E aroha atu i tō ta’ata tupu
Te aumihi ’o te hō’ē huru o te Mesia. E fā mai te reira nā roto mai i te here nō vetahi ’ē ’e ’aita tōna e ’ōti’a.
I teie po’ipo’i, tē ani atu nei ia ’outou ’ia ’āmui mai iā’u nei i roto i te tahi tere i ’Āfirita. E’ita ’outou e ’ite i te mau liona, te mau pua’arehenua toretore, ’aore rā i te mau ’erefani, penei a’e rā ’ia hope te tere, e ’ite ’outou e mea nahea te tauatinira’a mero o Te ’Ēkālesia a Iesu Mesia i te Feiā Mo’a i te mau Mahana Hope’a nei i pāhono ai i te ture piti rahi a te Mesia ’ia « aroha atu i tō ta’ata tupu » (Mareko 12:31)
’A feruri na i te tahi taime, te aroā, te repo ’ute’ute o ’Āfirita. E ’ite ’outou i ni’a i te repo marō ’e te tupu ’ore ē, ’aita te ua i topa rahi mai te au e rave rahi matahiti i teienei. Te tahi mau pua’atoro ’o tā ’outou e fārerei atu i ni’a i te purūmu, e ivi ana’e ïa ’eiaha ra i te i’o ’e ’o te arata’ihia nei e te hō’ē tīa’i Karamajong tei tāpo’ihia i te ’ahu ta’oto ē, tōna tīa’a varavara, e nu’u ’ata nei i mua ma te ti’aturi e ’itehia mai te aihere ’e te pape.
’A haere ai ’outou nā ni’a i te arati’a pa’ari ’e te ’ōfafa’i, e fārerei ’outou e rave rahi pūpū tamari’i purotu ’e e uiui ’outou ia ’outou iho nō te aha ’aita rātou i te fare ha’api’ira’a. E ’ata’ata mai ’e e aroha mai te mau tamari’i, ’e e pāhono atu ’outou ma te roimata ’e te ’ata’ata. E iva ’ahuru ma piti i ni’a i te hānere o te mau tamari’i ’āpī a’e ’o tā ’outou e ’ite atu i te roara’a o teie tere, e ora nei i roto i te vevera’a o te ma’a ’e e ’ū’uru tō ’outou ’ā’au ma te hepohepo.
I mua ri’i noa atu, e ’ite ’outou i te hō’ē metua vahine e āmo ra i te hō’ē tura fāri’i pape e 19 litera, tei tu’u-maita’i-hia ma te ’aifāto i ni’a i tōna ’upo’o ’e te tahi i roto i tōna rima. E fa’ahōho’ahia ’oia hō’ē ’utuāfare i ni’a i te piti i roto i te reira tuha’a i reira te mau vahine, te mea ’āpī ’e te mea pa’ari, e ta’ahi ai hau atu e 30 minuti i roto i nā pae e piti, i te mau mahana ato’a e tae roa i te hō’ē vaira’a pape nō tō rātou ’utuāfare. E ’are māuiui rahi te fa’a’ī ia ’outou
I muri mai e piti hora ’e e tae ’outou i te hō’ē vāhi āteatea ’e te marumaru. E ’ere te vāhi fārereira’a i te hō’ē piha ’ā’ano ’aita ato’a i te hō’ē fare ’ie, i raro a’e rā i te tahi mau tumu rā’au rarahi ’o tē hōro’a mai i te hō’ē tāfare i mua i te tōahu o te mahana I te reira vāhi, e ’itehia atu ē ’aita e pape tahe, ’aita e uira, ’aita e fare haumitira’a. E hi’o hā’ati haere ’outou ’e ’ua ’ite ’outou ē e tuha’a ’outou nō te hō’ē nuna’a ’o tei here i te Atua, i reira e putapū ’oi’oi ’outou i te here o te Atua nō rātou. ’Ua ’āmui mai rātou nō te fa’ari’i i te tauturu ’e te tīa’ira’a, ’e ’ua tae mai ’outou nō te fa’a’ite i te reira.
’O teie ïa te tere o te tuahine Ardern ’e tō’u, ’āpitihia mai e te tuahine Camille Johnson, tō tātou peresideni rahi o te Sōtaiete Tauturu ’e tōna hoa fa’aipoipo ’o Doug ’e te tuahine Sharon Eubank ti’a fa’atere nō te mau ’ohipa tauturura’a i te ao nei a te ’Ēkālesia, ’a rātere ai mātou i Ouganda, hō’ē fenua e 47milioni ta’ata i roto i te tuha’a ’Āfirita Rōpu o te ’Ēkālesia. I te reira mahana, i raro a’e i te marumaru o te mau tumu rā’au, ’ua māta’ita’i mātou i te hō’ē ’ōpuara’a nō te ea ’āmuitahira’a tei ’aufau-’āmui-hia e te mau ’ohipa tauturura’a i te ao nei a te ’Ēkālesia, te UNICEF, ’e te fa’aterera’a hau nō te ea nō te hau fenua Ouganda. E mau tā’atira’a ti’aturihia, tei mā’iti-maita’i-hia nō te ha’apāpū, te moni nō te tauturura’a i te ao nei tei hōro’ahia mai e te mau melo o te ’Ēkālesia, e fa’a’ohipahia ma te pāpū.
Mai te ’ā’au māuiui i te ’itera’a i te mau tamari’i ’aita e tāmā’a maita’i nei ’e te mau tupura’a o te ma’i tūto’o, te ma’i mārāria ’e te ma’i hī tāmau, ’ua putapū mātou tāta’itahi i te hō’ē tīa’ira’a turu ’ū’ana nō te hō’ē ananahi maita’i a’e nō te feiā tā mātou i fārerei.
’Ua tae mai teie tīa’ira’a hō’ē tuha’a maoti te hāmani maita’i a te mau melo o te ’Ēkālesia ati a’e i te ao nei, ’o tē hōro’a nei i te taime ’e te moni i te tauto’ora’a tauturura’a i te ao nei a te ’Ēkālesia. ’A ’ite ai au i te feiā ma’i ’e tei māuiui i te tauturura’ahia ’e i tei fa’ati’ahia, ’ua taupe au i te upo’o ma te māuruuru rahi. I te reira taime, ’ua hāro’aro’a maita’i au i te mea tā te Ari’i nō te mau ari’i i parau, ’o tē nā ’ō ra :
« ’A haere mai ’outou, e te feiā i fa’aorahia e tā’u Metua, e pārahi i te bāsileia i ha’apa’ohia nō ’outou… :
« I poi’a na ho’i au, e ’ua hōro’a mai ’outou i te mā’a nā’u ; i po’ihā na vau e ’ua fa’ainu mai ’outou iā’u ; e ta’ata ’ē au, ’e ’ua ’ite mai ’outou iā’u » (Mataio 25:34–35).
Te pi’ira’a a tō tātou Fa’aora « ’oia ato’a tō ’outou māramarama ’ia ’ana’ana ïa i mua i te aro o te ta’ata nei, ’ia hi’o rātou i tā ’outou parau maita’i, ’e ’ia ha’amaita’i i tō ’outou Metua i te ao ra » (Mataio 5:16 ; hi’o ato’a te mau ’īrava 14–15). I roto i teie pae ātea o te fenua, ’ua fa’a’oa’oa tā ’outou mau ’ohipa maita’i i te orara’a ’e ’ua ha’amāmā i te teimaha o te hō’ē nūna’a ’o tei hina’aro mau ’e ’ua fa’ahanahanahia te Atua.
I te reira mahana ve’ave’a ’e te hu’a repo, ’ua hina’aro roa vau ’ia fa’aro’o ’outou i tā rātou pure ’āruera’a ’e te ha’amāuruuru i te Atua. Tē hina’aro nei rātou ’ia parau atu vau ia ’outou nā roto i tō rātou reo Karamajong, « Alakara ». Māuruuru.
’Ua fa’aha’amana’o teie tere tō mātou iā’u i te parabole nō te ta’ata Samaria maita’i, i roto i tōna tere ’ua arata’ihia ’oia i ni’a i te hō’ē purūmua hu’a repo, fātata ri’i mai terā tā’u i fa’a’ite atu na, te purūmu e toro atu i Ierusalema haere atu i Iericho. Tē ha’api’i nei teie aupurura’a a te ta’ata nō Samaria ia tātou i te aura’a « e aroha atu i tō tātou ta’ata tupu ».
’Ua ’ite ’oia i « Te tahi ta’ata… tei ro’ohia i te nānā ’eiā haru, tātarahia ihora tāna ’ahu e rātou, ’e ’ua taparahi iāna, haere atu ra, ma te fa’aru’e iāna, ’ua fātata i te pohe » (Luka 10:30). ’Ua « aroha atura »(Luka 10:33) te ta’ata Samaria iāna.
Te aumihi o te huru ïa o te Mesia. E fā mai te reira nā roto mai i te here nō vetahi ’ē ’e ’aita tōna e ’ōti’a. Iesu, te Fa’aora o te ao nei, ’o ’oia te tino atua o te aumihi. ’Ia taio ana’e tātou e « ’oto ihora Iesu » (Ioane 11:35, e mau ’ite tātou, mai ia Maria ’e o Mareta, i tōna aumihi, o tei ’āfa’i iāna nā mua ’ia ’ū’uru ma te vārua ’e ’ia horuhoru (hi’o Ioane 11:33). I roto i te hō’ē hi’ora’a o te Buka a Moromona nō te aumihi o te Mesia, ’ua fā mai Iesu i te nuna’a ’e ’ua parau :
« E piri’o’i ānei tō rotopū ia ’outou, e matapō ānei […] e tari’a turi ānei, e feiā ro’ohia ānei i te tahi atu mau huru ’ati ? ’A hōpoi mai ia rātou i’ō nei, ’e nā’u e fa’aora ia rātou, e aroha ho’i tō’u ia ’outou na. …
« … ’E ’ua fa’aora ’oia ia rātou ato’a rā » (3 Nephi 17:7, 9
Ta’a noa atu tā mātou tauto’ora’a, e’ita ’outou ’e o vau nei e fa’aora i te mau ta’ata ato’a, e nehenehe rā tātou tāta’itahi e riro ’ei ta’ata ’o te nehenehe e fa’ataui i te orara’a o te hō’ē ta’ata. ’O te hō’ē noa tamaiti, hō’ē tamaiti iti, ’o tei hōro’a i nā faraoa e pae ’e e piti i’a tei fa’a’amu i te pae tauatini ta’ata. E nehenehe tātou e ani i tā tātou mau hōro’a, mai tā te pipi Anederea i rave nō te mau faraoa ’e te mau i’a, « e aha ra ho’i te reira e rava’i ai i teie nei feiā rahi ? » (Ioane 6:9). Tē ha’apāpū nei au ia ’outou : E ti’a noa e hōro’a ’aore rā i te ravera’a i te mea tā ’outou e nehenehe ’e e vaiiho i muri iho i te Mesia ’ia fa’atupu i tā ’outou mau tauto’ora’a.
I ni’a i te reira tumu parau, tē ani mai nei Elder Jeffrey R. Holland ia tātou, « te ta’ata moni ’aore rā te ta’ata veve, … ’ia ‘rave mai tā tātou e nehenehe’ ’ia vai ana’e vetahi i roto i te hina’aro ». ’Ua fa’a’ite pāpū ’oia i muri iho, mai ’iā’u ē, « e tauturu mai te [Atua] ia ’outou ’e e arata’i mai ia ’outou i roto i te mau ’ohipa aroha o te ti’ara’a pipi » (« E ’ere ānei tātou pā’āto’a e mau ta’ata tao’a ’ore ra ? », Liahona, Novema 2014, 41)
I roto i teie fenua ātea, i teie mahana mo’e-’ore-hia, tē vai nei au ’e ’ua riro vau i teie mahana ’ei ’ite nō te aumihi ’oto ’e ’o te taui i te orara’a o te mau melo o te ’Ēkālesia, te ta’ata moni ’e te ta’ata veve.
Tē nā ’ō fa’ahou nei te parabole nō te ta’ata Samaria maita’i ’ua « vehi ihora [te pēpē o te ta’ata] …’e utuutu atura iāna » (Luka 10:34) Te mau tauto’ora’a nō te tauturura’a nā te ao nei a te ’Ēkālesia, e fa’ati’a ia tātou ’ia pāhono ’oi’oi atu i te mau ’ati nātura ’e i te vehi atu i te mau pēpē rarahi o te ma’i, te po’ia, te pohera’a te tamari’i, te rāva’i ’ore te mā’a, te tāuiuira’a te orara’a, ’e te mau pēpē pinepine i te ’ite-’ore-hia o te tarapape, te māuruuru ’ore ’e o te tīa’ira’a ’ore.
I muri iho, « ’ua rave a’era [te ta’ata Samaria] e piti moni veo, tu’u atura i te ta’ata fare ra, na ’ō atura iāna, e utuutu oe i teie nei ta’ata » (Luka 10:35). ’Ei ’Ēkālesia, tē ’oa’oa nei tātou i te ’āmui atu i te tahi atu mau « rauti » ’aore rā mau tā’atira’a mai te mau ’Ohipa Tauturu Tātorita, te UNICEF, ’e te Sātauro Ura/Croissant Rouge, nō te turu i roto i tā tātou tauto’ora’a tauturura’a nā te ao nei. Tē māuruuru ato’a nei mātou nō nā « moni e piti », ’aore rā e piti euros, e piti pesos, ’aore rā e piti pene, ’o tei ha’amāmā i te hopoi’a ’o tā te mau ta’ata e rave rahi e ti’a e fa’aruru. E ’ere i te mea pāpū ē, ’ua ’ite ’outou i te ta’ata e fa’ari’i ra i tō ’outou taime, te moni, ’e te tuha’a ’ahuru, ’aita rā te aumihi e tītau nei ia tātou ’ia ’ite i te reira ; e ti’a noa ia tātou ’ia here ia rātou.
Māuruuru maita’i, peresideni Nelson, i te fa’aha’amana’ora’a ia tātou ē « ia here ana’e tātou i te Atua ma tō tātou ’ā’au ato’a, e fa’afāriu ’oia i tō tātou ’ā’au i ni’a i te au maita’i o vetahi ’ē » (« Te Piti o te ture rahi » Liahona, Novema 2019, 97). Tē fa’a’ite pāpū nei ē, e ’ite tātou tāta’itahi i te ’oa’oa rahi, te hau, te ha’eha’a, ’e te here mai te peu e pāhono tātou i te pi’ira’a a te peresideni Nelson ’ia fa’afāriu i tō tātou ’ā’au i ni’a i te au maita’i o vetahi ’ē ’e i te pi’ira’a a Iosepha Semita ’ia « fa’a’amu i te feiā tei po’ia, e fa’a’ahu i te feiā taha’a noa, e ’aupuru i te vahine ivi, e tāmarō i te roimata o te ’ōtare, e tāmāhanahana i tei roto i te hepohepo, i roto ānei i teie ’Ēkālesia, aore rā i roto i te tahi ’ē atu, ’aore rā ’aita i roto hō’ē noa a’e ’ēkālesia, i te vāhi ato’a e ’itehia mai rātou e tātou » (« Editor’s Reply to a Letter from Richard Savary », Times and Seasons, 15 nō Māti 1842, 732).
Teie mau ’āva’e ato’a i ma’iri a’enei, ’ua ’itehia mai ia mātou te feiā tei po’ia ’e tei hepohepo i roto i te mau fenua pāpū marō ’e te hu’a repo ’e ’ua riro mātou ’ei ’ite nō tō rātou mau mata tāparu ’ia roa’a te tauturu Ma tā mātou iho huru, ’ua autā mātou nā roto i te vārua ’e ’ua ’āehuehu ho’i (hi’o Ioane 11:33) ’e inaha ’ua tāmarūhia teie mau nino’a mana’o i tō mātou ’itera’a te aumihi o te mau melo o tē ’Ēkālesia i roto i te ’ohipa, ’a fa’a’amuhia ai tee po’ia, ’a hōro’ahia ai nā te mau vahine ’ivi, ’e ’a tāmahanahanahia ai tei hepohepo ’e ’a tāmarohia ai tō rātou roimata.
E ti’a ia tātou e vai ara noa i te au maita’i o vetahi ’ē ’e ’ia fa’a’ite nā roto i te parau ’e te ’ohipa ē « ’ua hina’aro [tātou] e amo te tahi i tā te tahi mau hōpoi’a » (Mosia 18:8), nō « te fa’aora i te feiā ’ā’au ’oto » Te Ha’api’ira’a tumu’e te mau fafaura’a 138:42), te ha’apa’ora’a i te fa’auera’a piti rahi a te Mesia ’ia « aroha atu i tō ta’ata tupu » (Mareto 12:31). I te i’oa o Iesu Mesia, ’āmene.