Omuaraa

A titau i te arata‘iraa a te Varua Maitai a faaineine ai outou no te haapii. A tuatapapa i te pene na roto i te pure, ia ti‘a ia outou ia papû maitai i to outou maramarama i te mau haapiiraa a te peresideni Snow. E haapii outou ma te aau tae e te puai rahi a‘e mai te mea e, ua faaûru ta’na mau parau ia outou iho (a hi‘o PH&PF 11:21).

Mai te mea e, te haapii ra outou i te haapiiraa na te Autahu‘araa a Melehizedeka e aore râ, na te Sotaiete Tauturu, eiaha outou e tuu i teie buka i te hiti e aore râ, e faaineine i te mau haapiiraa mai roto mai i te tahi atu mau materia. Na roto i te pure a ma‘iti i roto i te pene i te mau haapiiraa ta outou e mana‘o ra e, e riro ïa ei tautururaa no te mau taata ta outou e haapii ra. Te vai ra i roto i te tahi mau pene e rave rahi mau haapiiraa eita e noaa i te haapii pauroa i roto i te hoê taime haapiiraa.

A faaitoito i te mau piahi ia tuatapapa i te pene hou te haapiiraa e ia afa‘i mai i ta ratou buka. Ia na reira ana‘e ratou, e ineine maitai a‘e ïa ratou no te aparau e no te faateitei i te tahi e te tahi.

A faaite ai outou i te pene, e i roto i te roaraa o te haapiiraa, a tamata i te faatupu i te hoê huru i reira ho‘i te Varua e nehenehe ai e haaputapû i te aau e i te mana‘o o te feia ta outou e haapii ra. No te haamata i te haapiiraa, a tauturu i te feia ta outou e haapii ra ia faatumu i te mana‘o i ni‘a i te mau haapiiraa o te pene. A hi‘opo‘a i teie mau mana‘o :

• A tai‘o e a aparau i te tuhaa i parauhia « No roto mai i te oraraa o Lorenzo Snow » i te omuaraa o te pene.

• A aparau i ni‘a i te hoê hoho‘a e aore râ, i te hoê irava no roto mai i te pene.

• A himene amui i te hoê himene e tu‘ati atu i ni‘a i te parau tumu.

• A faaite poto noa i te hoê ohipa tei tupu i ni‘a ia outou iho no ni‘a i teie tumu parau.

A haapii ai outou i teie buka, a ani ia vetahi ê ia faaite mai i to ratou mau mana‘o, a ui i te mau uiraa, e a haapii te tahi i te tahi. Ia itoito ana‘e ratou i te tuatapaparaa e te aparauraa i roto i te piha haapiiraa e hau atu â ïa to ratou ineine i te haapiiraa mai e i te fariiraa i te heheuraa no ratou iho. A faatupu i te mau aparauraa maitai eiaha râ e titau i te haapii i te taatoaraa o te mau haapiiraa. No te faaitoito i te aparauraa, a faaohipa i te mau uiraa i roto i te pene tata‘itahi. E faahoro atu te mau nota i roto i te pene tata‘itahi i taua mau uiraa ra. E nehenehe atoa ta outou e hamani i ta outou iho mau uiraa taa ê no te mau taata ta outou e haapii ra.

Teie te tahi mau rave‘a no te horo‘a ia outou i te tahi atu mau mana‘o :

• A ani i te mau piahi ia faaite mai e, eaha ta ratou i haapii mai na roto mai i ta ratou iho tuatapaparaa i te pene. E mea maitai roa ia farerei i te tahi mau piahi i roto i te hepetoma e ia ani ia ratou ia haere mai ma te faaineine ia ratou no te faaite mai i te mea ta ratou i haapii mai.

• A faaue i te mau piahi ia tai‘o i te mau uiraa i te pae hopea o te pene (te taata hoê anei e aore râ, ei mau pŭpŭ na‘ina‘i). A ani ia ratou ia imi i te mau haapiiraa i roto i te pene e tuati ra i ni‘a i te mau uiraa. I muri iho a ani ia ratou ia faaite mai i to ratou mau mana‘o e ta ratou mau hi‘oraa i mua i te toe‘a o te pŭpŭ.

• A tai‘o amui i te tahi mau parau a te peresideni Snow tei ma‘itihia i roto i te pene. A ani i te mau piahi ia faaite mai i te mau hi‘oraa no roto mai i te mau papa‘iraa mo‘a e no roto i te mau ohipa tei tupu ia ratou iho o te faahoho‘a ra i te mea ta te peresideni Snow i haapii.

• A ani i te mau piahi ia ma‘iti i te hoê tufaa e ia tai‘o i te reira ma te mamu noa. A ani ia ratou ia amui ei pŭpŭ ta‘i piti e aore râ, ta‘i toru taata i roto, o tei ma‘iti i te hoê â tuhaa e ia aparau i te mea ta ratou i haapii mai.

E faufaa rahi atu â te mau haapiiraa a te peresideni Snow no te mau piahi o te faaite i te reira ia vetahi ê e o te faaohipa i te reira i roto i to ratou mau oraraa. A feruri i teie mau mana‘o :

• A ani i te mau piahi e nahea ra e nehenehe ai ia ratou ia faaohipa i te mau haapiiraa a te peresideni Snow i roto i ta ratou mau hopoi‘a ei mau metua aore râ ei mau taea‘e hahaere aore râ ei mau tuahine hahaere.

• A faaitoito i te mau piahi ia faaite i te tahi o te mau haapiiraa a te peresideni Snow i te mau melo no te utuafare e i to ratou mau hoa.

• A ani i te mau piahi ia faaohipa i te mea ta ratou i apo mai e ia faaite i te mau mea ta ratou i rave i te haamataraa o te haapiiraa i mua’tu.

A pu‘ohu poto noa i te haapiiraa e aore râ, a ani i te hoê e aore râ, e piti piahi ia haapoto mai. A faaite i to outou iteraa papû no ni‘a i te mau haapiiraa ta outou i aparau. E hinaaro atoa paha outou e ani ia vetahi ê atu ia faaite mai i to ratou iteraa papû.