Te pārurura’a i te reo o te nūna’a o te fafaura’a i roto i te ui ’āpī

Te hō’ē o te mau taime putapū roa a’e i roto i te Buka a Moromona ’o te tere fārerei ïa o te Fa’aora tei ti’afa’ahou i te mau ta’ata i te hiero i te fenua nō Bounetifura. I muri a’e i te hō’ē mahana ha’api’ira’a, te fa’aorara’a ’e te patura’a i te fa’aro’o, ’ua huti mai Iesu i te ara-māite-ra’a o te mau ta’ata i ni’a i te u’i ’āpī : « ’Ua fa’aue atu ra ’oia ’ia hōpoihia mai tā rātou mau tamari’i ri’i ».¹ ’Ua pure ’oia nō rātou ’e ’ua ha’amaita’i ia rātou tāta’itahi. Nō te putapū rahi o te ’ohipa i tupu, ’ua ’oto te Fa’aora iho e rave rahi taime.

I muri iho, ma te a’ora’a i te naho’a rahi, ’ua nā ’ō atu ra Iesu :

« ’A hi’o na i tā ’outou mau tamari’i ri’i.

« ’E ’a hi’o atu ai rātou […] ’ua ’ite atu ra rātou i te mau ra’i i te vēteara’a, ’e ’ua ’ite atu ra rātou i te mau melahi i te poura’a mai nā te ra’i mai », i te tāvinira’a i tā rātou mau tamari’i ri’i.²

’Ua feruri pinepine au i teie ’ohipa i tupu. ’Ua ha’aputapū ti’a te reira i te ’ā’au o te mau ta’ata ato’a ! ’Ua ’ite rātou i te Fa’aora. ’Ua putapū rātou iāna. ’Ua ’ite rātou iāna. ’Ua ha’api’i ’oia ia rātou. ’Ua ha’amaita’i ’oia ia rātou. ’E ’ua here ’oia ia rātou. E ’ere i te mea māere ē, i muri a’e i teie ’ohipa mo’a, ’ua pa’ari mai teie mau tamari’i nō te tauturu i te ha’amaura’a i te hō’ē tōtaiete nō te hau, te ruperupe ’e te here o te Mesia tei vai noa e rave rahi mau u’i.³

E ’ere ānei i te mea fa’ahiahia ’āhiri e nehenehe tā tātou mau tamari’i e fāri’i i te mau ’itera’a mai teie te huru ’e ’o Iesu Mesia—te hō’ē mea o te tā’amu i tō rātou ’ā’au iāna ! Tē ani nei ’oia ia tātou, mai tāna i ani i teie mau metua i roto i te Buka a Moromona, ’ia hōpoi mai i tā tātou mau tamari’i ri’i iāna ra. E nehenehe tātou e tauturu ia rātou ’ia ’ite i tō rātou Fa’aora ’e Tāra’ehara mai tā teie mau tamari’i i rave. E nehenehe tātou e fa’a’ite ia rātou nāhea ’ia ’ite mai i te Fa’aora i roto i te mau pāpa’ira’a mo’a ’e ’ia patu i tō rātou niu i ni’a iāna.⁴

’Aita i maoro a’enei, ’ua ha’api’i mai te hō’ē hoa maita’i iā’u i te hō’ē mea ’o tā’u i ’ore nā i ha’apa’o nā mua a’enei, nō ni’a i te parabole o te ta’ata pa’ari tei patu i tōna fare i ni’a i te papa. ’Ia au i te fa’ati’ara’a a Luka, ’a patu ai te ta’ata pa’ari i te niu o tōna ra fare, ’ua « heru ’oia i raro roa ».⁵ E ’ere i te hō’ē ’ohipa ha’iha’i ’e te ’ōhie—’ua tītauhia te tauto’ora’a !

Nō te patu i tō tātou orara’a i ni’a i te papa o tō tātou Tāra’ehara, ’o Iesu Mesia, e ti’a ia tātou ’ia heru hōhonu roa. E ’īriti ’ē tātou i te mau mea ’ino ato’a ’aore rā te mau mea faufa’a ’ore ato’a i roto i tō tātou orara’a. E tāmau noa tātou i te heru e tae roa atu i te taime e ’iteahia mai ’oia e tātou. ’E e ha’api’i tātou i tā tātou mau tamari’i ’ia ru’uru’u atu ia rātou i ni’a iāna nā roto i te mau ’ōro’a ’e te mau fafaura’a mo’a, ’e ’ia tae ana’e mai te mau vero ’e te mau pape pu’e o te pāto’ira’a, mai tā rātou e nā reira mau, e iti roa ïa te ’ohipa e tupu i ni’a ia rātou « nō te papa i ni’a iho i te reira i patuhia ai [rātou] ».⁶

E’ita teie huru pūai e tupu noa mai mai tera. E’ita te reira e fa’ataehia i te u’i nō a muri a’e mai te hō’ē faufa’a pae vārua. E ti’a i te ta’ata tāta’itahi ’ia heru hōhonu nō te ’ite mai i te papa.

Tē ha’api’i nei tātou i teie ha’api’ira’a nā roto i te tahi atu ’ā’amu o te Buka a Moromona. I tō te ari’i Beniamina hōro’ara’a i tāna a’ora’a hope’a i tōna nūna’a, ’ua ha’aputuputu mai rātou ’ei ’utuāfare nō te fa’aro’o i tāna mau parau.⁷ ’Ua fa’a’ite te ari’i Beniamina i te hō’ē ’itera’a pāpū pūai nō ni’a ia Iesu Mesia, ’e ’ua putapū roa te mau ta’ata i tōna ’itera’a pāpū. ’Ua parau rātou :

« ’Ua fa’atupu te Vārua i te hō’ē tauira’a rahi i roto ia mātou, ’oia ho’i i roto i tō mātou ’ā’au…

« ’E ’ua hina’aro mātou ’ia fafau i te hō’ē fafaura’a i te Atua nō te ha’apa’o i tōna hina’aro […] i te toe’a o tō mātou pu’e mahana ».⁸

E nehenehe e tīa’i ē, te mau tamari’i o te mau metua tei fa’afāriu-hōhonu-roa-hia e fa’afāriuhia mai i te hope’a ’e e rave i tā rātou iho mau fafaura’a. ’E nō reira, nō te tumu ’aita i fa’ahitihia i roto i te pu’e parau, ’aita te fa’aaura’a i ravehia e te mau metua i manuïa i ni’a i te tahi o tā rātou mau tamari’i. E rave rahi matahiti i muri mai, « e rave rahi mau u’i ’āpī ’o tei ’ore i māramarama i te mau parau a te ari’i Beniamina, nō te mea e mau tamari’i ri’i rātou i te tau i parau mai ai ’oia i tōna ra mau ta’ata ; ’e ’aita rātou i ti’aturi i te peu tumu a tō rātou mau metua.

« Aita rātou i ti’aturi i tei parauhia nō ni’a i te ti’afa’ahoura’a mai te pohe mai, ’e ’aita ho’i rātou i ti’aturi i te parau nō te taera’a mai o te Mesia…

« ’E ’aita rātou i hina’aro ’ia bāpetizohia ; ’e ’aita ho’i rātou i ’āmui mai i te ’ēkālesia. ’E e feiā fa’ata’a-’ē-hia rātou i tō rātou fa’aro’o ».⁹

’Auē ïa mana’o e ti’a ’ia feruri-maita’i-hia ! Nō te u’i ’āpī, ’aita e nava’i nō te fa’aro’o ia Iesu Mesia ’ia riro ’ei « peu tumu nā tō rātou mau metua ». E ti’a ia rātou ’ia roa’a te fa’aro’o i te Mesia nō rātou iho. ’Ei nūna’a nō te fafaura’a a te Atua, nāhea e ti’a ai ia tātou i te pupuhi atu i roto i te ’ā’au o tā tātou mau tamari’i i te hina’aro ’ia rave ’e ’ia ha’apa’o i te mau fafaura’a ’e ’ōna ?

E nehenehe tātou e ha’amata nā roto i te pe’era’a i te hi’ora’a o Nephi : « Tē paraparau nei tātou nō ni’a i te Mesia, tē ’oa’oa nei tātou nō te Mesia, tē a’o nei tātou nō ni’a i te Mesia, tē tohu nei tātou nō ni’a i te Mesia, ’e tē pāpa’i nei ho’i tātou ’ia au i tā tātou mau tohura’a, ’ia ’ite tā tātou mau tamari’i ’o vai tā rātou e hi’o atu nō te ha’amatarara’a i tā rātou ra mau hara ».¹⁰ E tītau te mau parau a Nephi i te hō’ē tūtavara’a tāmau ’e te tu’utu’u ’ore nō te ha’api’i i tā tātou mau tamari’i nō ni’a i te Mesia. E nehenehe tātou e ha’apāpū ē, e’ita te reo o te nūna’a o te fafaura’a e vai māmū noa i te tari’a o te u’i ’āpī ’e e ’ere o Iesu i te hō’e tumu parau i fa’ata’a-noa-hia nō te sābati.¹¹

E ’itehia te reo o te nūna’a o te fafaura’a i roto i tā tātou iho mau parau nō te ’itera’a pāpū. E ’itehia te reira i roto i te mau parau a te mau peropheta ora. ’E ’ua fa’ahereherehia te reira ma te pūai i roto i te mau pāpa’ira’a mo’a. I reira tā tātou mau tamari’i e ’ite ai ia Iesu ’e e ’ite ai i te mau pāhonora’a i tā rātou mau uira’a. I reira rātou e ha’api’i mai ai nō rātou iho i te ha’api’ira’a tumu a te Mesia. I reira rātou e ’ite mai ai i te tīa’ira’a. E fa’aineine te reira ia rātou nō te hō’ē orara’a nō te mā’imira’a i te parau mau ’e nō te ora i ni’a i te ’ē’a o te fafaura’a.

’Ua here au i tō tātou peropheta, te peresideni Russell M. Nelson.

« I hea tātou e nehenehe ai e haere nō te fa’aro’o iāna ?

« E nehenehe tātou e haere i roto i te mau pāpa’ira’a mo’a. Tē ha’api’i nei te reira ia tātou nō ni’a ia Iesu Mesia ’e tāna ’evanelia, te fāito teitei o tōna tāra’ehara, ’e te fa’anahora’a rahi nō te ’oa’oa ’e nō te fa’aorara’a a tō tātou Metua. E mea faufa’a rahi te utuhira’a i roto i te parau a te Atua i te mau mahana ato’a nō te oraora pae vārua, i roto iho ā rā i teie mau mahana ’ārepurepu rahi. ’A ’oa’oa ai tātou i te mau parau a te Mesia i te mau mahana ato’a, e parau mai te mau parau a te Mesia ia tātou nāhea ’ia pāhono i te mau fifi ’aita roa atu tātou i feruri e fa’aruru tātou. »¹²

Nō reira, mai te aha ïa te huru ’ia fa’a’āmua i te mau parau a te Mesia ’e ia fa’aro’o iāna ? ’Oia ïa, e au te reira i te mea e tano maita’i a’e nō ’outou ! Mai te hō’ē ’āmuira’a ’e tō ’outou ’utuāfare nō te paraparau i te mau mea tā te Vārua Maita’i i ha’api’i ia ’outou i roto i tā ’outou tuatāpapara’a i te pāpa’ira’a mo’a, ma te fa’a’ohipa i te Mai, pe’e mai. Mai te ’āmuira’a atu ’e tā ’outou mau tamari’i i te mau mahana ato’a nō te tai’o i te tahi mau ’īrava o te mau pāpa’ira’a mo’a, ’e i muri iho i te ’imira’a i te mau rāve’a nō te ’āparau i te mea tā ’outou i ha’api’i mai, ’a rave ai ’outou i te taime nō te pārahi-’āmui-ra’a. ’A ’ite noa mai i te mea e tano maita’i nō ’outou ’e tō ’outou ’utuāfare ; ’e i muri iho ’a tāmata i te rave maita’i a’e i te mau mahana ato’a.

’A feruri i teie mana’o nō roto mai i Ha’api’ira’a mai tā te Fa’aora : « E au ra e mea iti roa te ’ohipa e oti i te ravehia, te hō’ē noa pō ’utuāfare, te tuha’a nō te tai’ora’a i te pāpa’ira’a mo’a, ’aore rā te ’āparaura’a i te evanelia. Terā rā, te ha’apu’era’a i te mau tauto’ora’a iti ’ōhie, tāmau i te roara’a o te tau, e mea pūai ’e e ha’apautuutu roa atu ā, ’ia fa’aauhia i te hō’ē taime māere rahi ’aore rā i te hō’ē ha’api’ira’a fa’ahiahia roa… Nō reira, ’eiaha e fa’aru’e, ’e ’eiaha e ha’ape’ape’a nō te rave i te hō’ē ’ohipa rahi i te mau taime ato’a. ’A rave tāmau noa i tā ’outou mau tauto’ora’a ».¹³

Te hō’ē o tā tātou mau hōpoi’a mo’a roa o te tauturura’a ïa i tā tātou mau tamari’i ’ia ’ite hōhonu ’e te ta’a ’ē ē ’o Iesu te Mesia, te Tamaiti a te Atua ora, tō rātou iho Fa’aora ’e Tāra’ehara, o tē ti’a nei i te upo’o o tāna ’Ēkālesia ! E’ita tātou e nehenehe e fa’ati’a i tō tātou reo nō te fafaura’a ’ia vai tari’a-turi-hia ’aore rā ’ia vai māmū noa ’ia paraparau ’oia iāna.

E mana’o paha ’outou ē e’ita e mara’a ia ’outou i te reira ti’ara’a, ’eiaha roa atu ’outou e mana’o ē ’o ’outou ana’e. ’Ei hi’ora’a, e fa’ati’ahia i te mau ’āpo’ora’a pāroita ’ia fa’anaho i te mau ’āpo’ora’a nō te mau ’orometua ha’api’i nā te mau metua. I roto i teie mau ’āpo’ora’a toru ’āva’e, e nehenehe te mau metua e putuputu nō te ha’api’i mai nā roto i te mau ’itera’a o te tahi ’e te tahi, ’ia ’āparau e mea nāhea rātou i te ha’apūaira’a i tō rātou ’utuāfare, ’e ’ia ha’api’i mai i te mau parau tumu niu o te ha’api’ira’a mai tā te Mesia. E nehenehe teie rurura’a e fa’atupuhia i te piti o te hora o te purera’a.¹⁴ E arata’ihia te reira e te hō’ē melo o te pāroita tei mā’itihia e te ’episekōpo ’e ’o te pe’e i te fa’anahora’a o te mau ’āpo’ora’a tāmau a te mau ’orometua ha’api’i, ma te fa’a’ohipa i Ha’api’ira’a mai tā te Fa’aora ’ei rāve’a tauturu mātāmua.¹⁵ E te mau ’episekōpo, mai te mea ’aita tā ’outou pāroita e fa’atupu nei i te mau ’āpo’ora’a nā te mau ’orometua ha’api’i nā te mau metua, ’a ’ohipa i pīha’i iho i tō ’outou peresideni nō te Ha’api’ira’a Sābati ’e te ’āpo’ora’a pāroita nō te fa’anaho ’outou iho.¹⁶

E tō’u mau hoa here i roto i te Mesia, tē rave maita’i a’e nei ’outou i tā ’outou e mana’o ra. ’A tāmau noa i te ha’ara’a nō te reira. Tē māta’ita’i nei, tē fa’aro’o nei, ’e te ’apo mai nei tā ’outou mau tamari’i. ’A ha’api’i ai ’outou ia rātou, e ’ite mai ’outou i tō rātou nātura mau ’ei mau tamāroa ’e mau tamāhine herehia nā te Atua. E mo’ehia paha ia rātou te Fa’aora nō te hō’ē tau, tē fafau atu nei rā vau ia ’outou, e’ita roa atu ’oia e ha’amo’e ia rātou ! Taua mau taime ra ’a paraparau ai te Vārua Maita’i ia rātou, e vai noa ïa te reira i roto i tō rātou ’ā’au ’e tō rātou ferurira’a. ’E i te hō’ē mahana, e fa’a’ite mai tā ’outou mau tamari’i i te ’itera’a pāpū o Enosa : ’Ua ’ite au ē e mea parauti’a tō’u nā metua « nō te mea ’ua ha’api’i mai rāua iā’u… i te pa’ari ’e te a’o a te Fatu—’e ’ia fa’ahanahanahia te i’oa o tō’u ra Atua nō te reira ».¹⁷

E mata na tātou i te fa’ari’i i te anira’a a te Fa’aora ’e ’ia hōpoi mai i tā tātou mau tamari’i iāna ra. ’A nā reira ai tātou, e ’ite ïa rātou iāna. E putapū ïa rātou iāna. E mātau ïa rātou iāna. E ha’api’i ïa ’oia ia rātou. E ha’amaita’i ïa ’oia ia rātou. ’E, ’ua here mau ’oia ia rātou. ’E, ’ua here vau iāna. Nā roto i tōna i’oa mo’a, ’o Iesu Mesia, ’āmene.