Mau ha’api’ira’a hanahana a te metua
E ō atu te mau metua i roto i te hō’ē ’āpitira’a ’e tō rātou Metua i te ao ra nō te fa’aho’i atu i tā rātou mau tamari’i tao’a rahi i te ra’i.
’Ua hi’i a’ena ānei ’outou i te hō’ē ’aiū i roto i tō ’outou nā rima ? E māramarama te tae mai nā roto mai i te ’aiū tāta’itahi, ma te ’āfa’i mai i te hō’ē tā’amura’a ta’a ’ē ’o te fa’a’ī mai i te māfatu o tō rātou nā metua i te ’oa’oa.1 ’Ua pāpa’i te hō’ē ta’ata pāpa’i buka Mehiko, « ’ua ha’api’i mai au ē ’ia ’umi’umi ana’e te hō’ē ’aiū i te rimarima ’o tōna metua tāne nō te taime mātāmua, e haru ’oia i te reira e a muri atu ».2
Te rirora’a ’ei metua ’o te hō’ē ïa o te mau ’ohipa fa’ahiahia roa a’e o te orara’a nei. E ō atu te mau metua i roto i te hō’ē ’āpitira’a ’e tō rātou Metua i te ao ra nō te fa’aho’i atu i tā rātou mau tamari’i tao’a rahi i te ra’i.3 I teie mahana, tē hina’aro nei au e fa’a’ite atu i te tahi mau ha’api’ira’a nō te ti’ara’a metua e ’itehia i roto i te mau pāpa’ira’a mo’a, ’e tei ha’api’ihia e te mau peropheta ora nō te tauturu ia tātou ’ia vaiiho mai i tā tātou faufa’a ’āi’a metua.
Pa’i’uma i te vāhi teitei a’e o te peu tumu o te ’Evanelia
E mea ti’a ia tātou ’ia pa’i’uma i ni’a i te vāhi teitei a’e o te peu tumu o te ’evanelia ’e tō tātou ’utuāfare. ’Ua parau te peresideni Russell M. Nelson : « Mea ti’a i te mau ’utuāfare ’ia arata’ihia mai i te ra’i. ’Aita te mau metua e nehenehe e ha’api’i tano i te mau tamari’i nā roto noa i te pa’ari tāta’itahi, te ri’ari’a, ’aore rā te auhoara’a noa ».4
Noa atu ē, e mea faufa’a roa tā tātou mau peu tumu o te fenua, tā tātou mau haere’a metua, ’e tō tātou iho mau ’itera’a rau nō te ti’ara’a metua, ’aita teie mau ’aravihi e nava’i nō te tauturu i tā tātou mau tamari’i ’ia ho’i i te ra’i. Tītauhia ia tātou ’ia roa’a mai i te « hō’ē ha’apu’e faufa’a ’e… ’ohipara’a »5 hō’ē peu tumu nō te aroha ’e te mau tīa’ira’a, i roto i te reira tātou e ha’a ai ’e tā tātou mau tamari’i ma « te hō’ē ravera’a teitei a’e ’e te mo’a a’e ».6 ’Ua fa’ata’a mai te peresideni Dallin H. Oaks te peu tumu nō te ’evanelia mai « te hō’ē huru orara’a pāpū maita’i, te hō’ē ha’apu’e faufa’a, te mau tīa’ira’a ’e te ’ohipara’a. … E tae mai teie peu tumu o te ’evanelia nā roto mai i te fa’anahora’a nō te fa’aorara’a, te mau fa’auera’a a te Atua, ’e te mau ha’api’ira’a a te mau peropheta. E arata’i te reira ia tātou i roto i te huru tātou e ’atu’atu ai i tō tātou ’utuāfare ’e te orara’a i tō tātou orara’a tāta’itahi ».7
’O Iesu Mesia te pū o teie peu tumu o te ’evanelia. E mea faufa’a roa te ravera’a mai i te peu tumu o te ’evanelia i roto i tō tātou ’utuāfare nō te ha’amau i te hō’ē vāhi repo maita’i i reira te huero o te fa’aro’o e nehenehe ai e ’auhune. Nō te pa’i’uma i te vāhi teitei a’e, tē ani mai nei te peresideni Oaks ia tātou ’ia « fa’aru’e atu i te mau peu ato’a ’aore rā i te mau ravera’a a te ta’ata iho ’aore rā a te ’utuāfare o te pāto’i nei i te mau ha’api’ira’a a te ’Ēkālesia a Iesu Mesia ».8 E te mau metua, te paruparura’a nā roto mai ia tātou ’ia ha’amau i te peu tumu nō te ’evanelia e nehenehe e fa’ati’a i te ’enemi ’ia tu’u mai i tōna ’āvae i roto i tō tātou ’utuafare ’aore rā, hau atu ā, i roto i te ’ā’au o tā tātou mau tamari’i.
’A mā’iti ai tātou ’ia fa’ariro i te peu tumu o te ’evanelia ’ei peu tumu mātamua roa i roto i tō tātou ’utuāfare, i reira, i raro a’e i te fa’aurura’a a te Vārua Maita’i,9 tā tātou mau haere’a, te mau ihotumu ’e te mau ravera’a metua i teienei e riro i te tāmāhia, te fa’a’āfarohia, te fa’anehenehehia ’e i te ha’amaita’ihia.
’A fa’ariro i te ’utuāfare ’ei pū nō te ha’api’ira’a i te ’Evanelia
’Ua ha’api’i te peresideni Russell M. Nelson ē, ’ia riro te ’utuāfare ’ei « pū nō te ha’api’ira’a i te ’evanelia ».10 Te fā nō te ha’api’ira’a i te ’evanelia ’o te « fa’ahōhonura’a ïa i tō tātou fa’afāriura’a i te Metua i te ao ra ’e ia Iesu Mesia, ’e te tauturura’a ia tātou ’ia riro rahi atu ā mai ia rāua ra te huru.11 ’A feruri i nā e toru hōpoi’a faufa’a roa a te metua tei fa’ata’ahia mai e te mau peropheta ’e mau ’āpōsetolo, ’o te nehenehe e tauturu ia tātou ’ia ha’amau i te hō’ē peu tumu teitei a’e o te ’evanelia i roto i tō tātou ’utuāfare.
’A Tahi : Ha’api’i mā te tāpe’ape’a ’ore
’Ua ha’api’i te Metua i te ao ra ia Adamu nō ni’a ia Iesu Mesia ’e tāna ha’api’ira’a tumu. ’Ua ha’api’i ’oia iāna « ’ia ha’api’i atu i teie mau mea i [tāna] mau tamari’i ma te tāpe’apea ’ore ».12 ’Oia ho’i, ’ua ha’api’i te Metua i te ao ra ia Adamu ’ia ha’api’i hua atu i teie mau mea ma te hōro’a, ’e ma te tāpe’a ’ore.13 Tē parau nei te mau pāpa’ira’a mo’a ē, « ’ua ha’amaita’i Adamu ’e Eva i te i’oa o te Atua, ’e ’ua fa’a’ite rāua i te mau mea ato’a i tā rāua mau tamari’i tamāroa ’e tā rāua mau tamari’i tamāhine ».14
E ha’api’i hua atu tātou i tā tātou mau tamari’i, ’ia rave ana’e tātou i te taime maita’i ’e ō rātou. E ha’api’i tātou ma te tāpe’a ’ore ’ia paraparau ana’e tātou nō te mau tumu parau faufa’a mai te ravera’a te taime i mua te paruai, ma te fa’a’ohipara’a i te mau mātēria e vai ra a te ’Ēkālesia.15 E ha’api’i atu tātou ma te hōro’a, ’ia tai’o ana’e tātou i te mau pāpa’ira’a mo’a ’e tā tātou mau tamari’i ma te fa’a’ohipa i te Mai pe’e mai ’e ma te vaiiho i te Vārua ’ia riro ’ei ’orometua.
A piti : Hi’ora’a o te ti’ara’a pipi
I roto i te buka a Ioane, tē tai’o nei tātou ē, ’ua uiui e rave rahi ’ati Iuda i te Fa’aora nō ni’a i tōna huru, ’ua huti mai Iesu i tō rātou ferurira’a i ni’a i tōna hōho’a, tōna Metua. ’Ua ha’api’i ’oia : « E’ita e ti’a tā te Tamaiti ’ia rave ’oia ana’e iho ra, maori rā ’o tāna i ’ite i te Metua i te ravera’a ra : Te mau mea ato’a tāna e rave ra, ’oia ato’a tā te Tamaiti e rave ».16 Te mau metua, e aha te hōho’a e tītauhia ia tātou e fa’a’ite i tā tātou mau tamari’i ? Ti’ara’a pipi.
’Ei metua, e nehenehe tātou e ha’api’i i te faufa’a nō te tu’ura’a i te Atua nā mua roa, ’ia paraparau ana’e tātou nō te fa’auera’a mātāmua, e fa’ahōho’a rā tātou i te reira ’ia tu’u ana’e tātou i te mau fa’aturorira’a a te ao nei i te hiti ’e ’ia ha’amo’a ana’e tātou i te mahana sābati i te mau hepetoma ato’a. E nehenehe tātou e ha’api’i i te faufa’a rahi o te mau fafaura’a o te hiero, ’ia parau ana’e tātou nō ni’a i te ha’api’ira’a tumu nō te fa’aipoipora’a tiretiera, e fa’ahōho’a rā tātou i te reira ’ia ha’apa’o ana’e tātou i tā tātou mau fafaura’a ’e te fa’aturara’a i tō tātou hoa fa’aipoipo ma te ti’a-mā.
Te toru : Ani ’ia ’ohipa
E ti’a ’ia riro te fa’aro’o ia Iesu Mesia ’ei ha’apūra’a nō te ’itera’a pāpū o tā tātou mau tamari’i, ’e e ti’a i teie ’itera’a pāpū ’ia tae i te tamari’i tāta’itahi nā roto i te heheura’a o te ta’ata iho.17 Nō te tauturu i tā tātou mau tamari’i ’ia patu i tō rātou ’itera’a pāpū, e fa’aitoito tātou ia rātou ’ia fa’a’ohipa i tō rātou ti’amāra’a nō te mā’iti i te mea maita’i18 ’e e fa’aineine ia rātou nō te hō’ē orara’a roa i ni’a i te ’ē’a nō te fafaura’a a te Atua.19
E mea maita’i ’ia fa’aitoito i tā tātou mau tamari’i tāta’itahi ’ia fāri’i i te anira’a a te peresideni Nelson ’ia ’imi i tō rātou iho ’itera’a pāpū nō Iesu Mesia ’e tāna ’evanelia—’ia ha’a nō te reira, ’ia ’atu’atu ’ia tupu i te rahi, ’ia fa’a’amu i te parau mau, ’e ’eiaha e ha’avi’ivi’i i te reira i te mau ha’api’ira’a ha’avare a te mau tāne ’e mau vahine ti’aturi ’ore.20
Ti’ara’a metua tano ’e te hina’aro mau
’Ua heheuhia mai te mau hina’aro hanahana o tō tātou Metua i te ao ra i roto i te hō’ē heheura’a ’ia Mose : « Inaha ho’i, ’o teie ho’i tā’u ’ohipa ’e tō’u hanahana, ’ia fa’atupu i te tāhuti ’ore ’e te ora mure ’ore o te ta’ata nei ».21 ’Ua ’āmui mai te peresideni Nelson ē : « E ’imi te Atua i te mau rāve’a ato’a, ma te tāpe’a ’ore i tō ’outou ti’amāra’a ’ia mā’iti, nō te tauturu ia ’outou ’ia fa’ari’i i te mau ha’amaita’ira’a rahi roa a’e i roto i te orara’a mure ’ore ».22
’Ei mau metua, e mau ta’ata ha’apa’o tātou nā te Atua i roto i te aupurura’a i tā tātou mau tamari’i.23 E ti’a ia tātou e ’imi i te mau rāve’a ato’a nō te ha’amau i te hō’ē vāhi i reira tā tātou mau tamari’i e nehenehe ai e ’ite i tāna fa’aurura’a hanahana.
’Aita roa atu te Metua i te ao ra i hina’aro ia tātou, te mau metua ’ia fa’aea i te hiti ’ei feiā māta’ita’i, nō te hi’o noa i te tupura’a o te orara’a pae vārua o tā tātou mau tamari’i. E fa’ahōho’a atu vau i teie mana’o nō te ti’ara’a metua e hina’aro mau ma te hō’ē ’ohipa i tupu iā’u iho. ’A haere ai au i te Paraimere i roto i te hō’ē ’āma’a nō Guatemala, ’ua ha’amata tō’u nā metua i te ha’api’i iā’u i te faufa’a nō te ha’amaita’ira’a pātereāreha. ’Ua rave tō’u metua vahine i te taime nō te fa’a’ite mai i te ’ohipa i tupu nōna i te fa’ari’ira’a i tōna ha’amaita’ira’a pātereāreha fa’ahiahia mau. ’Ua ha’api’i mai ’oia iā’u i te ha’api’ira’a tumu e tū’ati i te ha’amaita’ira’a pātereāreha, ’e ’ua fa’a’ite pāpū mai ’oia nō ni’a i te mau ha’amaita’ira’a i fafauhia. Nā ti’ara’a metua hina’aro mau i fa’auru iā’u ’ia hina’aro e fa’ari’i i tō’u ha’amaita’ira’a pātereāreha.
I te 12ra’a o tō’u matahiti, ’ua tauturu mai tō’u nā metua iā’u ’ia ’ite mai i te hō’ē pātereāreha. E mea tītauhia te reira nō te mea ’aita e pātereāreha i te tuha’a ’oire tā mātou e fa’aea ra. ’Ua tere atu vau e fārerei i te hō’ē pātereāreha e vai ra i roto i te hō’ē titi e 156 kilometera i te ātea. Tē ha’amana’o maita’i ra vau i te taime ’a tu’u ai te pātereāreha i tōna nā pu’e rima i ni’a i tō’u upo’o. ’Ua ’ite au, ma te fē’a’a ’ore, maoti te ha’apāpūra’a pae vārua pūai roa ē, ’ua ’ite maita’i tō’u Metua i te ao ra iā’u.
Nō te hō’ē tamaiti e 12 matahiti nō roto mai i te hō’ē ’oire ha’iha’i roa, ’ua riro ’ei ’ohipa rahi mau nō’u. ’Ua fāriu atu tō’u ’ā’au i tō’u Metua i te ao ra i taua mahana ra, maoti te hina’aro mau o te ti’ara’a metua o tō’u metua tāne ’e tō’u metua vahine, ’e e māuruuru rahi tō’u ia rāua e a muri noa atu.
’Ua parau Joy D. Jones, peresideni rahi tahito nō te Paraimere : « E’ita tātou e nehenehe e tīa’i ’ia tupu noa te fa’afāriura’a i ni’a i tā tātou mau tamari’i. E’ita te fa’afāriura’a ’ōpua-’ore-hia i te hō’ē parau tumu nō te ’evanelia a Iesu Mesia ».24 E nehenehe tō tātou here ’e tā tātou mau anira’a manihini fa’auruhia e fa’atupu i te hō’ē ta’a-’ē-ra’a i roto e nāhea tā tātou mau tamari’i i te fa’a’ohipara’a i tō rātou ti’amāra’a. ’Ua ha’apāpū te peresideni Nelson, « ’aore e ’ohipa ’ē atu e nā ni’a a’e i te ti’ara’a metua parauti’a ’e te hina’aro mau ! »25
’Ei ’opanira’a
E te mau metua, ’ua ’ī teie ao i te mau ha’api’ira’a, te mau peu tumu ’e mau mana’o ’o tē ’aro nei i te ferurira’a o tā tātou mau tamari’i. Tē fa’atiani nei te fare rahi ’e te ’ā’ano i tōna mau melo i te mau mahana ato’a ma te fa’a’ohipa i te mau rāve’a ha’apararera’a ’āpī. ’Ua ha’api’i te peropheta Moroni, « ’āre’a rā nā roto i te hōro’ara’a i tāna iho Tamaiti, ’ua fa’aineine te Atua i te hō’ē rāve’a maita’i a’e ».26
’Ei ’āpiti ’e te Atua nā roto i te mau fafaura’a ’e te rirora’a ’ei mau ta’ata ha’apa’o i roto i te aupurura’a i tā tātou mau tamari’i, e ha’amo’a ’oia i tō tātou hina’aro mau, e fa’auru i tā tātou mau ha’api’ira’a ’e e fa’atano i tā tātou mau anira’a manihini, e ti’a « ’ia ’ite tā tātou mau tamari’i ’o vai tā rātou e hi’o atu nō te ha’amatarara’a i tā rātou ra mau hara ».27 I te i’oa o Iesu Mesia, ’āmene.