« A haere mai i roto i te mau Hiero »

E mea faahiahia e te hanahana te mau rave‘a ta te Atua i hohora mai i mua ia tatou ; eita e nehenehe i te mana‘o taata ia opua i te reira. A haere mai i roto i te mau Hiero e e faaite atu ïa matou ia outou. Te mana‘o nei au e e rave rahi o outou tei haere atu i reira, e tei faaroo i te mau mea faahiahia ta te Atua i faaineine no te feia tei here Ia’na e o te tamau i te haapa‘o maitai e tae noa’tu i te hopea…

Ua faaineine oia i te mau mea atoa no te Feia Mo‘a i te mau Mahana Hopea nei ia nehenehe ia ratou ia hinaaro aore râ ia mana‘o no te faatupu i to ratou oaoa hope i roto i te mau tau mure ore aano.⁷ [A hi‘o i te mana‘o tauturu 2 i te api 161.]

A feruri i te mau fafauraa tei fafauhia’tu ia outou i roto i te oro‘a nehenehe e te hanahana tei faaohipahia i roto i te fafauraa no te faaipoiporaa i roto i te Hiero. Ia apitihia e piti Feia Mo‘a i roto i te faaipoiporaa, e fafauhia te mau fafauraa ia raua no ni‘a i to raua huaai o te haere mai tera tau mure ore i tera tau mure ore.⁸

Ua farii tatou e rave rahi paari e te ite no ni‘a i te mau mea e haamaere nei i to te ao nei, ia paraparau ana‘e tatou no ni‘a i te reira mau mea. Ua haapii mai tatou e, i roto i te mau hiero, e nehenehe ia tatou ia faatupu i te mau taamu o te ore e mou i te poheraa, o te tae roa’tu râ i roto i te tau mure ore ; te mau taamu mo‘a o te taati i te mau utuafare no te tau e a muri noa’tu.⁹ [A hi‘o i te mana‘o tauturu 3 i te api 162.]

E farii ïa te mau tamaroa e te mau tamahine atoa a te Atua i te rave‘a e titauhia no te faateiteiraa e te hanahana … Te vai nei hoê ana‘e rave‘a e nehenehe ai e noaa te faateiteiraa e te hanahana. E ti‘a ia tatou ia bapetizohia no te matararaa hara e ia tuuhia te rima i ni‘a iho ia tatou no te fariiraa i te Varua Maitai. E mea titau-roa-hia teie e te tahi atu mau oro‘a no te faateiteiraa e te hanahana ; e i te mau vahi i reira te mau taata e ora ai e aita te Evanelia i tae atu, e nehenehe i teie mau mea ia ravehia e to ratou mau hoa. Ua haere mai tatou i roto i te ao nei i teie nei no te rave i teie mau mea—o tera ïa te hoê o te mau opuaraa tumu no to tatou haereraa mai. Eita e nehenehe ia tatou ia ore e haapuai i ni‘a i te faufaa rahi no teie ohipa.¹⁰

Aita tatou i haere mai i roto i teie ao mai tera noa. Ua haere mai tatou no te hoê opuaraa taa ê, e mea papû roa e mea na roto i te tahi mau faanahoraa i roto i te tahi ao, i reira ho‘i to tatou faaearaa hou a haere mai ai i roto i teie oraraa. Oia mau, i roto i te mau Hiero te rave nei tatou i te hoê ohipa rahi mau no to tatou mau fetii tei pohe. Ua farii tatou i tera taime e tera taime i te mau faaiteraa faufaa rahi e ua farii te Atua i teie ohipa o ta tatou e rave nei i roto i to tatou mau Hiero. Ua itehia te mau faaiteraa hau atu i te maere e te mau taata o te haa nei no to ratou mau tupuna. E ohipa rahi mau teie ta tatou e rave nei. E rave rahi tauasini taata tei bapetizohia no to ratou feia tei pohe i roto i te tereraa i mua o ta tatou mau ohipa i roto i te mau Hiero…

I teie nei, te faati‘a nei tatou i roto i ta tatou mau Hiero i te mau taata ia tomo mai, i muri a‘e i to ratou imiraa i to ratou mau tupuna, noa’tu eaha te roaraa i muri, e ia bapetizohia no to ratou metua tane, papa ruau, e tupuna tei pohe e haere noa’tu â mai tei nehenehe ia ratou i te imi i to ratou reni. I muri iho te faati‘a nei tatou ia ratou ia taatihia te mau vahine faaipoipo i ta ratou mau tane faaipoipo, mai te au i te reni tupuna, mai tei nehenehe ia ratou i te imi i to ratou reni. A rave na i te hi‘oraa o te hoê taure‘are‘a viivii ore tei ora hou te Evanelia i faaitehia‘i i te mau tamarii a te taata nei … Ua faaipoipo oia i te hoê vahine, e ua faati‘a i te hoê utuafare ; aita râ oia i farii noa a‘e i te haamaitairaa no te farii i te Evanelia mai ia outou e o vau nei. Ua haapii râ oia i to’na utuafare i te mau ture morare, e e taata here e te hamani maitai oia i ta’na vahine faaipoipo e ta’na mau tamarii. Eaha atu â ïa ta’na e nehenehe e rave ? Eita e ti‘a ia’na ia faahapahia no te mea aita oia i farii i te Evanelia ; no te mea aita e Evanelia no te farii. Eita e ti‘a ia’na ia ere i ta’na vahine faaipoipo no te mea i to’na faaipoiporaa ia’na aita i nehenehe ia’na ia haere atu i te hoê Hiero e ia taatihia ta’na vahine ia’na no te tau e a muri noa’tu. Ua rave oia mai te au i te ite maitai roa a‘e ta’na i farii, e ua faaipoipohia ta’na vahine ia’na no te tau, mai te au i te peu tumu o te fenua. E faatura tatou i taua faaipoiporaa ra, tei faahanahanahia mai te au i te mau ture no to’na ra fenua … E taati tatou i te mau tamarii i to ratou mau metua e te mau vahine faaipoipo i ta ratou mau tane, e na reira noa’tu â i ni‘a i te reni.¹¹

Ua parau te Faaora i te hoê taime, « Amene, amene, e parau atu vau ia outou, ua fatata e teie nei â te hora e faaroo ai tei pohe i te reo o te Tamaiti a te Atua »; e ua parau faahou â Oia i teie parau faahiahia : « e te faaroo ra, e ora ïa ». Ioane 5:25.] Te ti‘aturi nei au e e mea iti roa o tei ore i farii i te parau mau. E faaroo ratou i te reo o te Tamaiti a te Atua ; e e faaroo ratou i te reo o te Autahu‘araa a te Tamaiti a te Atua, e e farii ratou i te parau mau e e ora ratou. E farii teie mau taea‘e e mau tuahine o te rave itoito nei i te ohipa i roto i te mau hiero i te hanahana no te riroraa ei mau faaora no to ratou mau fetii e mau hoa o ta ratou ho‘i i rave te mau oro‘a.¹² [A hi‘o i te mana‘o tauturu 4 i te api 162.]

I teie nei, e ti‘a te reira ia riro ei fâ i roto i te feruriraa o te mau tane e te mau vahine atoa ia haere i roto i to tatou mau Hiero e ia rave i teie ohipa. E ohipa rahi teie e te faufaa rahi atoa. Ia haere ana‘e tatou i roto i te tahi oraraa e ia ite i to tatou mau hoa tei pohe e ora ra i reira, mai te mea aita tatou i rave i te ohipa e titauhia no to ratou faateiteiraa e hanahana eita ïa tatou e oaoa maitai e e ere ïa te reira i te hoê farereiraa maitai roa.

Eiaha tatou e ti‘a’i noa i te taime au e te tano ; e ti‘a râ ia tatou ia tutava noa’tu e titauhia ia tatou te hoê faatusiaraa ha‘iha‘i roa i roto i te hoê ti‘araa no te rave i teie ohipa … Te hinaaro onoono nei matou e ia ore te mau taea‘e e te mau tuahine ia haapa‘o ore i teie ohipa faufaa rahi. Ua ite anei outou eaha te ohipa tumu i roto i na tauasini matahiti faafaaearaa [te Mileniuma] ? O tera ïa te mea ta matou e tamata nei i te ti‘aoro i te Feia Mo‘a i te mau Mahana Hopea nei ia rave i teie taime. E patuhia ïa te mau hiero i te mau vahi atoa i ni‘a i teie fenua, e e haere atu ïa te mau taea‘e e te mau tuahine i roto e peneia‘e e rave i te ohipa i te ao e te pô no te haavitiviti i te ohipa e no te rave i te mau ohipa e titauhia hou e nehenehe ai i te Tamaiti a te Taata ia pûpû atu i To’na basileia i To’na ra Metua. E ti‘a i teie ohipa ia ravehia hou e nehenehe ai i te Tamaiti a te Taata ia haere mai e ia farii i To’na basileia no te pûpû atu i To’na ra Metua.¹³ [A hi‘o i te mana‘o tauturu 5 i te api 162.]

E ite tatou e ia haere ana‘e tatou i roto i teie mau hiero e oaoa tatou i te Varua o te Fatu hau atu i roto i te tahi ê atu vahi. E mau fare teie no te Fatu, e te ravehia nei i roto i to ratou mau patu Ta’na ohipa tei hau atu i te faufaa…

Te mauruuru nei au e ia haere te mau taata i roto i teie mau hiero, eita ratou, e [haere atu i rapae au] ma te ore e ite e e mea maitai a‘e ratou e ma te hoê faaotiraa i roto i to ratou mau feruriraa ia rave maitai a‘e i te ohipa ta ratou i rave. Teie te ite ta matou e hinaaro ia noaa i te Feia Mo‘a…

A haapa‘o maitai noa, te mau taea‘e e te mau tuahine, e a tape‘a noa e tae noa’atu i te hopea ; a haere mai i te hiero e a rave i ta outou ohipa i reira, e e oaoa ïa outou ia outou iho, e e faaineine-maitai-a‘e-hia outou no te pato‘i atu i te mau mea au ore o te ao nei.¹⁴

O ratou o te [tomo atu] i roto i te Hiero ma te aau mâ e te varua tatarahapa eita ïa ratou e haere mai i rapae au i te hiero ma te ore e farii i te mau haamaitairaa taa ê, noa’tu e mea taa ê rii teie mau haamaitairaa i roto i te tahi huru oraraa, e aore râ i te mau haamaitairaa ta te tahi paha e tia‘i nei … Te tia‘i nei paha te tahi o te Feia Mo‘a ia fâ mai te mau melahi utuutu… e aore râ te ti‘aturi nei ratou i te ite atu i te aro o te Atua. E ere paha i te mea maitai no outou ia farii i taua mau faaiteiteraa ra. Ua ite te Fatu eaha te mea maitai a‘e no te taata tata‘itahi, e e faaau ïa Oia i Ta’na mau horo‘araa no te faatupuraa i te maitai rahi roa a‘e i roto i te mau taata tei farii i te reira. E mea tia‘ihia râ e e farii te Feia Mo‘a tata‘itahi o tei haapa‘o maitai e o te tomo atu i roto i taua Fare ra i te hoê haamaitairaa o te horo‘a i te mauruuru rahi i roto i taua taata ra. Hou teie mau taata e tomo atu ai i roto i te Hiero e [haere atu] ai i rapae au, e tupu ïa te tahi mea i roto i to ratou aau e to ratou iteraa o te riro ei tautururaa no ratou i roto i to ratou mau oraraa a muri atu. Ei Feia Mo‘a mau i te mau Mahana Hopea nei e farii ïa ratou i te reira.¹⁵ [A hi‘o i te mana‘o tauturu 6 i te api 162.]