Te Hamani-maitai-raa ia Vetahi Ê

E hoê â to tatou Metua i roto i te mau ao tiretiera … Ahani ua matau tatou i te tahi e te tahi mai tei ti‘a ia tatou… e rahi hau atu ïa to tatou here ia vetahi ê i to tatou here i teie taime, e e tupu mai ïa te hoê hinaaro i roto i te taata tata‘itahi ia tuatapapa i roto i to ratou mau feruriraa e nahea e nehenehe ai ia ratou ia hamani maitai atu i to ratou mau taea‘e, nahea i te faaiti mai i to ratou mau oto e te haapapûraa ia ratou i roto i te parau mau, nahea ta ratou e nehenehe ai e iriti ê atu i te pouri mai roto atu i to ratou mau feruriraa. Ahani ua maramarama tatou te tahi i te tahi e to tatou auraa mau te tahi i te tahi, eita ïa tatou e mana‘o mai ta tatou e mana‘o nei ; e nehenehe râ i teie iteraa e noaa mai te mea e noaa ia tatou te Varua o te ora, e mai te mea e hinaaro tatou i te haapaari te tahi i te tahi i roto i te parau-ti‘a.²

Ua tonohia mai tatou i roto i te ao nei no te hamani maitai i te tahi atu mau taata ; e na roto i te hamani-maitai-raa ia vetahi ê te haamani maitai ra ïa tatou ia tatou iho. E ti‘a ia tatou ia tape‘a noa i te reira i roto i to tatou mau feruriraa, te tane faaipoipo e ta’na vahine faaipoipo, te vahine faaipoipo e ta’na tane faaipoipo, te mau tamarii e to ratou mau metua e te mau metua e ta ratou mau tamarii. Te vai nei i te mau taime atoa te taime au maitai no te hamani maitai i te tahi e te tahi.³

Te pure nei au i te Atua, i te i‘oa o Iesu, e ia tamata outou e o vau nei i te mau mahana atoa ia haapa‘o maitai rii a‘e â, ia rave maitai rii a‘e â i teie mahana i nanahi atu, e ia tamata tatou e ia rahi rii a‘e â te here e te aroha i to tatou mau taata tupu, mai tei parauhia ia tatou e tei ni‘a ho‘i i teie te ture e te mau peropheta, « ia hinaaro i te Fatu, to tatou Atua, ma to aau atoa, e ma to varua atoa, e ma to mana‘o atoa, e to tatou taata tupu mai ia tatou iho ». [A hi‘o Mataio 22:37–40.] « Te mau mea atoa ta outou i hinaaro ia vetahi ê ra, e na reira atoa’tu outou ia ratou ». O ta te ture ïa e ta te mau peropheta. [A hi‘o Mataio 7:12.] Teie te mau parau tumu e ti‘a ia tatou ia haapii mai … E ti‘a ia tatou ia riro ei hoa i te mau vahi atoa e i te mau taata atoa. Aita e Feia Mo‘a i te mau Mahana Hopea nei e au ore nei i to te ao nei : e mau hoa râ tatou no to te ao, e ua faahepohia tatou ia na reira, no ratou ihoâ ra. E ti‘a ia tatou ia haapii i te faatae i to tatou aroha e te ohipa no te maitai o te taata atoa. Teie ïa te misioni a te Feia Mo‘a i te mau Mahana Hopea nei—eiaha ia tape‘a noa i te aroha no tatou noa iho, ia faahaere râ i te reira na te ara, e e ti‘a i te reira ia faahaerehia i te mau taata atoa.⁴

A riro ei taata parau-ti‘a, te afaro e te aroha, ma te faaohipa i te hoê varua hanahana e te atuaraa i roto i to outou mau mana‘o e mau faaotiraa—i roto i ta outou mau ohipa e mau raveraa atoa. A faatupu i te hoê varua aroha ; ia ineine i te rave no vetahi ê hau atu i ta outou e ti‘aturi no ô mai ia ratou ra ahani ua taui te mau huru oraraa. A hinaaro ia riro ei taata maitai, eiaha i roto i te hi‘oraa a te taata i mua râ i te mata o te Atua, e a riro ei taata faahiahia i roto i teie auraa, « E here oe i te Fatu ra to oe Atua mai to aau atoa, e i to puai atoa, te mana‘o, e te itoito, e to oe taata tupu mai ta oe i here na ia oe iho ». E ti‘a ia oe ia here i te taata no te mea e mau taea‘e ratou no outou, e huaai ho‘i na te Atua. A pure itoito no te varua haamaitai i te oraraa o te tahi atu mau taata, no te faarahiraa i te mana‘o, e no te mana e te aravihi i te raveraa i te ohipa no te maitai o te basileia o te Mesia.⁵ [A hi‘o i te mana‘o tauturu 2 i te api 296.]

E ti‘a ia vai mai i mua ia tatou te hoê hinaaro puai i te hamani maitai ia vetahi ê. Eiaha e haape‘ape‘a rahi no tatou iho. E tae mai ihoâ te maitai ia tatou mai te mea e faahaere tatou i to tatou mau mana‘o i ni‘a i te mau taata i rapae au ia tatou, e ia tamata tatou i te faaoaoa ia vetahi ê e i te haafatata’tu ia ratou i te Fatu … Ia ite ana‘e outou e e mea oto rii outou, a hi‘o na piha‘iho ia outou e a imi i te tahi taata tei roto i te oto rahi atu i to outou iho ; a haere atu ia’na ra e a imi eaha te pe‘ape‘a, e i muri iho a tamata i te tatara i te reira na roto i te paari ta te Fatu i horo‘a ia outou ; e te mea matamua ta outou e ite, ua mo‘e ïa to outou oto, e ite ïa outou i te mâmâ i roto ia outou, tei ni‘a te Varua o te Fatu ia outou, e e au ra ua turamahia te mau mea atoa.⁶ [A hi‘o i te mana‘o tauturu 3 i te api 296.]

Te hoê o te mau mea maitai roa a‘e ta te hoê feia apî tane e aore râ feia apî tamahine e nehenehe e haamana‘o, i roto i ta ratou tutavaraa ia riro ei taata maitai, o te tautururaa ïa ia vetahi ê ia maitai atoa ; e te horo‘araa i te tahi maa taime iti no te haamaitai ia vetahi ê. Te rave‘a maitai roa a‘e no te haamaitai ia tatou o te faaitoitoraa ïa i te hamani maitai ia vetahi ê. A haamana‘o tamau noa i te reira.⁷

No te titauraa i te mau huru haapiiraa atoa e ti‘a ïa i te hoê taata ia tamau noa i te haapii, e i muri a‘e i te raveraa i te hoê haapiiraa e ti‘a ïa ia’na ia na reira faahou, e ia tamau noa i te rave i te ohipa ia ite maitai oia i te reira, e aita’tu ïa e rave‘a maitai ia ite i te reira maori râ na roto i te horo‘araa’tu ia vetahi ê te ite tei noaa ia’na. Ia haere oia e rave i te ohipa e ia haaputuputu mai i to’na mau hoa e ia tutava oia i te horo‘a’tu ia ratou te hoê â ite ta’na i farii, e i reira oia e haamata ai i te maramarama i taua mau mea ra tei ore roa e noaa ia’na maori râ na roto i te tamauraa i taua haapiiraa ra e te horo‘araa i te ite tei noaa ia’na i te tahi atu mau taata. E taa i te taata tei riro na ei orometua haapii i te mea ta’u e parau ra…

Ia haamana‘o te hoê taata e te vai nei te tahi atu mau taata i roto i te pouri e tei ore i haere i mua i roto i te ite, te paari e te maramarama, e ia horo‘a oia i taua ite ra, taua maramarama ra e taua mana ra i to’na mau hoa e to’na mau taea‘e, no te mea ho‘i e tei mua roa oia ia ratou, e na roto i te raveraa i te reira, e ite ïa oia e rahi atu â ïa to’na feruriraa, e te maramarama e te ite tei noaa ia’na e e rahi ‘oi‘oi atu â ïa…

Mai te mea e hinaaro outou e ia noaa ia outou te hoaraa e te aroha o to outou mau hoa a haere e a tamahanahana ma taua maramarama ra ta outou i farii, ma te haamana‘o e no ô mai taua mau haamaitairaa ra i te Atua, e na roto i te raveraa i te reira te rave ra ïa outou i te mea e ti‘a i te taata atoa ia rave…

Teie nei mai te mea e hinaaro te hoê taata ia noaa ia’na iho te mau haamaitairaa teitei roa a‘e e te rahi roa a‘e, e ia noaa ia’na te faati‘araa a te Mana Hope, e ia nehenehe ia’na ia tamau noa i te haamaitai ia’na i roto i te mau mea no te parau-ti‘a e ti‘a ïa ia’na ia rave i te mau mea atoa mai tei maraa ia’na. Ia haere oia e rave i te ohipa e ia ineine i te faatusia no te maitai o to’na mau hoa. Mai te mea e hinaaro oia i te haamaitai ia’na, te parau tumu maitai roa a‘e e nehenehe ia’na ia rave o te haamaitairaa ïa i to’na mau hoa…

Ia faarahihia to outou mau feruriraa no te taa e no te haapa‘o i te maitai o to outou mau hoa e haati ra ia outou, e i te vahi e mana to outou no te farii i te mau maitai no to outou mau hoa a na reira, e ia na reira outou e ite ïa outou e tae ‘oi‘oi mai taua mau mea ra ta outou e hinaaro ra hau atu i te vitiviti ahani e te haa ra outou no te titau i te reira no outou iho ma te tau‘a ore i te mau maitai o to outou mau hoa. Ua ite au e e parau tumu maitai e te faufaa rahi teie.⁸ [A hi‘o i te mana‘o tauturu 4 i te api 296.]

E ti‘a ia tatou ia ite e… te vai nei te tahi atu â mau taata ia tatou iho ; e ti‘a ia tatou ia hi‘o atu i roto i te aau e te mana‘o o vetahi ê, e ia riro ei mea maitai atu i to tatou huru i teie nei

… E ti‘a ia tatou ia faatusia ia tatou iho no te maitai o te mau taata ta tatou e amui atu. E ite tatou i te reira i roto i te Faaora, i roto i te taea‘e Iosepha, e e ite tatou i te reira i roto i to tatou Peresideni [Brigham Young]. Ua ineine noa o Iesu, te taea‘e Iosepha e te taea‘e Brigham i te mau taime atoa no te faatusia i ta ratou mau tao‘a atoa no te maitai o te nunaa ; na teie i horo‘a i te taea‘e Brigham te mana i te Atua e te mana i te taata, te mana‘o faatusiaraa ta’na i faaite i te mau taime atoa. Mai te reira atoa te tahi atu mau taata ; mai te au i te rahi o to ratou hinaaro i te faatusia no vetahi ê, e faarahi atoa ïa ratou i te atuaraa i roto ia ratou, e tei ni‘a ïa ia ratou te mau haamaitairaa no te mau ao mure ore, e o ratou ïa o te farii eiaha noa te mau ti‘araa no teie ao e farii atoa râ ratou i te mau haamaitairaa no te ora mure ore. Mai te au i te rahi o ta outou… faatusiaraa no te tahi atu taata, mai te reira atoa ïa outou i te haere i mua i roto i te mau mea a te Atua. Teie nei râ mai te mea te hinaaro nei outou ia tae mai te ra‘i i roto ia outou e ia tae i te ra‘i e hinaaro ïa outou ia tamau i taua e‘a ra ta te mau melahi i te ra‘i e rave ra. Mai te mea te hinaaro nei outou ia ite e nahea outou i te faarahi, e parau atu ïa vau ia outou, e mea na roto ïa i te faahaereraa i te huru atua i roto ia outou

… E nehenehe i te mau taata ia oaoa i te ra‘i na piha‘iho ia ratou i te mau vahi atoa. E ti‘a ia tatou ia haere e rave puai i te ohipa ; e ti‘a ïa ia tatou ia haere e haamau i te ra‘i i ni‘a i te fenua nei noa’tu te mau ino e haati nei ia tatou, te mau diabolo e haati nei ia tatou, e noa’tu te ino e vai nei, e ti‘a ia tatou ia haere e rave i te ohipa e ia haamau i te ra‘i i ni‘a i teie fenua.

E ore roa e nehenehe i te hoê taata ia oaoa i te ra‘i e tae noa’tu i te taime e haapii ai oia nahea ia noaa te reira, e nahea ia faaohipa i te mau ture. Teie nei e feruri outou i te tahi mau taata e e hi‘o outou i te mau huru oraraa tei haati ia ratou e 20 matahiti i ma‘iri a‘enei… i te taime ua fana‘o ratou i te tahi oaoa, te tahi hau, te tahi poupou i taua taime ra e e mea fifi roa te mau mea atoa. Teie nei ua noaa paha ia ratou te oraraa maitai e te moni no te faati‘a i to ratou mau hinaaro pae tino, mai te mea râ aita i noaa ia ratou te mau hoa, te mau mana‘o maitai o to ratou mau taea‘e, eita ïa ratou e oaoa, hau roa’tu to ratou oaoa ore e 20 matahiti i ma‘iri a‘enei

… Ia haamaitai mai te Fatu ia outou te mau taea‘e e te mau tuahine, e ia feruri outou i teie mau mea e ia here tatou te tahi i te tahi, e ia ora ia nehenehe ia tatou ia faateitei-hau-atu-hia a horo‘a ai te Fatu ia outou i te paari e te aravihi e ia noaa te ti‘aturiraa i te tahi e te tahi.¹⁹ [A hi‘o i te mana‘o tauturu 5 i te api 296.]