Te Ohipa Misionare : « Ia Nae‘ahia te Aau o te mau Taata Atoa »

Ia farii ana‘e te hoê taata i te ite, e tura‘ihia oia ia faaite i te reira i te tahi atu mau taataa ; ia oaoa ana‘e te hoê taata, e haapii te varua e haati ra ia’na ia tutava i te faaoaoa ia vetahi ê … Te vai ra anei te hoê rave‘a e oaoa ai te hoê taata tei ore i ite i te evanelia a te Mesia ? … Noa’tu i roto i te ao nei te tamata nei [te mau taata] ia faaoaoa ia ratou iho, aita â ratou i manuïa i roto i te mea ta ratou e tutava nei i te rave. Eita e nehenehe ia ratou ia oaoa, maori râ na roto i te hoê rave‘a, oia ho‘i te ti‘aturi-mau-raa i te îraa o te evanelia, o te haapii nei ho‘i ia tatou e eiaha e tia‘i ia tae tatou i te ora mure e haamata ai i te faaoaoa ia tatou, te haapii mai nei râ te evanelia ia tatou ia tutava i ŏ nei i te horo‘a ia tatou iho e i te feia e haati nei ia tatou te oaoa i roto i te mau haamaitairaa a te Mana Hope.

No reira e ti‘a i te reira ia riro ei fâ e e opuaraa na tatou : ia haapii i te faaohipa maitai ia tatou ; ia riro ei mau faaora no to tatou taata tupu ; ia haapii e nahea i te faaora ia ratou ; ia faaite atu ia ratou i te hoê iteraa no te mau parau tumu e titauhia no te faateitei ia ratou i te hoê â faito maramarama e to tatou iho.⁵

A haere e a faahoa i te mau taata e haati ra ia outou ; e aore râ a ma‘iti i te hoê taata e a tamata i te faaûru i to’na mau mana‘o, to’na faaroo, te huru o to’na oraraa e to’na feruriraa e a tamata i te haamaramarama ia ratou mai te mea e feia hara ratou, a tutava i te faaora ia ratou i ta ratou mau hara, e a iriti mai ia ratou i te faatîtîraa e ia tuu atu ia ratou i te hoê vahi i reira ratou e oaoa ai i te maramarama e te ti‘amâraa ta outou e fana‘o nei, no te mea e na roto i teie rave‘a e nehenehe ai ia outou ia rave i te maitai na roto i te ite ta te Fatu i horo‘a ia outou.⁶ [A hi‘o mana‘o tauturu 2 i te api 263.]

Aita i maoro roa to te Feia Mo‘a faaea-maitai-raa i roto i teie mau afaa [ i Utah] ua fariu faahou te mau tavini a te Fatu i to ratou mana‘o i ni‘a i te ohipa misionare rahi tei tuuhia mai i ni‘a i te Ekalesia.

Tei roto matou i te vĕvĕ e te aro ra matou ia nehenehe i te fenua e faaeahia, aita râ i nehenehe ia matou ia tau‘a ore i ta matou titauraa ia poro i te Evanelia na te ara ; no te mea ua horo‘a mai te Fatu i te faaueraa e ti‘a ia porohia te reira na te ao taatoa nei. O te hoê ïa o te mau tapa‘o haapapûraa no te hanahana o teie ohipa e i roto i te mau ti‘avaruraa e te mau hamani-ino-raa ua imi te Feia Mo‘a i te haapa‘o itoito i teie faaueraa a te Fatu.

I te amuiraa rahi a te Ekalesia tei tupu i te ava‘e Atopa 1849—e piti noa matahiti i muri a‘e i to te mau pionie tomoraa’tu i te afaa [no Roto Miti]—e rave rahi te mau Peresibutero tei piihia no te iriti i te mau misioni i te mau tufaa huru rau o te fenua nei. E maha o te Tino ahuru ma Piti Aposetolo tei faataahia no te arata‘i. Ua piihia te Aposetolo Erastus Snow ia haere i te fenua Scandinavia, te Aposetolo John Taylor i te fenua Farani, e o vau iho nei i te fenua Italia, e te Aposetolo Franklin D. Richards i te fenua Peretane, i reira ua haamau-a‘ena-hia te hoê misioni. I vai na matou i roto i te mau huru oraraa vĕvĕ roa, e to matou mau utuafare tei fatata i roto i te moni ore, ua riro ïa te reira ei hoê ohipa fifi roa no matou ; ua pii râ te Fatu, e ua ti‘a ia matou ia pahono, noa’tu eaha te tusia i titauhia.⁷

Ua horo‘a matou i to matou mau oraraa no te ohipa e e au ra aita matou i tau‘a rahi i to matou iho oraraa, ia nehenehe i to te ao ia ite e te vai nei te hoê Atua i roto i te mau ao mure ore ; ia nehenehe ho‘i ia ratou ia ite e te vai nei ta te Atua ohipa i teie taime e te mau ohipa a te mau tamarii a te taata nei. Te rahi noa ra te mana‘o o te taata e ere te haapa‘o ore i te mea hape. I roto iho i te mau tufaa Keresetiano no te utuafare taata, e mau tauasini e ahuru tauasini tei ore i ti‘aturi e te vai nei te auraa i rotopu i te Atua e te mau tamarii a te taata, noa’tu aita ratou i ineine i te parau no te mea e ere i te mea auhia e te taata. E ti‘a ia tatou ia ti‘a i ni‘a e ia rave i te mau tusia ia nehenehe i taua ti‘aturiraa e taua ite ra e tae mai i te mau tamarii a te taata nei.⁸

Ia pii ana‘e tatou i ta tatou mau misionare apî ia haere i te mau fenua na te ao nei, e feruri ratou, e i to ratou faarooraa i te ohipa i tupu i te feia tei haere i roto i te ao nei ei misionare, e ere ïa te hoê mana‘o maitai roa no te mau taata ia feruri i te mau tamataraa e te mau fifi ta ratou e faaruru atu. Te maitai râ tei roto ïa i to ratou hinaaro i te haamata e i te haapa‘o e i te pee i te mau titauraa.⁹

Te vai ra te mau mea no ni‘a i te hoê misioni e ere roa i te mea au roa no to tatou mau Peresibutero apî. Te ite nei ratou e e ti‘a ia ratou ia faatusia i te mau oaoaraa no te utuafare, e ua ite ratou e e haere ratou i rotopu i te mau taata o te ore roa e mauruuru i te mau taime atoa i te mea ta ratou e parau atu ia ratou ; i te tahi râ pae, e ite ratou e tei ia ratou ra te mau huero no te oraraa, e mai te mea e nehenehe ta ratou ia ite mai te hoê tane aore râ vahine parau-ti‘a, e haa ïa te Varua o te Fatu i ni‘a i to ratou mau aau e e penei a‘e e farii ïa ratou i teie poro‘i hanahana ta ratou e horo‘a’tu. Na te reira e horo‘a ia ratou i te oaoa e te mauruuru. Te tahi atu mea, e ite ratou i roto i teie ohipa te hoê rave‘a no ratou ia titau i te mea o te riro ei faufaa rahi no ratou i roto i ta ratou mau hopoi‘a a muri atu. E ohipa maere e i rotopu i te mau tauasini rata ta’u i farii no ô mai i te mau taata tei piihia ia haere i te misioni—fatata pauroa te mau feia apî tane—i to’u mana‘oraa maori râ hoê tei ore i pato‘i. No te aha râ ? No te mea ïa e tei ni‘a i teie mau Peresibutero apî te varua no te here e te tahuti ore, te Varua o te Mana Hope, e ua farii ratou i te mau heheuraa tei faaûru ia ratou ia rave i te mea e ore ho‘i te hoê faatianiraa e nehenehe e faaûru ia ratou ia rave.¹⁰ [A hi‘o i te mana‘o tauturu 3 i te api 263.]

E tono matou i ta tatou mau Peresibutero ia poro i te Evanelia. Na vai e tono atu ia ratou ? … Na te Atua no Iseraela e tono ia ratou. Na’na teie ohipa. Aita e taata tahuti tei hau atu i te anaanatae i te manuïaraa o te hoê Peresibutero ia poro ana‘e oia i te Evanelia mai te Fatu tei tono ia’na no te poro i te nunaa e mau tamarii ho‘i na te Fatu. E mau tamarii ratou Na’na no roto i te tahi atu ao, e ua haere mai ratou i ŏ nei no te mea ua hinaaro te Fatu ia ratou ia haere mai.¹¹

Te mana‘o nei matou e e manuïa rahi ïa outou [te mau misionare], no te mea te ite nei matou e ua piihia outou e te Atua. E ore roa te paari o te taata e mana‘o noa a‘e i teie huru ohipa. Te maere nei au ia feruri ana‘e au i te hanahana o teie ohipa. E nehenehe ta’u e parau e teie ihoâ te ohipa mau i titauhia no teie taime : e te mana‘o nei au e rave tatou i te reira ma to tatou varua atoa. A faatupu i te Varua o Iesu a parau ai oia e aore e mea e ti‘a ia’na ia rave maori râ te mea ta to’na Metua i faaue ia’na ia rave [a hi‘o Ioane 5:30].

Aita e pe‘ape‘a to outou mau fifi e to outou mau pau ; a faaru‘e i te mau mea anaanataehia e outou, e e riro ïa to outou manuïa i te rahi e te hanahana, e e ite ïa te Ekalesia taatoa i te mau maitai o ta outou mau ohipa.

Aita e pe‘ape‘a te tau‘a ore o te tahi mau taata i rotopu ho‘i ia ratou e ohipa ai outou, e te manuïa ore ta outou e farerei ; e vai mai ïa te Varua o te Fatu i ni‘a iho ia outou e e faaara outou i te mau varua o te mau taata ta outou e tavini, e e haavî outou i to ratou tau‘a-ore-raa… e mauruuru ïa outou no te mea ua rave faaoti outou i te ohipa i tonohia‘i outou ia rave…

Tei ia outou ra te îraa o te mana tei horo‘ahia i ni‘a ia outou, eiha roa râ outou e paraparau no ni‘a i te reira. E ite ïa outou e aita e faufaa no te paraparau i te reira ; e haapapû mai ïa te Varua o te Fatu i te reira, e e ite ïa te taata e te mau nei outou i te reira, e teie haapapûraa e teie mana‘o o to outou ïa mana.

E ite ïa outou i te tahi mau taata o te mana‘o nei e mea rahi a‘e to ratou ite i to outou, mai te mea râ e rave outou i ta outou hopoi‘a mai tei parauhia, e hou outou a faaru‘e ai ia ratou, e ite ïa ratou e e mea rahi rii a‘e to outou ite i to ratou, e ua haamaitai e ua tauturu ho‘i outou ia ratou…

A tamata i te faahoa i te feia i tonohia’tu ho‘i outou. Na te haehaa ïa ta outou e faaite e te Varua o te Fatu o te parahi i ni‘a iho ia outou e faaite e ua faaineinehia e ua piihia outou no te toro‘a ta outou e mau ra. A tamata i te taa i te natura taata e a rave mai te au i te reira, no te faaoaoa i te mau taata atoa e ia au maitai te mau mea atoa…

Te vai nei te hoê rave‘a e nae‘ahia‘i te aau o te mau taata atoa, e e ohipa ïa na outou ia imi i te rave‘a e tae atu ai i te aau o taua mau taata ra…

Te hinaaro nei au e parau i roto i to’u nei aau, Ia haamaitai mai te Atua ia outou. E faataahia ïa outou hou a haere atu ai outou, e e pure ïa matou no outou e e mana‘ona‘o rahi matou ia outou. Ia mărû to outou aau e ia haehaa outou. Ia hi‘o ana‘e outou i te mau taata ta outou e haapii, e piti huru e nehenehe e faaûru ia outou ; a tahi, ei taata a‘o e paraparau maitai paha outou e e haaputapû paha outou i te aau o teie mau taata ; e te piti, e tupu mai te uiraa, eaha ho‘i ta’u ohipa i ŏ nei ? No te ueueraa i te mau huero no te ora i roto i te mau aau o te mau taata ta outou e haapii ; e ti‘a ia outou ia pure i roto i to outou aau, « E te Fatu, ia na reirahia ïa ; e nehenehe anei ia’u ia farii i te mana na roto i to Oe Varua no te haaputapû i te aau a to oe mau taata ? » Taua pure poto râ o tera ana‘e ïa ta te hoê peresibutero e faahiti. Tera ana‘e te mea ta outou e faahiti. « E nehenehe anei ia’u ia parau i te tahi mea no te faaora i teie mau varua ? » Teie te mea ta te Peresideiraa Matamua… e te taatoaraa o to outou mau taea‘e e hinaaro ia outou ia rave.¹²

A fariu i to outou mana‘o i te faaanaanaraa i to outou mauhaa tama‘i varua. Ua ite au e ia tuu-ana‘e-hia ta’u mau ohipa pae tino i te hiti, e rotahi ïa to’u mata i ni‘a i te mau mea no te pae varua ; A pure, e te mau taea‘e, e eiaha e mana‘o e ino te tino ia haapae i te maa … Eiaha e parau ha‘uti rahi roa, [e] a haapa‘o maitai eiaha e faariri i te Varua. Ua ite au i roto i ta’u misioni, e i muri a‘e i te hoê e aore râ e piti hepetoma, ua nehenehe ia’u ia haamo‘e i te utuafare, e ua faaitoito te Varua o te Atua ia’u. E hutihia te Varua i te ti‘amâraa e te oaoa, eiaha râ ia rahi roa’tu te oaoa … A tamau noa i te pure ia vai mai te Varua o te Atua i ni‘a ia outou mai ni‘a mai i to outou upoo e tae atu i to outou mau manimani avae.¹³

Eiaha roa te mau Peresibutero e haa nei i roto i te ô vine ia haamo‘e e e mau ti‘a ratou no te ra‘i, e mau taata afa‘ifa‘i i te parau apî e te oaoa i te mau taata tei ore i ite i te Fatu.…

I to te peropheta Iosepha Semita tonoraa i te mau Peresibutero matamua i te hoê fenua ĕê, ua ite atea oia i te huru o te fariiraa a te mau taata ia ratou, e ua parau oia ia ratou e e mea iti roa te taata o te farii ia ratou ei mau tavini na te Atua, e pato‘i ïa te rahiraa ia ratou, e ore ho‘i ratou e faaroo i ta ratou parau poro‘i. Teie ïa te huru o te mau tavini a te Atua mai te haamataraa mai â o te tau, e e ti‘a ia tatou ia oaoa i te mau hotu no te mau ohipa itoito, noa’tu e mea iti roa tei arata‘ihia na roto atu ia tatou i te hoê iteraa no te parau mau…

Te ti‘aturi nei au e te pure nei au e ore roa ïa te hoê Peresibutero o te haa nei… tei horo‘a ia’na iho e tae noa’tu i teie taime ia hahi atu i roto i te mau faahemaraa o te ao nei. Te vai nei te hoê rave‘a papû no te ape i te reira, o te aperaa’tu ïa i te ino, oia, te hi‘oraa iho o te ino. E tuuhia mai te faahemaraa i roto i te mau huru atoa i mua ia ratou. Teie ïa te huru raveraa a te enemi o to tatou faaoraraa ; e ohipa râ na te mau Peresibutero no Iseraela ia pato‘i i te faahemaraa, e no te rave-manuïa-raa i te reira e ti‘a ïa ia ratou ia paruru ia ratou iho ia ore ia viivii i te mau mea no teie nei ao … Ia faatupu e ia faaherehere ana‘e ratou i te varua no ta ratou misioni, e ia ite ratou i te faufaa rahi no to ratou piiraa teitei i roto i te Mesia o Iesu, e ia ora mai te au i te varua no to ratou piiraa, e nehenehe ïa ia ratou ia ti‘a ei mau arata‘i e ei mau faaora no te nunaa, ma te faaite atu ia ratou i te maramarama no te ra‘i, eiaha râ ia riro mai te tahi atu mau taata ; mai te mea râ e taahi ratou i ni‘a i te fenua o te enemi e e farii i te mau peu o te ao nei, e faaerehia ïa ratou i to ratou puai e riro mai ho‘i ratou mai te tahi atu mau taata, e ua tano roa ia ratou ia ho‘i i te fare ma te oto rahi mai te tahi mau taata tei topa, e no te faaoto i te aau o te feia ta ratou i here no to ratou ho‘i huru … Ia tamau ana‘e ratou i te imi i te Fatu na roto i te haehaa, ma te mata rotahi i ni‘a i To’na hanahana, e ma te hinaaro i roto i to ratou aau i te faaora i te mau varua taata, e na te raveraa i te mau mea atoa e nehenehe ia ratou no te faatupu i to ratou faaoraraa, e noaa ïa ia ratou te oaoa eita e noaa i te faahitihia no te mau ohipa ta ratou i rave i te tino nei, e e riro ïa ratou i te pae hopea i te farii i piha‘iho i te Metua e te Tamaiti i te mau mea faahiahia e te hanahana eita e noaa i te taata tahuti nei ia taa e aore râ ia feruri.¹⁴ [A hi‘o i te mana‘o tauturu 4 e 5 i te api 263.]

Te ti‘aturi nei matou… e no te faatupu i teie ohipa, ia faaohipahia ïa te faaoroma‘i, te faaroo, te itoito, te tape‘a-noa-raa e te faaoroma‘i rahi ; i roto râ i te mau oire… e rave rahi tauasini o te farii i te pae hopea i te Evanelia, e i roto i te tahi o teie mau oire e titauhia ia e rave rahi mau ava‘e no te raveraa i te ohipa ma te manuïa ore hou e noaahia‘i taua mau parau tumu ra i te haapa‘ohia … I te tahi mau [taime] e ti‘a ia tatou ia rave eiaha noa tau mau ava‘e e mau matahiti râ ; ua papû râ ia tatou, e na roto i te faaroo, te pure, e te ohipa, e te mau haamaitairaa a te Fatu, e haavî ïa e e upooti‘a ïa tatou i ni‘a i teie mau fifi no te tura e te hanahana o te Atua ; e taa ê noa’tu i te reira, e noaa ïa ia tatou te oaoaraa e ua rave tatou i ta tatou hopoi‘a, ua tamâ tatou i to tatou mau ahu i te toto o te mau taata atoa.¹⁵

I te [hoê] taime, hou a tere atu ai au i Italia, ua tere atu vau i Manchester, Macclesfied, Birmigham, Cheltenham, Ronedona, Southampton e te mau Amuiraa ‘Apatoa [i te Fenua Peretane] … Ua oaoa vau i te farereiraa e rave rahi mau taata ta’u i faahaere mai i roto i te Ekalesia [e va‘u matahiti na mua’tu]; e aita e faufaa ia’u ia parau atu ia outou e ua riro te farerei-faahou-raa i teie mau taata ei oaoaraa mau tei riro ei ohipa oaoa ia hi‘o atu. Ua parau te Aposetolo Ioane i to’na ra tau, « Ua ite tatou e, mai te pohe mai tatou, e tei te ora mai nei, no te mea te aroha nei tatou i te mau taeae ». [1 Ioane 3:14.] Teie here ta to tatou mau misionare e ite nei no te mau nunaa o te fenua nei, e te here ta te mau taata e ite nei no te mau Peresibutero tei afa‘i atu ia ratou te poro‘i o te Evanelia, ua riro ïa ei iteraa papû tei nava‘i no te haapapû i te feia aau parau-ti‘a e no ô mai i te Atua ra te poro‘i e tei piha‘iho Oia ia tatou. Teie mana‘o mo‘a e te hanahana, tei faaarahia i roto ia tatou e te Varua Maitai, ua faataa ïa ia tatou ei hoê nunaa taata i te toe‘a o te utuafare taata ; e teie te mana‘o o te faataui i te taatoaraa o te ao nei, e o te haapapû i te taata ti‘aturi ore e e ere noa te Atua te Metua no tatou paatoa, e mau hoa e e mau tavini râ tatou No’na.¹⁶

Ua horo‘a vau i to’u ora i te taviniraa i te Fatu ; ua tuu vau ia’u taatoa i ni‘a i te fata no te tusia, ia nehenehe ia’u ia faahanahana ia’na, ia haapa‘o maitai i to’na hinaaro, e ia haaparare i te mau parau tumu no te oraraa i rotopu i te mau tamarii a te taata nei. Ia feruri au i te mau mea i tupu na, e ia hi‘o vau i te rima o te Fatu i te iriti-faahiahia-raa i to’u haerea, e to’na haamanuïaraa ia’u i roto i te mau mea atoa no teie misioni hau atu i te mau mea ta’u i ti‘aturi, ua itoito faahou vau i te haere i mua ; eita te reo e manuïa i te faaite i te mauruuru hohonu i roto i to’u aau no ta’na mau haamaitairaa. I taua mau taea‘e e Feia Mo‘a ra, tei ite-taa-ê-hia te maitai o to ratou aau e to ratou anaanatae no te ohipa a te Atua i roto i ta ratou mau misioni, ia ninii-hua-hia mai ïa te mau haamaitairaa a te Teitei Roa ra i ni‘a ia ratou, i muri mai i te mau matahiti e faaroo ïa ratou i te reo mărû o te mau tauasini, e te mau ahuru tauasini o taua mau fenua ra i te tuoraa i te arueraa i te Mana Hope no te maramarama o te heheuraa, e ia oaoa atoa to ratou mau aau i muri iho i te iteraa oaoa e ua rave ratou i te tahi tufaa no te faatupuraa i teie ohipa faaoraraa hanahana.¹⁷ [A hi‘o i te mana‘o tauturu 6 i te api 263.]