e te mau u‘i e rave rahi i mua nei. E ti‘a i te reva no te basileia o Emanuela tei haamau-faahou-hia i roto i te ao nei ia tahirihirihia i te mau fenua atoa, te mau basileia atoa e te mau emepera atoa ; e ti‘a i te reo no te faaararaa… ia faataehia i te mau taata atoa ; o outou te mau taata ta te Fatu i ma‘iti no teie tumu, oia ho‘i te matahiapo o Iosepha, no te faatahoê i te nunaa [a hi‘o Deuteronomi 33:13–17]. E mea papû roa e ti‘a ia outou ia anaanatae, ia itoito i te raveraa i te ohipa, ia faarahi atu â i to outou mau ti‘araa hanahana e te mo‘a ei maitai no outou iho e no te taata atoa.¹⁶

Te vai nei i roto i teie Ekalesia te mau taata maitai i roto i to ratou aau e to ratou mana‘o mai te mau taata atoa, aita râ to ratou e faaroo e e itoito, e aita roa ratou e farii nei i te haamaitairaa taa ê e ti‘a ia ratou ia farii. Ahani e ua aifaito to ratou faaroo, to ratou itoito e to ratou mana‘o papû i to ratou mau mana‘o e to ratou mau hinaaro maitai, to ratou parau-ti‘a e to ratou maitai, e riro mau ïa ratou e mau taata puai i Iseraela ; e pee ïa te ma‘i e te mana o te diabolo i mua ia ratou mai te ota i mua i te mata‘i ra. Te parau nei tatou e e mau taata maitai tatou e aita tatou e aifaito noa nei i te tahi atu mau taata i roto i te ohipa, te haere nei râ tatou i mua i roto i te parau-ti‘a i mua i te Atua ; e e mea papû roa te na reira nei tatou. Te hinaaro nei râ vau i te parau papû atu ia outou, e to’u mau taea‘e e mau tuahine, e te vai nei te mau Peresibutero i rotopu ia tatou tei farii i te mau horo‘araa a te Varua o te ti‘a ia faaohipahia na roto i te tautururaa a te Varua Maitai. E ti‘a i te mau horo‘araa a te Evanelia ia faatupuhia na roto i te ohipa tuutuu ore e te tape‘a-maite-raa e tae noa’tu i te hopea. Ia hinaaro ana‘e ratou i te tahi haamaitairaa taa ê, e aore râ te tahi ite faufaa rahi, te heheuraa e aore râ te orama, e haapae te mau Peropheta tahito i te maa i te tahi mau taime e e pure ratou e rave rahi mau mahana e mau hepetoma atoa no taua tumu ra.¹⁷

E to’u mau taea‘e apî e, ia aro ana‘e mai te mau mea ia outou, ia riro ana‘e te mau mea atoa e mea pouri, a rave i ta outou hopoi‘a e e riro mai ïa outou ei mau taata paari, e mau taata puai ; e faaorahia ïa te ma‘i i raro a‘e i ta outou mau faatahinuraa ; e horo ê atu ïa te mau demoni ; e ti‘a mai ïa tei pohe ; e te mau mea atoa tei ravehia na e te taata mai te tau o Adamu mai, e nehenehe ïa ia outou e rave i te reira na roto i te mana o te Atua e na roto i te hoê hinaaro ti‘a.¹⁸

Te viivii ore, te parau-ti‘a, te haapa‘o-maitai-raa, te paieti e ti‘a ïa ia imihia ma te hinaaro rahi, oi ore te korona e noaahia. E ti‘a i taua mau parau tumu ra ia faaôhia [i roto] ia tatou iho, ia natihia i roto i to tatou huru, ia riro ei tufaa no tatou iho, ia faariro ia tatou ei pû, ei pape pihaa no te parau mau, no te aifaitoraa, no te parau-ti‘a e no te aroha, no te mau mea maitai e te faahiahia atoa, e na roto atu ia outou e matara atu ai ho‘i te maramarama, te ora, te mana, e te ture no te arata‘i, no te faatere e no te tauturu i te faaoraraa i te hoê ao e ori haere noa ra ; ia haa mai te mau tamaiti a te Atua, ei ti‘a no to tatou Metua i te ao ra. Te tia‘i nei tatou i te faaohipa i te mau mana no to tatou autahu‘araa i te ti‘a-faahou-raa—e nehenehe ia tatou ia faaohipa i te reira mai te au i te rahiraa o te parau-ti‘a e te maitai o te reira mau mana tei noaa ia tatou ; e noaa teie mau maitai mai te mea ana‘e e imihia e e mauhia, e i te po‘ipo‘i no te ti‘a-faahou-raa e farii ïa tatou i taua mau faufaa ra tei noaa ia tatou i roto ana‘e i teie ao ! Eita te ti‘araa Atua e nehenehe e horo‘a-noa-hia e ti‘a râ ia noaahia, te hoê ohipa ta te ao faaroo, e maere nei e e oto nei, e e ore e ite nei. A imi i te haamaitai ia vetahi ê, e e imi ïa vetahi ê i te haamaitai ia outou ; e o te taata o te hinaaro ia rahi, ia maitai ïa oia, ia tuatapapa oia i te maitai o te taatoaraa, ia riro oia ei tavini no te taatoaraa.¹⁹

Ei Feia Mo‘a a te Atua, te mau Peresibutero no Iseraela, e ti‘a ia tatou ia hinaaro i te horo‘a i te taime e te ohipa, ma te rave i te mau tusia atoa e titauhia no te farii i te mau ti‘araa varua tano ia manuia tatou i roto i to tatou mau piiraa e rave rahi. E ia faaûru mai te Fatu i te mau aau atoa i te faufaa rahi no teie mau mea e ia imi itoito e puai noa tatou i te mau horo‘araa e te mau mana tei fafauhia mai i roto i te Evanelia ta tatou i haapa‘o.²⁰ [A hi‘o i te mana‘o tauturu 4 i raro nei.]