’Auē te ta’ata

E au mau taea’e, e au mau tuahine, e tura nō’u te ti’ara’a i rotopū ia ’outou i teie mahana. Tē pure nei au i te Fatu ’ia ha’amaita’i mai iā’u.

’Aita tō’u mata mai i te mātāmua. ’Ua fārerei au i te taote mata, ’e ’ua parau atu vau : « E’ita tā’u e nehenehe e tai’o i ni’a i te ’āfata teata. »

’E ’ua nā ’ō mai ’oia : « ’Ua ’ite ’oe, mohimohi te mata o te ta’ata pa’ari. E’ita e taui. »

Nō reira, e fa’aitoito vau.

Tē hina’aro nei au e fa’a’ite ia ’outou i te tahi mau mea i roto i tō’u ferurira’a. Mai te huru ē, ’ua vai noa te peropheta Iosepha i roto i tō’u ferurira’a i nā ’āva’e i ma’iri. ’Ua pārahi au ’e ’ua hi’o feruri au i tāna hōpoi’a hanahana i te rirora’a ’ei peropheta nō teie tau, te tau tu’ura’a nō te ’īra’a o te mau tau.

’Ua feruri au i tō tātou māuruuru, te melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei, nō te hina’arora’a te tamāroa ra Iosepha Semita, ’ia fa’a’orehia tāna mau hara, ’e ’ua fa’aitoito i te haere i roto i te hō’ē uru rā’au piri i tōna fare i Palmyra, i New York, ’e ’ua tūturi i raro ’e ’ua pure ’e—mai tāna iho i parau—’ua pure pūai nō te taime mātāmua (hi’o Iosepha Semita—’Ā’amu 1:14).

I taua taime ra, i te tūturira’a Iosepha i roto i te Uru rā’au mo’a, mai tā tātou e parau nei, ’ua vēteahia te mau ra’i. E piti ta’ata, ’ana’ana a’e i te mahana i te avatea, tei fā mai iāna. ’Ua parau mai te hō’ē iāna i te nā-’ō-ra’a : « [E Iosepha], ’o ta’u Tamā’iti here teie. ’A Fa’aro’o iāna ! » (Iosepha Semita—’Ā’amu 1:17). Ha’amata atu ra te Fa’aho’i-fa’ahou-ra’a mai o te ’īra’a o te ’evanelia a Iesu Mesia.

Nō te mea ’ua paraparau Iesu, tō tātou Fa’aora ’e tō tātou Tāra’ehara, i te tamāroa ra Iehova, ’e ’ua ’īriti i teie tau tu’ura’a tā tātou e ora nei, tē hīmene nei tātou : « ’Auē te ta’ata i parau ia Iehova ! » (« ’Auē te ta’ata i parau ia Iehova », Te mau hīmene, N°16). Māuruuru e te Fatu nō Iosepha Semita ’e nō tōna itoito i te haereara’a i roto i terā uru rā’au i te matahiti 1820, piri i tōna fare i Palmyra, i New York.

’Ua feruri au i te mau mea fa’ahiahia ato’a tā tātou i ’ite, ’e te mau mea ato’a e vai nei nō tātou. E au mau taea’e, e au mau tuahine, tō’u ’itera’a pāpū ia ’outou i teie po’ipo’i, ’oia ho’i, ’ua rahi mau tā tātou mau ha’amaita’ira’a i te ’itera’a i te mau mea ato’a tā tātou i ’ite maoti te peropheta Iosepha Semita, te peropheta nō teie tau tu’ura’a hope’a.

E māramarama tō tātou nō te fā o te orara’a, ’e ’o vai tātou.

’Ua ’ite tātou ’o vai te Atua ; ’ua ’ite tātou ’o vai te Fa’aora, maoti Iosepha, tei haere i roto i te hō’ē uru rā’au i tōna ’āpīra’a, nō te ’imi i te fa’a’orera’a o tāna mau hara.

Iā’u nei, ’o te hō’ē teie o te mau mea hanahana roa a’e ’e te fa’ahiahia roa a’e tā te hō’ē ta’ata i roto i teie nei ao e nehenehe e ’ite—’oia ho’i, ’ua fā mai tō tātou Metua i te ao ra ’e te Fatu Iesu Mesia ia rāua i teie mau mahana hope’a nei, ’e ’ua fa’ati’ahia nō te fa’aho’i mai i te ’īra’a o te ’evanelia mure ’ore a Iesu Mesia.

Tē vai nei te Buka a Moromona nā tātou. ’Auē ïa hōro’a māere ’e te fa’ahiahia te Buka a Moromona nō te mau melo o te ’Ēkālesia. ’O te tahi fa’a’itera’a, te tahi ’ite ē, ’o Iesu te Mesia. Tē vai nei te reira maoti te ti’a mā o Iosepha nō te ti’i mai i te mau ’api, ’e ’ua fa’auruhia e tō te ra’i nō te ’īriti i te reira nā roto i te hōro’a ’e te mana o te Atua, ’e ’ua hōro’a i te buka i te ao nei.

Noa atu te ’ōhie o tā’u a’ora’a i teie po’ipo’i, e mea hōhonu rā, ’e te ’ī i te here nō te peropheta Iosepha Semita ’e nō rātou ato’a, tō’u mau taea’e ’e mau tuahine, tei pāturu iāna ’e tei ineine i te pāturu iāna i tōna ’āpīra’a.

Tē hina’aro nei au e fa’ahanahana i teie po’ipo’i i tōna metua vahine. ’Ua mana’o noa ana vau, ’auē pa’i fa’ahiahia i te ho’ira’a mai Iosepha i muri iho i terā ’ohipa i tupu i roto i te Uru rā’au mo’a, ’ua fa’ati’a atu ra i tōna metua vahine, ’e ’ua ti’aturi mai Lucy Mack Smith.

’Ua māuruuru roa vau i tōna metua tāne ’e i tōna mau taea’e ’e tōna mau tuahine ’e tōna ’utuāfare, tei pāturu iāna i roto i teie hōpoi’a rahi roa ’ino tā te Fatu i tu’u i ni’a iāna, nō te rirora’a ’ei peropheta nō te fa’aho’i fa’ahou mai i te ’īra’a o te ’evanelia mure ’ore a Iesu Mesia, i ni’a i te fenua nei.

Nō reira tō’u ’itera’a pāpū i teie po’ipo’i, ’oia ho’i, ’ua ’ite au ē, ’o Iesu Mesia te Fa’aora ’e te Tāra’ehara o teie nei ao. ’Ua ’ite ato’a vau ē, ’ua fā tō tātou Metua i te ao ra ’e te Fatu Iesu Mesia, ’e ’ua paraparau ho’i rāua ia Iosepha, ’e ’ua fa’aineine iāna ’ia riro mai ’ei peropheta.

Tē māere nei au, ’e pāpū iā’u ē, e rave rahi ato’a o ’outou, i tō tātou ha’amaita’ira’a ’ia ’ite i te mea tā tātou i ’ite nō ni’a i te fā o te orara’a, nō te aha tātou i’ō nei, ’e e aha te mea e mea maita’i tātou ’ia tāmata i te rave ’e i te fa’atupu i roto i tō tātou orara’a tāmahana. Tei roto tātou i te ’ohipa nō te tāmatara’a i te fa’aineine ia tātou iho, te hō’ē mahana i te taime hō’ē, ’ia maita’i ri’i mai, ’ia hāmani maita’i ri’i atu ā, ’ia fa’aineine ri’i atu ā ia tātou nō taua mahana ra, ’o tē tae mai iho ā, ’ia haere fa’ahou tātou i mua i te aro o tō tātou Metua i te ao ra ’e te Fatu Iesu Mesia.

Tē fātata ri’i noa atu ra terā taime nō’u. Fātata vau i te 95 matahiti. Tē parau nei tā’u mau tamari’i ē, e au ē e mea pa’ari atu ā vau i terā fāito matahiti i te tahi mau mahana, ’aita rā e fifi. Tē fa’aitoito noa nei au.

Terā rā, fātata i te 50 matahiti te maoro, te mau taea’e ’e te mau tuahine, tō’u fāna’ora’a i te hāhaere nā te ao ato’a nei nō tā’u mau fa’auera’a ’ohipa ’ei tino nō te Huimana fa’atere rahi o te ’Ēkālesia. E ha’amaita’ira’a rahi te reira. Tē mana’o nei au, ’ua haere paha vau i te mau vāhi ato’a o te ao nei. ’Ua fārerei au i te mau melo o te ’Ēkālesia nā ao ato’a nei.

’Auē ho’i tō’u here ia ’outou. E ’ohipa hanahana te reira—i te hi’ora’a i roto i tō ’outou mata, i te pārahira’a i rotopū ia ’outou, ’e i te putapūra’a i tō ’outou here nō te Fatu ’e nō te Fa’aho’i-fa’ahou-ra’a o te ’evanelia a Iesu Mesia.

’Ia hi’o mai tō tātou Metua i te ao ra ia tātou i teienei, ’e ’ia ha’amaita’i mai i te terera’a o te ’āmuira’a. ’E ’ia vai rahi roa ho’i te Vārua o te Fatu i roto i tō tātou ’ā’au, ’e ’ia rahi atu ā tō tātou here nō te ’evanelia a Iesu Mesia—tō tātou Fa’aora here, te Fatu Iesu Mesia—’a tūtava ai tātou i te tāvini iāna ’e i te ha’apa’o i tāna mau fa’auera’a, ’e ’ia riro rahi atu ā tātou mai iāna te huru i muri iho i te haerera’a mai i te ’āmuira’a rahi. Noa atu ā te vāhi tei reira ’outou i roto i te ao, ’ia ha’amaita’i mai te Atua ia ’outou. ’Ia pārahi mai te Vārua o te Fatu ia tātou nei. ’Ia putapū mai tātou i te mana o te ra’i ’a ha’amori ’āmui ai tātou i roto i teie tuha’a purera’a nō te ’āmuira’a.

Tē vaiiho nei au i tō’u ’ite ’e tō’u ’itera’a pāpū ē, ’ua ’ite au ē, ’o Iesu te Mesia. ’O ’oia tō tātou Fa’aora, tō tātou Tāra’ehara. ’O ’oia tō tātou hoa rahi. Nā roto i te i’oa mo’a o Iesu Mesia, ’āmene.