E mau taea’e ’e e mau tuahine i roto i te Mesia

E au mau hoa here, ’ua fāri’i tātou i te mau tuha’a purera’a ’āmuira’a fa’ahiahia roa i teie mahana. ’Ua fāri’i tātou pā’āto’a i te Vārua o te Fatu ’e i tōna here nā roto i te mau parau poro’i nehenehe tei vauvauhia mai e tō tātou feiā fa’atere. Tē fana’o nei au ’ia paraparau atu ia ’outou i teie pō nō te ’ōpani i teie tuha’a purera’a. Tē pure nei au ’ia vai tāmau noa mai te Vārua o te Fatu i ni’a ia tātou ’a poupou ’āmui ai tātou ’ei taea’e ’e ’ei tuahine mau i roto i te Mesia.

’Ua parau mai tō tātou peropheta here, ’o Russell M. Nelson : « Tē ti’aoro nei au i tō tātou mau melo i te mau vāhi ato’a ’ia rave i te ’opuara’a o te vaiiho-roa-ra’a i te mau haere’a ’e te mau ’ohipa hāmani-’ino-ra’a. Tē tāparu nei au ia ’outou ’ia fa’arahi i te fa’atura nō te mau tamari’i ato’a a te Atua ».¹ ’Ei ’Ēkālesia nō te ao ato’a nei e tupu tāmau nei i te rahi, ’ua riro te pe’era’a i teie anira’a a tō tātou peropheta ’ei hō’ē tītaura’a faufa’a mātāmua nō te patu i te Bāsileia o te Fa’aora i roto i te nūna’a tāta’itahi o te ao nei.

Tē ha’api’i nei te ’evanelia a Iesu Mesia ē, e mau tamāroa ’e e mau tamāhine vārua fānauhia tātou pā’āto’a nā te mau metua i te ao ra tei here mau ia tātou²e i ora na ho’i tātou ’ei ’utuāfare i mua i te Atua hou a fānauhia mai ai tātou i ni’a i teie fenua.3 Tē ha’api’i ato’a nei te ’evanelia ē, ’ua hāmanihia tātou pā’āto’a ’ia au i te hōho’a ’e i te huru o te Atua.³ Nō reira, e mea ’aifāito tātou i mua iāna,⁴ nō te mea « nāna i hāmani i te ta’ata i te mau fenua ato’a nei i te toto o te ta’ata hō’ē ».⁵ Nō reira, e nātura, e faufa’a ’āi’a, ’e e fāito pūai hanahana tō tātou pā’āto’a, nō te mea tē vai ra « hō’ē Atua o te Metua o te ta’ata ato’a ra ’e tei ni’a iho ho’i i te ta’ata ato’a, ’e tei roto ho’i ia [tātou] ato’a ».⁶

’Ei pipi nā te Mesia, tē anihia mai nei ia tātou ’ia fa’arahi i tō tātou fa’aro’o ’e tō tātou here nō tō tātou mau taea’e ’e mau tuahine vārua nā roto i te ’āmui-pāpū-ra’a i tō tātou ’ā’au i roto i te tāhō’ē ’e te here, noa atu te huru o tō tātou mau ta’a’ēra’a, nā roto ho’i i te reira e tupu ai i te rahi tō tātou ’aravihi ’ia fa’atupu i te fa’atura i te tura o te mau tamaiti ’e te mau tamāhine ato’a a te Atua.⁷

E ’ere ānei te ’ohipa mau te reira i tupu i ni’a i te nūna’a o Nephi fātata e piti tenetere te maoro, i muri noa mai i tō te Mesia utuutura’a ia rātou ?

« ’E ’oia mau roa ’aita ho’i e mau ta’ata i ’oa’oa roa atu i rotopū i te mau ta’ata i hāmanihia e te rima o te Atua.

’Aita ato’a e mau ’āti Lamana, ’e ’aita ato’a e mau pupu ta’ata ta’a ’ē ; ’ua riro rā rātou ’ei hō’ē, e mau tamari’i nā te Mesia, ’e e feiā ’āi’a i te bāsileia o te Atua.

’E e ao ho’i tō rātou ! »⁸

’Ua ha’apāpū fa’ahou te peresideni Nelson i te faufa’a ’ia ha’aparare i te tura ’e te fa’atura i tō tātou mau ta’ata tupu ’a parau ai ’oia ē : « Tē pi’i mai nei tei Hāmani ia tātou pā’āto’a ’ia fa’aru’e tātou tāta’itahi i te mau mana’o hi’o ’ino i te huru pupu tamari’i ato’a a te Atua. Tātou ato’a tē vai ra te mana’o ’ino i te tahi atu taura ta’ata, e ti’a ïa ’ia tātarahapa ! […] Tei ia tātou tāta’itahi te ’imira’a i te rāve’a i te mau vāhi ato’a tei reira tātou nō te pāruru i te tura ’e te fa’atura e au i te tamaiti ’e te tamāhine tāta’itahi a te Atua ».⁹ Te ti’ara’a mau, te tura o te ta’ata o te fa’aturara’a ïa i tō tātou mau ta’a’ēra’a.¹⁰

Nō te tā’amura’a mo’a e tāhō’ē nei ia tātou ’e te Atua ’ei tamari’i nāna, teie arata’ira’a a te peropheta tei hōro’ahia mai e te Peresideni Nelson, e mea pāpū maita’i ē, hō’ē te reira ta’ahira’a tumu nō te patu i te mau araturu o te hāro’aro’ara’a, ’eiaha rā te hāmanira’a i te mau papa’i o te mau mana’o ’ino ’e te fa’ata’a’era’a i rotopū ia tātou.¹¹ Terā rā, mai tā Paulo i fa’aara i te mau ta’ata nō Ephesia, e ti’a ia tātou ’ia fāri’i ē, nō te fa’atupura’a i teie ’opuara’a, e tītauhia te hō’ē tauto’ora’a ta’ata hō’ē ’e a te tā’ato’ara’a nō te ha’a ma te ha’eha’a, te marū ’e te fa’a’oroma’i maīte te tahi ’e te tahi.¹²

Tē vai ra hō’ē ’ā’amu nō te hō’ē ’orometua ’ati Iuda e fāna’o ra i te hitira’a mahana ’e e piti hoa. ’Ua ui atura ’oia ia rāua, « Nāhea ’ōrua e ’ite ai ē, ahea te aru’i e hope ai ’e tē ha’amata mai ra te hō’ē mahana ’āpī ? »

’Ua pāhono maira hō’ē ’o rāua, « ’Ia hi’o ana’e ’oe i te pae hiti’a o te rā ’e e nehenehe ’oe e fa’ata’a ’ē i te hō’ē māmoe i te hō’ē pua’aniho ».

’Ua pāhono maira te tahi, « ’Ia hi’o ana’e ’oe i te ’iriātai ’e ’ia fa’ata’a ’ē i te hō’ē tumu olive i te hō’ē tumu suke ».

I muri iho fāriu atura rāua i ni’a i te ’orometua ’e ui atura i te hō’ē ā uira’a. I muri a’e i te feruri-maīte-ra’a, ’ua pāhono maira ’oia, « ’Ia hi’o ana’e ’oe i te pae hiti’a o te rā ’e ’ia ’ite i te hōho’a mata o te hō’ē vahine ’aore rā te hōho’a mata o te hō’ē tāne ’e e nehenehe tā ’oe e parau ē, ’tō’u terā tuahine, tō’u terā tua’ane’ ».¹³

E au mau hoa here, e nehenehe tā’u e ha’apāpū ia ’ōrua ē, e ’ana’ana pūai a’e te māramarama o te hō’ē mahana ’āpī i roto i tō tātou orara’a ’ia hi’o ’e ’ia fa’a’ite ana’e tātou i tō tātou mau ta’ata tupu i te fa’atura ’e i te tura, ’e ’ia fa’ariro ia rātou ’ei taea’e ’e ’ei tuahine mau i roto i te Mesia.

I tōna tāvinira’a i te fenua nei, ’ua fa’ahōho’a ’oIesu i teie parau tumu « ’a hāmani maita’i ai ’e ’a haere ’oia »¹⁴ i te mau ta’ata ato’a, ma te ani manihini ia rātou ’ia haere mai iāna ra ’e ’ia rave i tōna maita’i, noa atu nō hea mai rātou, noa atu tō rarou ti’ara’a i roto i te orara’a sōtiare, ’aore rā tā rātou huru peu. ’Ua tāvini ’oia, ’ua fa’aora i te ma’i, ’e ’ua ha’apa’o tāmau noa ’oia i te mau hina’aro o te mau ta’ata ato’a, ’o rātou ihoā rā tei fa’arirohia i taua tau ra ’ei ta’ata ta’a’ē, tei fa’aha’eha’ahia ’aore rā tei tu’uhia i te hiti. ’Aita ’oia i pāto’i i te hō’ē noa a’e, ’ua fa’a’ite rā i te ’aifāitora’a ’e te here, nō te mea ’ua fa’ariro ’oia ia rātou ’ei taea’e ’e ’ei tuahine nōna, e mau tamaiti ’e e mau tamāhine nō te hō’ē ā metua.¹⁵

Hō’ē o te mau taime fa’ahiahia roa a tupu ai te reira, o te taime ïa ’a rātere ai te Fa’aora i Galilea, ma te ’opua mau e haere nā roto ia Samaria.¹⁶ ‘Ua fa’aoti a’era Iesu e pārahi i pīha’i iho i te ’āpo’o pape o Iakoba nō te fa’afa’aea. I tōna taera’a i reira, haere mai ra te hō’ē vahine Samaria nō te fa’a’ī i tāna fāri’i i te pape. I roto i tōna ’ite hope’a nā ’ō atura Iesu iāna, « Hō mai na e inu ».¹⁷

’Ua maere roa teie vahine i te mea ē, ’ua ani te hō’ē ’ati Iuda i te tauturu i te hō’ē vahine Samaria ’e ’ua fa’a’ite atura i tōna hitimahuta, i te nā ’ōra’a ē, « E aha ’oe te ’ati Iuda nā i ani mai ai iā’u, i te vahine Samaria nei, i te pape ? ’e’ita ho’i te ’ati Iuda e au maita’i atu i tō Samaria ».¹⁸

Terā rā, ma te vaiiho i te hiti i te mau peu tumu tahito o te ’āmahamaha i rotopū i te mau ta’ata Samaria ’e te mau ’ati Iuda, ’ua tāvini Iesu ma te here i teie vahine, ma te tauturu iāna ’ia ’ite ē, ’o vai mau ’Oia, ’oia ho’i, te Mesia, ’o tē parau mai i te mau mea ato’a, ’e ’o tāna e tīa’i nei i te taera’a mai.¹⁹ ’Ua tūra’i te pūai o taua tāvinira’a here ra i te vahine ’ia horo nā roto i te ’oire nō te fa’aara i te ta’ata i te ’ohipa i tupu ma te parau ē, « E ’ere anei tēra’e te Mesia ? »²⁰

E aroha rahi tō’u ia rātou tei rave-’ino-hia, tei fa’aha’eha’ahia, ’aore rā tei hāmani-’ino-hia nā te mau ta’ata mana’o pae tahi ’e ’o te feruri ’ore nō te mea, i roto i te roara’a o tō’u orara’a, ’ua ’ite au i te māuiui i fa’ari’ihia e te mau ta’ata maita’i ’ia ha’avāhia ’aore rā ’ia tiaihihia rātou nō te mea e mea ta’a ’ē tā rātou paraparau, tā rātou hi’ora’a, ’aore rā tō rātou huru orara’a. E ’ite au i te hō’ē ’oto pāpū i roto i tō’u ’ā’au nō te feiā tei vai noa te vārua i roto i te pōiri, tei ta’otiahia te hi’ora’a, ’e tei fa’a’eta’etahia nā tō rātou ti’aturira’a i te ti’ara’a ha’eha’a o te feiā tei ta’a ’ē ia rātou. Nā tā rātou huru hi’ora’a tā’ōti’ahia ia vetahi ’ē e tāpe’a nei ia rātou ’ia ’ite ē, ’o vai mau rātou ’ei tamari’i nā te Atua.

Mai tei tohuhia e te mau peropheta, tē ora nei tātou i roto i te mau mahana ’ati hou te tae pitira’a mai o te Fa’aora.²¹ Tē vai nei te ao nei i roto i te hō’ē ha’aputura’a rahi o te mau ’āmahamahara’a pūai, tura’ihia nā te mau mana’o ta’a ’ē i te pae o te ’iri ta’ata, i te pae poritita ’e i te pae fa’arava’ira’a faufa’a. Nā te reira mau ’āmahamahara’a e hōro’a mai i te huru ferurira’a ’e te huru ’ohipa a te ta’ata i ni’a i tō rātou ta’ata tupu. Nō reira, e ’ere i te ’ohipa varavara ’ia ’ite i te ta’ata ’ia fa’ariro ’ei mea ha’eha’a te huru ferurira’a, te huru ’ohipara’a ’e te huru paraparaura’a a te tahi atu mau hīro’a tumu, te tahi atu mau taura ta’ata, ma te fa’a’ohipa i te mau mana’o oti noa, te mau mana’o hape, ’e pinepine te mau mana’o fa’ao’oo’o, nā te reira ho’i e fa’atupu mai i te mau peu fa’a’ino, te tau’a ’ore, te fa’atura ’ore, ’e ’oia ato’a te mau mana’o pae tahi i ni’a ia rātou. Tei roto te a’a o te reira mau huru peu i te te’ote’o, te ’ā’au teitei, te nounou ’e te pohehae, ’o te nātura tino ïa te reira,²² ’e e mea pāto’i hope roa te reira i te huru o te Mesia. E haere’a tano ’ore te reira nō te feiā e fa’aitoito nei ’ia riro ’ei pipi mau nāna.²³ Inaha, e au mau taea’e, e au mau tuahine, ’aita e pārahira’a nō te mau mana’o ’aore rā nō te mau ’ohipa ’ino i roto i te autahira’a o te Feiā Mo’a.

’Ei tamaiti ’e ’ei tamāhine nō te fafaura’a, e nehenehe tātou e tauturu i te fa’a’orera’a i te reira huru peu nā roto i te hi’ora’a i te mau ta’a’ēra’a e vai ra i rotopū ia tātou nā roto i te mata o te Fa’aora²⁴ ’e ma te niu ia tātou i ni’a i te mau mea hō’ē ā tā te tahi ’e te tahi : tō tātou ti’ara’a hanahana ’e tō tātou aura’a fēti’i. Hau atu, e nehenehe tā tātou e tauto’o ’ia ’ite ia tātou iho ’i roto i te mau moemoeā, te mau tīa’ira’a, te mau ’otora’a, ’e te mau māuiui o tō tātou mau ta’ata tupu. E mau hoa rātere ana’e tātou pā’āto’a ’ei tamari’i nā te Atua, tei ’aifāito i roto i tō tātou huru ti’a ’ore ’e i roto i tō tātou ti’ara’a ’ia tupu i te rahi. Tē anihia nei ia tātou ’ia haere ’āmui, ma te hau, ma tō tātou ’ā’au tei ī i te here i te Atua ’e i te ta’ta ato’a—’oia ho’i, mai tā Aberahama Lincoln i parau ra, « ma te ’ino ’ore i te ta’ata ; ma te aroha i te mau ta’ata ato’a ».²⁵

’Ua feruri a’ena anei ’outou i te rāve’a e ’itehia ai te parau tumu nō te fa’atura i te turara’a o te ta’ata ’e i te ’aifāitora’a i roto i te huru ’ōhie nō te fa’anehenehe ia tātou i roto i te fare o te Fatu ? Tē haere mai nei tātou pā’āto’a i te hiero ma te tāhō’ē i roto i te hō’ē noa iho ’opuara’a, ’e ma te ’ī i te hina’aro ’ia vi’ivi’i ’ore ’e ’ia mo’a i mua i tōna aro mo’a. Ma te ’ahu ’uo’uo, e fa’ari’ihia tātou pā’āto’a e te Fatu iho ’ei tamari’i here nāna, te tāne ’e te vahine nō te Atua ’ei hua’ai nō te Mesia.²⁶ Te fāna’o nei tātou i te rave i te hō’ē ā mau ’ōro’a, te ravera’a i te hō’ē ā mau fafaura’a, ’ia fafau ia tātou iho ’ia ora i te hō’ē orara’a teitei a’e, ’e te mo’a a’e, ’e ’ia fa’ari’i i te hō’ē ā mau parau fafau mure ’ore. Ma te tāhō’ēhia i roto i te hō’ē ’opuara’a, tē hi’o nei tātou te tahi i te tahi i te mau mata ’āpī ’e, i roto i tō tātou hō’ēra’a, tē fa’ahanahana nei tātou i tō tātou mau ta’a’ēra’a ’ei tamari’i hanaha nā te Atua.

’Aita i maoro a’enei ’ua arata’i au i te feiā ti’ara’a mana ’e i te mau ti’a nō te fa’aterera’a hau i te mahana ’ōpani ’īriti nō te hiero nō Brasilia, i Peresiria. ’Ua fa’aea vau i roto i te piha tauira’a ’ahu ’e te peresideni mono nō Peresiria ’e ’ua paraparau māua nō ni’a i te ’ahu ’uo’uo e ’o’omohia e te mau ta’ata ato’a i roto i te hiero. ’E ’ua fa’ata’a atu vau iāna ē, teie fa’a’ohipara’a nā te ao ato’a nei i te ’ahu ’uo’uo, e tāpa’o fa’a’ite ïa ē, e mea ’aifāito tātou pā’āto’a i mua i te Atua, ’e i roto i te hiero, tō tātou ti’ara’a e ’ere ïa te ti’ara’a mono peresideni nō te hō’ē fenua ’aore rā e fa’atere nō te ’Ēkālesia, e ti’ara’a mure ’ore rā ’ei tamaiti nā te hō’ē Metua here i te ao ra.

Hōho’a

Te mau hītāpere nō Iguaçú.

Tē tere nei te ’ānāvai Iguaçú nā te pae apato’a o Peretīria ’e māni’i atu ai i roto i te hō’ē pa’epa’e, riro mai ai ’ei topara’a pape tei ’itehia nā te ao ato’a nei i te i’oa ra te topara’a pape nō Iguaçú, te hō’ē o te mau poietera’a nehenehe roa a’e ’e te maere a te Atua i ni’a i te fenua nei, tei fa’arirohia ’ei hō’ē o nā mea fa’ahiahia e hitu o te ao nei. Hō’ē fāito rahi o te pape e māni’i i roto i te hō’ē noa iho ’ānāvai, ’e fa’ata’a ’ē atu ai, ma te fa’atupu e rave rahi hanere topara’a pape ’aita e fa’aaura’a. ’Ei aura’a parau, ’ua riro teie hōho’a rahi o te mau topara’a pape ’ei fa’ahōho’ara’a i te ’utuāfare o te Atua i ni’a i te fenua nei, i te mea ē, hō’ē ā tō tātou ’omuara’a, ’e hō’ē ā fa’anahora’a pae vārua, nō roto mai i tō tātou faufa’a ’āi’a hanahana ’e tō tātou aura’a fēti’i. Terā rā, tē ora nei tātou i roto i te mau ta’ere, te mau ’ōpū fēti’i ’e te mau nūna’a ta’a’ē, ’e te mau mana’o, te mau ’itera’a ’e te mau ferurira’a ta’a’ē. Noa atu rā i te reira, tē haere nei tātou i mua, ’ei tamari’i nā te Atua ’e ’ei taea’e ’e ’ei tuahine i roto i te Mesia, ma te ha’amo’e ’ore i tō tātou tā’amura’a hanahana, o tē fa’ariro nei ia tātou ’ei nūna’a hō’ē roa ’e ’ei ’āmuira’a here.²⁷

E ti’a anei ia tātou ’ia fa’a’āfaro i tō tātou ’ā’au ’e tō tātou vārua i ni’a i te ’itera’a ’e i te fa’a’itera’a ē, e mea ’aifāito tātou pā’āto’a i mua i te Atua, ’e ’ua fāri’i tātou pā’āto’a i te hō’ē ā pūai ’e te hō’ē ā faufa’a ’āi’a mure ’ore. E ti’a anei ia tātou ’ia fāna’o hau atu i te aura’a fēti’i pae vārua e vai nei i rotopū ia tātou ’e ’ia ha’afaufa’a i te mau huru ta’a ’ē ’e te mau hōro’a rau tā tātou pā’āto’a e mau nei. Mai te mea e nā reira tātou, tē fafau atu nei au ia ’outou ē, e tahe tātou mai tā tātou e hina’aro, mai te pape o te topara’a pape nō Iguazú, ma te ha’amo’e ’ore i te tā’amura’a hanahana e fa’a’ite nei ia tātou ’ei nūna’a ta’a’ē, ’ei tamari’i nā te Mesia ’e ’ei fatu ’āi’a nō te bāsileia o te Atua.²⁸

Tē fa’a’ite pāpū atu nei au ia ’outou ē, mai te mea e tāmau noa tātou i te pe’e i te reira haere’a i roto i tō tātou orara’a tāhuti nei, e ha’amata mai te hō’ē mahana ’āpī ’e te hō’ē māramarama ’āpī o tē turama i tō tātou orara’a ’e e turama ho’i i te mau rāve’a nehenehe nō te ha’afaufa’a hau atu ’e ’ia ha’amaita’i rahi hia atu ā nā te raura’a tei poietehia e te Atua i rotopū i tāna mau tamari’i.²⁹ E mea pāpū ē, e riro mai tātou ’ei mauha’a i roto i tōna rima nō te fa’atupu i te fa’atura ’e i te tura i rotopū i te tā’ato’ara’a ’o tāna mau tamaiti ’e mau tamāhine. Tē ora nei te Atua. ’O Iesu te Fa’aora o te ao. Te peresideni Nelson, e peropheta ïa a te Atua i teie mahana. Tē fa’a’ite pāpū nei au i teie mau parau mau nā roto i te i’oa mo’a o Iesu Mesia, ’āmene.